CIPANDE CA KUSAMBILILAMO 3
LWIMBO NA. 35 “Mwamanya Ukusoolola Ivili Visuma”
Mwasoolola Ukucita Ivintu Ivikazanzya Yeova
“Ukoopa Yawe ili ntendekelo ya mano. Nu kumanya wa Muzilo wilya, kuli kwiluka.”—MAPI. 9:10.
VINO TUMASAMBILILAPO
Vino tungaomvya amano, ukumanya, alino nu kwiluka pakuti twapingula ningo pa vintu.
1. Iintazi ci ino swensi tukakwata?
CILA WANDA tukalondekwa ukupingula pa vintu. Vimwi vyangupala ukupingulapo, wakwe vino tumalya katondo nanti insita ino tumaya umu kulaala. Lyene vyuze vyene vyatala ukupingulapo. Vino tukapingulapo ukucita vingakuma umi witu, insansa zitu, ya lupwa itu na vino tukaombela Yeova. Tukalonda vino tukapingulapo ukucita vyatuzipila nupya vyazipila na amu lupwa lwitu. Ni cicindamisye icakuti, tukalonda vino tukapingulapo ukucita vyazanzya Yeova.—Loma 12:1, 2.
2. I vintu ci vino tulinzile ukucita pakuti tupingule ningo pa vintu?
2 Mungapingula ningo pa vintu ndi cakuti (1) mwamanya ivisinka, (2) mwelenganya pali vino Yeova akaelenganya pali vino mukulonda ukupingulapo, na (3) ndi cakuti mwelenganyapo sana pali vino mumasoololapo ukucita. Umu cipande cii tumasambilila pa vintu kwene vii vitatu, nupya tumalola na vino vingatwazwa ukulaomvya ningo maka itu aakwiluka.—Mapi. 2:11.
MWAMANYA IVISINKA
3. Londololini umulandu uno cazipila ukumanya ivisinka lino mutatala mwapingula pa vintu.
3 Icintu cino mulinzile ukutandikilapo ukucita lino mutatala mwapingula pa vintu, u kumanya ivisinka. U mulandu ci uno ukucitila vii kwacindamila? Elenganyini ukuti umuntu uwatalwala sana waya kuli dokota ukuti amulwazye. Uzye dokota angapeela umulwale umulembo ukwaula ukumupima nanti ukumuzya mauzyo? Awe foo. Namwe kwene mulinzile inkoleelo ukwelenganya sana pa visinka ivikumile ivintu vino mukulonda ukupingulapo. Mungacita uli vivyo?
4. Kulingana na Mapinda 18:13, mungacita uli pakuti mumanye ivisinka? (Loliniko ni cikope.)
4 Mungamanya ivisinka ukupitila umu kuuzya mauzyo. Wakwe, elenganyini ukuti yamwama ukuti mukizizye pamwi na antu yauze uku ncende imwi. Uzye mungaya mukazanweko? Ndi cakuti mutamanyile atiyapekanya ukukomaana kuu nanti vino kulaya, mulinzile ukuyuzya mauzyo wakwe yaa: “Uzye aekwi ukulayela ukukomaana? Uzye aantu yanga aalazanwako? A weni alasininkizya ukuti ivintu vyonsi ivilaya pa kukomaana kuu vyapitika ningo? Aa weni aalazanwako? I vyani vino mupekinye vino antu yalacita? Uzye kulaya uwengwa?” Amasuko uku mauzyo yaa yangamwazwa ukupingulapo ningo.—Belengini Mapinda 18:13.
