1, 2. I cani icilalenga antu aingi yaye alemane mu 2018, nupya u mulandu ci? (Lolini cikope cakutandikilako.)

PA 31 Maaci 2018, lino ilanzi lyawa, antu yakwe Leza alino na aakulondesya ukusambilila icumi yalalongana pamwi ku kuzevya Icakulya ca Manguzi Ica Mwene. Lino insita ikuya ikupalama, antu amamilyoni yalakongana pamwi ku Ciusyo ca mfwa yakwe Yesu. Cila mwaka, Iciusyo cii alico cikalenga antu yakwe Leza ukuya alemane ukucila iciliconsi mu nsi.

² Tutale twelenganye vino Yeova na Yesu yakatemwa ndi yalola antu aingi cuze mu nsi yonsi yakuya mu kuzevyako ukuzevya ukuiyele ndi kuu mpaka uwanda onsi iusila. Baibo yasoowile ukuti ‘iumba likulu cuze lino kutaali nanti wenga uwange apende antu onsi, antu yaa yafumile mu nko zyonsi, mu mitundu ya antu nu mu ndimi zyonsi’ yali nu kupunda yati: “Ufyusi ukafuma kuli Leza witu, wino uwikala pa cilimba ca wene, nga nu ku Mwana wa mfwele!” (Umbw. 7:9, 10) Ala cikazipa sana ukulola vino Yeova na Yesu yakacindikwa ndi kwaya ukuzevya kwa Ciusyo!

3. A mauzyo ci yano tumaasuka mu cipande cii?

 ³ Kwaya mauzyo yamwi akayako yano tumaasuka mu cipande cii. (1) Uzye swensi cila muntu tungacita uli pakuti tupekanyizizye Iciusyo nu kuyazanwako pakuti tukaipakizye? (2) U mu nzila ci muno Iciusyo cingalenga pa yantu yakwe Leza paye umutende? (3) Uzye naswe cila muntu tungacita uli pakuti umutende mu cilongano utwalilile? (4) Uzye kulatala kuye Iciusyo cakusyalikizyako? Nga kulaya, a alilaci?

4. U mulandu ci uno icicindamila ukuti tukazanwe ku Ciusyo ndi cakuti pasi ivilapumvyanya?

⁴ Mwaelenganya pa mulandu uno ukuzanwa uku Ciusyo kwacindamila. Iusyini ukuti, ukulongana kwa pa cilongano inzila yonga iya kupepa kwitu. Ukwaula nu kutwisika Yeova na Yesu yakalola yonsi akaezya na maka kuti yakazanweko ku kulongana kucindame ndi kuu ukukayako cila mwaka. Ukulanda sile icisinka, tukalonda Yeova na Yesu yalole ukuti tulazanwa ku Ciusyo suka sile nga kuli vimwi ivikalamba sana ivilalenga tufilililwe sile ukuzanwako ivili wa kulwala nanti vyuze. Ndi cakuti muli vino tukucita twalanga ukuti ukulongana kwacindama sana mu kupepa kwitu, tukalenga Yeova akwate umulandu na uze uwa kusungila izina litu “mu lupapulo lwa ciusizyo” ali kuti “lupapulo lwa umi” ulwakwata amazina yakwe yayo aya pa mutande wa kwizakwata umi wa pe.—Malaki 3:16; Umbw. 20:15.

5. Lino Iciusyo citatala cafika, tungacita uli pa ‘kuyezya sweisikulu pakuti tuilole ndi mu cumi tukwikala mu utailo’?

⁵ Mu manda ya Ciusyo, tungapatulako insita yakupepa nu kuceceta sana ucuza witu na Yeova vino uli. (Welengini 2 Kolinto 13:5.) Tungacita uli vivyo? Tungacita vivyo ndi cakuti ‘tukuyezya sweisikulu pakuti tuilole ndi mu cumi tukwikala mu utailo.’ Pakuti tumanye ningo, tulinzile ukuyuzya sweineco ukuti: ‘Uzye nazumila ukuti naya mwi uvi lyonga sile lino Yeova akaomvya pa kufikilizya ukulonda kwakwe? Uzye vino nkacita vikalanga ukuti mu cumi nataila ukuti amanda yaa aakusyalikizya nu kuti impela ya kuteeka kwakwe Satana ili mupipi? Uzye ncili nataila muli Yeova na Yesu wakwe vino nali lino napeezile umi wane kuli Yeova?’ (Mate. 24:14; 2 Tim. 3:1; Ayeb. 3:14) Ukuzana amasuko ku mauzyo yaa kulatwazwa ukumanya vino twaya.

6. (a) Iinzila ci yonga sile iingatutungulula ku umi wa pe? (b) Uzye eluda umwi akacita uli pa kuipekanyizizya ku Ciusyo cila mwaka, nupya u mulandu ci uno namwe mulinzile ukucitila vivyo?

