1-2. I ntazi ci zino aomvi yakwe Yeova acisinka yangakwata?

 NDI cakuti iviipe vyacitika, umi witu ungasenuka umu nsita sile inono. Wakwe, umwina Luis a yamuzanyile nu ulwale uwipisye wakwe kansa. Dokota wayanenyile ukuti iyasyala sile ni myezi inono ala yafwa. Ya Monika na ya iya yali apamviwe umu mulimo wakwe Leza. Lyene wanda umwi, ya Monika yizile iyamanya ukuti ya iya yacitanga uluyembu pa myaka iingi. Nkazi Olivia umusimbe wafumile umu ng’anda pa mulandu ni mvula ya cimuza icipisye iyali nu kwiza. Lino yawezile, yazanyile ing’anda yao yatiyononeka. Umu nsita sile inono maumi ya yantu yaa yasenwike. Uzye kwaya iviipe vimwi ivyamucitikila ivyalenga umi winu ukusenuka?

² Nanti cakuti sweswe aomvi yakwe Yeova acisinka, tukakwata intazi nupya tukalwala, wakwe vino caya uku yantu yonsi. Nupya tukazizimizya ukutukaanya nu kucuziwa ukufuma uku yantu aatatemwa Leza. Nanti cakuti Yeova asilesya iviipe ukutucitikila, walaya ukuti alaatwazwa. (Eza. 41:10) Ndi cakuti Yeova watwazwa, tungatwalilila ukuya ni nsansa, tungapingula ningo pa vintu, nu kutwalilila ukuya acisinka kuli aliwe na lino itukwata intazi iipisye. Umu cipande cii tumasambilila pa vintu 4 vino Yeova akaomvya pa kutwazwa lino twakwata intazi. Nupya tumasambilila na pali vino tungacita pakuti Yeova atwazwe.

 YEOVA ALAMUCINGILILA

3. I vyani ivingatutalila ukucita ndi cakuti twakwata intazi?

³ Intazi ikayapo. Ndi cakuti twakwata intazi, cingatutalila ukulaelenganya ningo nu kulapingula ningo pa vintu. U mulandu ci? Pano tukaya sana nu ulanda nupya tukasakamikwa. Tungayuvwa kwati tukupita muli kungwi, nupya tusikulola ningo kuno tukuya. Elenganyini pali vino ya nkazi yano itulandapo ya yuvwile lino yali ni ntazi. Ya Olivia yatiile: “Lino imvula iya cimuza icipisye yononyile ing’anda yane, nayuvwile kwati imponga nupya nasakamile.” Ya Monika yalanzile pali vino ya iya yatiile ukuya na ucisinka ukuti: “Nuvwile sana uyi. Nuvwile kwati umwi wantota nu mupeni. Navilwanga ukucita ivintu wakwe vino naombanga mpiti. Ntatazile inelenganyapo ukuti vii vingancitikila.” Uzye Yeova walaya ukuti alatwazwa uli nga twasakamikwa?

4. Ukulingana na Filipi 4:​6, 7 i vyani vino Yeova watulaya?

⁴ Vino Yeova akacita. Walaya ukutupeela cino Baibo ikaama ukuti “umutende wakwe Leza.” (Belengini Filipi 4:​6, 7.) Umutende uu u mutende wa mu melenganyo uukaiza pa mulandu nu kukwata ucuza usuma na Yeova. Umutende uu “uwacila imyelenganyizizye yonsi” wazipa ukucila na vino tungelenganya. Uzye mwatala mwakwatapo umutende wa mu melenganyo pa cisila ca kupepa kuli Yeova? Mutende uno muvwile u “mutende wakwe Leza.”

5. Uzye umutende wakwe Leza ukacingilila uli imyenzo na melenganyo itu?

⁵ Filipi 4:7 yalanda nu kuti umutende wakwe Leza “ulacingilila imyenzo inu na melenganyo inu.” Izwi lyakuti ‘ukucingilila’ lyaomviwanga uku yasilika acingililanga umusumba pakuti yatauzanza. Antu aikalanga umu musumba yalalanga ukwaula ukusakamala pano ala iyamanya ukuti kuli asilika aakulinda apa mpongolo. Vikwene ali vino nu mutende wakwe Leza ukacingilila imyenzo itu na melenganyo itu, nupya tukaya ateekele, pano ala itumanya ukuti itucingililwa. (Masa. 4:8) Wakwe vino cali kuli Hana, nanti cakuti intazi zino tukweti zitanga zisile papo kwene, tungaya nu mutende. (1 Sam. 1:​16-18) Nupya ndi cakuti twateeka umwenzo, cikatwangukila ukwelenganya ningo nu kupingula ningo pa vintu.