Mwauzya mauzyo pakuti mumanye ivisinka (Lolini palaglafu 4) a
5. I vyani vino mulinzile ukucita ndi cakuti mwamanya ivisinka?
5 Lyene pa cisila cakuti mwakwata ivisinka, mulinzile ukwelenganyapo sana. Wakwe, nga ndi cakuti mwazana ukuti antu aalazanwako yasilondela ivisinte vya muli Baibo nanti ukuti kulaya uwengwa nupya kutalaya umuntu alasininkizya ukuti antu yasikumwesya uwengwa, i vyani vino mulinzile ukucita? Uzye musikwelenganya ukuti limwi ukwizya kuu kutanga kuzipe? (1 Pet. 4:3) Nga ndi cakuti insita lino kulaya ukukomaana kuu ukwakwizizya pamwi, ali insita ino mulinzile ukuzanwa umu kulongana nanti umu mulimo wa kusimikila? Fwandi ndi cakuti mwelenganya pa visinka vyonsi, cilamwangukila ukupingulapo ningo ivyakucita. Lelo kuli na vyuze vino mulinzile ukucita. Nanti cakuti mwamanya ivisinka na vino mukuyuvwa, mulinzile ukuyuzya ukuti, ‘Uzye Yeova akuyuvwa uli pali vii?’—Mapi. 2:6.
MWAELENGANYA PALI VINO YEOVA AKAELENGANYA PALI VINO MUKULONDA UKUPINGULAPO
6. Ukulingana na Yakobo 1:5, u mulandu ci uno tulinzile ukupepela kuli Yeova ukuti atwazwe?
6 Mwalenga Yeova ukuti amwazwa ukumanya vino akaelenganya pali vino mukulonda ukupingulapo. Yeova watulaya ukuti alatupeela amano aakwiluka ndi cakuti vino tukulonda ukupingulapo vingamuzanzya. Leza akapeela amano “kuli yonsi ukwaula ukukalipila.”—Belengini Yakobo 1:5.
7. Uzye mungamanya uli vino Yeova akaelenganya pali vino mukulonda ukupingulapo? Langililini.
7 Pa cisila cakuti mwapepa kuli Yeova ukuti amwazwe, mulinzile ukwika amano kuli vino akwasuka ipepo linu. Katulangilile: Ndi cakuti mwaponga lino mukuya kumwi, limwi munguzya umuntu akaikala uku ncende iyo pakuti amwazwe. Uzye mungafumapo lino atatala wamunena vino mulinzile ukupita? Awe foo. Mungika sana mano kuli vino akumunena. Vikwene ali vino namwe mulinzile ukucita pa cisila ca kulenga kuli Yeova ukuti amupeele amano, mulinzile ukwezya ukulola vino akwasuka ipepo linu ukupitila umu kulola masunde nanti ivisinte vya muli Baibo ivingamwazwa ukulingana na vino mukulonda ukupingulapo. Wakwe, lino mukupingulapo ndi cakuti mungazanwa uku kukomaana kuno itulandapo, mungelenganya pali vino Baibo yalanda pa ukuwowota, pali ya cuza aipe, na pali vino mulinzile ukukolezya ivya Wene ukucila vino mukalonda mweineco.—Mate. 6:33; Loma 13:13; 1 Kol. 15:33.
8. I vyani vino mulinzile ukucita ndi cakuti mukulonda uwazwilizyo lino mukulonda ivyeo ivingamwazwa pali vino mukulonda ukupingulapo? (Loliniko ni cikope.)
8 Lelo insita zimwi mungalondekwa uwazwilizyo pakuti muzane ivyeo vino mukulondekwa. Limwi umwina nanti nkazi uwakula muli vyakwe Leza angamwazwa. Nanti ciye vivyo, namwe kwene mulinzile ukulondelezya. Mungazana ivyeo ivingi umu mpapulo zitu, wakwe umwi Ibuku Ilya Kwazwa Inte Zyakwe Yeova Ukulondelezya Ivyeo alino ni buku lyakuti Amalembo Aangazwa Aina Klistu. Mwaiusya ukuti umulandu uno mukucitila vii, apa mulandu cakuti mukulonda ukupingula pa vintu ivingazanzya Yeova.