⁶ Mwawelenga nu kwelenganya pa vipande vya mu mpapulo zitu ivikalanda pa ucindami wa Ciusyo. (Welengini Yoane 3:16; 17:3.) Inzila sile yonga iikatutungulula uku umi wa pe ‘u kumanya’ Yeova alino nu ‘kutaila’ muli Yesu umwana wakwe. Uzye lino mukupekanyizizya Iciusyo mutange musoolole insita ya kuisambilizya ivingamwazwa ukupalama sana kuli Yeova na Yesu? Lekini tulande pali vino eluda umwi wacitanga. Pa myaka iingi, wakolonganikanga ivipande vya mu Lupungu Lwa Mulinzi ivyalandanga pa Ciusyo alino na pali vino Yeova na Yesu yakalanga ukutemwa kuli sweswe. Umu milungu ipalamile ku wanda wa Ciusyo, wawelenganga nupya mu vipande vii nu kwelenganya pa mulandu uno kuzevya kuu kwacindamila. Lino Iciusyo icapalama walondelangapo icipande conga nati viili ukwika pali vino wakwata mpiti. Eluda wii wazana ukuti ukuwelenga mu vipande vii umuku wakwe ciili alino nu kuwelenga Malembelo amu manda ya Ciusyo nu kwelenganyapo, kukalenga aasambilila ivipya cila mwaka. Ni cicindamisye i cakuti akauvwa kuti ukutemwa kuno watemwa Yeova na Yesu kukaya kukukulilako sile cila mwaka. Ukuisambilizya kwa musango  uu namwe kwene kungamwazwa ukutemwa sana Yeova na Yesu alino nu kulataizya pali vino yamucitila nupya mulaaipakizya sana ukuzanwa ku Ciusyo.

7. (a) I vyani vino Yesu wapepiilepo pa wanda uno watandikilepo ukuzevya Icakulya ca Manguzi Ica Mwene? (b) I cani icikalanga ukuti Yeova waswike ipepo lyakwe Yesu?

⁷ Pa wanda uno Yesu watandikilepo ukuzevya Icakulya ca Manguzi Ica Mwene, usiku, wapefile ukuti alondezi yakwe yaye alemane nu kuti yakolanya vino wene na Isi yaya alemane. (Welengini Yoane 17:20, 21.) Yeova waswike ningo ipepo lili ilya mwana wakwe wino watemwa sana, nupya ndakai antu mamilyoni yataila ukuti Yeova watumile umwanakwe. Pa kulongana konsi ukwayako, Iciusyo i cikalanga ukuti ya Nte Yakwe Yeova yalemana mu cumi. Antu amitundu yonsi nupya apusane inkanda yakalongana pamwi pa vifulo vya kulonganilapo umu nsi yonsi. Umu ncende zimwi, ukulongana ukwakuti antu apusane inkanda iyalongana yakupepela pamwi yakusuula sana. Nomba ukulemana kwa musango uu kwacindama sana kuli Yeova na kuli Yesu!

8. A mazwi ci yano Yeova wanenyile Ezekelo aakalanda pa kulemana?

⁸ Swe yantu yakwe Yeova tusizunguka pa kulemana kuno twalemana. Alino Yeova wasoowile pa kulemana kwa musango uu. Uvwini amazwi yano wanenyile kasema Ezekelo aalandanga pa kulemanya intuwa ziili, intuwa yonga yalangililanga “Uwene wa Ciyuda” ni ntuwa yuze nayo “Uwene wa ina Izlaeli.” (Welengini Ezekelo 37:15-17.) Icipande cakuti ““Mauzyo Yano Aakawelenga Yakauzya” icali umu Lupungu Lwa Mulinzi lwakwe Julai 2016 calondolwile ukuti: “Yeova wanenyile Ezekelo pa ulayo wakuti luko lwa Ina Izlaeli lwali nu kulemana ndi yaswilila uku Mpanga Iyalavilwe. Ilandwe lilyo lyalanzile na pali vino antu yakwe Leza yali nu kutandika ukuombela pamwi umu manda akusyalikizya.”

