EE Insita zimwi vyaombanga. Lekini tulangilile. Pa Malango 24:14, 15 pakalanda ukuti: “Utaezya ukutumpoka umuomvi wino walemba incito, umupina nupya wino uulilwa, cisi cimwi angaya umwina Izlaeli nanti sile umwenyi kwene wino wiza wikala mu musumba . . . Pano limwi angailizyanya kuli Yeova nga nawe ungapelwa umulandu wa kwifya.”

Kwali vimwi ivyazanyilwe pakasi ka myaka yakwe ya 700 B.C.E. na 601 B.C.E. ivikolineko na vii vino umuntu umwi walemvile pa kupapata pali vino yamufyenzile. Vyazanyilwe mupipi nu musumba wa Asyidodi. Kufwile kwali uwazwilizye siulimi wii uwafizilwe ukukwanisya ukuwezya ingano zino wali nu kupeela umusambazi wakwe ukulemba, ivyeo vii ivyakupapata ivyalemvilwe pa ciinga vyatangi: “Lino umuomvi winu wamazile ukuzombola mu manda anono apitapo, Hosyayau umwana wakwe Syoba wizile asenda ica kuzwala ca muomvi winu. . . . Yonsi yano twazombolanga nayo mu kasanya kakwe mba yangamvwangila . . . ukuti vino nkulanda ivya cumi. Nene wakaele ntakweti umulandu uli onsi. . . . Ndi cakuti umulasi wazana ukuti atakweti insambu zya kuwezezya umuomvi winu icakuzwala, munganguvwila uluse mule mumpeele sile! Mutalinzile ukusuula sile lino umuomvi wino atenzi sile ukwaula ica kuzwala.”

Aakalondelezya pa malyasi ya mpiti, Simon Schama walanzile pa kupapata kuu ukuti: “Kusilanda sile ukuti umuomvi wii walondesyanga ukuti yamuwezezye icakuzwala cakwe, lelo kukalangilila nu kuti wamanyile cimwi pa masunde ya muli Baibo, maka maka yaya alembwa muli Levi alino nu mu Malango aakalanda pali vino tulinzile ukulola apiina.”