1, 2. Uzye Yeova akaomvya uli vintu vino wapanga?

YEOVA a Leza uwaya na ukapekape. Vyonsi vino twakwata vyafuma kuli aliwe. Yeova aliwe wapanga vyonsi ivili wakwe siluva na goldi alino na vyonsi ivyaya pano nsi, nupya akaviomvya kukupekanyizizya iviumbwa vya umi vyonsi vino vikulondekwa. (Masa. 104:13-15; Hag. 2:8) Muli Baibo mwaya malyasi aingi akalanda pali vino Yeova akaomvya vintu vino wapanga ku kusungilamo antu yakwe.

² Lino aina Izlaeli yali mu lwanga pa myaka 40, Yeova wayapeelanga mana alino na manzi. (Kufu. 16:35) Icafumilemo i cakuti “yatuulilwe nanti cimwi.” (Neem. 9:20, 21) Nupya Yeova waomvizye Eliya ukucita icizungusyo ca kuvuzya tumafuta utwali tunono sile twakwe mukamfwilwa. Vino Leza wapeezile umwanaci wiya vyalenzile alipile inkongole zino wakweti nupya wakweti ni mpiya izyali nu kumwazwa na anakwe mu mikalile. (2 Yamw. 4:1-7) Pa mulandu nu kwavwa kwakwe Yeova, Yesu mu cizungusyo wapekanyizizyanga antu ivyakulya ni mpiya zya kuomvya.—Mate. 15:35-38; 17:27.

3. I vyani vino tumasambilila mu cipande cii?

³ Yeova wakwata insambu zya kuomvya ivilivyonsi vino wapanga uku kwazwilizya iviumbwa vyakwe ivya pano nsi. Lelo nanti ciye vivyo, akanena aomvi yakwe  ukuomvya ivintu vino yakwata ku kutungilila umulimo uno iuvi lyakwe likaomba. (Kufu. 36:3-7; welengini Mapinda 3:9.) U mulandu ci uno Yeova akaenekela ukuti tungamuwezezya vyuma vino watupeela? Uzye antu ya utailo aliko mpiti yatungililanga uli imilimo ino aomvi aimililangako Yeova yaombanga? Uzye iuvi likaomvya uli impiya izikasangulwa ndakai? Ivyasuko ku mauzyo yaa tumavizana mu cipande kwene cii.

4. I vyani vino tukalanga Yeova ndi cakuti tukutungilila umulimo wakwe?

⁴ Tukapeela Yeova pa mulandu wakuti twamutemwa nupya tukamutaizya. Tukatemwa sana nga twalola vino Yeova watucitila. Lino Umwene Davidi walondololanga ivyalondekwanga pa kukuula ing’anda ya kupepelamo, walanzile ukuti, vyonsi vino tukakwata vikafuma kuli Yeova nu kuti vyonsi vino tukapeela Yeova vikafuma pali vino watupeela mpiti.—Welengini 1 Milandu 29:11-14.

5. Uzye Malembelo yakalanga uli ukuti ukupeela umu kuitemelwa kwacindama sana umu kupepa kwitu?

⁵ Ukupeela, iinzila na yuze ino tukapepelamo Yeova. Umu cilolwa cino Yoane waweni, uvwile aomvi yakwe Yeova umwi yulu yakuti: “We Mwene Leza witu! Wemo wazipilwa kupelwa lulumbi, mucinzi na maka, pano wewe waumvile vintu vyonsi. Ku kulonda kwako walenzile vyonsi kuti viyeko, nupya wewe waviumvile.” (Umbw. 4:11) Uzye musikuzumila ukuti Yeova walinga ukupeelwa lulumbi nu umucinzi uno tulinzile ukumupeela ndi cakuti tukumupeela ivisuma vino twakwata? Yeova wanenyile Mose ukunena aina Izlaeli ukuti yaalinzile ukulolekela kuli Yeova maila yatatu pa nsita ya kuzevya ivimulo. Pa mulandu wakuti ivimulo viivi yaali inzila yonga ino aina Izlaeli yapepelangamo Yeova fwandi yataali nu kuya sile minwe lelo cila muntu wali nu kutwala “uwila.” (Malan. 16:16) Fwandi na ndakai kwene, ukuitemelwa ukupeela pa kulanga ukutaizya nu kutungilila umulimo uukaombwa umwi uvi lyakwe Yeova ilya pano nsi kwacindama sana umu kupepa kwitu.

