CIPANDE CA KUSAMBILILAMO 1
Mwateekela nu Kutaila Muli Yeova
ILEMBELO LYA MWAKA WA 2021: “Amaka inu yalaya mu kuteekela nu kulanga utailo.”—EZA. 30:15, NWT.
LWIMBO NA. 3 Wewe Maka Itu, Wewe Twasintililamo
VINO TUMASAMBILILAPO *
1. Wakwe vino Umwene Davidi uzizye, iuzyo ci lino naswe tunguzya?
SWENSI kwene tukalonda ukuya nu mutende nu umi usuma. Kusi aakauvwa ningo kusakamikwa. Nomba, insita zimwi tungasakamala sana. Ali mulandu uno aomvi yakwe Yeova yamwi yanguzizya iuzyo wakwe lino Umwene Davidi uzizye Yeova ukuti: “Uzye namazizimizya amasakamiko ukufika lilaci? Uzye indinzile ukwikala nu ulanda umu mwenzo usiku nu musanya?”—Masa. 13:2.
2. I vyani vino tumasambilila mu cipande cii?
2 Nanti icakuti swensi tukasakamikwa pa nsita imwi, kwaya ivingi vino tungacita pakuti tutaasakamala sana. Mu cipande cii, tumatandikilapo ukulanda pa vintu vimwi ivingalenga twasakamikwa. Lyene tumalanda pa vintu 6 ivingatwazwa ukuya ateekele lino twakwata intazi.
I VYANI VINGALENGA TWASAKAMIKWA?
3. I vyani ivingalenga twasakamikwa, nupya uzye tungacimvya ivintu vivyo?
3 Kwaya ivintu ivingi ivingalenga twasakamikwa, nupya tutanga tulesye ivintu vivyo ukucitika. Wakwe, tutange tulesye imitengo ya vyakulya, ivyakuzwala, nu mwakwikala ukukulilako cila mwaka, nanti ukulesya yano tukaomba nayo, yano tukasambilila nayo ukuta ukututunka ukukanaya na ucisinka nanti ukucita uzelele. Nupya tutange tulesye unkalwe ukacitika uku ncende ya kumwitu. Tukakwata intazi zya musango uu pa mulandu wakuti tukaikala umu nsi umwaya antu asiomvya ivisinte vya muli Baibo lino yakupingula pa vintu. Nupya Satana leza wa nsi ii wamanya ukuti antu yamwi yangata ukuombela Yeova pa mulandu na “masakamiko ya wikazi uwamu nsi ii.” (Mate. 13:22; 1 Yoa. 5:19) Fwandi ali cino tusizunguka nga twalola intazi izyaya umu nsi izikalenga antu kusakamikwa sana!
4. I cani cingacitika nga twatandika ukulaelenganya sana pa ntazi zino tukweti?
4 Tungaasakamikwa sana pa ntazi icakuti twafilwa nu kwelenganya pa vili vyonsi. Limwi tungasakamikwa ukuti tutalakwata impiya izya kukalila vino tukulondekwa, nanti limwi tungalwala tufilwe ukulaomba ningo yatuzinge ni ncito. Nupya limwi tungasakamikwa ukuti limwi tulafilwa ukutwalilila ukuya acisinka nga tweziwa ukukanauvwila isunde lyakwe Leza. Likwene sile Satana alalenga yayo yano akatungulula ukuzanza antu yakwe Leza, fwandi limwi tungasakamala pali vino tulacita nga yatuzanza. Limwi tungaelenganya ukuti, ‘Uzye caipa ukulasakamala pa vintu vii?’
5. Uzye Yesu walozizye mwi lino walanzile ukuti: “Mutasakamala”?
5 Twamanya ukuti Yesu wanenyile alondezi yakwe ukuti: “Mutasakamala.” (Mate. 6:25) Uzye Yesu walozizye umukuti tutalinzile ukulasakamala pa cili consi? Awe foo. Iusyini ukuti na aomvi yakwe Yeova kwene aaliko ukucisila yasakamalanga, lelo Yeova watwalilile ukuyatemwa. * (1 Yamw. 19:4; Masa. 6:3) Yesu watutekezyanga. Atalondanga twasakamikwa sana pa vintu vino tukalondekwa icakuti twalola ukuombela Leza ukuti kutacindama sana. I vyani vino tungacita lino twasakamikwa?—Lolini kambokosi kakuti “ Vino Mungacita.”
IVINTU 6 IVINGATWAZWA UKUYA ATEEKELE
Lolini palaglafu 6 *
6. Ukulingana na Filipi 4:6, 7, i cani icingatwazwa ukuya ateekele?
6 (1) Mwapepa lyonsi. Nga mwasakamala apa ntazi imwi, mungapepa kuli Yeova pakuti amwazwe. (1 Pet. 5:7) Yeova angasuka amapepo inu pa kumupeela “mutende uno kusi umuntu nanti wenga angaumanyikisya.” (Belengini Filipi 4:6, 7.) Yeova alamupeela umutende uwo ukuomvya umupasi wakwe uwa muzilo.—Gala. 5:22.
