“UZOMBOZI uukulu cuze, lelo aomvi yati yacepa. Caleka pepini ku mwine wa uzombozi kuti atume aomvi na yauze ku uzombozi wakwe.” (Luka 10:2) Amazwi kwene yaa yano Yesu walanzile imyaka 2,000 iyapitapo, yakalondolola vino ivintu vyaya ndakai umu mpanga ya Myanmar. U mulandu ci? Umu Myanmar mwaya sile ya kakosoola 4,200 aakasimikila ilandwe lisuma umu mpanga umwaya antu 55 milyoni.

Nomba “umwine wa uzombozi” Yeova waleenga ukuti aina na ya nkazi aingi sana ukufuma umu mpanga izipusane pusane iize uku mpanga ii iyayela uku Kaeya ka mpanga ya Asia ukuti yavwilizye umu mulimo wa uzombozi wa unkolanya. I cani icalenzile ukuti yafume uku mpanga zya kumwao? Uzye yazanyile uli uwazwilizyo pakuti ize uku mpanga ii? Nupya yakaipakizya amapaalo ya musango ci? Lekini tulole.

Imyaka imwi ku cisila, umwina Kazuhiro, painiya wa ku mpanga ya Japan walwile ulwale wa cifumfumi. Wafwile icipafi, nupya yamutwazile uku cipatala. Dokota wanenyile umwina wii ukuti ate ukupisya motoka pa myaka iili. Umwina Kazuhiro camupezizye amano. Wayuzizye umweneco ati: ‘Uzye ningacita uli pakuti ntwalilile ukuomba umulimo uno natemwa wakwe upainiya?’ Wapefile kuli Yeova nu kumulenga ukuti ayule inzila pakuti angatwalilila ukuomba upainiya.

Umwina Kazuhiro walanzile ukuti: “Lino papisile umwezi onga, cuzane uwaombelanga uku Myanmar uvwile ivyancitikile. Wantumiile foni nu kuneena ati: ‘Umu Myanmar antu yakaomvya sana mabasi pa kuya kuno yakasi. Ndi cakuti mwiza kuno, mungatwalilila nu mulimo winu uwa kusimikila ukwaula motoka!’ Nuzizye dokota wane ndi cakuti imiyele ino nalimo inganzumilizya ukuya uku Myanmar. Icanzungwisye icakuti dokota walanzile ati: ‘Kuli dokota aali umupiipi nu kwiza kuno umu kutandala ukufuma uku Myanmar uwamanya ukulwazya amalwale ya ku wongo. Ndi wiza ndamuleeta pakuti muce mumanyane. Ndi cakuti mulakwata icifumfumi nupya, alamwazwa.’ Naweni vino dokota waswike ukuti a Yeova u wataasuka ipepo lyane.”

Papokwene sile umwina Kazuhiro watumile kalata ukwi ofesi lyakwe ya Nte ilya ku Myanmar nu kulondolola vino wene na mamakwe yalondesyanga ukuyaombela upainiya umu mpanga iiya. Lino papisile sile amanda 5, akwi ofesi yaswike yati, “Muce mwize, tukulonda ya painiya na yauze!” Umwina Kazuhiro na mamakwe, Mari, yakazizye ya motoka, iyaya yasenda ivitupa nu kukala matiketi ya  ndeke. Ndakai yakaomba nu luzango umwi umba lya lulimi lwa uciulu ilyayela umu Mandalay. Umwina Kazuhiro walanzile ati: “Icintu kwene cii icatucitikile cakomizye utailo witu mu ulayo uwaya pali Masamu 37:5 apaaya amazwi aakati: ‘Sekezya amikalo yako kuli Yeova, umutaile nawe alakwazwa.’”

Umu 2014, ya Nte Yakwe Yeova umu Myanmar yakweti isyuko lya kukwata ukongano uyiyele. Antu afumile uku mpanga zyuze izile iyazanwako. Umwi pali yayo wali aa nkazi Monique, uwa myaka 34, uwafumile uku United States, walanzile ati: “Lino nafumile uku ukongano, napefile kuli Yeova pali vino nali nu kucita. Nupya nalanzile na avyazi yane pa mauyo yano nimiike umu mulimo wakwe Leza. Swensi twaweni ukuti nalinzile sile ukuswilila uku Myanmar, nomba papisile insita, nupya napepiilepo sana lino ntatala napingulapo ivya kucita.” Nkazi Monique walondolwile umulandu uno wacitiile vivyo.

