CIPANDE CA KUSAMBILILAMO 5
LWIMBO NA. 108 Kutemwa Kwako Leza Ukwa Cumi
Ivisuma Vino Tukaipakizya pa Mulandu Wakuti Yeova Watutemwa
“Klistu Yesu wizile umu nsi umu kupususya ayembu.”—1 TIM. 1:15.
VINO TUMASAMBILILAPO
Ivisuma vino tukaipakizya pa mulandu ni lambo na vino tungalanga ukuti tukataizya Yeova api lambo.
1. I vyani vino tulinzile ukucita pakuti tuzanzye Yeova?
ELENGANYINI ukuti mwapeela umwi uupe usuma sana nupya uungamwazwa. Munguvwa uyi ndi cakuti umuntu wiyo wika sile uupe uwo ukwaula ukuti auomvye nupya wililako. Lelo munguvwa ningo sana ndi cakuti umuntu wiyo watandika ukuomvya uupe uwo nu kutaizya. I vyani vino tukulandapo? Yeova wapeezile Umwanakwe pakuti atufwile. Yeova akauvwa ningo ndi cakuti tukutaizya pa uupe uu ucindame sana na pa kutemwa kuno watutemwa, ukwalenzile ukuti atupeele ilambo.—Yoa. 3:16; Loma 5:7, 8.
2. I vyani vino tumasambilila umu cipande cii?
2 Lino insita ikuya ikupita, tungatandika ukuta ukutaizya api lambo. Ndi cakuti twata ukutaizya, cingaya kwati twatoola uupe usuma uno Yeova watupeela nu kuwika sile ukwaula ukulauomvya alino itwilila nako. Pakuti ivya musango uu vitatucitikila, tulinzile lyonsi ukulaelenganya pali vino Leza na Klistu yatucitila. Icipande cii cimatwazwa ukucita vivyo. Tumasambilila pa visuma vino tungaipakizya ndakai pa mulandu ni lambo na vino tulaipakizya uku nkoleelo. Nupya tumasambilila pali vino tungalanga ukuti tukataizya pali vino Yeova watutemwa, sana sana umu milungu lino kutatala kwaya Iciusyo na pa cisila ca Ciusyo.
VINO TUKAIPAKIZYA NDAKAI
3. Iinzila ci yonga ino tukaipakizizyamo ivisuma pa mulandu ni lambo?
3 Kwaya ivisuma vino tukaipakizya pa mulandu ni lambo lyakwe Klistu. Wakwe, ilambo lyalenga ukuti Yeova atwelela imembu. Asitwelela sile pa mulandu wakuti ali vino alinzile ukucita. Lelo a pa mulandu wakuti akalonda ukutwelela. Kalemba wa masamu walangizye ukuti wataizyanga pali vino Yeova waya nu uluse. Watiile: “We Yawe, wemo wewe musuma, nupya ukaeleela uluse.”—Masa. 86:5; 103:3, 10-13.
4. Aaweni yano Yeova wapeezile ilambo? (Luka 5:32; 1 Timoti 1:15)
4 Yamwi yangayuvwa ukuti tusilondekwa ukuti Yeova atwelele. I cacumi ukuti swensi kwene tutalinga. Umutumwa Paulo wamanyile ukuti ‘atalinzile ukwamwa umutumwa.’ Nanti ciye vivyo watiile: “Naya vii pa mulandu ni cikuuku cikulu cakwe Leza.” (1 Kol. 15:9, 10) Ndi cakuti twalapila uku membu zitu, Yeova akatwelela. U mulandu ci? Asi pa mulandu wakuti avino akalondekwa ukucita, lelo a pa mulandu wakuti watutemwa. Ndi cakuti mukuvwa ulanda pa mulandu wakuti mukwelenganya ukuti mutalinga ukuti Yeova amwelele, mulinzile ukwiusya ukuti Yeova atapeezile ilambo uku yantu amalilike lelo wapeezile ilambo uku yantu atamalilika aakauvwa uyi ndi cakuti yayembuka nupya aakalonda ukusenuka.—Belengini Luka 5:32; 1 Timoti 1:15.