7. I vyani vino tulinzile ukwiusya lino tukupepa kuli Leza?
7 Lino mukupepa kuli Yeova, mwamunena vyonsi vino mukuyuvwa. Mwamulondolwela pa ntazi ino mukweti, na vino mukuyuvwa pa ntazi iyo. Nga kuli inzila ino mungamalilamo intazi iyo, mwamulenga ukumupeela mano aakumanya vino mungacita na maka akucita vivyo kwene. Ndi cakuti kusi vino mungacita pakuti mumale intazi iyo, mwalenga Yeova amwazwa ukukanasakamikwa sana. Nga tukupepa amapepo ya mukulungatika, tulalola vino Yeova alasuka amapepo yayo. Ndi cakuti ipepo linu litaswikwe papo kwene, mutalinzile ukuta ukupepa. Yeova asilonda sile ukuti mwapepa umukulungatika lelo akalonda nu kuti mwatwalilila ukupepa.—Luka 11:8-10.
8. I vyani vino tulinzile ukulanda mu mapepo itu?
8 Lino mukwika amasakamika inu pali Yeova ukupitila umwi pepo, mwamutaizya nu kumutaizya. Tulinzile ukulaelenganya pa vintu visuma vino twakwata na lino tuli ni intazi. Nomba i vyani vino mulinzile ukucita ndi cakuti mutamanyile ivya kunena Yeova pali vino mukuyuvwa? Mwaiusya ukuti Yeova akaasuka mapepo inu nanti mwalanda sile ukuti ‘si ngazwe!’—2 Mila. 18:31; Loma 8:26.
Lolini palaglafu 9 *
9. I vyani vino tulinzile ukucita nga tuvwa intete?
9 (2) Mwataila mano yakwe Yeova, asi mano inu foo. Mu nsita yakwe kasesema Ezaya, Ayuda yatiinanga ukuyazanza uku ina Asilya. Ayuda yatalondanga Aina Asilya ukuyazanza, fwandi yanenyile Aina Ejipti ukuyazwa. (Eza. 30:1, 2) Yeova wayacelwile ukuti ukutaila umu Aina Ejipti kwali nu kuyaletelela. (Eza. 30:7, 12, 13) Yeova wanenyile kasesema Ezaya ukunena antu yakwe vino yali nu kucita pakuti yacingililwe. Watiile: “Amaka inu yalaya mu kuteekela nu kulanga utailo” muli Yeova.—Eza. 30:15b, NWT.
10. A muli vyani muno tungalangizya ukuti twataila muli Yeova?
10 A lilaci lino tungalanga ukuti twataila sana Yeova? Elenganyini pa vilangililo vii. Tuti limwi yamupeela incito yakufola ulupiya ulwingi, ikulondekwa mwaomba pa maawazi aingi nupya imalenga mutaombela Yeova ningo. Nanti limwi wino mukaomba nawe watandika ukulanga icintemwa, nomba asi kapepa wakwe Leza umubatiziwe. Nga ndi cakuti lupwa winu wamunena ukuti amamukana nga mwatwalilila ukuombela Yeova? Muli vii vino twalandapo, limwi cingamutalila ukusololapo ivyakucita nomba Yeova angamwazwa ukumanya vino mulinzile ukucita. (Mate. 6:33; 10:37; 1 Kol. 7:39) Iuzyo i lyakuti, uzye mulataila Yeova nu kulondela vino alamunena?
Lolini palaglafu 11 *
11. A malyasi ci amuli Baibo yano tungabelenga pakuti tuteekeziwe lino yauze yakutuzunya?
11 (3) Mwasambilila kuli yano yacitanga ivisuma na acitanga iviipe. Muli Baibo mwaya malyasi aingi akalanda pali vino cacindama ukutwalilila ukuya ateekele nu kutaila Yeova. Lino mukusambilila pa malyasi yaa, mwaelenganya pali vino vyavwile aomvi yakwe Yeova ukutwalilila ukuya ateekele lino yauze yayazunyanga. Lino amu cilye ca Ayuda yanenyile atumwa ukuta ukusimikila, yatuvwiile intete. Lelo yalanzile mukusipa ukuti: “Tulinzile ukuyela Leza, kuluta kuyela antu.” (Mili. 5:29) Nanti sile alino yayumile ivikoti, atumwa yataasakamile. U mulandu ci? Pano yamanyile ukuti Yeova wali nu kuyazwa. Watemilwe pali vino yacisile. Fwandi yatwalilile ukusimikila ilandwe lisuma. (Mili. 5:40-42) Na lino Sitivini wali mupipi nu kukomwa, watwalilile ukuya nu mutende nu “usyu wakwe walolekanga kwati uwa mungeli.” (Mili. 6:12-15) U mulandu ci? Pano wamanyile ukuti Yeova watemilwe pali vino wacitanga.
