1. U mulandu ci uno cazipila ukulazanwa uku Ciusyo ca mfwa yakwe Yesu?

 UKWAULA nu kutwisika ilambo uupe ucindame sana uno Yeova watupeela. (2 Kol. 9:15) Pa mulandu wakuti Yesu wapeezile umi wakwe, cikalenga ukuti muye ya cuza yakwe Yeova Leza aapalamisye. Nupya calenga nu kuti mukwate upaalilo uwa kwikala amanda pe. Fwandi twakwata imilandu iingi iya kutaizizyapo Yeova uwatupeezile ilambo pa mulandu wakuti watutemwa sana. Pakuti tutwalilile ukulataizya nu kukanailila pali vino Yeova na Yesu yatucitile, Yesu watunenyile ukuti twazanwa uku Ciusyo ca mfwa yakwe cila mwaka.—Luka 22:​19, 20.

2. I vyani vino tumasambilila umu cipande cii?

² Umwaka uu, Ciusyo ca mfwa yakwe Yesu cilaya pa Cibelusi, pa 12 Epuleo, 2025. Ukwaula nu kutwisika swensi kwene tukuipekanya pakuti tukazanweko. Cingazipa sana ndi cakuti lino kwasyala imilungu inono ukuti Ciusyo ciyeko na pa cisila ca Ciusyo, swensi kwene wenga na wenga tukapatuleko insita iya kwelenganya a pali vino Yeova na Yesu yatucitila. Umu cipande cii, tumasambilila pali vino ilambo likatusambilizya pali Yeova na Yesu. Lyene icipande icilondelilepo, cilatwazwa ukumanya ivisuma vino tungaipakizya pa mulandu ni lambo na vino tungalanga ukuti tukataizya api lambo.

VINO ILAMBO LIKATUSAMBILIZYA PALI YEOVA

3. Uzye imfwa ya muntu wenga umumalilike ingalenga uli antu aingi ukukululwa? (Loliniko ni cikope.)

³ Ilambo likatusambilizya pali vino Yeova waya nu mulinganya. (Malan. 32:4) Umu nzila ci? Elenganyini pali cii: Lino Adamu wakanyile ukuvwila Leza, wayembwike nu kufwa. Pa mulandu wakuti sweswe ana yakwe Adamu, naswe kwene sweswe  yayembu nupya tukafwa. (Loma 5:12) Pakuti tukululwe uku luyembu ni mfwa, Yeova watumile Yesu ukuti aize atufwile. Nomba uzye imfwa ya muntu wenga umumalilike ingalenga uli antu aingi ukukululwa? Umutumwa Paulo walondolwile ukuti: “Wakwe vino ucintuvwa wa muntu wenga [Adamu] walenga antu aingi ukuya ayembu, avino ni cuvwila ca muntu wenga [Yesu] cilalenga antu aingi ukuya alungami.” (Loma 5:19; 1 Tim. 2:6) Paulo walozizye umukuti antu yonsi aayembu nupya yakafwa pa mulandu wakuti umuntu wenga umumalilike wakanyile ukuvwila Leza. Fwandi pakuti tukululwe uku luyembu ni mfwa, kwalondekwanga umuntu umumalilike uwali nu kuvwila Leza.

4. U mulandu ci uno Yeova atalesile sile ukuti ana yakwe Adamu aali ni cuvwila yaikala amanda pe?

⁴ Uzye Yesu walondekwanga ukufwa pakuti atukulule? U mulandu ci uno Yeova atalesile sile ukuti ana yakwe Adamu aali ni cuvwila yaikala amanda pe? Swe yantunze tungelenganya ukuti yii ali nzila iyali nu kuya isuma iya kumalilamo intazi yii. Lelo yii itaali nu kuya inzila isuma kuli Yeova. Pa mulandu wakuti Yeova waya nu mulinganya, acita vivyo nga calolike ukuti Adamu atayembwike nu kuti ana yakwe yataali nu kuya ayembu. Nomba vii asi vino cali.

5. U mulandu ci uno tungasininkizizya ukuti Yeova lyonsi akacita ivilungame?

⁵ Uzye cali nu kuya uli ndi cakuti Yeova atapekanya ilambo lyene azumilizya ana yakwe Adamu ataali amalilike kuti yaikala amanda pe? Antu yali nu kutandika ukwelenganya ukuti nu mu vintu vyuze kwene ataali nu ukuya nu mulinganya. Wakwe, Limwi antu nga yatandike ukutwisika ndi cakuti Yeova wali nu kufikilizya vino walavile. Nomba tutalinzile ukulasakamala ukuti vii vingacitika. Pa mulandu wakuti Yeova waya nu mulinganya, wapeezile Umwanakwe ukwiza tufwila na cii cikalenga tusininkizye ukuti lyonsi akacita ivilungame.

