CIPANDE CA KUSAMBILILAMO 1
“Yayo Akalonda Yeova Yatalulilwa Nanti Acimwi Cisuma”
ILEMBO LYA MWAKA WA 2022: “Yayo akalonda Yeova yatalulilwa nanti acimwi cisuma.”—MASA. 34:10, NWT.
LWIMBO NA. 4 ‘Yeova U Mucemi Wane’
VINO TUMASAMBILILAPO *
Devedi wayuvwanga ukuti atuulilwe “nanti acimwi cisuma” nanti sile alino wali ni ntazi (Lolini mapalaglafu 1-3) *
1. Iintanzi ci imwi ino Devedi wakweti?
DEVEDI utukanga, pano yalondanga kumukoma. Saulo umwene uwa aina Izlaeli walondanga ukumukoma. Lino Devedi walondanga ivyakulya, waile umu musumba wa Nobu kuno waile alenga imikate 5 sile. (1 Sam. 21:1, 3) Lyene pa cisila, wene na aonsi yano wali nayo yaile iikala umu lucengo. (1 Sam. 22:1) U mulandu ci uno Devedi wakwatiile intazi ii?
2. I viipe ci vino Saulo wacisile? (1 Samueli 23:16, 17)
2 Saulo uvwilanga Devedi uzuwa pa mulandu wakuti insita izingi wacimvyanga umu ulwi nupya antu aingi yamutemilwe nu kumucindika. Saulo wamanyile ukuti Yeova wamukanyile pa mulandu wakuti ataali ni cuvwila nu kuti wasoolwile Devedi ukuti aliwe akaye umwene. (Belengini 1 Samueli 23:16, 17.) Pa mulandu wakuti Saulo wali u mwene umu Izlaeli wakweti asilika aingi na antu amutungililanga, Devedi walondekwanga ukuutuka pakuti apusuke. Uzye Saulo welenganyanga ukuti wali nu kulesya mapange yakwe Leza akulenga Devedi ukuya umwene? (Eza. 55:11) Baibo italandapo ivya musango uu, nomba twasininkizya icintu conga icakuti: Saulo wikanga umi wakwe umu uzanzo. Yayo aakalwisya Leza yasicimvya!
3. Uzye Devedi wayuvwanga uli pali vino vyamucitikiile?
3 Devedi wali u muntu umufuuke. Ataisoolwelile ukuti aye umwene wa ina Izlaeli. Yeova u wamusolwile ukuti aye umwene. (1 Sam. 16:1, 12, 13) Saulo wapasile sana Devedi. Nomba Devedi atapeezile Yeova umulandu pa uzanzo uno walimo nanti ukuilizyanya lino wakweti ivyakulya ivinono nu kuyafisama umu lucengo. Lelo, cifwile lino wali umu lucengo kwene, alino walemvile ulwimbo umwaya amazwi ya kulumbanya aali umwi lembo apafumile icipande cii akuti: “Lelo yayo akalonda Yeova yatalulilwa nanti acimwi cisuma.”—Masa. 34:10.
4. A mauzyo ci yano tumaasuka, nupya u mulandu ci uno iyacindamila?
4 Aomvi yakwe Yeova aingi ndakai insita zimwi yasikwata ivyakulya ni vintu vyuze ivikalondekwa umu umi. * Nupya vii vikucitika sana umu nsita ii lino kuli ulwale uwipisye. Lino tukuya tukupalamila uku “ucuzi ukalamba,” ivintu vimayanga vikwipilako sile. (Mate. 24:21) Lino tukwelenganya pa visinka vii, lekini twasuke mauzyo yaa ali 4: U mu nzila ci muno Devedi aatulilwe “nanti acimwi cisuma”? U mulandu ci uno tulinzile ukuyelezezya ukuteeka umwenzo kuli vino tukweti? U mulandu ci tulinzile ukutailila ukuti Yeova alatusakamala? Nupya tungaipekanya uli kuli vino viliza uku nkoleelo?
“NTALUULILWA CIMWI”
5-6. Uzye ilembo lya Masamu 23:1-6 likatwazwa uli ukuvwikisya muno Devedi walozizye lino watiile aomvi yakwe Yeova “yatalulilwa nanti acimwi cisuma”?