Mwaelenganya pali vino Yeova akaelenganya pali vino mukulonda ukupingulapo (Lolini palaglafu 8) b
9. Tungasininkizya uli ukuti vino tumapingulapo ukucita vimazanzya Yeova? (Efeso 5:17)
9 Uzye tungasininkizya uli ukuti vino tukulonda ukupingula vimazanzya Yeova? Ica nkoleelo tulinzile ukumumanya ningo. Baibo ikalanda ukuti, “kumanya wa Muzilo wilya, kuli kwiluka.” (Mapi. 9:10) Tungaya nu kwiluka kwa cumi ndi cakuti twamanya imiyele ino Yeova wakwata, ukulonda kwakwe, alino nu kumanya vino watemwa na vino wapata. Muyuzye mweineco ukuti, ‘Ukulingana na vino namanya pali Yeova, i vyani vino ningapingula ivingamuzanzya?’—Belengini Efeso 5:17.
10. U mulandu ci uno ukulondela ivisinte vya muli Baibo kwacindamila ukucila intambi zya mu lupwa nanti izyaya uku ncende kuno tukaikala?
10 Pakuti tuzanzye Yeova, Insita zimwi, tulinzile ukucita vimwi ivingalenga yauze ukuvwa uyi. Wakwe, avyazi yamwi yangapatikizya umwanao umukazyana ukutwalwa uku monsi uwakwata impiya pakuti angayalipila impiya izingi kuli kuti impaango, nanti cakuti umonsi wiyo atiika sana mano kuli vyakwe Leza. I cacumi ukuti avyazi yaa yangalonda ukuti umwanao asakamalwa, nomba a weni alaazwa umwanao ukukula muli vyakwe Leza? Uzye Yeova akalola uli ukucita vii? Tukazana icasuko pali Mateo 6:33. Api lembo lii Yesu wakomelizye Aina Klistu ukuti yalinzile, ‘inkoleelo ukulonda Uwene wakwe Leza.’ Nanti cakuti twatemwa avyazi itu na antu aaya uku ncende kuno tukaikala, cino tukalondesya ukwikako sana mano u kuzanzya Yeova.
MWAELENGANYAPO SANA PALI VINO MUMASOOLOLAPO UKUCITA
11. I miyele ci iyaya pali Filipi 1:9, 10 iingamwazwa ukwelenganya sana pali vino mumasoololapo ukucita?
11 Pa cisila cakuti mwelenganya sana pa visinte vya muli Baibo ivikalanda pali vino mukulonda ukupingulapo, mulinzile ukwelenganya sana pali vino mumasoololapo ukucita. (Belengini Filipi 1:9, 10.) Ukwiluka kungamwazwa ukwelenganya sana pa vingacitika pali vino mumasoololapo ukucita. Insita zimwi cikaangupala ukupingulapo ivyakucita. Lelo insita zimwi zyene cikatala. Ukwiluka kulamwazwa ukupingulapo ningo ivyakucita nanti cakuti ivintu ivitala.
12-13. Uzye ukwiluka kungamwazwa uli ukusoolola ningo incito iyakuomba?
12 Elenganyini ukuti mukulonda incito pakuti mwasakamala ulupwa lwinu. Lyene mwazana incito ziili. Lyene mwelenganya pa visinka vyonsi ivikumile incito zizyo, incito ino mulaomba, insita iilalondekwa ukuomba incito iyo, insita ino mulasumba ukuya nu kuwela uku ncito, alino ni vintu vyuze. Incito zyonsi zyoili zisikupusana ni visinte vya muli Baibo. Limwi mwatemwapo incito yonga pa mulandu ni milimo ino mulaomba nanti pa mulandu ni mpiya zino yalamupeela. Lelo kuli na vyuze vino mulinzile ukwelenganyapo lino mutatala mwasoololapo incito ino mumatandika ukuomba.
