CIPANDE CA KUSAMBILILAMO 4
Mulandu Uno Tukazanilwa Uku Ciusyo
“Mwacita cii pa kunjiusya”—LUKA 22:19.
LWIMBO NA. 20 Wapiile Umwana Wako Uno Watemwa Cuze
VINO TUMASAMBILILAPO *
1-2. (a) A lilaci lino yamwi yakaiusya sana atemwikwa yao afwa? (b) I cintu ci cino Yesu watandike pa wanda wa kusyalikizyako ukuya pano nsi usiku?
TUCILI tukaiusya atemwikwa itu afwa nanti cakuti ipapita insita ukufuma pano yafwilile. Yamwi yakaelenganya sana pa yatemwikwa yao ndi cakuti uwanda uno yafwililepo wafika.
2 Cila mwaka tukaya pa yantu mamilyoni aakakongana pamwi ku kwiusya imfwa iya muntu wino twatemwa sana kuli kuti Yesu Klistu. (1 Pet. 1:8) Tukakongana pamwi uku kwiusya umuntu uwapeezile umi wakwe ukuya ilambo pakuti atupususye uku luyembu ni mfwa. (Mate. 20:28) Yesu walondanga alondezi yakwe yaiusya imfwa yakwe. Uwanda uwa kusyalikizyako ukuya pano nsi usiku, watandike icakulya ica manguzi icicindame nu kulanda ukuti: “Mwacita cii pa kunjiusya.”—Luka 22:19.
3. I vyani vino tumasambilila umu cipande cii?
3 Pa yantu aakazanwa uku Ciusyo ca mfwa yakwe Klistu, aanono sile aakwata upaalilo wa kuya ukwi yulu. Nomba antu aingi aakazanwa uku Ciusyo yakwata upaalilo uwa kwikala pano nsi. Umu cipande cii, tumasambilila pali vino vikalenga maumba yonsi yoili yalondesya ukuzanwa uku Ciusyo cila mwaka. Nupya tumasambilila na pali vino tukaipakizya nga tukuzanwako. Lekini tutandikilepo ukulanda pali vimwi ivikalenga apakwe ukuzanwa uku Ciusyo.
MULANDU UNO APAKWE YAKAZANILWA UKU CIUSYO
4. U mulandu ci uno apakwe yakaliila mukate nu kumwa waini pa Ciusyo?
4 Cila mwaka, apakwe aakazanwa uku Ciusyo yakalya mukate nu kumwa waini. U mulandu ci uno yakacitila vivyo? Pakuti tumanye icasuko, lekeni tulande pali vino vyacitiike pa wanda uno Yesu wasyalikizyeko ukuya pano nsi. Pa cisila ica kuzevya Ucilo, Yesu watandike ukuzevya kuno tukaama ukuti Cakulya ca Manguzi Ica Mwene. Wapeezile atumwa yakwe 11 acumi umukate na waini ayenena ukulya nu kumwa. Yesu wayanenyile pa maupango yaili kuli kuti upangano upya nu upangano wa Wene. * (Luka 22:19, 20, 28-30) Maupangano yaa yalenzile atumwa na antu sile anono ukuya aene nupya ya simapepo ukwi yulu. (Kuso. 5:10; 14:1) Apakwe acili pano nsi, aaya mu maupangano yaa yaili ali yano yakalya umukate nu kumwa waini pa Ciusyo.
5. I vyani vino apakwe yamanya pa upaalilo uno yapeelwa uwa kuya ukwi yulu?
5 Mulandu nauze uno apakwe yakalondesya ukuzanwa uku Ciusyo u wakuti: Kuzevya ku kukalenga yaelenganya sana pa upaalilo uno yakwata. Yeova wayapeela upaalilo usuma sana kuli kuti yalakwata umi uwaula ukufwa ukwi yulu, yalaombela pamwi na Yesu Klistu na yauze aaya umwi umba lyakwe ya 144,000 aya mpiti ukwi yulu ni cicindamisye i cakuti, yalaalolana na Yeova Leza! (1 Kol. 15:51-53; 1 Yoa. 3:2) Apakwe yamanya ukuti yamwa ukuti yakaipakizye ivisuma vii ukwi yulu. Pakuti yakazumiliziwe ukuya ukwi yulu, yalinzile ukutwalilila ukuya acisinka kufika lino yalafwa. (2 Tim. 4:7, 8) Apakwe yakaya sana nu luzango lino yakwelenganya pa upaalilo wao uwa kuya ukwi yulu. (Tito 2:13) I vyani lyene vino tungalanda pali yano yaya umu “mfwele na zyuze”? (Yoa. 10:16) I vyani vimwi ivikalenga yazanwa uku Ciusyo?