5 Uzye Devedi walozizye mwi lino walanzile ukuti aomvi yakwe Yeova “yatalulilwa nanti acimwi cisuma”? Tungamanya muno walozizye ndi cakuti twabelenga amazwi akolaneko aaya umu Musamu 23. (Belengini Masamu 23:1-6.) Devedi watandike masamu yaa na mazwi yakuti: “Leza ali mucemi wane. Ntaluulilwa cimwi.” Mu vikomo vyuze ivyasyala umwi samu lii, Devedi walanzile pa vintu ivicindame wakwe, ivintu ivisuma vino Yeova wamupeezile pa mulandu wakuti wazumiile ukuti u wali Kacema wakwe. Watile Yeova akantungulula “umu nzila zya ololoke” lino ivintu ivimuzipila na lino akweti intazi. Devedi wamanyile ukuti “mulemvwe” uno Yeova wamutwalangako utali nu kuya uwaula intazi. Insita zimwi wali nu kutoovoka, cali kwati akupita “umu mukonko mufitisye” nupya alwani yali nu kumuzanza. Nomba vino Yeova wali u Mucemi wakwe, Devedi ataali nu kutiina “iciipe icili consi.”
6 Fwandi twazana icasuko ukwi iuzyo ilyakuti: U mu nzila ci muno Devedi aatulilwe “nanti acimwi cisuma”? Wakweti vyonsi vino walondekwanga pakuti atwalilile ukupalama kuli Yeova. Atalondekwanga ukukwata ivintu vingi pakuti aye ni nsansa. Devedi wateesile umwenzo ku vintu vino Yeova wamupeezile. Icintu icali cicindame sana kuli aliwe a vino Leza wamupaalanga nu kumucingilila.
7. Ukulingana na Luka 21:20-24, iintazi ci zino aina Klistu yakutandikilako aikalanga mu Yudea yakweti?
7 Amazwi yano Devedi walanzile yakalenga twalola ukuti ukukwata ivintu vingi mu umi asi aali cintu cicindame sana. Kwene tungaipakizya ukuomvya ivintu vino twakwata, nomba tutalinzile ukulenga viye ali vicindamisye mu umi witu. Cii ali cintu cimwi cicindame cino aina Klistu akutandikilako aikalanga mu Yudea yuvwikisye. (Belengini Luka 21:20-24.) Yesu wayacelwile ukuti insita yali nu kufika lino ‘asilika yali nu kuzinguluka’ umusumba uwa Yelusalemu. Lino cico cacitike “yatandike ukuutukila uku myamba.” Ndi cakuti yali nu kuutuka mu musumba yali nu kupusuka, lelo yali nu kusya ivintu vingi. Lupungu Lwa Mulinzi lwalanzile ukuti: “Yasiile ivyalo, mang’anda nupya yataasenzile nanti acimwi pa vintu vino yakweti. Yataile ukuti Yeova wali nu kuyacingilila alino nu kuyazwa, nupya yakolezizye ukupepa Yeova ukucila icintu icili consi.”
8. I cintu ci cicindame cino tungasambilila kuli vino vyacitikile aina Klistu akutandikilako aikalanga mu Yudea?
8 I cintu ci cicindame cino tungasambilila kuli vino vyacitikile aina Klistu akutandikilako aikalanga mu Yudea? Lupungu Lwa Mulinzi luno itulandapo lwatile: “Uku nkoleelo tulakwata mezyo alalenga cimanyikwe ndi cakuti ivyuma i vyacindama kuli sweswe nanti u kupusuka ukuli nu kwiza pa mulandu wa kuya acisinka kuli Leza. Lino impela iliza, tulalondekwa ukuzizimizya intazi izipisye nu kuipeelesya ukusya ivintu vino twakwata. Pakuti tuce tupusuke, tulalolendekwa ukucita wakwe vino aina Klistu akutandikilako yacisile.” *
