1. I vyani vikaiza umu melenganyo inu nga mwelenganya pali Yeova?

 UZYE mwatala mwelenganyapo pali vino Yeova waya? Ndi cakuti mukupepa kuli aliwe, i vyani vino mukaelenganyapo? Nanti cakuti Yeova asiloleka, Baibo ikamulondolola umu nzila izipusane pusane. Yeova akaamwa ukuti ali ‘mwakuzina’ nupya “u moto ukaonona.” (Masa. 84:11; Aeb. 12:29) Umu cilolwa cino Ezekelo waweni walondolwile Yeova ukuti walolekanga wi iwe liyengese ilya mutengo, icela ca mukuwa, nupya luswepo lwa mulalamfuti. (Ezek. 1:​26-28) Amazwi yamwi yano Baibo yaomvya pa kulondolola Yeova yangatuzungusya nanti kutulenga kuya ni ntete.

2. I vyani ivingalenga yamwi ciyatalile ukupalama kuli Yeova?

² Pa mulandu wakuti tusilola Yeova, limwi cingatutalila ukuzumila ukuti watutemwa. Yamwi yakaelenganya ukuti Yeova atanga ayatemwe pa mulandu ni viipe ivyayacitikiile mpiti. Limwi avyazi yao yatayalanganga ukutemwa. Yeova wamanya vino tukayuvwa nupya wamanya nu mulandu uukalenga catutalila ukupalama kuli aliwe. Pakuti atwazwe ukupalama kuli aliwe, watunena vino waya umwi Izwi lyakwe.

3. U mulandu ci uno tulinzile ukusambilila sana pa kutemwa kwakwe Yeova?

³ Yeova u kutemwa. Baibo ikati, “Leza u kutemwa.” (1 Yoa. 4:8) Akacita ivintu vyonsi pa mulandu nu kutemwa. Leza wakwata sana ukutemwa icakuti akalanga ukutemwa na kuli yayo aatamutemwa. (Mate. 5:​44, 45) Umu cipande cii, tumasambilila pali vino Yeova waya alino na pa kutemwa kwakwe. Lino tukuya tukusambilila pali Leza, alino tukaya tukumutemelwako.

 YEOVA WATUTEMWA SANA

4. Uzye ukutemwa kwakwe Yeova kukalenga mwauvwa uli? (Loliniko ni cikope.)

⁴ “Yeova waya sana nu kutemwa.” (Yako. 5:11) Muli Baibo, Leza waikolanya kuli nyina uwaya nu kutemwa. (Eza. 66:​12, 13) Elenganyini pali vino nyina uwaya nu kutemwa akasakamala umwana wakwe. Akamufukatila ningo nu kulanda nawe umwi izwi ilitekele. Nupya ndi cakuti umwana akulila nanti atalwala, akasininkizya ukuti wamupeela vino akulondekwa. Naswe kwene nga tuli ni intazi, Yeova angatulanga ukutemwa. Kalemba wa masamu walemvile ukuti: “Amizu yane nanti yangamvulila uli, wemo ukantekezya nu kunsansamusya.”—Masa. 94:19.

5. Uzye ukutemwa kwakwe Yeova kungamwazwa uli?

⁵ Yeova waya sana nu kutemwa. (Masa. 103:8.) Asita ukututemwa na lino twaluvyanya. Uluko lwa Ina Izlaeli lwapondekelanga Yeova pa miku iingi, nomba walanganga ukutemwa uku yantu alapilanga lino wayanenanga ati: “Wewe wamutengo ukulu pa manso yane, nupya nakutemwa.” (Eza. 43:​4, 5) Kutemwa kwakwe Leza kutasenuka. Lyonsi kwene tungamutaila. Nanti cakuti twamusosya sana, asitutazyela. Ndi cakuti twalapila nu kuwelela kuli Yeova, tulalola ukuti acili watutemwa. Walaya ukuti ‘alatwelela.’ (Eza. 55:7) Baibo ikalondolola ukutemwa kwakwe Yeova ukuti ‘kukapeela umutende.’—Mili. 3:19.

6. Uzye Zakaliya 2:8 ikatusambilizya vyani pali Yeova?

⁶ Belengini Zakaliya 2:8. Pa mulandu wakuti Yeova watutemwa, akalondesya ukutucingilila. Akauvwa uyi ndi cakuti tuli ni ntazi. Fwandi tungasininkizya ukuti amaasuka nga twapepa ukuti: “Unsunge wakwe vino ungacingilila nyinalinso uwi linso lyako.” (Masa. 17:8) Ilinso lyacindama sana nupya likalondekwa ukulisakamala sana. Fwandi vino Yeova watukolanya ukwi linso lyakwe, caya kwati walanda ukuti, ‘Wensi uwazanza mwemwe, mwe yantu yane, ala wazanza icintu cimwi ica mutengo.’

