1. I vyani vikalanga ukuti ukutemwa kwacepa mu ndupwa izingi?

BAIBO yasoowile ukuti mu manda ya kusyalikizya, antu yatalaya nu kutemwa. (2 Tim. 3:1, 3) Tukalola kuno usoowelo uu ukufikiliziwa ndakai. Avyazi aingi ndakai yataana nupya yasosyanya, na cico cikalenga ana yayuvwa ukuti yatatemwikwa. Nanti sile amu lupwa aakaikala pamwi, yasiuvwana. Umwi aakasunda atwalane, walanzile ukuti: “Ya nyina, ya isi na ana yasivwanzyanya, nupya yakasumba sana insita pa kompyuta, pa tabuleti, pa foni nanti ku vyangalo vya pa kompyuta. Nanti icakuti yakaikala pamwi, yatamanyana ningo.”

2-3. (a) Kulingana na Loma 12:10, a kuli yaweni kuno tulinzile ukulanga ukutemwa? (b) I vyani vino tumasambilila mu cipande cii?

² Tusilonda ukuya wa antu amu nsi ii aataya nu kutemwa. (Loma 12:2) Lelo, tulinzile ukusambilila vino tungalanga sana ukutemwa kuli ya lupwa itu nu ku ina na ya nkazi umu cilongano. (Belengini Loma 12:10.) Uzye ukulanga ukutemwa ali kutuuli? Ali nzila ino amu lupwa yakalangilamo ukuti yatemwana nupya yakauvwana. Ali kutemwa kuno tulinzile ukulanga uku ina itu na ya nkazi amu cilongano. Nga tukulanga ukutemwa, tukaombela pamwi na yauze ni nsansa.—Mika 2:12.

³ Pakuti tuye nu kutemwa kuu, lekini tusambilile uku vilangililo ivyalembwa muli Baibo.

4. I vyani vino ilembelo lyakwe Yakobo 5:11 likatunena pali Yeova?

⁴ Baibo ikatulondolwela imiyele yakwe Yeova isuma. Ikalanda ukuti “Leza u kutemwa. (1 Yoa. 4:8) Nga twasambilila vii pali Yeova, tukalondesya ukuya ya cuza yakwe. Lelo Baibo ikatunena nu kuti Yeova “wakwatisya mizu.” (Belengini Yakobo 5:11.) Amazwi yaa yakalondolola ningo vino Yeova watutemwa.

5. Uzye Yeova akalanga uli uluse, nupya tungamukolanya uli?

⁵ Pali Yakobo 5:11 pakalondolola ukuti Yeova wakwata amizu alino ni miyele yuze ikalenga twapalama kuli aliwe, kuli kuti uluse. (Kufu. 34:6) Inzila yonga ino Yeova akatulangilamo uluse u kutweleela pali vino tukaluvyanya. (Masa. 51:1) Muli Baibo uluse lukapiliula ivintu na vyuze ukucila sile ukweleela uwataluvyanya. Uluse lukapiliula vino umuntu akayuvwa nga walola umwi akucuula nupya cikalenga alondesya ukwazwa umuntu wiyo. Yeova watunena ukuti vino akalondesya ukutwazwa vyacila na pali vino nyina akacitila umwanakwe. (Eza. 49:15) Lino tukucuula, uluse lwakwe Yeova u lukalenga ukuti atwazwe. (Masa. 37:39; 1 Kol. 10:13) Tungalanga ukuti twaya nu luse ku ina na ya nkazi nga tukuyeleela nu kukanasunga iviipe vino yatucitiile. (Efes. 4:32) Inzila yuze icindame ino tungalangilamo uluse uku ina na ya nkazi, u kuyazwa lino yakwata intazi. Ndi cakuti ukutemwa kwatulenga ukuya nu luse kuli yauze, tukakolanya Yeova uwaya nu luse kuluta umuntu ali wensi.—Efes. 5:1.

6. Londololini vino ucuza wakwe Yonatani na Davidi wali.

⁶ Baibo ikatunenako pa antu yamwi atemwanine sana. Elenganyini pali Yonatani na Davidi. Baibo ikalanda ukuti: “Umwenzo wakwe Yonatani umwana wakwe Saulo iuya sana kuli Davidi cakuti amutemwa wakwe vino waitemwa umwisikulu.”  (1 Sam. 18:1) Yeova wasoolwile Davidi ukupyana Saulo pa wene. Lyene Saulo wizile aya nu uzuwa icakuti walondanga ukukoma Davidi. Nomba Yonatani mwana Saulo ataatungilile isi lino walondanga ukukoma Davidi. Yonatani na Davidi yapangine ukuti yalatwalilila ukuya ivyuza nupya yaalazwana lyonsi.—1 Sam. 20:42.

