SYLVIANA painiya ali ni myaka pakasi kakwe 23 na 26, walanzile ati: “Lino nuvwile ivisuma vino anji yaipakizye lino yaile mukuombela ukwalondekwanga sana ya painiya, natandike ukulondesya ukuipakizya nani kwene. Nomba natiinanga ukuti ntange nkwanisye ukuya mu kuombela kuno ya kasimikila yacepa.”

Uzye namwe mukauvwa wakwe vino Sylviana uvwanga? Uzye mukalonda ukuombela kuno ya kasimikila ya Wene yacepa nomba ala mukusakamala ngi cakuti mungakwanisya ukucita vivyo? Nga ali vino cili, mutalinzile ukutoovoka! Pa mulandu nu kwazwa kwakwe Yeova aina na ya nkazi aingi sana yacimvya vyonsi ivingayacilikila ukulundulula umulimo wao uwa kusimikila. Pakuti mumanye vino Yeova wayazwa, lekini tulande pa mpanga ya Madagascar, icilila icalenga 4 mu ukulu pano nsi.

Ukucila pa myaka 10 iyapitapo, ya kasimikila na ya painiya acincile ukucila pali 70 ukufuma ku mpanga 11 * iiza mu kuombela ku mpanga kwene ii iya mu Africa, kuno antu aingi yacindika Baibo. Nupya na ya kasimikila ya mu mpanga kwene ii yaitemelwa aineco ukukuuka pakuti yazwilizyeko ukukosoola ilandwe mu ncende yonsi iya mu cilila cii. Lekini tulande pali yamwi aaombako.

Ya Louis na Perrine atwalane ali ni myaka ku ma 30 yafuma ku France ukuya ku Madagascar. Pa myaka iingi, yelenganyanga ukuya ku mpanga yuze pakuti yalundulule umulimo wao uwa kusimikila, nomba ya Perrine yalezyokanga ukukuuka. Yalanzile yati: “Natiinanga ukuya kuno ntamanyile. Nasakamalanga pa kusya ya lupwa, icilongano, ing’anda, incende zino twayelizye alino sile nu kuta ukucita ivintu vino twayelizye. Ukulanda sile icisinka, ukusakamala pa vintu vii wali ali wezyo uno nalondekwanga ukucimvya.” Mu 2012, ya Perrine iizile yasipa, nupya yene na ya iya ya Louis yakuusile. Uzye ya Parrine yuvwile uli pali vino yapingwilepo? Yalanzile yati: “Nga nelenganya pali vino ivintu vyali kucisila ningalanda ukuti utailo wakomelako ukulola vino Yeova watwazwa mu umi witu.” Ya Louis nayo yalunzilepo ukuti: “Pa Ciusyo  cakutandikilapo mu Madagascar, antu 10 yano twasambilizyanga Baibo yazanyilweko!”

I cani calenzile ukuti atwalane yaa yatwalilile ukuya akome nu kutwalilila ukuomba umulimo uno yaombanga nanti icakuti yakweti intazi? Yapefile kuli Yeova pakuti ayapeele amaka ya kuzizimizya. (Filipi 4:13) Ya Louis yatiile: “Twaweni ukuti Yeova wataasuka amapepo itu nu kutupeela ‘umutende wakwe.’ Twatwalilile ukwika sana amano pa visuma vino umulimo uno twaombanga watuletelanga. Nupya ya cuza itu aku France yatutumilanga ama mesegi na makalata akutukomelezya ukuti tutatoovoka nu kuta ukuomba umulimo witu.”—Filipi 4:6, 7; 2 Kol. 4:7.

Yeova wapoleliile ya Louis na ya Parrine pali vino yazizimizye. Ya Louis yalanzile yati: “Mu Okotoba 2014 twaile tuzanwa kwi Sukulu lya Baibolo lya Ina Klistu Atwalane * mu France. Ukuzanwa ukwi sukulu lili wali uwila ukufuma kuli Yeova uno tutalatala twilile.” Lino yamazile isukulu, atwalane yaa yayanenyile ukuswilila mu kuombela ku Madagascar kwene.

Lino ya Didier na ya Nadine aatwalane yafumile ku France ukuya ku Madagascar mu 2010, yataali aakote sana. Ya Didier yalanzile yati: “Twatandike ukuomba upainiya lino twali ance, nupya twakuzya ana yatatu. Lino ana yakuzile, twatandike ukwelenganya pa kuya mu kuombela ku mpanga yuze.” Ya Nadine nayo yatiile: “Ukwelenganya pa kusya ana yane kwalenzile ukuti nalezyoka, nomba ana yatunenyile yati: ‘Ndi mwapita mukuombela ku mpanga kuno ya kasimikila yacepa, tulatemwa sana!’ Amazwi yao yatukomelizye ukuti tukuuke. Nanti icakuti ndakai tukaikala ukutali sana na ana itu, twatemwa sana ukuti tukalanzyanya nayo cila nsita.”