6. U mulandu ci uno ukupeela kwazipila? (Lolini cikope cakutandikilako.)

⁶ Ukupeela u kusuma sana. Cacindama sana ukuya ya kapekape ukuluta sile ukulalolela ukupeelwa. (Welengini Mapinda 29:21.) Tungelenganya pa mwana akupeela avyazi yakwe uwila uno watakala mu lupiya ulunono sile luno avyazi yakwe iyamupeela. Avyazi yangataizya sana pa wila uwo! Limwi umwana umonsi nanti umukazyana painiya acili akaikala pa ng’anda angapeela avyazi yakwe impiya zimwi izya kuomvya pa ng’anda. Nanti icakuti avyazi yasikwenekela ivya musango uu, yangatola uwila uwo pano ala iyamanya ukuti ali nzila ino umwana angalangilamo ukuti akataizya pali vyonsi vino yakamucitila. Avino caya na kuli Yeova, wamanya ukuti ndi tukumupeela ukufuma pali vino twakwata ala tukucita ningo sana.

7, 8. I vyani vino antu yakwe Yeova aampiti yacitanga pa kusangula impiya zya kuomvya (a) kuli vimwi ivyalondekwanga? (b) ku kutungilila imilimo yakwe Leza?

⁷ Umulandu uno ukupeela kwazipila walondololwa ningo sana mu Malembelo. Insita zimwi, antu yakwe Yeova yasangulanga pakuti imilimo imwi iombwe. Mose wanenyile antu ukusangula impiya zya kuomvya pa kukuula itenti lya kupepelamo, wakwe na vino  Umwene Davidi wacisile pa kukuula ing’anda ya kupepelamo. (Kufu. 35:5; 1 Mila. 29:5-9) Mu manda ya Mwene Yoasyi, ya simapepo yaomvizye impiya zino antu yasangwile ku kuzifya ing’anda yakwe Yeova. (2 Yamw. 12:4, 5) Lino aina ya mu cilongano ca Ina Klistu ya kutandikilapo yuvwile ukuti kuli aakulondekwa uwazwilizyo lino kwali icipowe, ‘yuvwanyile ukusangula ivya kutuma ku kwazwa Aina Klistu yauze aku Yudeya, nga cila muntu asangula kulingana na pano akwatile.’—Mili. 11:27-30.

⁸ Pa nsita yuze napo, antu yakwe Yeova yatungilile yayo aangalilanga imilimo. Mu Masunde Yakwe Mose, aina Levi yatayapeelanga incende wakwe vino yapeelanga amitundu yuze. Fwandi, aina Izlaeli aliyo yasangulanga nanti ukupeela icikumi, pano icali nu kulenga aina Levi yaika mano ku mulimo uno yaombanga pi tenti lya kupepelapo. (Mpe. 18:21) Avino cali na kuli Yesu na alondezi yakwe, yaomvyanga ivintu vino anaci aali na ukapekape “aomvyanga icuma cao pa kutumikila Yesu na alondezi yakwe,” yayapeelanga.—Luka 8:1-3.

9. Aekwi kumwi kumwi kuno antu yakwe Yeova yafumyanga vino yasangulanga?

⁹ Imisangulo iyo yafumanga kupusane pusane. Lino aina Izlaeli yasangulanga impiya zya kuomvya pa kukuula itenti lya kupepelapo mu lwanga, yapeezile na vino iizile navyo ukufuma ku Eguputo. (Kufu. 3:21, 22; 35:22-24) Mu nsita ya Ina Klistu ya kutandikilapo, Aina Klistu yamwi yakazizye vintu vino yakweti ivili wa mpanga nanti mang’anda, nu kutwala impiya ku yatumwa. Atumwa nayo yankinye impiya zizyo kuli yano yalondekwanga uwazwilizyo. (Mili. 4:34, 35) Yauze nayo yapatulangapo impiya zimwi izyakusangwilako cila nsita ku mulimo wakwe Leza. (1 Kol. 16:2) Fwandi asi mulandu yamwi yali akankala yamwi nayo apiina yonsi kwene yasangulanga.—Luka 21:1-4.

10, 11. (a) Uzye tungakolanya uli aomvi yakwe Yeova aliko mpiti aali na ukapekape? (b) Uzye mukauvwa uli pi syuko lino mwakwata ilya kutungilila mulimo wa Wene?

¹⁰ Naswe kwene ndakai, yangatunena ukusangula impiya zya kuomvya kuli vimwi. Uzye pa cilongano cino mukalonganako yakulonda ukukuula Ing’anga ya Wene ipya? Nanti uzye yakulonda ukuizifya? Limwi tunguvwa ukuti kukulondekwa umusangulo wa kuomvya pa kuzifya iofesi lyakwe ya Nte ilyayela ku mwitu, ukuzifya pano tukalonganila ukongano, nanti sile ukwazwilizya aina atiyaponelwa nu uzanzo. Nupya tukasangula pakuti tutungilile umulimo uukaombwa pa maofesi yakalamba mu nsi yonsi alino na pa maofesi yanono. Umusangulo witu ukaomviwa nu kukusakamala ya misyonali, yapainiya aiyele, alino na angalizi ya viputulwa. Nupya icilongano cinu cakwata isyuko lya kusangwilako impiya izikalondekwa pa kukuula Vikuulwa Vya Kulonganilamo Ukongano alino na Mang’anda ya Wene, ivikaazwa aina yonsi mu nsi.