6. U mu nzila ci muno ilambo likalangilila vino Yeova watutemwa? (1 Yoani 4:​9, 10)

⁶ Kwaya imiyele na yuze ino Yeova wakwata iyalenzile ukuti atume Yesu ukwiza tufwila, imiyele yii u kutemwa. (Yoa. 3:16; belengini 1 Yoani 4:​9, 10.) Yeova watumile Umwanakwe ukwiza tufwila pa mulandu wakuti akalonda ukuti tukikale manda pe nu kuti tuye umu lupwa lwakwe. Elenganyini pali cii: Lino Adamu wayembwike, Yeova wamufumizye umu lupwa lwakwe. Lyene calenga nu kuti swensi kwene tutavyalilwa umu lupwa lwakwe Leza. Lelo pa mulandu ni ilambo, Yeova akaelela imembu zitu nupya uku nkoleelo alalenga ukuti yonsi aya ni cuvwila nupya amutaila yakaye umu lupwa lwakwe. Nupya na ndakai kwene  tungaya na ucuza usuma na Yeova alino na ya kapepa yanji. Umu cumi Yeova watutemwa sana.—Loma 5:​10, 11.

7. Uzye ukucuula kuno Yesu wacuuzile kukatwazwa uli ukuvwikisya vino Yeova watutemwa?

⁷ Tunguvwikisya vino Yeova watutemwa nga twelenganya pali vino wayuvwanga lino walolanga kuno Umwanakwe akucuula. Satana akalanda ukuti kusi umuomvi wakwe Leza angatwalilila ukuya uwa cumi kuli Leza ndi cakuti akucuula. Pakuti Yeova asinile Satana ukuti uwa ufi, wazumilizye ukuti Yesu acuule lino atatala wafwa. (Yobo 2:​1-5; 1 Pet. 2:21) Yeova walolanga kuno antu yatumfyanga Yesu, kuno asilika yamumanga na lino yamupopiile pa cimuti. Nupya Yeova walolanga kuno Umwanakwe wino watemwa akufwa imfwa iipisye. (Mate. 27:​28-31, 39) Yeova wakweti amaka aakulesya ukuti vii vitacitika pa nsita ili yonsi. Wakwe, lino antu yalanzile ukuti: “lekini [Leza] amupususye ndi cakuti akulonda ukumwavwa,” Yeova nga wacisile vivyo kwene. (Mate. 27:​42, 43) Lelo Yeova nga acita vivyo, ilambo nga litapeezilwe nupya nga tutali nu kukwata upaalilo wa ku nkoleelo. Fwandi Yeova wazumilizye ukuti Umwanakwe azizimizye ukucuula kufika na lino wafwile.

8. Uzye Yeova wayuvwile uli lino walolanga kuno Umwanakwe akucuula? Londololini. (Loliniko ni cikope.)

⁸ Tutalinzile ukulaelenganya ukuti vino Leza wakwatisya amaka, asiuvwa uyi. Twapangwa umu cata cakwe, fwandi vivi kwene vino tukauvwa uyi avino na Yeova kwene akauvwa uyi. Baibo yalanda pali aliwe ukuti ‘wasakamile’ nupya ‘wasosile.’ (Masa. 78:​40, 41) Elenganyini api lyasi ilikalanda pali Abulahamu na Isaki. Iusyini ukuti Yeova wanenyile Abulahamu ukuti apeele umwana uno wakweti sile wenga ilambo. (Utan. 22:​9-12; Aeb. 11:​17-19) Elenganyini vino Abulahamu uvwile uyi lino wali mupiipi nu kukoma umwanakwe. Yeova wene afwile wacizile napo ukuvwa uyi nu ulanda lino waweni kuno antu asi yakapepa yakucuzya Umwanakwe nu kumukoma.—Lolini vidyo pa jw.org iikati Mwakolanya Utailo Wao—Abulahamu, Ciputulwa 2.