9. Uzye amazwi yano Paulo wanenyile Aebele yakamukomelezya uli?
9 Uzye mungelenganya vino cifwile cataliile aina Klistu yaa ukusya vintu vyonsi vino yakweti nu kutandika ukuyelezya imikalile yuze? Yalondekwanga ukuya nu utailo ukome pakuti yataile ukuti Yeova wali nu kuyapeela vyonsi vino yalondekwanga. Nomba kwali cimwi icali nu kuyazwa. Imyaka 5 ku cisila lino Aina Loma yatatala yazinguluka musumba wa Yelusalemu, mutumwa Paulo wanenyile Aebele amazwi acindame aakuti: “Lekini uwikazi winu utaya uwa kutemwa impiya, lelo mwateeka umwenzo kuli vino mukweti. Pano walanda ukuti: ‘Ntalakusya, nupya ntalatala nkutazyele.’ Pakuti tungasipa nu kulanda ukuti: ‘Yeova ali kaazwa wane; ntalatiina. I cani cino umuntu angancita?’” (Aeb. 13:5, 6) Auvwilile amazwi yano Paulo wayanenyile, cayangukile ukuteeka umwenzo ku vintu ivinono vino yakweti. Yasininkizye ukuti Yeova wali nu kuyasakamala muli vino yalondekwanga. Amazwi yano Paulo walanzile yakalenga tusininkizye ukuti naswe kwene Yeova alatupeela vino tukalondekwa.
“TWATEEKA IMYENZO KULI VIVYO KWENE”
10. I vyani vino Paulo wasambilile vino watunenyileko?
10 Paulo wanenyile Timoti amazwi ali yamwi, nupya naswe kwene yangatwazwa. Watile: “Fwandi nga tukweti ivyakulya ni vyakuzwala, twateeka imyenzo kuli vivyo kwene.” (1 Tim. 6:8) Nomba uzye ci cikusenula ukuti tutalinzile ukulalya ivyakulya ivisuma, ukukwata umwakwikala musuma nanti ukulakala ivyakuzwala ivipya? Mu asi muno Paulo walozizye. Paulo walozyanga mukuti tulinzile ukuteeka imyenzo kuli vino tukweti. (Filipi 4:12) Vii ali vino Paulo wasambilile. Icintu cicindame sana a ucuza witu na Leza, asi cintu cili consi cino twakwata.—Haba. 3:17, 18.
Aina Izlaeli yatulilwe “nanti acimwi” lino yali mu lwanga pa myaka 40. Uzye tungacita uli pakuti tuteeke imyenzo kuli vino twakwata ndakai? (Lolini palaglafu 11) *
11. I vyani vino tukusambilila pa kuteeka umwenzo ku vintu vino tukweti ku mazwi yano Mose wanenyile aina Izlaeli?
11 Vino tukulondekwa vingapusana na vino Yeova akwelenganya ukuti a vino tukulondekwa. Uvwini vino Mose wanenyile aina Izlaeli ala papita imyaka 40 kufuma pano yayelile umu lwanga watile: “Mwiusye vyonsi vino Yawe [nanti Yeova] wamupolelela mu milimo inu yonsi. Wene wamusakamalanga nu kumuwaka lilyo lyonsi lino mwalulumbanga mu lwanga ulutaikulila. Apa myaka yonsi amakumi yani Yawe [nanti Yeova] wali namwe, nupya mutulilwanga icintu nanti cimwi.” (Malan. 2:7) Pa myaka 40, Yeova wapeelanga aina Izilaeli mana wino yalyanga. Ivyakuzwala vino yakweti lino yafumanga mu Ejipti vitatazile visile. (Malan. 8:3, 4) Nanti cakuti yamwi yalengenyanga ukuti ivintu vii vitayakumiine, Mose waiwisyeko ukuti yakweti vyonsi vino yalondekwanga. Yeova akatemwa sana nga walola ukuti tukuteeka umwenzo ku vintu vino tukweti. Akalonda twataizya na pa tuntu sile tunono tuno akatupeela nupya akalonda tumanye ukuti u wila ukufuma kuli aliwe.