MULANDU UNO AMU MFWELE NA ZYUZE YAKAZANILWA UKU CIUSYO
6. U mulandu ci uno amu mfwele na zyuze yakazanilwa uku Ciusyo?
6 Amu mfwele na zyuze nga yazanwa uku Ciusyo, yasilyako mukate nanti ukumwa waini, lelo yakaipakizya ukuzanwako. Umu 1938, ali muno yayo aakwata upaalilo wa kwikala pano nsi yamilwe ukutandika ukuzanwa uku Ciusyo. Lupungu Lwa Mulinzi lwakwe Maaci 1, 1938, lwatiile: “Icicindama ukuti yayo aakwata upaalilo uwa kwikala pano nsi yazanwa uku Ciusyo nu kulalola ivikacitika. . . . Nupya na kuli aliyo kwene ifwile ukuya insita isuma iyakuti yaya nu luzango.” Vivi kwene vino yano yakaama ku winga yakaya ni nsansa, avino na amu mfwele na zyuze yakaya ni nsansa lino yazanwa uku Ciusyo.
7. U mulandu ci uno amu mfwele na zyuze yakalondesya ukuyauvwako ilyasi lya Ciusyo?
7 Amu mfwele na zyuze nayo kwene yakaelenganya sana pa upaalilo wao. Yakalondesya ukuyauvwako ilyasi lya Ciusyo pa mulandu wakuti likalanda sana pali vino Klistu na ya 144,000 yalacitila antu aya ni cisinka umu Kuteeka Kwa Myaka 1,000. Lino Umwene Yesu Klistu alateeka, ya kateeka yauze ukwi yulu yalazwilizyako ukusenula insi ukuya paladaise nu kwazwa antu ukuya amalilike. Fwandi yayo aakazanwa uku Ciusyo yakauvwa ningo sana ukwelenganya pali vino Mausesemo amuli Baibo yalafikiliziwa uku nkoleelo, wakwe yano yaya pali Ezaya 35:5, 6; 65:21-23; na pali Kusokolola 21:3, 4. Ukwelenganya ukuti yali umu nsi ipya pamwi na atemwikwa yao kukakomya upaalilo wao uwakuti ivintu vilazipa uku nkoleelo nupya cikalenga yalondesya ukutwalilila ukuombela Yeova.—Mate. 24:13; Gala. 6:9.
8. U mulandu ci nauze uno amu mfwele na zyuze yakazanilwa uku Ciusyo?
8 Lekini tulande pa mulandu nauze ukulenga amu mfwele na zyuze ukuzanwa uku Ciusyo. Yakalonda ukulanga ukutemwa nu kwazwa apakwe. Izwi lyakwe Leza lyasoowile ukuti apakwe na yayo aakwata upaalilo uwa kwikala pano nsi yalaombela pamwi. U mu nzila ci? Lekini tulande pa nzila zimwi.
9. Uzye usesemo uwalembwa pali Zakaliya 8:23 ukalangilila uli vino amu mfwele na zyuze yakayuvwa pa yapakwe?
9 Belengini Zakaliya 8:23. Usesemo uu ukalondolola ningo sana vino amu mfwele na zyuze yakayuvwa pa ina na ya nkazi apakwe. Mazwi akuti “Muyuda” na “kunomuli” yakalozya ukwi umba ilya yantu ali yamwi kuli kuti apakwe asyala pano nsi. (Loma 2:28, 29) “Ainamasi ikumi” aafuma umu antu aakalanda indimi izipusanepusane yakaimililako amu mfwele na zyuze. Yakaombela pamwi na apakwe umu kupepa ukusanguluke. Fwandi pa wanda wa Ciusyo, amu mfwele na zyuze yakalanga ukuti yakuombela pamwi na apakwe nga yazanwako.
10. I vyani vino Yeova wacita pakuti afikilizye usesemo uwalembwa pali Ezekelo 37:15-19, 24, 25?
10 Belengni Ezekelo 37:15-19, 24, 25. Yeova wafikilizye usesemo uu, lino walenzile apakwe na amu mfwele na zyuze ukulaombela pamwi ukucila vino cali mpiti. Usesemo uu ukalanda pa ntuwa ziili. Yayo aakwata upaalilo uwa kwikala ukwi yulu yaya wa ntuwa yakwe Yuda (umutundu umwafumile aene amu Izlaeli), nupya yayo aakwata upaalilo uwa kwikala pano nsi yaya wa ntuwa yakwe Efulemu. * Yeova wali nu kuleta maumba yaa yaili pamwi pakuti yaye “intuwa yonga.” Ci cikupiliula ukuti yalemana umukuombela pamwi lino yakuvwila utunguluzi wa Mwene wenga kuli kuti Klistu Yesu. Cila mwaka, apakwe na amu mfwele na zyuze yakazanwa uku Ciusyo, yasiya maumba yaili apusane lelo yakaya ufyo onga ukutungululwa na kacema wenga.—Yoa. 10:16.