Ukusambilila ululimi luze kwataliile sana ya Didier na ya Nadine. Ya Nadine yalanzile ala yakumwentula iyati: “Ndakai tusi ni myaka 20.” Uzye yakwanisye uli? Pa kutandika yalongananga mu cilongano icikaomvya ululimi lwa Cifrench. Lyene pacisila, lino yaweni ukuti yangasambilila ululimi luze, yakukiile uku cilongano icikaomvya ululimi lwa Cimalagasy. Ya Nadine yalanzile yati: “Antu aingi yano tukazana mu mulimo wa kusimikila yakatemwa sana ukusambilila Baibo. Lyonsi yakatutaizya nga twayatandalila. Pa kutandika nalolanga kwati nkulota. Natemwa ukuomba upainiya mu ncende ii. Lyonsi nga nazyuka katondo nkaivwanzya inti, ‘cazipa sana nkuya mu kusimikila ilelo!’”

Ya Didier yamwentwile lino iwisye vino cali lino yatandike ukusambilila Cimalagasy. Yalanzile yati: “Wanda umwi natungululanga ukulongana nomba ntuvwanga nanti acimwi pa vyasuko vino aina na ya nkazi yasukanga. Cino namanyile sile u kulanda ati ‘Nataizya.’ Pacisila ca kutaizya nkazi umwi pa casuko cino waswike, aali kwi tundu lyakwe yatandike ukunsinizya ukuomvya makasa ukuti icasuko cino wataasuka asi cilico. Zuwa zuwa nasonsile umwina uwaswike icasuko cino naweni ukuti ica cumi nupya nkutaila ukuti cali ica cumi.”

Mu 2005 pa ukongano wa citungu, ya Thierry na ya mama yao ya Nadia yatamvile cangalo icakweti umutwe  wa kuti “Mwaimika Mauyo Aakacindika Leza.” Icangalo ciici ica muli Baibo icalandanga pali Timoti cayafisile sana pa mwenzo nupya calenzile yalondesya ukuya mu kuomba kuno ya kasimikila ya Wene yacepa. Ya Thierry yalanzile yati: “Lino twatootanga pacisila ca kumala ukutamba icangalo, nayendamiile kuli mamane alino imuzya inti, ‘Tumaya kwi?’ Mamane walanzile ukuti nawe kwene akwelenganya pa vili vimwi kwene.” Pataalengile, yatandike ukucitapo vimwi pakuti yafikilizye uyo wao. Ya Nadia yalanzile yati: “Twatandike ukucefyako ivintu mpaka ivisyala ivyakulonga sile mu masutikesi 4.”

Yafisile mu Madagascar mu 2006 nupya yaipakizya mulimo wa kusimikila ukufuma sile lino yatandike. Ya Nadia yalanzile yati: “Antu yano tukazana yakatuletela sana insansa.”

Pacisila ca myaka 6, aatwalane yaa yakweti intazi. Ya nyina yakwe ya Nadia, ya Marie-Madeleine aikalanga mu France, yaponyile iyavunika ikasa, iyaicisa nu ku mutwe. Lino aatwalane yaa yalanzyanyizye na Dokota wakwe ya Marie-Madeleine, yuzyizye ya nyina ngi cakuti yangakonka yakaikala nayo ku Madagascar. Nanti icakuti yali ni myaka 80 yaazumile ukukonka. Uzye yakauvwa uli pa kwikala ku mpanga yuze? Yalanzile yati: “Insita zimwi cikatala, nomba asi mulandu na vino cikantalila ukuomba vimwi, nkaumvwa ukuti nkaomviwa sana mu cilongano. Nupya ni cikalenga inje sana ni nsansa pano imikalile ii yalenga ana yane yatwalilile ukuomba umulimo wao uwa kusimikila kuno.”

Riana u mwina ali ni myaka pakasi kakwe 21 na 23. Wakulila mu Alaotra Mangoro. Icitungu icaya sana nu muvundo mu Madagascar. Wacisile ningo sana mu vya ku sukulu nupya walondanga ukuya ku masambililo ya papela. Nomba, lino wasambilile Baibo, wasenwile melenganyo yakwe. Walanzile ati: “Nalwisyanga ukumala zuwa isukulu lya ku sekondali nupya nalavile Yeova ukuti, ‘Ndi napaasa sile masindano, ndatandika upainiya.’” Lino Riana wamazile isukulu, wafikilizye vino walavile. Wene nu mwina muze yatandike ukuomba incito ya kuombako sile insita inono nupya yatandike na upainiya. Walanzile ati: “Pa kupingula konsi kuno napingwilepo, kuu ali kupingula kuno napingwilepo ningo sana.”