MWATAILA UKUTI YEOVA ALAMUSAKAMALA
12. I vyani ivikalangilila ukuti Devedi ataitaile nu kuti wataile Yeova?
12 Devedi wamanyile ukuti Yeova waya uwa cumi nu kuti akasakamala yayo yonsi amutemwa. Nanti cakuti Devedi wali mu uzanzo lino walembanga Masamu 34, utailo wakwe wakomileko nupya wasininkizye ukuti “umungeli wakwe Yawe [nanti Yeova]” wamucingililanga. (Masa. 34:7) Devedi afwile wakolanyanga malaika wakwe Yeova uku musilika ali mu nkambi akaikako mano nu kulolekesya kuno alwani yakwiza. Nanti cakuti Devedi wali u musipe nupya Yeova wamulavile ukuti wali nu kuya umwene, atataile ukuti vino wamanyile ukuomvya ningo ica kuvwintilako amawe nu lupanga vyali nu kumwazwa ukucimvya umulwani wakwe. (1 Sam. 16:13; 24:12) Devedi wataile Leza nu kusininkizya ukuti malaika wakwe Yeova akapusya yayo akatiina Yeova. Ndakai tusienekela ukuti Yeova angatucingilila umu cizungusyo. Nomba twamanya ukuti yonsi aakataila Yeova yalaya nu umi uwa manda pe nanti cakuti yangafwa ndakai.
Umu ucuzi ukalamba, Gogi wa ku Magogi alatuzanza umu mang’anda itu. Nomba tukateekeziwa ukumanya ukuti Yesu na ya malaika yakwe yalalola vino alacita nupya yalatwazwa (Lolini palaglafu 13)
13. Lino Gogi wa ku Magogi alatuzanza, u mulandu ci uno tulalolekela kwati tutakweti uwakutucingilila, nupya u mulandu ci uno tutalinzile ukutiinila? (Lolini icikope icili pa nkupo.)
13 Uku nkoleelo, utailo uno twakwata muli Yeova uwakuti alatucingilila uleziwa. Lino Gogi wa ku Magogi kuli kuti inko izilaombela pamwi alanzanza antu yakwe Leza, tulaalola kwati yamatukoma. Tulalondekwa ukutaila ukuti Yeova alatucingilila. Ku yantu amu nsi, tulaaloleka wa mfwele izitakweti uwa kuzicingilila. (Ezek. 38:10-12) Tutalakwata ivyanzo nupya tutalasambiliziwa ivya kulwa ulwi. Amu nsi yalalola kwati i canguke ukutucimvya. Yataamanya ukuti ya malaika yakwe Yeova yaipekanya ukutwazwa, lelo swemo twamanya pano twakwata utailo. Yene yatataila Leza. Yalazunguka sana lino asilika akwi yulu yalatulwila.—Kuso. 19:11, 14, 15.
MWAIPEKANYA NDAKAI KULI VINO VILACITIKA UKU NKOLEELO
14. I vyani vino tulinzile ukucita ndakai pakuti tuipekanye kuli vino vilacitika uku nkoleelo?
14 I vyani vino tungacita ndakai pakuti tuipekanye kuli vino vilacitika uku nkoleelo? Ica kutandikilako, tutalinzile ukulaelenganya ukuti ivintu vino twakwata vyacindama sana, pano wanda umwi tulavisya. Tulinzile ukuteeka imyenzo ku vintu vino twakwata nupya tulinzile ukuya ni nsansa pali ucuza uno twakwata na Yeova. Nga twamanya ningo Leza witu, tulasininkizya ukuti alatucingilila lino Gogi wa ku Magogi alatuzanza.