7. U mulandu ci uno tulinzile ukutailila ukuti Yeova watutemwa sana?

⁷ Yeova akalonda tumanye ukuti watutemwa sana swensi wenga na wenga. Lelo Yeova wamanya ukuti pa mulandu ni vyatucitikiile mpiti, limwi tungaelenganya ukuti atanga  atutemwe. Nanti limwi ivikutucitikila vingalenga twatwisika ndi cakuti Yeova watutemwa. I vyani ivilatwazwa ukutaila sana ukuti watutemwa? U kusambilila pali vino Yeova akalanga ukutemwa kuli Yesu, ku yapakwe, alino na kuli swensi.

VINO YEOVA AKALANGA UKUTEMWA

8. U mulandu ci uno Yesu wasininkizizye ukuti Isi wamutemilwe?

⁸ Pa myaka iingi, Yeova na Yesu yali pamwi ukwi yulu nupya yaipakizyanga ucuza usuma. Ucuza uu kutaya uwaukwatapo. Yeova walanzile umukulungatika ukuti watemwa Yesu, wakwe vino tukabelenga pali Mateo 17:5. Limwi Yeova nga walanzile sile ukuti, ‘Wii ali wino nkazangilamo.’ Lelo walondanga tumanye ukuti watemwa sana Yesu, fwandi wamwamile ukuti “u Mwanane umutemwikwe.” Yeova watemilwe Yesu viivi kwene vino wali na pali vino wali nu kucita. (Efes. 1:7) Nupya Yesu atatwisikanga ukuti Isi wamutemilwe. Yeova watemilwe sana Yesu nupya na Yesu kwene wayuvwanga ukuti watemwikwa sana. Nupya lyonsi Yesu walandanga ukuti Isi wamutemwa.—Yoa. 3:35; 10:17; 17:24.

9. A mazwi ci aakalangilila vino Yeova watemwa apakwe? Londololini. (Loma 5:5)

⁹ Yeova walangilila ukuti watemwa apakwe. (Belengini Loma 5:5.) Lolini amazwi aya pa cikomo cii aakalangilila vino Yeova watemwa apakwe, amazwi akuti, “ukutemwa kwakwe Leza kwazula umu myenzo” yao. Ibuku limwi ilyakulondelezyamo ivyeo lyakolanya ukutemwa kwakwe Leza uku luzi. Cilangililo cii cikulangilila vino Yeova watemwa sana apakwe. Nupya apakwe yamanya ukuti ‘yatemwikwa na Leza.’ (Yuda 1) Umutumwa Yoani walondolwile vino apakwe yonsi yakayuvwa lino watiile: “Lolini vino Tata watutemwa, tukaamwa ukuti sweswe yana yakwe Leza.” (1 Yoa. 3:1) Uzye Yeova watemwa sile apakwe? Awe foo, Yeova watutemwa swensi kwene.

10. I vyani ivikalangilila ukuti Yeova wamitemwa?

¹⁰ I vyani ivikalangilila ukuti Yeova wamitemwa? I lambo lino wapeezile, nupya kutaya umuntu ali wensi aangalanga ukutemwa wakwe kuu. (Yoa. 3:16; Loma 5:8) Yeova wapeezile Umwanakwe wino watemwa ukwizafwila antu yonsi pakuti tungelelwa imembu nu kuya ya cuza yakwe. (1 Yoa. 4:10) Nga tukwelenganya pali vino Yeova na Yesu yatucitila, cingalenga tumanye vino yatutemwa swensi wenga na wenga. (Gala. 2:20) Yeova atapeezile ilambo pa mulandu sile uwakuti ali vino walondekwanga ukucita. Lelo wapeezile lambo pa mulandu nu kutemwa. Yeova walanga ukuti watutemwa lino wapeezile icintu icicindame sana kuli aliwe, kuli kuti Yesu. Yeova walesile Umwanakwe ukucula nu kufwa pa mulandu witu.