11. Uzye “imfwele” izyalumbulwa pali Mateo 25:31-36, 40, zikalangilila uli ukuti zikaazwa aina yakwe Klistu?
11 Belengini Mateo 25:31-36, 40. “Imfwele” zino Yesu walandangapo umu mulumbe uu, zikaimililako aololeke alayako umu nsita zya ku mpela aakwata upaalilo uwa kwikala pano nsi kuli kuti amu mfwele na zyuze. Yakatwalillila ukuya acisinka lino yakwazwa aina yakwe Klistu apakwe ukuomba umulimo ucindame kuli kuti umulimo wa kusimikila nu kupanga asambi.—Mate. 24:14; 28:19, 20.
12-13. U mu nzila ci na zyuze muno amu mfwele na zyuze yakalangila ukuti yakaazwilizya aina yakwe Klistu?
12 Cila mwaka umu milungu inono lino kutatala kwaya Iciusyo, amu mfwele na zyuze yakaazwa aina yakwe Klistu lino yakuombako kampeni ikayako umu nsi yonsi iyakwama antu uku Ciusyo. (Lolini kambokosi akakuti “ Uzye Mukuipekanyizizya Calimwi ku Ciusyo?”) Nupya yakasinkizya ukuti vyonsi ivikaomviwa pa Ciusyo ivipekanyiziwa ningo, nanti cakuti mu cilongano cao musi mupakwe ali wensi. Amu mfwele na zyuze yakaya sana ni nsansa ndi cakuti yakwazwa aina yakwe Klistu umu nzila zii. Imfwele zii zyamanya ukuti Yesu akalola vino zikaazwa apakwe kwati sile zikwazwa Yesu kwene.—Mate. 25:37-40.
13 I milandu ci na yuze ino swensi kwene tukazanilwa uku Ciusyo asi mulandu nu upaalilo uno twakwata?
MULANDU UNO SWENSI TUKAZANILWA UKU CIUSYO
14. Uzye Yeova na Yesu yatulanga uli ukutemwa?
14Tukataizya pali vino Yeova na Yesu yatulanga ukutemwa. Yeova watulanga ukutemwa umu nzila izipusanepusane, nomba kwaya yonga iyacila zyonsi zii. Watulangizye ukutemwa lino watumile Umwanakwe wino watemwisya ukwizacuula nu kutufwila. (Yoa. 3:16) Nupya twamanya ukuti Yesu watulangizye ukutemwa lino waipeelisye ukwizapeela umi wakwe pa mulandu witu. (Yoa. 15:13) Tutanga tulipile Yeova na Yesu pa kutemwa kuno yatulanga. Nomba tungalanga ukuti tukataizya muli vino tukacita cila wanda. (Kolo. 3:15) Nupya tukazanwa uku Ciusyo pakuti twaelenganya pali vino Yeova na Yesu yatutemwa nu kulanga ukuti twayatemwa.
15. U mulandu ci uno apakwe na amu mfwele na zyuze yacindikila sana ilambo?
15Tukataizya pi lambo. (Mate. 20:28) Ilambo lyacindama sana ku yapakwe, pano likalenga yaye sana nu upaalilo. Pa mulandu wakuti yakwata utailo umwi lambo lyakwe Klistu, Yeova wayalenga ukuya alungami nupya wayakala ukuya ana yakwe. (Loma 5:1; 8:15-17, 23) Amu mfwele na zyuze nayo kwene yakataizya api lambo. Pa mulandu wakuti yakwata utailo umwi lambo lyakwe Klistu, Leza akayalola ukuti yasanguluka, yangaomba imilimo ya muzilo nupya yakwata upalilo wakuti yalapusuka “ucuzi ukalamba.” (Kuso. 7:13-15) Inzila yonga ino apakwe na amu mfwele na zyuze yakalangilamo ukuti yakataizya api lambo, u kuzanwa uku Ciusyo cila mwaka.