15. I vintu ci vimwi ivyacitikiile Devedi lino wali umwance ivyalenzile ataile ukuti Yeova wali nu kumwazwa?
15 Uvwini icazwilizye Devedi nupya icingatwazwa ukuipekanyizizya limwi uku ntazi izili nu kwiza uku nkoleelo. Devedi watile: “Muyuvwile mweisikulu mwenga usuma wakwe Yawe [nanti Yeova] vino waya! Wasyuka wiyo akasimwilila kunoli.” (Masa. 34:8) Amazwi yaa yakalondolola umulandu uno Devedi wamanyile ukuti walondekwanga ukutaila ukuti Yeova wali nu kumwazwa. Insita izingi Devedi watailanga muli Yeova, nupya Leza wakwe atatazile amutazyele. Lino Devedi wali umwance, walondekwanga ukulwa na Golyati umwina Filisiti ipombolo nupya wamunenyile ukuti: “Uwanda kwene uu Yawe [nanti Yeova] amakundemela.” (1 Sam. 17:46) Lino papisile insita, Devedi watandike ukuombela umwene Saulo, nomba apa miku ingi Saulo wezyanga ukuti amukome. Nomba Yeova wali na Devedi. (1 Sam. 18:12) Pa mulandu wakuti Devedi waweni vino Yeova wamwazwilizye uku cisila, wamanyile ukuti wali nu kumwazwa mu ntazi zyuze zino wakweti.
16. U mu nzila ci mumwi muno ‘tungayuvwila’ usuma wakwe Yeova?
16 Ndi cakuti tukutaila ukuti Yeova angatwazwa ndakai, ale tulasininkizya ukuti nu ku nkoleelo kwene alatupususya. Tukalondekwa ukuya nu utailo nu kuipeelesya ukutaila Yeova pakuti tulenge aatwingizya incito ukutuzumilizya ukuzanwa uku ukongano wa ciputulwa nanti uwa citungu, nanti ukutucefezyako insita ino tukazanwa uku ncito pakuti twazanwa mu kulongana lyonsi nu mu mulimo wa kusimikila. Tuti limwi aatwingizya incito yatukaanya nupya incito yasila, tungacita uli? Uzye tungataila ukuti Yeova atalatala atusye nanti kututazyela nupya lyonsi alatupeela vino tukulondekwa? (Aeb. 13:5) Aingi aaya umu mulimo wa nsita yonsi yangalondolola vimwi ivikalangilila vino Yeova wayazwile lino yalondekwanga sana uwazwilizyo ukufuma kuli aliwe. Yeova waya uwa cumi.
17. Uzye ilembo lya mwaka wa 2022 likutuuli, nupya u mulandu ci uno ililingila?
17 Pa mulandu wakuti Yeova waya naswe, tutalinzile ukulasakamala ivili nu kucitika uku nkoleelo. Leza witu atalatala atutazyele ndi cakuti twatwalilila ukwika Uwene wakwe inkoleelo. Pakuti twaipekanya uku ntazi izili nu kwiza uku nkoleelo na pakuti tutaile ukuti Yeova atalatala atutazyele, Iumba Ilikatungulula lyasoolwile ilembo lya Masamu 34:10 ukuya ilembo lya mwaka uwa mu 2022 ilikati: “Yayo akalonda Yeova yatalulilwa nanti acimwi cisuma.”
LWIMBO NA. 38 Alamwazwa Ukuya Akome
^ pala. 5 Ilembo lya mwaka wa 2022 lifumile pa Masamu 34:10 apakati: “Yayo akalonda Yeova yatalulilwa nanti acimwi cisuma.” Aomvi yakwe Yeova aingi yatakwata impiya izingi nanti ivintu ivingi. Nomba u mulandu ci uno tungalandila ukuti yasiulilwa “nanti acimwi cisuma”? Nupya uzye ukumanya vino icikomo cii cikapiliula, kungatwazwa uli ukuipekanya uku ntazi izili nu kwiza uku nkoleelo?
^ pala. 4 Lolini icipande cakuti “Mauzyo Yano Aakabelenga Yakauzya” icali umu Lupungu Lwa Mulinzi lwakwe Sepetemba 15, 2014.
^ pala. 8 Lolini Lupungu Lwa Mulinzi lwakwe Mei 1, 1999 apifwa 19.
^ pala. 54 ULONDOLOZI WA CIKOPE: Nanti sile alino Devedi wafisime umu lucengo ala akuutuka umwene Saulo, wataizyanga pali vino Yeova wamucitilanga.
^ pala. 56 ULONDOLOZI WA CIKOPE: Lino aina Izlaeli yafumile mu Ejipti, Yeova wayapeelanga mana wino yalyanga nupya ivyakuzwala vyao vitasilanga.