7. I cani cimwi icali nu kulenga Yonatani na Davidi ukukanaya ivyuza?

⁷ Cikatuzungusya ukumanya ukuti Davidi na Yonatani yali acuza apalamisye nanti icakuti kwali ivingi ivyali nu kulenga yataya ivyuza. Yonatani wacizile Davidi imyaka 30. Yonatani nga welenginye ukuti atanga aye cuza nu mwance sana nupya aatamanyile ivintu ivingi. Nomba Yonatani atelenginye vivyo, wacindike sana Davidi.

8. Uzye mukwelenganya ukuti u mulandu ci uno Yonatani wayeliile cuza musuma kuli Davidi?

⁸ Yonatani nga uvwilanga Davidi uzuwa. Vino Yonatani wali umwana wa Mwene Saulo, nga walondanga ukuti aliwe akapyane pa Wene. (1 Sam. 20:31) Nomba Yonatani wali umuicefye nupya wali uwa cisinka kuli Yeova. Fwandi watungilile Davidi wino Yeova wasoolwile ukuti u wali nu kupyana pa wene. Nupya watwalilile ukuya na ucisinka kuli Davidi, nanti icakuti Saulo wasosile wakwe cimwi.—1 Sam. 20:32-34.

9. Uzye twamanya uli ukuti Yonatani atuvwilanga Davidi uzuwa? Londololini.

⁹ Pa mulandu wakuti Yonatani watemilwe Davidi, atamuvwilanga uzuwa. Yonatani wamanyile ukuomvya ningo ulapwa nupya wali umusilika umusipe. Wene na isi Saulo yamanyikwe ukuti “yakweti ulwilo ukuluta yalyang’anda, ni vimaka ukuluta yacisama.” (2 Sam. 1:22, 23) Fwandi Yonatani nga wailumbanga pali vino wacisile. Nomba, Yonatani atezizye ukuloleka kwati wacindime ukucila Davidi nupya ataali nu uzuwa pa visuma vino Davidi wacisile. Lelo, Yonatani wakumbwanga vino Davidi wali umusipe na vino wataile sana Yeova. Lino Davidi wakomile Golyati, alino Yonatani watandike ukumutemwa sana. Uzye tungalanga uli ukuti twatemwa ina na ya nkazi wakwe vino Yonatani watemilwe Davidi?

10. Uzye cikapiliula cani ‘kutwalilila kutemwana nu mwenzo onsi’?

¹⁰ Baibo ikatunena ukuti tulinzile ‘kutwalilila kutemwana nu mwenzo onsi.’ (1 Pet. 1:22) Yeova watulanga vino tulinzile ukucita. Watutemwa sana icakuti nga twatwalilila ukuya acisinka kuli aliwe, atalatala ate ukututemwa. (Loma 8:38, 39) Izwi lya Cigliki ilyakuti “mwenzo onsi” likalozya ku muntu akwezya na maka ukulanga ukutemwa na lino ivintu ivitala. Insita zimwi citangupala ukulanga ukutemwa ku ina na ya nkazi. Ndi cakuti yamwi yatusosya, tulinzile kutwalilila ‘kuombesya na maka mu kuleka umupasi wakwe Leza utulundanye myenzo. Mwacita cii mukwikala mu mutende.’ (Efes. 4:1-3) Nga tukwezya na maka ukuya nu mutende ku ina na ya nkazi, tutalaika mano kuli vino yakaluvyanya. Tulaezya na maka ukulalola aina wakwe vino Yeova akayalola.—1 Sam. 16:7; Masa. 130:3.

11. U mulandu ci uno insita zimwi cikatalila ukulanga ukutemwa?

 ¹¹ Citangupala ukulanga ukutemwa ku ina na ya nkazi sana sana ndi cakuti itumanya vino yaluvyanyizye. Ikwene ali ntazi ino na Ina Klistu ya kutandikilapo yakweti. Yuodia na Sintike yataakweti uwavya uli onsi lino yaombelanga pamwi na Paulo “mukusalanganya landwe lisuma.” Lelo Yuodia na Sintike yatuvwananga sana. Fwandi Paulo wayakomelizye ukuti yauvwana pano yali “aina mu Mwene.”—Filipi 4:2, 3.

12. Uzye tungalanga uli ukutemwa ku ina itu na ya nkazi?

¹² Uzye tungalanga uli ukutemwa ku ina itu na ya nkazi ndakai? Nga twamanya ningo aina itu na ya nkazi, cilatwangukila ukuyuvwikisya nu kuyalanga ukutemwa. Tungaya ya cuza yao nanti icakuti aikolo nanti ance, nanti icakuti twapusana inkulilo. Iusyini ukuti Yonatani wacizile Davidi imyaka 30, nomba wali a cuza wakwe umupalamisye. Uzye kwaya umwi umu cilongano cinu, uwikolo nanti umwance angaya cuza winu? Nga mwacita vivyo mulalanga ukuti mwatemwa “aina Klistu ataila wakwe mwemwe.”—1 Pet. 2:17.