11. I vyani vino tukasambilila pali Yelemiya 31:3?

¹¹ Yeova asiuvwa sile ukuti watutemwa, lelo akatunena nu kuti watutemwa. (Belengini Yelemiya 31:3.) Yeova watupalamika kuli aliwe pa mulandu wakuti watutemwa. (Loliniko na Malango 7:​7, 8.) Kusi icili consi nanti muntu ali wensi angatupatukanya uku kutemwa kwakwe Leza. (Loma 8:​38, 39) Uzye ukutemwa kwakwe Leza kukalenga mwauvwa uli? Belengini Masamu icipande 23, alino mulole vino Devedi wayuvwanga pali vino Yeova wamulanganga ukutemwa na vino wamusakamalanga, nupya mulole na vino vii vingalenga naswe kwene twayuvwa.

UZYE UKUTEMWA KWAKWE YEOVA KUKALENGA MWAUVWA ULI?

12. Uzye mungalondolola uli Masamu icipande 23?

¹² Belengini Masamu 23:​1-6. Masamu cipande 23 u lwimbo luno Devedi wimvile  muno walondolwile vino Yeova wamutemilwe na vino wamusakamalanga. Mu masamu yaa, Devedi walanzile pali ucuza uwali pali aliwe nu Mucemi wakwe, Yeova. Devedi walesile ukuti Yeova amutungulula nupya wasintilile pali aliwe, na cii calenzile ayuvwa ukuti wacingililwa. Devedi wamanyile ukuti Yeova wali nu kulamulanga ukutemwa cila wanda umu umi wakwe onsi. I vyani ivyalenzile ayuvwa vivyo?

13. U mulandu ci uno Devedi wasininkizizye ukuti Yeova wamusakamalanga?

¹³ “Ntaluulilwa cimwi.” Devedi wayuvwanga ukuti Yeova wamusakamalanga pano lyonsi wamupeelanga vyonsi vino walondekwanga. Nupya Devedi wamanyile ukuti wali a cuza wakwe Yeova nu kuti wamutemilwe. Nupya vii vyalenzile asininkizye ukuti asi mulandu ni vyali nu kumucitikila uku nkoleelo, Yeova wali nu kumusakamala. Pa mulandu wakuti Devedi wataile ukuti Yeova wamutemilwe nupya wamusakamalanga, atasakamikwanga pa cili consi lelo wali ni nsansa nupya wateesile umwenzo kuli vino wakweti.—Masa. 16:11.

14. Uzye Yeova akatusakamala uli?

¹⁴ Yeova akatusakamala sana, sana sana lino twakwata intazi. Ya Claire, a atiyaombela pa Betele pa myaka kucila pali 20, yatamanyile vino yali nu kwazwa ulupwa lwao lino lwakweti intazi. Ya isi yaculanga nu ulwalwe wakwe situloko, nkazi yao wazinzilwe, nupya ulupwa lwao lwayazile bizinesi ino yacitanga nupya ya banki yayaposile ing’anda. Uzye Yeova wayasakamile uli? Ya Claire yatiile: “Yeova wasininkizye ukuti ulupwa lwitu lukukwata vino lukulondekwa cila wanda. Pa miku iingi Yeova  watupeelanga ivintu ukucila na pali vino twalondekwanga. Lyonsi nkaelenganya pali vino Yeova watwazwanga nupya ntalatala nilile vino watulanganga ukutemwa. Ukwelenganya pali vyonsi vii, kwangazwa ukutwalilila ukuzizimizya intazi.”

15. I cani icalenzile Devedi ayuvwa ukuti wali na maka? (Loliniko ni cikope.)

¹⁵ “Akawezezya umwenzo wane amaka.” Insita zimwi, Devedi wasakamikwanga sana pa mulandu ni intazi zino wakweti. (Masa. 18:​4-6) Nanti ciye vivyo, ukutemwa kwakwe Yeova na vino wamusakamalanga kwalenzile ateekeziwa. Yeova watungululanga cuza wakwe umutonte “uku mulemvwe” nu ku “vilambe vyamanzi asengame, azuke.” Na cii calenzile Devedi akomeleke nu kutwalilila ukuombela Yeova nu luzango.—Masa. 18:​28-32.

16. Uzye ukutemwa kwakwe Yeova kukamiteekezya uli?

¹⁶ Naswe kwene ndakai ‘ukutemwa kwakwe Yeova ukusisila’ u kukalenga twakwata amaka akuzizimizya intazi zino tukakwata. (Ndosya 3:22; Kolo. 1:11) Elenganyini pali vino vyacitikiile ya Rachel. Yuvwile sana uyi lino ya iya yayasile nu kusya Yeova lino kwali cikuko cakwe COVID-19. I vyani vino Yeova wayacitiile? Yalanzile ukuti: “Yeova wasininkizye ukuti lyonsi nkuyuvwa ukuti natemwikwa. Wampeezile ivyuza ivyayanga nani lyonsi, yandetelanga ivyakulya, kuntumila mameseji na malembo aakunkomelezya, yamwentwilanga, nupya lyonsi yanjiusyangako ukuti Yeova wansakamalanga. Nkataizya sana Yeova pali vino wampeela ulupwa ulukulu ulwantemwa.”

