IZWI lino yasenula ilyakuti “iceleta” muli Baibo Uwa Malembo ya Nsi Ipya likalozya nu ku maceleta apusane pusane. (Mili. 8:28, 29, 38) Nomba cikaloleka kwati iceleta lino Umwina Etiopia wakwezilemo lyali ilikulu ukucila pa maceleta yano yakaomvya umu nkondo nu mu kucimvyanya. Lolini ivisinka ivyalondelelapo ivikutungilila icisinka cii.

Umwina Etiopia uwali acilolo umukalamba wapisile intamfu itali. Umonsi wii awino “namwene Kandake uwa ku Etiopia wapeezile amaka, nupya u wangalilanga ivyuma vyakwe namwene vyonsi.” (Mili. 8:27) Mpiti, Etiopia yuminkine ni ncende ya Sudan iyayako ndakai alino ni ncende imwi iya Ejipti. Nanti icakuti umonsi wii limwi atapisile umwi celeta lyonga pa lwendo lwakwe lonsi wakweti iviya ivingi vino wasenzile. Maceleta yano yaomvyanga mu manda ya atumwa uku kusendela antu yakwatanga matayala 4. Ibuku limwi (Acts An— Exegetical Commentary) lyalanzile ukuti “maceleta yaya yangasenda iviya ivingi sana, nupya akwelangamo ikalanga ningo cii calenganga yapita intamfu itali.”

Filipi wazanyile umwina Etiopia akubelenga. Baibo ikalanda ukuti “Filipi wasimwile aya azana iceleta nupya uvwile mutungwi akubelenga ivyalembwa vyakwe kasesema Ezaya.” (Mili. 8:30) Maceleta yaa yatasimulanga. Pa mulandu wakuti iceleta litasimulanga, calenzile mutungwi ukukwata isyuko lya kubelenga nupya cazwile na Filipi uwapitanga pansi ukuzana iceleta.

Umwina Etiopia “wapaapasile Filipi ukuti akwele umwi celeta nu kwikala nawe.” (Mili. 8:31) Maceleta yano yakaomvya umu kucimvyanya, yakaimilila pa kupisya. Nomba iceleta lino mutungwi wakwezilemo lyakweti incende apakwika iviya alino na apaakwikala mutungwi na Filipi.

Ukulingana ni ilembo lya Milimo icipande 8 alino ni vyalembwa vya mpiti, impapulo zitu izyalikwene zyalanda ukuti Umwina Etiopia wakwezile umwi iceleta ilikulu sana ukucila lino yakaomvya umu nkondo alino nu mu kucimvyanya.