¹¹ Swensi kwene tungatungilila umulimo uno Yeova akalonda uombwe mu manda yaa akusyalikizya. Imisangulo iingi isimanyika na kuno ikafuma. Tukaika impiya mu tumbokosi utwaya mu Ng’anda ya Wene, nanti ukusangula ukuomvya jw.org. Limwi tungalola kwati utupiya utunono tuno tukasangula pasi na vino tukaomba. Nomba imisangulo iingi iikaomviwa ndakai ikafuma pa tumawila utunono asi ku mawila akulu foo. Aina itu, ukwikako na aapiina yakakolanya aina Makedoniya yano nanti icakuti “yali apina cuze” yapapasile ukuti yayazumilizye ukusangwilako nupya yasangwile ukwaula ukuilizyanya.—2 Kol. 8:1-4.

12. Uzye iuvi litu likaezya uli na maka ukuomvya ningo imisangulo iikasangulwa?

¹² Aamwi Umba Ilikatungulula yakapepa  sana pakuti yatwalilile ukuya acisinka nupya aamano lino yakutungulula iuvi mu miomvezye ya mpiya. (Mate. 24:45) Imisangulo yonsi iikasangulwa ikaomviwa ningo sana. (Luka 14:28) Mu nsita ya Ina Klistu ya kutandikilapo, aonsi aangalilanga pa mpiya izyasangulwanga yalondelanga vyonsi vino yali nu kulondela pakuti yasininkizye ukuti imisangulo ikuomviwa ukulingana na vino ilinzile ukuomviwa. Lino Ezila waswililanga ku Yelusalemu wasenzile ivintu vino umwene wa ina Pesya wamupeezile ivili wakwe, goldi, siluva alino na vyuze ivyalingine ni mpiya amadola 100 milyoni (U.S.) mu mpiya zya ndakai. Ezila walolanga imisangulo iiya yonsi ukuti i yakwe Yeova nupya wisileko sana mano ku kucingilila ivintu viivi pano yaali nu kupita mu mpanga umwali antu aatale sana. (Ezila 8:24-34) Umutumwa Paulo waposile umusangulo pakuti aazwilizye aina ya mu Yudeya alondekwanga uwazwilizyo. Wasininkizye ukuti yonsi aali nu kutwala impiya zizyo yali nu kusakamala vyonsi “asi sile pa manso yakwe Yeova, lelo na pa manso ya antu kwene.” (Welengini 2 Kolinto 8:18-21.) Fwandi ukukolana na vino Ezila na Paulo yacisile, iuvi litu ndakai likasininkizya ukuti misangulo ikuomviwa ningo ukulingana na vino ifwile ukuomviwa.

13. Uzye tulinzile ukulola uli vino iuvi likucefyako imiomvezye ya mpiya?

¹³ Amu lupwa, limwi yangapenduluka muli vino yakaomvya impiya nu kulola vino yangangupazya imikalile alino nu kucefyako imiomvyezye ya mpiya pakuti yaombesya mu mulimo wakwe Yeova. Avino caya nu kwi uvi lyakwe Yeova. Likwene sile, kwali imilimo iingi ipya iyalondekwanga ukuombwa pa muku onga, nupya impiya izyasumvilwepo zyavuzile sana kuluta pali zino zyasangwilwe. Fwandi wakwe vino lupwa luno itulandapo lungacita, iuvi likulonda ukuzana inzila zyakucefezyamo impiya izikusumbwa alino nu kwangupazya incito, pakuti misangulo ino mukusangula pa mulandu na ukapekape winu iyaomviwa ningo.

14-16. (a) Uzye imisangulo inu ikuomviwa uli? (b) Uzye mwemo imisangulo ya ina itu yamwavwa uli?

¹⁴ Antu aombela Yeova pa myaka iingi yakalanda ukuti, ndakai kwaya inzila izingi sana zino Yeova akatusambilizizyamo ukuluta vino cali mpiti. Mutale mwelenganye! Ndakai kwaya jw.org nu mulawasa wa JW Broadcasting. Baibo wa New World Translation of the Holy Scriptures nawe wasenulwa mu ndimi izingi. Mu 2014 nu mu 2015 iviwansa vya kulonganilamo ivikulu sana ivili 14  mu nsi yonsi vyaomvile uku Ukongano wa Mpanga Zingi uwa manda yatatu uwatangi, “Inkoleelo Mwalonda Uwene Wakwe Leza!” Yonsi azanyilweko yatemilwe sana pa kuzanwako.