9. Uzye Loma 8:​32, 38, 39 ikamwazwa uli ukuvwikisya vino Yeova wamutemwa alino na yakapepa yauzo?

⁹ Ilambo likatusambilizya ukuti Yeova watutemwa sana ukucila na vino cuza witu nanti lupwa witu angatutemwa, nupya ukucila na vino umuntu ali wensi angatutemwa. (Belengini Loma 8:​32, 38, 39.) Ukwaula nu kutwisika Yeova watutemwa sana ukucila na vino twaitemwa sweineco. Uzye mukalonda ukwikala amanda pe? Yeova wene wacila napo ukulonda ukuti mukikale amanda pe. Uzye mukalonda ukuti imembu zinu zyelelwe? Yeova wene wacila napo ukulondesya ukumwelela. Cino akalonda sile icakuti mwalanga ukuti mukataizya  pi ilambo lino wamupeezile, ukuya na utailo muli aliwe alino nu kulamuvwila. Ilambo i cintu icicindame icikalanga vino Yeova watutemwa. Umu nsi ipya, tulacizya napo ukusambilila pali vino Yeova watutemwa.—Kasa. 3:11.

VINO ILAMBO LIKATUSAMBILIZYA PALI YESU

10. (a) I vyani vino Yesu wasakamile sana pali vino wali nu kufwa? (b) U mu nzila ci muno Yesu walenzile cimanyikwe ukuti walenzile izina lyakwe Isi ukucindikwa? (Loliniko na kambokosi akakuti “ Vino Yesu Watwalilile Ukuya Uwa Kaele Vyalenzile Izina Lyakwe Yeova Ukucindikwa.”)

¹⁰ Yesu wika sana mano pali vino antu yakaelenganya pali Isi. (Yoa. 14:31) Yesu wali sana nu ulanda pali vino antu yelenganyanga iviipe pali Isi pa mulandu wakuti Yesu wali nu kufwa wa muntu uwasaalulanga izina lyakwe Leza nupya wa icipondo. Ali mulandu uno wapepiile ukuti: “Tata nga cingacitika, fumya kapu wi pali nene.” (Mate. 26:39) Pa mulandu wakuti Yesu watwalilile ukuya uwa kaele kufika na lino wafwile, walangilile ukuti vino Satana walanzile pali Isi i vya ufi.

11. Uzye Yesu walangizye uli ukuti watemwa antu? (Yoani 13:1)

¹¹ Ilambo likatusambilizya na pali vino Yesu watemwa sana antu, sana sana asambi yakwe. (Mapi. 8:31; belengini Yoani 13:1.) Wakwe, Yesu wamanyile ukuti vimwi vino wali nu kucita pano nsi vyali nu kumutalila sana, nu kuti wali nu kufwa imfwa iipisye. Yesu wacisile ivintu vyonsi vii ivitale, asi pa mulandu sile wakuti ali vino Yeova wamunenyile ukucita, lelo wacisile vyonsi pa mulandu wakuti watemilwe antu. Yesu walangizye ukuti watemilwe sana antu lino wayasimikilanga, kuyasambilizya, na lino wazwanga yauze. Nanti apa wanda uno Yesu wali nu kufwa, wafuzile asambi yakwe ingazo pakuti ayasambilizye, ukuyakomelezya alino nu kuyateekezya. (Yoa. 13:​12-15) Lino  Yesu wali umupiipi nu kufwa pa cimuti, wapeezile icipondo icali umupiipi nu kufwa upaalilo uwa kwikala umu paladaise, nupya walangizye ukuti watemilwe sana nyina lino wanenyile Yoani ukuti asakamala nyina. (Luka 23:​42, 43; Yoa. 19:​26, 27) Fwandi Yesu walangizye ukuti watemwa antu ukupitila muli vino wayafwilile na muli vino waomvile umulimo wakwe onsi pano nsi.

12. I vyani vino Yesu akucita ndakai pa kutwazwa?

¹² Nanti cakuti Yesu wafwile “umuku onga sile,” na ndakai kwene acili akatucitila ivintu ivingi ivisuma. (Loma 6:10) I vyani vivyo kwene? Watwalilila ukuomba pakuti atupeela ivintu ivingi ivisuma vino tukakwata pa mulandu ni lambo. Elenganyini pali vino akucita ndakai. U Mwene witu, Simapepo Mukalamba, nupya u mutwe wa cilongano. (1 Kol. 15:25; Efes. 5:23; Aeb. 2:17) Aliwe akatungulula umulimo wakukolanganika apakwe ni iumba ilikalamba, umulimo ulasila lino ucuzi ukulamba utatala wasila. b (Mate. 25:32; Mako 13:27) Nupya akasininkizya ukuti aomvi yakwe acisinka yakusakamalwa muli vyakwe Leza umu manda yaa akusyalikizya. (Mate. 24:45) Nupya lino alateeka umu myaka 1,000 alatwalilila ukutucitila ivintu ivisuma. Lino Yeova watupeezile Umwanakwe, atatupeezile ukuti atufwile sile lelo watupeezile Umwanakwe pakuti atucitile ivintu ivingi ivisuma.