6. I vyani vino tulinzile ukucita pakuti twaipakizya umutende wakwe Leza? (Loliniko ni cikope.)

⁶ Vino tulinzile ukucita. Ndi cakuti mwaya ni ntazi, mwalenga Leza ukuti amucingilile. U munzila ci? Mwatwalilila ukupepa suka imukwata umutende wakwe Leza. (Luka 11:9; 1 Tesa. 5:17) Ya Luis yano itulandapo pa  kutandika, yalondolwile icayazwile ukuzizimizya pamwi na aci yao ya Ana, lino yamanyile ukuti yali nu kufwa umu myezi sile inono. Yatiile: “Lino ivya musango uu vyacitika, cikatala sana ukupingulapo ningo pa milwazizye na pa vintu vyuze. Lelo ipepo lyatwazwile ukuya nu mutende umu nsita ii itale.” Ya Luis na aci yao yalanzile ukuti yatwalilile ukupepa sana ala yakulenga Yeova ukuti ayapeele umutende uwa mu melenganyo, kuteeka umwenzo, na mano yakupingula ningo pa vintu. Nupya yaweni vino Yeova wayazwanga. Ndi cakuti muli ni ntazi, mwatwalilila ukupepa, nupya Yeova alamupeela umutende uulacingilila umwenzo na melenganyo inu.—Loma 12:12.

YEOVA ALAMUPEELA UMUTENDE

7. I vyani vino limwi tungatandika ukuvwa nga twakwata intazi?

⁷ Intazi ikayapo. Ndi cakuti twakwata intazi vino tukayuvwa, ukwelenganya, na vino tukacita visiya wakwe vino vikaya lyonsi. Wakwe viivi kwene vino uwato ukasunkana sana nga kuli maimbi avino naswe kwene cikaya nga twakwata intazi. Ya Ana, yano itulandapo yalanzile ukuti yayuvwanga ivipusane pusane lino ya Luis yafwile. Yatiile: “Nasakamikwanga nupya naipeelanga imilandu. Nuvwanga uyi pa mfwa yao.” Kulunda pali cii, ya Ana yazukilwanga sana nupya cayatalilanga ukupingula pa vintu vino ya Luis yapingulanga. Insita zimwi yayuvwanga kwati yali pali yemba apali icimuza. Uzye Yeova akatwazwa uli ndi cakuti twatandika ukusakamikwa sana?

8. Ukulingana na Ezaya 33:​6, i vyani vino Yeova watulaya?

⁸ Vino Yeova akacita. Watulaya ukuti alatupeela umutende. (Belengini Ezaya 33:6.) Ndi cakuti icimuza cakatuka pali yemba uwato ukatandika ukusunkana sana. Nomba uwato ukakwata ivintu vimwi umu mbali ivikaazwilizya uwato ukuta ukusunkana sana. Ivintu vii vikalenga uwato ukutwalilila ukupita ningo nu kucingilila antu ali umu wato. Nomba ivintu vii vikaomba ningo ndi cakuti uwato ukuya inkoleelo. Vikwene avino na Yeova akatwalilila ukutukomya nga twatwalilila ukuya acisinka kuli aliwe lino tuli ni ntazi.