17. U mulandu ci uno Devedi atatiinilanga “iciipe icili consi”?

¹⁷ ‘Ntange ntiine iciipe icili consi, pano we Yeova uli nane.’ Insita izingi umi wakwe Devedi wayanga umu uzanzo, nupya wakweti alwani amaka aingi. Lelo ukutemwa kwakwe Yeova kwalenganga ayuvwa ukuti wacingililwe. Devedi wayuvwanga ukuti Yeova wayanga nawe insita zyonsi, nupya cii camuteekezyanga. Cii calenzile aimbe ukuti: “[Yeova] wampususya na kuli vyonsi ivya nsakamikanga.” (Masa. 34:4) Nanti cakuti Devedi insita zimwi uvwanga intete, kumanya ukuti Yeova wamutemilwe kwamwazwanga ukuya musipe.

18. Uzye ukutemwa kwakwe Yeova kungamikomya uli lino muli ni ntete?

¹⁸ Uzye ukutemwa kwakwe Yeova kungatukomya  uli lino iviipe vyatucitikila? Ya Susi ya painiya yalondolwile vino yene na ya iya yayuvwile lino umwana wao umulumendo waikomile, yatile: “Ndi cakuti iviipe vya kucitikila umu umi kukaya ukuvwa sana uyi nupya ungauvwa intete izyakuti limwi iviipe na vyuze vingakucitikila. Lelo ukutemwa kwakwe Yeova kwalenga twayuvwa ukuti twacingililwa.” Ya Rachel, yano itulandapo mpiti yatiile: “Uwanda umwi usiku lino nuvwile sana uyi, nupya nasakamiile nu kuvwa sana intete, napefile kuli Yeova ala nkulila. Papo kwene sile nuvwile ukuti wanteekizye, wakwe viivi kwene vino nyina akacita uku mwana, nupya nakaswile. Ntalilila ivyacitiike uwanda uwa.” Ya Tasos ya eluda yayanyefile umu cifungo pa myaka 4 pa mulandu na vino yakanyile ukwingila usilika. Uzye Yeova wayasakamalanga uli? Yatiile: “Yeova wampeezile ivintu ukucila na pali vino nalondekwanga. Cii calenzile imutaile sana. Nupya Yeova waomvizye umupasi wakwe ukungazwa ukuya ni nsansa nanti cakuti nali umu cifungo. Cii cangazwile ukumanya ukuti ndi cakuti napalama sana kuli Yeova, wali nu kulangazwa. Fwandi natandike upainiya wa nsita yonsi ala ncili umu cifungo.”

MWAPALAMA KULI LEZA WINU UWAYA NU KUTEMWA

19. (a) Uzye ukumanya ukuti Leza watutemwa kulakuma uli vino tukalanda umu mapepo itu? (b) I vyani vino mwatemwa sana pali vino Yeova akalanga ukutemwa? (Lolini kambokosi akakuti “ Mazwi Aakatwazwa Ukulola Vino Yeova Watutemwa.”)

¹⁹ Vino itulandapo ivilenga tusininkizye ukuti Yeova, “Leza uwaya nu kutemwa,” waya naswe. (2 Kol. 13:11) Watwikako mano swensi wenga na wenga. Twasininkizya ukuti “kutemwa kwakwe ukwa pe” kwaya naswe. (Masa. 32:10) Ukwelenganya sana pali vino akatulanga ukutemwa, kulalenga twamulola ukuti uwa cumi cumi nupya tulapalama sana kuli aliwe. Tungapepa kuli aliwe ukwaula intete nu kumunena vino tukulonda. Tungamunena vyonsi ivikutusakamika, pano twasininkizya ukuti akatuvwikisya nupya akalondesya ukutwazwa.—Masa. 145:​18, 19.

20. Uzye ukutemwa kwakwe Yeova kukalenga uli tupalame kuli aliwe?

²⁰ Wakwe viivi kwene vino tukapalama uku moto lino ikuzuka, ali vino nu kutemwa kwakwe Yeova kukatupalamika kuli aliwe. Yeova wakwatisya ukutemwa ni cikuuku. Fwandi mwaya ni nsansa pano Yeova wamitemwa. Acino lekini naswe twamunena ukuti: ‘Nakutemwa Yeova.’—Masa. 116:1.