Nanti ciye vivyo, ya lupwa yakwe Riana yatuvwikisye umulandu uno atalondelanga ukulaomba incito ya mu nsi. Walanzile ati: “Ya tata, ya tata yanono alino na mama umuto wakwe mama uwavyala ya tata, yonsi yankomelezyanga ukuti inje ku masambililo ya papela. Nomba ntalondanga iciliconsi ukundesya ukuomba upainiya.” Insita yonsi kucisila Riana walondanga ukuya mu kuombela kuno ya kasimikila yacepa. I cani icalenzile alondesya ukucita vivyo? Walanzile ati: “Aapupu yatamile ka ng’anda kano twikalangamo nu kwiya vintu vyane ivingi sana. Aapupu yaya yalenzile niusye amazwi yakwe Yesu yano walanzile pa kusunga ‘ivyuma mwiyulu.’ Napingwilepo ukutandika ukulonda ivyuma vyakwe Leza.” (Mate. 6:19, 20) Wakukiile ku katutu ka mpanga kwene iiya ku citungu ukwali sana icilala apali makilomita 1,300 kufuma kuno wikalilanga. Mu citungu ciici mukaikala antu ya mutundu wa Antandroy. U mulandu ci uno wailile kuuku?

Umwezi onga kucisila lino aapupu yatatala iza iya, Riana watandike ukusambilila na Aantandroy yaili aonsi. Wasambilileko amazwi yamwi amu lulimi lwao nupya welenginye pa ya Antandroy aingi aatatazile yuvwepo ilandwe lya Wene. Walanzile ati: “Napefile kuli Yeova ukuti angazwe ukukuukila ku citungu cino yakalanda Icitandroy.

Riana wakuusile, nupya lino wafisile sile wakweti intazi. Ataazanyile ukwakwingila incito. Umonsi umwi wamunenyile ati: “I cani cino wizila kuno? Antu yonsi akulonda incito yakaaya kuno wafuma!” Pacisila ca milungu iili, Riana waswilile ku mwao ukuya umu kulongana kwa citungu ala atakweti impiya nanti azimwi, ala atamanyile ni vya kucita. Pa wanda wakusyalikizyako ukulongana, umwina umwi wisile cimwi umwitumba likoti lyakwe Riana. Zyali i mpiya izingi sana izyali nu kukumana ukuswililila ku ncende ya Aantandroy nu kutandikila uculuzi wakwe yogati. Riana walanzile ati: “Papo kwene sile naweni ikasa lyakwe Yeova!” Mu cilongano mwali sana imilimo iya kuomba. Riana walanzile nu kuti: “Yampeelanga malyasi cila mulungu. Yeova wansambilizya ukuomvya iuvi lyakwe.” Ndakai Riana acili akasimikila ilandwe lya  Wene ku yantu akavwanga ululimi lwa Citandroy aakalonda sana ukusambilila pali Yeova.

Yeova watulaya ukuti, “wensi akalonda ukupaalwa muno nsi alapaalwa kuli Leza wa cumi.” (Eza. 65:16, NWT) Ndi cakuti twaombesya ukucimvya amezyo angalenga tufilwe ukulundulula umulimo witu wa kusimikila, Yeova alatupolelela. Lekini tulande pali Sylviana, wino twatitulandapo pa kutandika kwa cipande cii. Iusyini ukuti watiinanga ukuti atanga akwanisye ukuya mukuombela kuno ya kasimikila yacepa. U mulandu ci uno welenganyizizyanga vivyo? Walondolwile ati: “Ikulu lyane ilya kwimani lipimpala yasentimita 9 kuluta ilya kwilunji. Fwandi nkasinta pa kupita nupya nkatonta zuwa sana.”

Nanti ciye vivyo umu 2014, Sylviana watandike ukuombela pamwi na Sylvie Ann painiya wacance uwa mu cilongano, nupya yakukiile ku kamuzi akanono apali makilomita 85 kufuma ku mwao. Asi mulandu ni ntazi, vino Sylviana welenganyanga i vyacitike nupya wapolelilwe cuze! Walanzile ati: “Lino twamazile sile umwaka onga ku cifulo cipya, ya Doratine umuvyazi wacance yano nasambililanga nayo Baibo, yawatiziwe pa kulongano kwa ciputulwa.”

Ukulingana nu utailo uno yaa yonsi aya mu kuombela kuno ya kasimikila yacepa yakalanga, ndi cakuti twaombesya ukucimvya ivingatulesya kulundulula mulimo witu wa kusimikila, cila muntu tukataila ulayo uno Yeova walaya aomvi yakwe uwakuti: “Namamukomyanga nupya namamwavwanga.” (Eza. 41:10) Nu usuma uwakuti, ucuza witu na Yeova ukakomelako. Fwandi ukuipeelesya sweineco ukuombela ku ncende kuno ya kasimikila yacepa mu mpanga itu kwene nanti ku mpanga yuze kukatupekanya ku milimo yakwe Leza ilayako mu nsi ipya, wakwe vino ya Didier, yano itulandapo mpiti yalanzile, yatiile: “Ukuombela kuno ya kasimikila yacepa kukatusambilizya ivya kwiza mu kuomba uku nkoleelo!” Fwandi si lekini yonsi akulondesya ukuombako umulimo uu yatandike likwene ukusambilila!