13 Wakwe, uzye incito zyonsi zyoili zilalondekwa ukuomba pa nsita ino mulinzile ukuya umu kulongana? Uzye zilalenga ukuti mwakwata insita iya kwazwa ya lupwa inu kulayuvwa acingililwe, ukuya ni nsansa, alino nu kupalama kuli Yeova? Ukuyuzya mauzyo yaa kungamwazwa ukukolezya “ivintu ivicindamisye,” kuli kuti ukapepa winu alino nu kulasakamala ulupwa lwinu muli vino lukalondekwa ukucila ukwika sana mano uku kulondesya impiya izingi. Ndi cakuti mwacita vii, cilalenga ukuti Yeova akamipaale pali vino mulapingulapo ukucita.
14. Uzye ukwiluka nu kutemwa kulatwazwa uli ukukanasosya yauze?
14 Ukwiluka kukatwazwa ukulola vino tumapingulapo ukucita vimakuma yauze pakuti tutayasosya. (Filipi 1:10) Ukucita vii kwacindama sana, wakwe lino tukusoolola pa vyakuzwala vino tumazwala nanti ukuiyemvya. Limwi tungasoololapo ukulazwala ivyakuzwala vimwi nanti ukuiyemvya kumwi. Nomba nga ndi cakuti vino twasoololapo vikusosya amu cilongano nanti aasi ya kapepa? Ukwiluka kulatwazwa ukuyalangulukilako. Ukutemwa kulalenga ukuti twalonda ‘ivingazipila antu yauze’ alino nu kulazwala ivyakuzwala ivilinge. (1 Kol. 10:23, 24, 32; 1 Tim. 2:9, 10) Fwandi vino tulapingulapo ukucita i vilalangilila ukuti twatemwa yauze nupya twayacindika.
15. I vyani vino mulinzile ukwelenganyapo lino mutatala mwapingula pa vintu ivicindamisye?
15 Ndi cakuti mukupingula pa vintu ivicindame sana, mulinzile ukwelenganya pa vikulondekwa pakuti mukacite vino mukulonda ukupingulapo. Yesu watusambilizye ukuti tulinzile “kupenduluka.” (Luka 14:28) Fwandi mulinzile ukwelenganya pa insita, ivintu ivilalondekwa, alino na maka yano mulaomvya pakuti mucite vino imupingulapo. Insita zimwi, limwi munguzyako amu lupwa lwinu pakuti mumanye vino wenga na wenga umu lupwa angacita pakuti vino imupingulapo ukucita viombe ningo. U mulandu ci uno ukucitila vii kwacindamila? Pano kungamwazwa ukumanya ndi cakuti kuli muno mulinzile ukusenuka nanti nga kuli vyuze vino mungacita. Nupya ukunenako amu lupwa lwinu nu kukutika kuli vino yakwelenganya, kungalenga ukuti yamwazwe ukufikilizya vino imupingulapo ukucita.—Mapi. 15:22.
MWAPINGULA PA VINTU VINO MULAKWANISYA UKUCITA
16. I vintu ci ivingamwazwa ukupingula ningo pa vintu? (Loliniko na kambokosi akakuti “Vino Mungapingula Ningo pa Vintu.”)
16 Ndi cakuti imulondela ivisinka vino itulandapo umu cipande cii, mungapingula ningo pali vino mukulonda ukucita. Imukwata ivisinka nupya imulola ivisinte vya muli Baibo ivilamwazwa ukupingula ningo pa vintu ivingazanzya Yeova. Fwandi mungalenga Yeova ukuti amwazwe ukufikilizya vino imupingulapo ukucita.
17. I vyani ivingatwazwa ukupingula ningo pa vintu?
17 Nanti cakuti vino mwapingwilepo ukucita uku cisila vyaomvile, mwaiusya ukuti icintu conga icingamwazwa ukupingula ningo pa vintu asi kusintilila pa mano inu nanti pali vino mwamanya lelo u kusintilila pa mano aakafuma kuli Yeova. Yeova aliwe angamupeela amano, ukumanya, alino nu kwiluka, imiyele icindame sana iilamwazwa ukupingula ningo. (Mapi. 2:1-5) Yeova angamwazwa ukupingula ningo pa vintu ivingamuzanzya.—Masa. 23:2, 3.
LWIMBO NA. 28 Vya Kuya Cuza Wako Yeova