Walanzile ukuti: “Yesu wakomelizye alondezi yakwe ‘ukupenduluka nu kulola impiya izingasumbwapo.’ Fwandi nayuzizye nemwineco inti: ‘Uzye ningakwanisya ukucita vino nkupaanga ukucita? Uzye ndakwanisya ukuisakamala umu mpanga iiya ukwaula ukusumba sana insita uku milimo ya kungazwa ukuzana ulupiya?’” Walanzile nu kuti: “Nilwike zuwa ukuti ntaakweti impiya izikumanile izya kungazwa ukuya uku mpanga yuze.” Uzye lyene nkazi wii wacisile uli pakuti apite?—Luka 14:28.

Nkazi Monique walondolwile ukuti: “Wanda umwi uwandemvile incito wangamile ukuti alande nani. Nuvwile sana intete, nu kwelenganya ukuti limwi amanzinga incito. Nomba wantaizye pa miombele yane isuma. Lyene wanenyile ati watapekanya ukuti nkapokelele ulupiya lwa kuntaizizyapo. Ulupiya luno yampeezile u lwalenzile ukuti nkwanisye ukuya uku Myanmar!”

Nkazi Monique akaombela umu Myanmar ukufuma umu Dizemba umu 2014. Uzye nkazi wii akauvwa uli ukuombela ukukalondekwa ya kakosoola aingi? Walanzile ukuti: “Naya sana ni nsansa ukuya kuno, nkatungulula masambililo yatatu. Wenga pali yano nkasambilizya Baibo ali ni myaka 67. Lyonsi pa kundamuka akamwentwila nu kunkuukula. Lino wasambilile ukuti izina lyakwe Leza a Yeova, waponyizye aminsozi. Walanzile ati: ‘Uu ali muku wakutandikilako ukuvwa ukuti izina lyakwe Leza a Yeova. Wewe mwance sana pali nene, nomba wansambilizya icintu icicindamisye cino ntaali nu kumanya.’ Nani kwene natandike ukuponya minsozi. Ivya musango uu vikalenga ukuombela ukukalondekwa sana ya kakosoola ukuzipa. Patalengile pano nkazi Monique wakwatiile isyuko ilya kuya ukwi Sukulu Lyakwe ya Kakosoola ya Wene.

Cuze icalenzile aingi ukwiza umu kuombela uku Myanmar, i vyeo vino yawelenzile umwi Buku Lya pa Mwaka Lyakwe ya Nte Yakwe Yeova ilya mu 2013 ivyalandanga pa mpanga ya Myanmar. Nkazi umwi uwa myaka ukucila pali 30 uwizina lyakuti Li wikalanga uku Southeast Asia ukufuma na mpiti. Waombanga, nomba vino wawelenzile umwi Buku Lya pa Mwaka vyalenzile ukuti atandike ukwelenganya ukuya umu kuombela uku Myanmar. Walanzile ukuti: “Umu 2014 lino nazanyilwe uku ukongano uyiyele umu Yangon, nakomaanyile na atwalane yamwi ayile umu kuombela ukukalondekwa ya kakosoola aingi umu lulimi lwa Cichinese. Vino nkavwanga Icichinese, napingwilepo ukuya uku Myanmar pakuti nkatungilile iumba lya Cichinese. Twalanzyanyizye na nkazi Monique nupya twaile uku Mandalay. Yeova watupaazile nupya twazanyile incito ya kusambilizya api sukulu ilililyonga iya kuomba amanda anono umu mulungu, nupya twazanyile umwa kwikala apiipi ni sukulu. Nanti icakuti kwakaya sana nupya insita zimwi ivintu vikatala, nkaipakizya ukuombela uku cifulo cii. Antu aakaikala uku Myanmar yangupazya umi, nomba yaya nu mucinzi nupya yakaitemelwa ukuvwa ukwi landwe lisuma. Cikatuzanzya sana ukulola vino Yeova akatungilila umulimo wa kusimikila. Nsitwisika ukuti Yeova aliwe walenzile ukuti nize uku Mandalay.”