12. Kulingana na 1 Petulo 3:14; 4:14, u mulandu ci uno tungayela ni nsansa lino tukuzunyiwa?
12 Atumwa yasininkizye ukuti Yeova wali nayo. Wayapeezile amaka ya kucita ivizungusyo. (Mili. 5:12-16; 6:8) Yeova ataatupeela amaka ya kucita ivizungusyo ndakai. Lelo Yeova watunena ukupitila umwi Izwi lyakwe ukuti lino twazunyiwa pa mulandu wa kucita cisuma, akazanga sana nupya umupasi wakwe ukaya naswe. (Belengini 1 Petulo 3:14; 4:14.) Fwandi ukucila ukulasakamikwa pali vino tulacita nga yatuzunya uku nkoleelo, tulinzile ukulakomya utailo witu muli Yeova ukuti angatwazwa nu kutupususya. Wakwe vivi kwene vino asambi yakwe Yesu yacisile, naswe kwene tulinzile ukutaila ulayo wakwe Yesu uwakuti: “Pano ndamupeela mazwi nga na mano kuti patakaye nanti wenga uwamu anisi inu alakana nanti kupilika vino mulavwanga.” Yesu watulavile ukuti: “Mukuposya kwinu, mulaya nu umi.” (Luka 21:12-19) Mwaiusya nu kuti Yeova akaiusya yonsi aali na ucisinka lino yatatala yafwa. Na cico cilalenga ukuti akayatuutulule.
13. I vyani vino tungasambilila kuli vino vyacitikiile yayo afizilwe ukuteekela nu kutaila Yeova?
13 Tungasambilila na kuli vino vyacitikiile yayo afizilwe ukuteekela nu kutaila Yeova. Ukusambilila pa viipe vino yacisile kulatwazwa ukukanacita vino yacisile. Wakwe lino Asa wizile aya umwene wa Ayuda nupya iumba lya asilika likalamba lyamuzanzile, wataile sana Yeova nupya Yeova wamwavwile ukucimvya. (2 Mila. 14:9-12) Lino papisile insita, Umwene Baasya wizile umu kuzanza Asa ni umba lyakwe linono ilya asilika, nomba pa nsita ii Asa ataataile Yeova ukuti aliwe amamupususya wakwe vino wacisile uku cisila, lelo wanenyile Aina Asilya ukuti yamwazwe. (2 Mila. 16:1-3) Lino wizile alwala sana, ataataile ukuti Yeova wali nu kumwazwa.—2 Mila. 16:12.
14. I vyani vino tungasambilila kuli vino Asa waluvyanyizye?
14 Pa kutandika lino Asa wakweti intazi, wataile sana Yeova. Nomba pa cisila lino wizile akwata intazi, wafizilwe ukutaila Yeova nupya wezizye ukuti amale intazi ku maka yakwe. Pa kutandika, calolike kwati uwazwilizyo uno Asa walenzile uku Ina Asilya wali nu kuomba. Nomba Aina Izlaeli yataatwalilile ukuya nu mutende pa nsita itali. Yeova wamunenyile ukupitila muli kasesema ukuti: “Apamulandu wakuti wemo wataile umu mwene waku Asilya, umu cifulo ca kutaila muli Yawe [nanti Yeova], Leza wako, ivita vya ina Izlaeli vyativikupuuka.” (2 Mila. 16:7) Fwandi tulinzile ukucenjela pakuti tutaelenganya ukuti tungamala intazi ku maka itu ukwaula ukutaila utunguluzi wakwe Yeova uwaya umwi Izwi lyakwe. Nanti sile alino tukulonda ukupingulapo zuwa ivyakucita, tulinzile ukutaila Yeova, nupya alatwazwa ukupingulapo ningo.
Lolini palaglafu 15 *
15. I vyani vino tungacita lino tukubelenga Baibo?
15 (4) Mwaiusya ivikomo vimwi ivya muli Baibo. Ndi cakuti mwazana ivikomo vimwi muli Baibo ivikulanda pa mulandu uno cacindamila ukuya ateekele nu kutaila Yeova, mwaezya ukwiusya ivikomo vivyo. Pakuti mwaiusya ivikomo vivyo, mwabelenga ni izwi lyuvwike nanti ukulemba pamwi pakuti mungabelengamo lyonsi. Yeova wanenyile Yoswa ukulabelenga lyonsi mu lupapulo lwa Masunde pakuti apingula ningo pa vintu. Ukubelenga mu lupapulo lwa Masunde kwali nu kumwazwa ukukanaya ni intete lelo ukuya umusipe lino akutungulula antu yakwe Leza. (Yoswa 1:8, 9) Ivikomo ivingi ivyaya umwi Izwi lyakwe Leza vingamwazwa ukuya ateekele lino muli ni ntazi izingamulenga ukusakamikwa nanti ukuvwa intete.—Masa. 27:1-3; Mapi. 3:25, 26.