MWATWALILILA UKUISAMBILIZYA

13. Uzye ukwelenganya pali vino mukuisambilizya kungamwazwa uli ukusambilila pali vino Leza na Yesu yatutemwa?

¹³ Mungatwalilila ukusambilila pa kutemwa kuno Yeova na Klistu Yesu yakwata ndi cakuti mwatwalilila ukwelenganyapo sana. Umu milungu inono lino kutatala kwaya Iciusyo na pa cisila, mungabelenga nanti ibuku lyonga umu mabuku a Ilyasi Lisuma. Mutaezya ukubelenga ivyeo ivingi pa nsita yonga. Lelo mwateekela lino mukubelenga nupya mwalola imilandu ino tulinzile ukutemelwa Yeova na Yesu. Mwaezya na maka ukunenako yauze vino mukusambilila.

14. Kulingana na Masamu 119:​97, uzye ukulondelezya kungatwazwa uli ukutwalilila ukusambilila api lambo alino na pa malyasi yauze? (Loliniko ni cikope.)

¹⁴ Ndi cakuti mwaya umu cumi pa myaka iingi, limwi mungatandika ukwelenganya ukuti kusi na vyuze ivipya vino mungasambilila pali vino Leza waya nu mulinganya, vino waya nu kutemwa, alino na pi lambo. Lelo  icisinka icakuti ukusambilila pa malyasi yaa alino na yauze kusisila. Fwandi, i vyani vino mulinzile ukucita? Mwabelenga nu kuisambilizya ivyeo ivyaya umu mpapulo zitu izikalanda pali Baibo. Ndi cakuti mwabelenga vimwi muli Baibo vino mutuvwikisye, mwalondelezya. Lyene uwanda onsi mwaelenganya pali vino imulondelezya na pali vino ivyeo vivyo vikumusambilizya pali Yeova, pa Mwanakwe, alino pali vino yamutemwa.—Belengini Masamu 119:97.

15. U mulandu ci uno tulinzile ukutwalilila ukulasambilila ivyeo ivipya muli Baibo?

¹⁵ Mutalinzile ukutoovoka ndi cakuti lino mukuisambilizya nanti ukulondelezya mutazanyile ivyeo ivipya nanti vino mungatemwa. Mulinzile ukuya wa muntu akulondesya goldi. Insita izingi, umuntu aakalonda goldi akalondekwa insita ikulu nanti amanda aingi pakuti aizane. Asitoovoka lelo akatwalilila ukulonda pano wamanya ukuti nanti sile aka goldi akanono kacindama kuli aliwe. Icintu icicindame sana icicizile na pali goldi i vyeo ivipya vino tukasambilila muli Baibo. (Masa. 119:127; Mapi. 8:10) Fwandi mwaya ateekele nupya lyonsi mwalondela insita ino mwatantika iya kubelenga Baibo.—Masa. 1:2.

16. Uzye tungakolanya uli Yeova na Yesu?

¹⁶ Lino mukuisambilizya, mwalola inzila zino mungaomvezyamo vino mukusambilila. Wakwe, mwakolanya vino Yeova waya nu mulinganya ukupitila umu kulalola yauze ukuti yaya sile icili cimwi. Mwakolanya vino Yesu watemwa Isi na antu yauze ukupitila umu kulacita vino Yeova akalonda nu kwazwa yauze nanti cakuti insita zimwi ukucita vivyo kungalenga ivintu vimutalile. Nupya mwakolanya Yesu ukupitila umu kusimikilako yauze pakuti nayo yamanye ivintu visuma vino Yeova akatucitila na vino yangalanga ukuti yataila umwi lambo.

17. I vyani vino tulasambilila umu cipande icilondelilepo?

¹⁷ Ndi cakuti twatwalilila ukusambilila api lambo, tulatemelwako Yeova na Yesu. Nupya ndi cakuti twayatemwa sana, nayo yalatutemelwako. (Yoa. 14:21; Yako. 4:8) Fwandi lekini twaomvya vyonsi vino Yeova watupeela pakuti twaisambilizya api lambo. Umu cipande icilondelilepo, tulasambilila pa visuma na vyuze vino Yeova watucitila pa mulandu wakuti Yesu watufwilile na pali vino tungalanga ukuti tukataizya pali vino Yeova watutemwa.