5. Uzye tulinzile ukulayuvwa ukuti Yeova alinzile ukutwelela pa mulandu wakuti twamuombela pa myaka iingi? Londololini.
5 Tutalinzile ukulayuvwa ukuti Yeova alinzile ukutwelela pa mulandu wakuti twamuombela pa myaka iingi. I cacumi ukuti Yeova akataizya pa myaka iingi ino twamuombela na ucisinka. (Aeb. 6:10) Watupeezile Umwanakwe uwila sile, asi kutulipila pa milimo ino tukamuombela. Fwandi citanga cizipe ukwelenganya ukuti Yeova alinzile ukutwelela pa mulandu ni milimo ino twamuombela. Ukwelenganya vivyo kungalenga ciloleke kwati tusilondekwa ilambo.—Loliniko na Galatiya 2:21.
6. U mulandu ci uno Paulo waombesyanga umu mulimo wakwe Yeova?
6 Paulo wamanyile ukuti Yeova ataali nu kumwelela pa mulandu sile na vino waombesyanga. Nomba u mulandu ci uno waombesyanga umu mulimo wakwe Yeova? A pa mulandu wakuti walondanga ukulanga ukuti wataizyanga pali vino Yeova wali ni cikuuku alino nu luse kuli aliwe. (Efes. 3:7) Wakwe Paulo, naswe tukatwalilila ukuombesya, asi pa mulandu wakuti Yeova atwelele, lelo a pa mulandu wakuti tukalonda ukulataizya pali vino waya nu luse.
7. I visuma ci na vyuze vino tukaipakizya ndakai pa mulandu ni lambo? (Loma 5:1; Yakobo 2:23)
7 Ivisuma na vyuze vino tukaipakizya ndakai pa mulandu ni lambo, u kukwata ucuza usuma na Yeova. a Wakwe vino icipande icafumako calanzile, tutaavilwe ala sweswe ya cuza yakwe Leza. Lelo pa mulandu ni lambo tukaipakizya “umutende pamwi na Leza” nupya tukaya ya cuza yakwe.—Belengini Loma 5:1; Yakobo 2:23.
8. U mulandu ci uno tulinzile ukulataizizya Yeova api syuko lino twakwata ilya kupepa?
8 Ukupepa kuli Yeova i syuko iliiyele lino twakwata pa mulandu na ucuza uno twakwata na aliwe. Yeova asikutika sile uku mapepo yano tukapepa lino itukolongana pamwi na antu, lelo akaasuka na mapepo yano tukapepa lino tuli swenga. Ipepo lingatwazwa ukuteeka umwenzo alino nu kuya nu mutende, lelo kuli na vyuze vino ipepo lingatwazwa. Lingakomya ucuza witu uno twakwata na Leza. (Masa. 65:2; Yako. 4:8; 1 Yoa. 5:14) Lino Yesu wali pano nsi, wapepanga insita izingi kuli Yeova pano wamanyile ukuti Yeova wakutikanga nupya ipepo lyali nu kulenga ucuza wakwe na Isi ukukomelako. (Luka 5:16) Tukataizya sana pali vino ilambo lyakwe Yesu lyalenga ukuti tukwate ucuza usuma na Yeova alino nu kulanda nawe umwi pepo.
VINO TULAIPAKIZYA UKU NKOLEELO
9. I visuma ci vino ya kapepa yakwe Yeova yalaipakizya uku nkoleelo pa mulandu ni lambo?
9 I visuma ci vino ya kapepa yakwe Yeova acisinka yalaipakizya uku nkoleelo pa mulandu ni lambo? Yeova alayapeela umi uwa manda pe. Antu aingi yakaelenganya ukuti vitanga vicitike antu ukulaikala manda pe pano antu lyonsi yakafwa. Lelo ukulonda kwakwe Yeova u kwakuti antu yaikala amanda pe. Ndi cakuti Adamu akana ukuyembuka, antu yonsi nga yakaikala amanda pe. Nanti cakuti ndakai cingatutalila ukwelenganya vino tulikala, tungataila ukuti tulikala manda pe, pano Yeova walipiile umutengo ukulu, kuli kuti Umwanakwe, pakuti vii vikacitike.—Loma 8:32.