Lolini palaglafu 16 *
16. Uzye Yeova akaomvya uli amu cilongano ukutwazwa ukuya ateekele nu kutaila muli aliwe?
16 (5) Mwaya pamwi na antu yakwe Leza. Yeova akaomvya aina na ya nkazi kutwazwa ukuya ateekele nu kutaila muli aliwe. Lino tuli pa kulongana, tukaipakizya malyasi aakalandwa, masuko yano amwi umba yakaasuka, alino nu kulanzyanya kuno tukalanzyanya na ina na ya nkazi. (Ayeb. 10:24, 25) Nupya tukakomeleziwa sana nga twanena ya cuza itu amu cilongano ivikutusakamika. “Amazwi ya mutembo” ukufuma kuli cuza witu yangatwazwa ukukanasakamala sana.—Mapi. 12:25.
Lolini palaglafu 17 *
17. Kulingana na Ayebulai 6:19, uzye upaalilo ungatwazwa uli ukutwalilila ukuya akome asi mulandu ni ntazi?
17 (6) Mwakomya upaalilo winu. Upaalilo witu waya wa “nanga pa kutungilila umi witu” ku kulenga twatwalilila ukuya akome asi mulandu ni ntazi nanti masakamika. (Belengini Ayebulai 6:19.) Mwaelenganya pali vino Yeova watulaya ivilacitika uku nkoleelo. Pa nsita iya kusi ali wensi aalasakamala pa cintu cili consi. (Eza. 65:17) Mwaelenganya ukuti muli umu nsi ipya umulaya umutende, umutalaya ivintu iviipe. (Mika 4:4) Mulakomya upaalilo winu lino mukunenako yauze pali vino insi ipya ilaya. Mwacita vino mungakwanisya mu mulimo wa kusimikila nu kupanga asambi. Nga mwacita vivyo, mungatwalilila “kucita visuma kufika nu ku mpelelekezyo.”—Ayeb. 6:11.
18. I vyani vilacitika uku nkoleelo, nupya i vyani vino tulacita?
18 Pa mulandu wakuti tuli uku mpelelekezyo ya nsi ii, tulaakwata intazi izingi izilalenga twasakamikwa. Ilembelo lya mwaka wa 2021 lingatwazwa ukucimvya intazi nu kutwalilila ukuya ateekele, asi ku maka itu, lelo lino tukutaila Yeova. Mu mwaka ukwiza, lekini twalanga muli vino tukacita ukuti twataila ulayo wakwe Yeova uwakuti: “Amaka inu yalaya mu kuteekela nu kulanga utailo.”—Eza. 30:15, NWT.
LWIMBO NA. 8 Yeova Ali Kacingilila Witu
^ pala. 5 Ilembelo lya mwaka wa 2021 likulanda sana pa mulandu uno cacindamila sana ukutaila Yeova lino twakwata intazi izingalenga twasakamala pali vino ivintu vili ndakai na vino vilaya uku nkoleelo. Cipande cii cimalanda pali vimwi vino tungacita pa kuvwila ukusunda ukuli umwi lembelo lya mwaka.
^ pala. 5 Aina na ya nkazi yamwi acisinka yakacula pa mulandu wa kusakamikwa sana. Ukusakamikwa kwa musango uwo uulwale uwipisye nupya asi kuno Yesu walandangapo.
^ pala. 63 ULONDOLOZI WA CIKOPE: (1) Nkazi akupepela pa ntazi izikumusakamika uwanda onsi.
^ pala. 65 ULONDOLOZI WA CIKOPE: (2) Pa nsita ya kupuuza lino ali uku ncito, akubelenga Baibo pakuti aye na mano.
^ pala. 67 ULONDOLOZI WA CIKOPE: (3) Akwelenganya pa antu acitanga ivisuma na acitanga iviipe aalembwa muli Baibo.
^ pala. 69 ULONDOLOZI WA CIKOPE: (4) Wakambatika ilembelo lya kumukomelezya pali fuliji pakuti aiusya.
^ pala. 71 ULONDOLOZI WA CIKOPE: (5) Akuipakizya ukuombela pamwi na nkazi muze mu mulimo wa kusimikila.
^ pala. 73 ULONDOLOZI WA CIKOPE: (6) Akukomya upaalilo wakwe lino akwelenganya pa vilacitika ku nkoleelo.