9. Uzye iviombelo vyakulondelezyamo ivyeo vingatwazwa uli ukutwalilila ukuya nu mutende? (Loliniko ni cikope.)

⁹ Vino tulinzile ukucita. Ndi cakuti mwakwata intazi, mwaezya papezile amaka inu ukupepa, ukulongana alino nu kuisambilizya. Kwene mutanga mwaomba wakwe vino mwaombanga pa kutandika nomba mwaiusya ukuti Yeova akamyuvwikisya. (Loliniko na Luka 21:​1-4.) Ukulunda pali vino twalandapo, mwakwata insita yakuisambilizya nu  kwelenganya pali vino mukubelenga. U mulandu ci? Yeova akaomvya iuvi lyakwe ukutupeela ivintu ivikatwazwa ukuya nu mutende nga twakwata intazi. Nga mukulonda ivyeo vimwi ivyakumwazwa, mungaomvya JW Laibulale, Watch Tower Publications Index, alino ni Ibuku Ilya Kwazwa Inte Zyakwe Yeova Ukulondelezya Ivyeo. Ya Monika, yano itulandapo yalanzile ukuti yaovyanga iviombelo ivya kulondelezyamo ivyeo nga yatandika ukuvwa sana uyi. Wakwe, yalondelizye api zwi lyakuti “ukusoka.” Apa nsita yuze, yalondelizye pizwi lyakuti “kufutuka” nanti “ucisinka.” Yatwalililanga ukubelenga mpaka iyuvwako ningo. Yatiile: “Lino natandike ukulondelezya ntaipakizyanga nomba lino natwalilile natandike ukuvwa kwati Yeova atankumbatila. Lino natwalilile ukubelenga nizile manya ukuti Yeova wamanyile vino na yuvwanga nupya wangazwanga.” Ukwazwa kwa musango uu ukukafuma kuli Yeova kungamwazwa ukutwalilila ukuya nu mutende.—Masa. 119:​143, 144.

YEOVA ALAAMITUNGILILA

10. Uzye tukauvwa uli ndi cakuti iviipe vyacitika?

¹⁰ Intazi ikayapo. Ndi cakuti kwacitika iviipe vimwi, insita zimwi tungauvwa umwili ukutonta alino nu mu melenganyo. Tungayuvwa wakwe vino umuntu aakasimulisya ulwilo angayuvwa ndi cakuti wacisika watandika ukupitila ni intuwa. Tungavilwa ukucita ivintu vino twacitanga uku cisila, nupya limwi tungata ukulalondesya ukucita ivintu vino twaipakizyanga ukucita. Wakwe vino cali kuli Eliya, naswe kwene cingatutalila ukukatuka nupya tungalonda sile ukulaala. (1 Yamw. 19:​5-7) I vyani vino Yeova walaya ukutucitila ndi cakuti tuvwa ukutonta?

11. Iinzila ci nayuze ino Yeova akatwazwilamo? (Masamu 94:18)

¹¹ Vino Yeova akacita. Walaya ukuti alamutungilila. (Belengini Masamu 94:18.) Wakwe viivi kwene vino umuntu aakasimula nga wacisika akalondekwa aakumwazwa pakuti atwalilile ukusimula, avino naswe tukalondekwa Yeova ukutwazwa pakuti tutwalilile ukumuombela. Lino twakwata intazi, Yeova watunena ukuti: “Nene ne Leza winu namamukomyanga, ali cino fwandi nkumunena inti, ‘Mutaoopa, namamwazwanga.’” (Eza. 41:13) Umwene Devedi waweni vino Leza wamwazwanga. Lino wakweti intazi alino na alwani, wanenyile Yeova ukuti: “Ikasa lyako, ilyakwe ndilo lyancindamika.” (Masa. 18:35) Nomba uzye Yeova akatwazwa uli?

12. Aaweni yano Yeova akaomvya pa kutwazwa lino twatonta?

 ¹² Yeova akatwazwa ukuomvya antu yauze ndi cakuti twakwata intazi. Wakwe, lino Devedi uvwile ukutonta, cuzakwe Yonatani wamutandalile pakuti akamukomelezya alino nu kumwazwa. (1 Sam. 23:​16, 17) Umu nzila ili imwi, Yeova wasoolwile Elisya pakuti akakomelezye Eliya. (1 Yamw. 19:​16, 21; 2 Yamw. 2:2) Ndakai, Yeova angaomvya ya lupwa, ivyuza, alino na ya eluda pa kutwazwa. Lelo ndi cakuti itusakamikwa sana, tusilonda ukuya pamwi na antu. Tukalonda sile ukuya swenga. Caya sile ningo ukuyuvwa vivyo. Nomba i vyani vino tulinzile ukucita pakuti Yeova atwazwe?