16. U mulandu ci nauze uno tukazanilwa uku Ciusyo?
16 Mulandu nauze uno tukazanilwa uku Ciusyo u wakuti tukalonda ukuvwila Yesu. Asi mulandu nu upaalilo uno twakwata, swensi kwene tukalonda ukuvwila isunde lino Yesu walanzile usiku pa wanda uno watandike Iciusyo ilyakuti: “Mwacita cii pa kunjiusya.”—1 Kol. 11:23, 24.
VINO SWENSI TUKAIPAKIZYA NGA TUKUZANWA UKU CIUSYO
17. Uzye Iciusyo cikatwazwa uli ukupalama kuli Yeova?
17Tukapalama kuli Yeova. (Yako. 4:8) Wakwe vino twasambilila, Iciusyo cikatwazwa ukulaelenganya pa upaalilo uno Yeova watupeela na pali vino watutemwa. (Yele. 29:11; 1 Yoa. 4:8-10) Nga tukwelenganya pa upaalilo uno twakwata uwa ku nkoleelo na vino Yeova watutemwa, tukatemelwako sana Yeova nupya ucuza witu na aliwe ukakomelako.—Loma 8:38, 39.
18. Uzye ukwelenganya pali vino Yesu wacisile kukatulenga ukucita cani?
18Tukalondesya ukukolanya Yesu. (1 Pet. 2:21) Lino kwasyala panono ukuti kuye Iciusyo, tukaika mano ku kubelenga pa malyasi aakalanda pali vino vyacitike umu mulungu uno Yesu wasyalikizyeko ukuya pano nsi, pa mfwa yakwe na pa kutuutuluka kwakwe. Pa wanda wa Ciusyo manguzi, ilyasi ilikayako likatwiusyako pali vino Yesu watutemwa. (Efes. 5:2; 1 Yoa. 3:16) Nga tukubelenga nu kwelenganya pali vino Yesu waipeelisye, tukalondesya ukutwalilila “ukucita ivintu wakwe vino Yesu wacitanga.”—1 Yoa. 2:6.
19. Tungatwalilila uli ukwikala umu kutemwa kwakwe Leza?
19Tukalonda ukutwalilila ukuya ya cuza yakwe Yeova. (Yuda 20, 21) Tukatwalilila ukwikala umu kutemwa kwakwe Leza lino tukwezya na maka ukumuvwila, kucindika izina lyakwe alino nu kumuzanzya. (Mapi. 27:11; Mate. 6:9; 1 Yoa. 5:3) Ukuzanwa uku Ciusyo kukalenga twalondesya ukucita ivintu wakwe vino Yeova akalonda twacita cila wanda nupya cikaya kwati tukumunena ukuti, ‘Nkulonda ukutwalilila ukwikala umu kutemwa kako amanda pee!’
20. I milandu ci icindame ikalenga twazanwa uku Ciusyo?
20 Asi mulandu upaalilo witu u wa kwikala ukwi yulu nanti pano nsi, swensi kwene twakwata imilandu icindame iikalenga twazanwa uku Ciusyo. Cila mwaka pa wanda wa Ciusyo, tukaiusya imfwa iya muntu wino twatemwa sana kuli kuti Yesu Klistu. Ni cacila vyonsi, tukaiusya vino Yeova watulangizye ukutemwa lino wapeezile Umwanakwe ilambo. Umwaka uu, Iciusyo cilayako manguzi pali Cisano, pa 15 Epuleo, 2022. Pa mulandu wakuti twatemwa Yeova na Yesu, kusi icili consi icilinzile ukutulesya ukuzanwa uku Ciusyo ca mfwa yakwe Yesu.
LWIMBO NA. 16 Lumbanyini Jah pa Mwanakwe Umupakwe
^ pala. 5 Asi mulandu twakwata upaalilo uwa kuya ukwi yulu nanti uwa kwikala umu paladaise pano nsi, swensi kwene tukalondesya ukuzanwa uku Ciusyo cila mwaka. Mu cipande ci tumalanda pa milandu icindame iyaya umu Malembo ikalenga twazanwa uku Ciusyo alino na vino tukaipakizya nga tukucita vivyo.
^ pala. 4 Nga mukulonda ukumanyilapo na vyuze pa upangano upya nu upangano wa Wene, lolini cipande icatangi “Mulaya ya Simapepo mu Wene” icali mu Lupungu Lwa Mulinzi lwakwe Okotoba 15, 2014, pa mafwa 15-17.
^ pala. 10 Pakuti mumanyilepo na vyuze pa ntuwa ziili izyalumbulwa muli Ezekelo cipande 37, lolini cipande icakuti “Mauzyo Yano Aakabelenga Yakauzya” icali umu Lupungu Lwa Mulinzi lwakwe Julai 2016.