13. U mulandu ci uno tutanga tuyele ya cuza apalamisye na yonsi umu cilongano?

¹³ Uzye ukutemwa Aina Klistu ataila wakwe sweswe kukapiliula ukuti tulaya ya cuza apalamisye na antu yonsi mu cilongano? Awe, citanga cicitike. Citaipa ukupalama sana ku antu yamwi pa mulandu wakuti vino yatemwa avino naswe twatemwa. Yesu wamanga atumwa yakwe yonsi ukuti “yacuza,” lelo watemilwe sana Yoane. (Yoa. 13:23; 15:15; 20:2) Nomba, Yesu ataacitilanga Yoane ivipusaneko. Wakwe lino Yoane nu mwina wakwe Yakobo, yalenzile Yesu ukuti akayapeele icifulo cicindame umu Wene wakwe Leza, Yesu wayanenyile ati: “Ntakweti nsambu yakusolola wino angikala  kwi kasa lilunji nanti kwi mani lyane.” (Mako 10:35-40) Wakwe Yesu, tutalinzile ukulalola ya cuza itu apalamisye ukuti yacindama sana ukuluta yauze. (Yako. 2:3, 4) Nga tukucita vivyo tulalenga ukuti mu cilongano mutaya umutende.—Yuda 17-19.

14. Uzye ilembelo lyakwe Filipi 2:3, lingatwazwa uli ukukanailola ukuti twacindama ukucila yauze?

¹⁴ Ndi cakuti tukulanga ukutemwa uku ina na ya nkazi umu cilongano, tutalailola ukuti twacindama ukuluta yauze umu cilongano. Iusyini ukuti Yonatani atuvwilanga Davidi uzuwa nupya atezizye ukulondesya ukuya umwene. Swensi kwene tungakolanya vino Yonatani wacisile. Tutalinzile ukuvwila yauze uzuwa pa mulandu ni milimo ino yakwata, lelo tulinzile ukuicefya nu kulalola yauze ukuti yacindama ukuluta sweswe. (Belengini Filipi 2:3.) Mwaiusya ukuti swensi kwene tungacita vimwi ivingazwa cilongano. Ndi cakuti twaicefya, tulaalola ivisuma umu ina na ya nkazi nupya tulasambililako kuli aliyo.—1 Kol. 12:21-25.

15. I vyani vino mwasambilila kuli vino vyacitikiile ya Tanya nu lupwa lwao?

¹⁵ Lino iviipe vyatucitikila, Yeova akatutekezya nu kutulanga ukutemwa nupya akatwazwa ukupitila umu ina na ya nkazi. Elenganyini ivyacitikile ulupwa lumwi ulwazanyilwe uku ukongano wa mpanga zingi uwa mu 2019 pa Cibelusi, uwakweti umutwe wakuti “Kutemwa U Kwa Pe!” Ya Tanya yalanzile ukuti: “Pa Cibelusi lino twaswililanga kuno twikalanga, motoka umwi wapumbwike nupya wizile apuma  muli motoka witu. Pasi uwacisike, nomba twasakamile nupya twafumile muli motoka nu kwimilila pa museo. Umwi watunenyile ukuti tuutukile muli motoka wakwe. Wali umwina uwafumanga uku ukongano kwene. Nupya atali wenga sile uwimilile. Kwali na yauze 5 afumile uku Sweden. Ya nkazi yankukwile pamwi nu mwanane nupya calenzile tuvwe ningo! Nanenyile aina na ya nkazi ukuti tumaya sile ningo, nomba yataatusiile. Ikazile naswe ukufikila lino ya dokota yafisile, nupya yasininkizye ukuti itukwata vyonsi ivyalondekwanga. Pa nsita ii itale, twaweni ukutemwa kwakwe Yeova. Ivyatucitikile vyalenzile tutemelweko aina na ya nkazi, alino nu kutemwa Yeova nu kumutaizya.” Uzye mungiusya insita ino mwalondekwanga uwazwilizyo lyene kapepa muzo aizamulanga ukutemwa?

16. I vyani vikalenga twalanga ukutemwa kuli yauze?

¹⁶ Elenganyini pa vintu ivisuma ivikacitika nga twalanga ukutemwa kuli yauze. Tukakomelezya aina na ya nkazi lino yakwata intazi. Tukaazwa aina na ya nkazi ukuya alemane lino yakuombela Yeova ni nsansa. Tukalanga ukuti sweswe asambi yakwe Yesu, nupya cii cikalenga antu aya ni cisinka ukulondesya ukuombela Yeova. Ni cacindamisya i cakuti, tukacindika Yeova, “Tata wa luse, Leza ali ntulo ya kutekeziwa konsi!” (2 Kol. 1:3) Fwandi lekini swensi tutwalilile ukulalanga ukutemwa!