10. I vyani vino apakwe na amu mfwele na zyuze yakalondesya?
10 Nanti cakuti tulaipakizya umi wa manda pe uku nkoleelo, Yeova akalonda ukuti twaelenganyapo ndakai. Apakwe yakalondesya umi wa kwi yulu lino yalateeka insi pamwi na Klistu. (Kuso. 20:6) Amu mfwele na zyuze yakalondesya ukwikala muli paladaise pano nsi, umutalaya ukuwaika nu kucula. (Kuso. 21:3, 4) Uzye mwemwe amu mu mfwele na zyuze aakwata upaalilo uwa kwikala pano nsi? Asi kuti upaalilo uu utacindama sana ukucila uwa kwi yulu. Antu yaumvilwe ukuti yaikala pano nsi. Fwandi ukwikala amanda pe pano nsi kulalenga ukuti tukaye sana ni nsansa.
11-12. I visuma ci vino tukalondesya ukwizaipakizya umu paladaise? (Loliniko ni vikope.)
11 Elenganyini vino umi winu ulaya umu paladaise pano nsi. Mutaalasakamala pa kulwala nanti imfwa. (Eza. 25:8; 33:24) Yeova alamupeela ivintu vyonsi vino mukalondekwa. I vyani vino mulatemwa ukusambilila? Uzye mungatemwa ukwizasambilila pa vyunyi? Uzye mungatemwa ukwizasambilila pa vya kulizya nyimbo? Uzye mungatemwa ukwizasambilila ivya kulenga? Ukwaula nu kutwisika, umu paladaise tulalondekwa aamanya ivya kupanga mapulani ya ng’anda, ya kakuula, alino na ya kalima. Nupya antu yalalondekwa ukulima nu kweleka ivyakulya, ukupanga iviombelo, alino nu kulima ivyalo nu kuvisakamala. (Eza. 35:1; 65:21) Lino mulaikala mande pe, mulakwata insita iya kuipakizya ivintu vii vyonsi alino ni vintu vyuze.
12 Tulaya sana ni nsansa lino tulazengela antu alatuutululwa. (Mili. 24:15) Elenganyini nupya vino mulaipakizya ukusambilila pali Yeova ukupitila umu vintu ivingi ivyakuzungusya vino waumba. (Masa. 104:24; Eza. 11:9) Ni cicindamisye i cakuti, tutalayembuka, fwandi tulatwalilila ukuombela Yeova nupya tutalalondekwa ukuti atwelele. Uzye mungatemwa ukupanya masyuko yaa pa mulandu nu “kuipakizya luyembu lwa pa nsita inono”? (Aeb. 11:25) Awe foo. Umi uno tulaipakizya umu nsi ipya ulazipa sana ukucila ivintu vino tungakwata pano nsi ndakai. Mwaiusya ukuti paladaise italaya icintu cino tulapaalila lyonsi. Lelo ilaya i ncende muno tulaikala cila wanda. Nupya vyonsi vii vilacitika pa mulandu wakuti Yeova watutemilwe sana icakuti watupeezile Umwanakwe ukwizatufwila.
I vintu ci ivisuma vino mukalondesya ukuipakizya umu paladaise? (Lolini mapalaglafu 11-12)
VINO TUNGALANGA UKUTI TUKATAIZYA PALI VINO YEOVA WAYA NU KUTEMWA
13. Tungalanga uli ukuti tukataizya pali vino Yeova waya nu kutemwa? (2 Kolinto 6:1)
13 Uzye tungalanga uli ukuti tukataizya Yeova api lambo lino watupeela? Tungacita vivyo, ndi cakuti tukulola ukuti ukumuombela ali cintu icicindamisye umu umi witu. (Mate. 6:33) Nupya Yesu “wafwilile yonsi pakuti ali nu umi yataaikalila aineco, lelo yaikalila uwayafwilile nupya uwatuutulwilwe.” (2 Kol. 5:15) Yeova waya sana ni cikuuku kuli sweswe nupya akatwelela. Ndi cakuti tukumuombela ukulingana na pano tungapezya, tukalangilila ukuti tukataizya pali vino akatucitila cila wanda.—Belengini 2 Kolinto 6:1.