9. Uzye usowelo wakwe Ezekelo ukafikiliziwa uli cila mwaka pa wanda wa Ciusyo?

⁹ Ukufuma mu 1919 ukuya uku nkoleelo, Yeova walonganika ningo apakwe nu kuyazwa ukuya alemane, yano ndakai yakaimililako intuwa ‘yakwe Yuda.’ Nupya, antu aingi sana aakwata upaalilo wa kwikala pano nsi aakaimililako intuwa ya ‘ina Izlaeli’ yalemana na apakwe, maumba yonsi yoili yaya “ufyo onga.” (Yoa. 10:16; Zaka. 8:23) Yeova walavile ukuti intuwa zii ziili, wali nu kuzilemenkanya ziye sile intuwa yonga mu minwe yakwe. (Ezek. 37:19) Ndakai amaumba yonsi yoili yakaombela pamwi nupya yakwata Umwene wenga sile, Yesu Klistu, wino casoowilwe ukuti wali nu kuya ‘umuomvi wakwe Leza, Davidi.’ (Ezek. 37:24, 25) Ukulemana kuu ukucindame ukwalondololwa mwi buku lyakwe Ezekelo kukaloleka cila mwaka lino apakwe alino ni ‘mfwele zyuze’ yakalongana capamwi ku kuzevya Iciusyo ca mfwa yakwe Yesu. Nomba i vyani vino tungacita cila muntu pakuti pa yantu yakwe Leza paye umutende?

10. Tungacita uli pakuti umutende pa yantu yakwe Leza utwalilile?

¹⁰ Icakutandililapo cino tungacita pakuti pa yantu yakwe Yeova paye umutende u kuya aicefye. Lino Yesu wali pano nsi, wanenyile alondezi yakwe ukuti yaicefya. (Mate. 23:12) Ndi cakuti twaya aicefye, tutalakwata miyele ino antu ya mu nsi ii yakwata iya kuilola kwati yaluta yauze. Nomba ukuicefya kungatwazwa ukulauvwila aakututungulula, nupya icuvwila cikalenga mu cilongano muye ukulemana. Ni cicindamisye icakuti nga twaya aicefye tulazanzya Leza,  pano wene “akakanya yao aya ni cilumba, lelo waya ni cikuku kuli yao aicefya.”—1 Pet. 5:5.

11. Uzye ukwelenganya pa vinkolanya ivikaomviwa pa Ciusyo kungatwazwa uli ukulenga umutende pa yantu yakwe Leza utwalilile?

¹¹ Cakwe ciili cino tungacita u kwelenganya sana pa upiliulo wa vinkolanya ivikaomviwa pa Ciusyo. Tungelenganya pa mulandu uno mukate na waini vyacindamila lino Iciusyo citatala cayako alino na pa wanda wa Ciusyo kwene. (1 Kol. 11:23-25) Umukate ukaimililako umwili wakwe Yesu umalilike uno wapeezile, na waini nawe akaimililako uwazi uwazwile. Nomba tukalondekwa na vyuze ukucila sile pa kuvwikisya umwalola ivinkolanya vivyo. Tulinzile ukwiusya ukuti mu mpolelwa yakwe Yesu mwaya ivintu viili ivikalamba ivikalangilila ukutemwa, mwaya ukutemwa kuno Yeova walanga pa kupeela umwanakwe wa mpolelwa pa mulandu witu alino nu kutemwa kuno Yesu walangizye pa kuitemelwa ukwizapeela umi wakwe pa mulandu witu. Ukwelenganya sana pa kutemwa kuno yalanzile kulinzile kulenga ukuti naswe kwene tuyatemwe. Nupya ukutemwa kuno swensi twatemwa Yeova kukalenga twaombela pamwi nu kuya alemane sana.

12. Uzye mu cilangililo ca mwene na aazya yakwe, Yesu walanzile uli ukwaula nu kupita mu mbali ukuti Yeova akalonda ukuti twaelela anji?

¹² Cakwe citatu cino tungacita u kwelela anji. Ndi cakuti twelela aatiyatuluvyanya, tukalanga ukuti tukataizya pali vino twelelwa maifyo itu ukupitila mu mpolelwa yakwe Klistu. Elenganyini pa cilangililo cino Yesu wapeezile icalembwa pali Mateo 18:23-34. Mwayuzya mweineco ukuti: ‘Uzye nkaomvya vino Yesu wasambilizye? Uzye nkalanga ukuti nateekela nu kuti nkauvwa ku Ina Klistu yanji? Uzye naiteyanya ukwelela yonsi anganduvyanya?’ Ukuya kwene luyembu lwapusana pusana, nupya insita zimwi ndi umwi wakuluvyanya cikatala sana pakuti umwelele. Nomba icilangililo cakwe Yesu cikatusambilizya vino Yeova akaenekela kuli sweswe. (Welengini Mateo 18:35.) Yesu walanzile ukwaula nu kupita mu mbali ukuti Yeova atalatwelela ndi cakuti tusikwelela aina ngi tukwata amaka ya kucita vivyo. Tulinzile ukwelenganyapo sana pali  vino walanzile! Tukacingilila umutende mu cilongano ndi cakuti tukwelela yauze wakwe vino Yesu watusambilizye.