¹⁵ Aingi yakataizya sana pa visuma vino iuvi lyakwe Yeova likacita. Atwalane yamwi aakaombela mu Asia yalemvile iyati: “Yatupeela ukuombela mu musumba unono. Fwandi insita zimwi tukazukilwa sana, nupya tukailila zuwa vino umulimo wakwe Yeova wacindama. Nomba lyonsi lino twatamba mulawasa wa JW Broadcasting, tukaiusya ukuti twalemana na ina na ya nkazi mu nsi yonsi. Aina na ya nkazi yano twazana yatemwa sana mulawasa wa JW Broadcasting. Tukauvwa kuno yakulanda yakuti, cila mwezi ndi yatamba pologalamu wii, yakauvwa ukuti iyapalama sana ku ina aya mwi Umba Ilikatungulula. Lyene ndakai yaya sana ni cilumba pa kuya mwi uvi lyakwe Leza.”

¹⁶ Amang’anda ya Wene aakulondekwa ukukuulwa nanti ukuzifiwa insi yonsi yali mupipi na 2,500. Lino a mu cilongano cimwi ku Honduras yatandike ukuomvya Ing’anda ya Wene ipya yataizye yati: “Ala twasyuka wakwe cimwi pa kuya umu lupwa lwakwe Yeova ulwa kwi yulu nu lwa pano nsi nu kuipakizya kulemana kuno twalemana na ina itu insi yonsi, nupya vikwene i vyalenzile kuti tukwate Ing’anda ya Wene yii iisuma sana umu muzi witu.” Vikwene vino tuvwa i vikalanda na ina itu ndi yapokelela Baibo ni mpapulo zyuze umu lulimi lwao, na lino yayazwa pa cisila cakuponelwa na mazanzo, nanti sile alino yalola ivisuma ivikafuma umu mulimo wa kusimikila antu ukuomvya utumasitandi nu kusimikila antu konsi kuno yali.

17. Uzye vino iuvi likaomba ivintu ndakai vikalanga uli ukuti Yeova aakatungilila umulimo wakwe?

¹⁷ Antu cikayapezya amano ndi yalola vino tukaomba ukuomvya sile imisangulo ya kuitemelwa. Umukalamba wa kampani kamwi akakapulinta mpapulo wazungwike pa milimo ino ikaombwa na aomvi aakuitemelwa kuomvya imisangulo, alino kusiya ukuomba uculuzi nanti ukulengelezya impiya izya kuomvya. Umuntu wi watiile tutanga tukwanisye ukuomba imilimo ino tukaomba. Nupya cico i cacumi! Twamanya ukuti tukakwanisya ukuomba imilimo yii pano Yeova aakatutungilila.—Yobo 42:2.

18. (a) Uzye a mapaalo ci yano tungapokelela nga tukutungilila Uwene? (b) I vyani vino tungacita pakuti twasambilizya ana itu na apya ukuya na ukapekape?

¹⁸ Yeova watucindika pa kutupeela isyuko ilya kutungilila umulimo wakwe uukulu uukuombwa ndakai. Watulaya ukuti alatulambula nga twatungilila umulimo wakwe uwa Wene. (Malaki 3:10) Yeova watulaya ukuti nga tuli na ukapekape ivintu vilatuzipila. (Welengini Mapinda 11:24, 25.) Nga tuli na ukapekape tulaya ni nsansa, pano “mukupeela mwaya upolelelo ukulu cuze kuluta mukupokelela!” (Mili. 20:35) Tungasambilizya ana itu na apya ukuya na ukapekape mu milandile itu nu mu micitile itu, kucita vivyo kungalenga yapaalwe.

19. Uzye ivyeo ivili mu cipande cii vyamukomelezya uli?

¹⁹ Vyonsi vino twakwata vyafuma kuli Yeova. Tukalanga ukuti twatemwa Yeova nupya tukataizya pali vino watucitila nga tukumupeela vino watupeela umweneco. (1 Mila. 29:17) Lino aina Izlaeli yasangulanga impiya izya kukuulila ing’anda ya kupepelamo, ‘antu yazanzile wakwe cimwi pa mulandu wakuti intunguluzi zyao zyaipeelisye kuli Yeova nu mwenzo onsi.’ (1 Mila. 29:9) Acino fwandi naswe katwazanga nu kuvwa ningo umu myenzo itu lino tukupeela Yeova vino watupeela umweneco.