13. I vyani vino tulinzile ukucita pakuti tuipakizye ukwazwa kwakwe Yeova? (Loliniko ni cikope.)

¹³ Vino tulinzile ukucita. Mwaezya na maka ukukanaya mwenga. Ndi cakuti tukuya swenga, tungaelenganya sile pali sweineco na pa ntazi zino tukweti. Nupya ukucita vii kungalenga tutapingula ningo pa vintu. (Mapi. 18:1) Ukuya kwene, swensi tukalonda ukuya swenga, sana sana ndi cakuti twakwata intazi. Lelo ndi cakuti twatwalilila ukuya swenga pa nsita itali, antu yano Yeova akaomvya apa kutwazwa yangavilwa ukutwazwa. Asi mulandu na vino ivintu ivitala, mwapokelela ukwazwa ukufuma kuli ya lupwa, ivyuza, alino na ya eluda. Mwayalola ukuti ali yano Yeova akuomvya apa kumwazwa.—Mapi. 17:17; Eza. 32:​1, 2.

YEOVA ALAMITEEKEZYA

14. I vintu ci vimwi ivingalenga tuvwe intete?

¹⁴ Intazi ikayapo. Insita zimwi vimwi ivikacitika vikalenga tuvwe intete. Muli Baibo, aomvi yakwe Leza acisinka yalanda pa nsita ino yuvwile intete pa mulandu na alwani yao nanti intazi zyuze. (Masa. 18:4; 55:​1, 5) Naswe kwene ndakai, limwi yangatucuzya pa sukulu, ku ncito, kuli ya lupwa, nanti amu uteeko. Limwi tungasakamala ukuti tumafwa pa mulandu nu kulwala. Ivya musango uu nga vyacitika, limwi tungayuvwa wa mwana umunono aakuyuvwa ukuti kusi uwakumwazwa. Uzye Yeova akatwazwa uli ndi cakuti ivya musango uu vikutucitikila?

15. Ukulingana na Masamu 94:​19, i vyani vino Yeova alatucitila?

¹⁵ Vino Yeova akacita. Akatuteekezya nu kutusansamusya. (Belengini Masamu 94:19.) Masamu yaa yangalenga twelenganye pa mwana umunono aakuvwa intete nupya aatavilwa ukukasula pa mulandu ni mvula iikweti  umuza. Tungelenganya ukuti ya isi yiza yamukatusya nupya yamukumbatila mpaka walaala nupya. Nanti cakuti imvula icili ikutoonya, vino ya isi yamukumbatila vyalenga ayuvwa ukuti atacingililwa. Ndi cakuti tuli ni ntazi izikulenga twauvwa intete, tukalondekwa Tata witu uwa kwi yulu ukutukumbatila kufikila tuvwako ningo. Uzye Yeova akatuteekezya uli?

16. I vyani vino tulinzile ukucita pakuti Yeova atuteekezye? (Loliniko ni cikope.)

¹⁶ Vino tulinzile ukucita. Tulinzile ukulaya na Yeova pa nsita itali, kuli kuti ukulapepa kuli aliwe nu kubelenga Izwi lyakwe. (Masa. 77:​1, 12-14) Ndi cakuti mwelezya ukulacita vii, lyonsi lino mwakwata intazi mulalenga uwazwilizyo kuli Tata winu uwa kwi yulu. Mwanena Yeova vyonsi ivikulenga mwauvwa intete ni vikumisakamika. Mwaleka alanda namwe nu kumiteekezya ukuomvya Malembo. (Masa. 119:28) Kubelenga mabuku yamwi amuli Baibo kungamuteekezya. Wakwe, mungakomeleziwa ndi cakuti mwabelenga ibuku lyakwe Yobo, ibuku lya Masamu, na Mapinda, alino na mazwi yakwe Yesu aya muli Mateo icipande 6. Ndi cakuti mwatwalilila ukupepa kuli Yeova nu kubelenga Izwi lyakwe, mulateekeziwa.

17. I vyani vino tungasininkizya?

¹⁷ Tungasininkizya ukuti Yeova alaya naswe lino twakwata intazi. Atalatusya swenga foo. (Masa. 23:4; 94:14) Yeova walaya ukutucingilila, kutupeela umutende, kututungilila, alino nu kututeekezya. Ezaya 26:3 ikalanda ukuti: “We Yawe antu yano yakasumba amano kuli wewe, nu kukutaila, leka yaikala umutende.” Fwandi mwataila Yeova, nupya mwacita vyonsi vino mungacita pakuti mwaipakizya ukwazwa kwakwe Yeova. Ndi cakuti mwacita vivyo, mulaya na maka asi mulandu ni ntazi zino mukweti.