13. Uzye ukumanyikwa ukuti sweswe ya mutende kukalenga uli mutende ukutwalilila?

¹³ Ndi cakuti twelela yauze, ale tukulanga ukuti tukalonda ukuya amutende nantu yanji. Iusyini ukucelula kuno mutumwa Paulo watucelwile ukwakuti, ‘ezyini kuombesya na maka mu kuleka umupasi wakwe Leza umulundanye myenzo. Mwacita cii mukwikala mu mutende.’ (Efes. 4:3) Mu manda yano tulazevya Iciusyo ca mwaka uu alino na pa wanda wa Ciusyo kwene, muce mwaelenganya sana pali vino mukaomba na antu yauze. Mukayuzye mweineco ukuti: ‘Uzye yonsi amanya yamanya ukuti nsitwalilila ukusokela umuntu uwatansosya? Uzye antu yakalola ukuti nkaezya na maka ukulenga mutende utwalilile?’ Icicindama sana ukwelenganya pa mauzyo yaa.

14. Uzye tungalanga uli ukuti ‘tukaposya kuti tulange kutemwana kuli cila muntu’?

¹⁴ Icalenga 4 cino tungacita pakuti umutende utwalilile, u kukolanya Yeova Leza uwaya nu kutemwa. (1 Yoa. 4:8) Tusitala tulanda pali ya kapepa yanji ituti: “Ukuya kwene natemwa aina na ya nkazi nomba ntayatemwisya.” Ukwelenganya umu nzila iyo kwapusana sana na vino Paulo watucelwile ukuti, “mwaposya kuti mulange kutemwana kuli cila muntu.” (Efes. 4:2) Lolini ukuti Paulo atalanzile sile ukuti “mwaposya.” Lelo walanzile kuti “mwaposya kuti mulange ukutemwana.” Fwandi paya sana upusano. Mu vilongano vitu mwaya antu apusane pusane yano Yeova wapalamika kuli aliwe. (Yoa. 6:44) Vino Yeova wayapalamika kuli aliwe, afwile wayatemwa sana. Nga fwandi u mulandu ci uno tungapingwila ya kapepa yanji ukuti yatalinzile ukutemwikwa? Tutalinzile ukuta ukuya nu kutemwa kuno Yeova watunena ukuya nako!—1 Yoa. 4:20, 21.

15. Uzye twamanya uli ukuti kulaya Iciusyo cakusyalikizyako?

¹⁵ Wanda umwi kulaya Iciusyo cakusyalikizyako. Uzye twamanya uli vivyo? Muli kalata wakwe Paulo uwa kutandikilako ku aina Kolinto, walembiile Aina Klistu apakwe ukuti nga yakuzevya Iciusyo cila mwaka ‘ala yakulanda imfwa ya Mwene kufika lino aliza.’ (1 Kol. 11:26) Izwi lyakuti “aliza” likalanda pa ‘kwiza’ kuno Yesu umwineco walanzile mu usoowelo uukalanda pa mpela ya nsi. Walanzile pa ucuzi ukulu cuze uukwiza ukuti: “Pa nsita ilya, cilangililo ca Mwana wa Muntu cilaloleka mwi yulu. Na antu amu nko zyonsi mu nsi yalalosya lino yalalola Mwana wa Muntu akwiza mu makumbi na maka nu lulumbi lukulu. Izwi likulu lya ntandala liluvwika nga [Yesu] alatuma angeli yakwe kukukonganika asoololwe yakwe kufuma ku mpela yonga ya nsi kufika nu ku yuze kwene.” (Mate. 24:29-31) ‘Ukukonganika kuu ukwa yasoololwe’ kulayako lino apakwe acili pano nsi yalapeelwa icilambu cao ca kwi yulu. Ukukonganika kuko kulacitika ala ucuzi ukulu cuze watandika nomba ala Alamagedoni atatala watandika. Lyene ya 144,000 yalaombela pamwi na Yesu ukulwisya aene yonsi apano nsi. (Umbw. 17:12-14) Fwandi Iciusyo icilayako lino apakwe yatatala yapita kwi yulu i cilaya icakusyalikizyako pano ala Yesu ‘wiza.’

16. U mulandu ci uno mukulondesya ukuti mukazanweko uku Ciusyo ca uno mwaka?

¹⁶ Fwandi lekini tukezye na maka ukuzanwa ku Ciusyo pa 31 Maaci 2018 pakuti tukaipakizye. Nupya lekini lyonsi twalenga Yeova ukuti atwazwa pakuti tuleke umutende utwalilile pa yantu yakwe. (Welengini Masamu 133:1.) Mwaiusya ukuti wanda umwi tulazevya Iciusyo ca kusyalikizyako. Pali ino nsita lekini twaezya na maka ukuzanwa uku Ciusyo cila mwaka, nupya twataizya na pa mutende uukayako lino tukuzevya.