Aingi aaya uku cifulo cii ukukalondekwa sana ya kakosoola yailolela vino ipepo likaazwa. Lekini tulande pa  mwina Jumpei uwa myaka 37 na mamakwe, Nao uwa myaka 35. Ukufuma na mpiti, yaombelanga umu cilongano ca lulimi lwa uciulu uku Japan. U mulandu ci uno yailile uku Myanmar? Umwina Jumpei walanzile ati: “Mamane nani twakweti uyo wa kuombela uku mpanga yuze ukukalondekwa ya kakosoola aingi. Umwina umwi wino twali nawe umu cilongano ca uciulu uku Japan waile uku Myanmar. Nanti cakuti twakweti impiya izinono sile, naswe twaile uku Myanmar umu Mei 2010. Aina na ya nkazi amu Myanmar yatupokelile ningo sana!” Uzye umwina wii akayuvwa uli ukusimikila umu lulimi lwa uciulu uku Myanmar? Walanzile ukuti: “Aingi yakalondesya ukuvwa. Ya ciulu yakazunguka sana ndi twayatambisya mavidyo yakwe ya ciulu. Twaya sana nu luzango ukuti twapingwilepo ukwiza kuno umu kuombela Yeova!”

Uzye umwina Jumpei na mamakwe Nao yazananga uli impiya zya kuomvya? Umwina Jumpei walanzile ukuti: “Lino papisile myaka itatu, twasile sile ni mpiya izinono sana icakuti tutaakweti ni zya kusonkela ing’anda umwaka uwalondelilepo. Nemo na mamane twapefile amapepo aingi sana ukufuma pansi ya myenzo itu. Ukwaula nu kwenekela, twapokeliile kalata ukufuma ukwi ofesi lyakwe ya Nte iyakutumanyisya ukuti itusontwa ukuomba upainiya uyiyele pa nsita inono! Twataile Yeova, nupya twailoliile ukuti ataatutazyela. Akatusakamala muli vyonsi.” Likwene sile, umwina Jumpei na mamakwe Nao yaile yazanwa ukwi Sukulu Lyakwe ya Kakosoola ya Wene.

I cani icalenzile umwina Simone uwa myaka 43 uwavyalilwe uku Italy, na mamakwe Anna uwa myaka 37 uwavyalilwe uku New Zealand, yaye uku Myanmar? Nkazi Anna walanzile ukuti: “Icalenzile i Buku Lyakwe ya Nte Ilya pa Mwaka ilya mu 2013!” Umwina Simone walanzile ukuti: “I syuko sana ukuombela umu mpanga ya Myanmar. Uwikalo kuno wangupala, nupya cikalenga naombesya umu mulimo wakwe Yeova. Cikatuzanzya sana ukulola vino Yeova akatusakamala lino tukuombela ukukalondekwa ya kakosoola aingi.” (Masa. 121:5) Nkazi Anna walanzile ukuti: “Naya sana ni nsansa. Twangupazya uwikalo. Nkasumba insita ikulu na ya wane, nupya tukauvwana sana. Nupya twazana ni vyuza ivisuma sana. Antu yatemwa sana ya Nte, nupya yakalonda sana ukuvwa ndi tukusimikila!” U mu nzila ci?

Nkazi Anna walanzile ukuti: “Wanda umwi, nasimikile umwanaci umwi aakasambilila uku yunivesiti pa maliketi nu kupekanya ukuti tukalolane nupya kwene. Lino twakomenkine, wali nu muze. Umuku walondelilepo wiziilepo na yauze. Lyuze nalyo yavuliileko. Nkasambilila na ali 5.” Umwina Simone walanzile ati: “Antu yano tukasimikila yaya na ucuza nupya yakalondesya ukuvwa lino tukusimikila. Aingi yakatandika ukusambilila, nomba tusikwata insita ya kusambilila na yonsi aakalonda ukusambilila.”