14. Uzye tungalanga uli ukuti twataila utunguluzi wakwe Yeova?
14 Tungalanga ukuti tukataizya pali vino Yeova waya nu kutemwa ndi cakuti twamutaila nu kulalondela utunguluzi wakwe. Tungacita uli vivyo? Lino tukupingula pa vintu ivili wakwe, masambililo yano tungasambilila nanti incito ino tungasoolola, tulinzile ukwelenganya pali vino Yeova akulonda tucite. (1 Kol. 10:31; 2 Kol. 5:7) Ndi cakuti lino tukupingula pa vintu tukupingula ukulingana na vino Yeova akalonda, utailo witu muli aliwe alino na ucuza witu na aliwe vilakomelako. Nupya tutalatwisika pa upaalilo witu uno twakwata uwa kwikala amanda pe.—Loma 5:3-5; Yako. 2:21, 22.
15. Uzye tungalanga uli ukuti tukataizya pali vino Yeova waya nu kutemwa mu nsita ya Ciusyo?
15 Kuli inzila na yuze ino tungalangilamo ukuti tukataizya pali vino Yeova waya nu kutemwa. Lino kwasyala imilungu inono ukuti kuye Iciusyo na pa cisila ca Ciusyo tungalanga ukuti tukataizya pali vino Yeova waya nu kutemwa. Lino tukupekanya ukuti tukazanwe uku Ciusyo tulinzile ukwamako na yauze pakuti nayo yakazanweko. (1 Tim. 2:4) Mungayalondolwela ivilacitika pa wanda wa Ciusyo. Cingazipa ndi cakuti mwayatambisya vidyo iyakuti U Mulandu ci Uno Yesu Wafwilile? ni yakuti Mwaiusya Imfwa Yakwe Yesu pa jw.org. Ya eluda yalinzile ukusininkizya ukuti yama na aata ukulongana. Elenganyini vino ya malaika ukwi yulu na antu pano nsi yaluvwa ningo ndi cakuti yalola imfwele yakwe Yeova iponge yawela kuli aliwe. (Luka 15:4-7) Apa wanda wa Ciusyo, lekini swensi lino tulalamukana tukalamuke na apya nanti yayo yano ipalengela pano yazanyilwe uku Ciusyo. Tukulonda yakayuvwe ukuti ituyapokelela.—Loma 12:13.
16. U mulandu ci uno tulinzile ukuombesya mu mulimo wa kusimikila lino kwasyala imilungu inono ukuti kuye Iciusyo na pa cisila ca Ciusyo?
16 Uzye mungaombesya mu mulimo wa kusimikila lino kwasyala imilungu inono ukuti kuye Iciusyo na pa cisila ca Ciusyo? Kucita vivyo inzila isuma iya kulangilamo ukuti tukataizya pali vino Leza na Klistu yatucitila. Ndi cakuti tukuombesya umu mulimo wa kusimikila, tulalola vino Yeova akutwazwa nupya tulamutaila. (1 Kol. 3:9) Nupya mungabelenga malembo aakalanda pa Ciusyo yano yatantika umu kabuku kakuti Twasambilila Malembo Cila Wanda nanti malembo aaya muli cati iikaya umu kabuku kano tukaomvya pa kulongana kwa mukasi ka mulungu. Nupya mungaomvya malembo yaa lino mukuisambilizya.
17. I vyani ivikazanzya Yeova? (Loliniko na kambokosi akakuti “ Inzila Zino Tukalangilamo Ukuti Tukataizya Pali Vino Yeova Waya nu Kutemwa.”)
17 Limwi pa mulandu ni vikamucitikila, mutanga mukwanisye ukuomvya vyonsi vino itulanda umu cipande cii. Mwaiusya ukuti Yeova asilinganya vino mukaomba kuli vino yauze yakaomba, lelo akataizya pali vino mwamutemwa. Akaya sana ni nsansa ndi cakuti walola ukuti mukutaizya apa upe ucindame sana, kuli kuti ilambo.—1 Sam. 16:7; Mako 12:41-44.
18. U mulandu ci uno tulinzile ukulataizizya Leza na Yesu Klistu?
18 Ilambo lyalenga ukuti Yeova atwelela imembu, ukuya ya cuza yakwe, alino nu kukwata upaalilo uwa kwikala amanda pe. Fwandi lekini lyonsi twalanga ukuti tukataizya pali vino Yeova waya nu kutemwa, pano ukutemwa u kwalenzile ukuti atucitile ivintu vii ivisuma. (1 Yoa. 4:19) Acino lekini twataizya pali vino Yesu watucitile, pano watufwilile.—Yoa. 15:13.
LWIMBO NA. 154 Kutemwa Ukwa Pee