I vyani vino umwi alinzile ukucita pakuti akaombele uku mpanga yuze? Nkazi Mizuho, uwa ku Japan, wasimike ukuti: “Ya wane ya Sachio, nani twalondanga ukuombela uku mpanga ukukalondekwa ya kakosoola aingi, nomba tutamanyile ukwa kuya. Lino twawelenzile umwi Buku Lya pa Mwaka ilya Mu 2013 pa mpanga ya Myanmar, vino twawelenzile vyatufisile pa mwenzo icakuti itutandika ukwelenganyapo ndi cakuti tungaya tukaombeleko  uku Myanmar.” Ya Sachio yalanzile nu kuti: “Twapingwilepo ukuya umu kutandala pa mulungu onga uku Yangon, umusumba ukulu uwa mu Myanmar, pakuti tukalole vino kwaya. Ukutandala kuuku ukwa nsita inono kwatwazwile ukumanya ukuti tulinzile ukuya umu kuombelako.”

Umwina Rodney na mamakwe Jane aku Australia, yonsi yoili aali ni myaka uku ma 50, nu mwanao umonsi, Jordan, alino nu mwanao umukazyana, Danica, nayo yakaomba ukukalondekwa sana ya kakosoola umu Myanmar ukufuma umu 2010. Umwina Rodney walanzile ukuti: “Twatemilwe sana ukulola vino antu yalondesyanga ukusambilila pali Leza. Nkukomelezya indupwa ukuti yakezye ukuombela uku cifulo icaya wa mpanga ya Myanmar.” U mulandu ci? Umwina wii walondolwile ukuti: “Cikauvwika ningo sana ukulola vino ukucita vii kwazwa ulupwa lwitu ukupalama sana kuli Yeova! Acance aingi yakasumba sana mano uku mafoni, ya motoka, uku ncito, ni vintu vyuze ivingi. Ana itu yene iika sana mano uku kusambilila mazwi apya akuomvya umu mulimo wa kusimikila. Yakaezya ukusambilila ivya kulanzyanya na antu aatamanya sana ivyaya muli Baibo, kusambilila ivya kwasuka pa kulongana, nupya yakaombesya umu milimo na yuze yakwe Leza.”

Umwina Oliver, aali ni myaka 37 uwa ku United States, walondolwile umulandu uno ukuombako ukukalondekwa sana ya kakosoola kwazipila, watiile: “Ukuombela Yeova uku ncende ino ntaelezya kwangazwa sana. Ukufuma uku mwitu nu kuya umu kuombela uku mpanga yuze kwangazwa ukutaila sana Yeova ukuti alatwalilila ukungazwa muli vyonsi vingancitikila. Ukuomba na yano ntaamanyile aazumila muli vino nazumilamo kwangazwa sana ukumanya ukuti kusi icintu cimwi muno nsi cino ningakolanya uku Wene Wakwe Leza.” Ndakai, umwina Oliver na mamakwe Anna, yatwalilila ukuombesya umu mulimo wa kusimikila umu lulimi lwa Cichinese.

Nkazi Trazel, uwa myaka 52 uwa ku Australia, watwalilila ukuombela uku Myanmar ukufuma umu 2004. Walanzile ukuti: “Yonsi aangakwanisya ukuyaomba ukukalondekwa ya kakosoola aingi, cingazipa yace yakaombeko. Nailolela ukuti ndi cakuti ukulonda ukuomba, Yeova akapolelela. Ntatazile nelenganyepo ukuti ningaikala wakwe vii. Nkaikala ningo sana ukucila na vino nelenganyanga ukuti avino ningatemwa ukwikala.”

Si lekini amazwi yaa yano aombela ukukalondekwa ya kakosoola aingi uku Myanmar yalanzile, yamukomelezye namwe ukwelenganya pa kuya umu kwazwa antu aaya nu ufumacumi umu vifulo ivitaombelwamo. I cumicumi aakaombela ukukalondekwa sana ya kakosoola yakupunda ukuti, ‘Muce mwize ku Myanmar mwize mutwazwe!’