1. Ukulingana na 3 Yoane 3, 4, i vyani vikatulenga ukuya ni nsansa?

UZYE mungelenganya pali vino umutumwa Yoane wayuvwile lino uvwile ukuti yonsi yano wazwilizye ukumanya icumi yatwalilile ukuombela Yeova na ucisinka? Yakwatanga intazi nupya Yoane waombesyanga ukwazwa Aina Klistu yaa ukuya nu utailo ukome pano wayalolanga wa ana yakwe. Wakwe Yoane, naswe kwene tukaya sana ni nsansa lino tukulola ana itu nanti yano tukaazwa ukusambilila Baibo yaipeela kuli Yeova nu kutwalilila ukumuombela.—Welengini 3 Yoane 3, 4.

2. U mulandu ci uno Yoane walembiile makalata yaya yatatu?

² Umu 98 C.E., Yoane afwile wikalanga mu Efeso nanti lwa mupipi. Afwile wakuukile kuku pa cisila ca kufuma umu cifungo icayeliile pa cilila ca Patimosi. Pa nsita iya, umupasi wa muzilo wamwazwile ukulemba makalata yatatu. Mulandu uno walembiile makalata yaya, u wakukomelezya Aina Klistu ukutwalilila ukuya nu utailo muli Yesu nu kutwalilila ukwikalilila umu cumi.

3. A mauzyo ci yano tumaasuka?

³ Yoane wali umutumwa wa kusyalikizyako ukuya nu umi pano nsi, nupya wasakamile pali vino ya kasambililzya ya ufi yatandike ukuvula umu vilongano. * (1 Yoa. 2:18, 19, 26) Asangu yaa yalolekanga kwati yamanyile Leza, lelo yatalondelanga masunde yakwe Yeova. Katulande pa kusunda kuno Yoane wapeezile. Lino tukulanda pa kusunda kuu, tumaasuka na mauzyo yaa yatatu: Uzye cikapiliula cani ukutwalilila ukwikalilila  umu cumi? Iintazi ci zino tukakwata? Nupya tungaazwana uli pakuti tutwalilile umu cumi?

4. Ukulingana na 1 Yoane 2:3-6 na 2 Yoane 4, 6, i vyani vino tulinzile ukucita pakuti tutwalilile ukwikalilila umu cumi?

⁴ Pakuti twaikalilila umu cumi, tulinzile ukumanya icumi icaya umwi Izwi lyakwe Leza, Baibo. Nupya tulinzile ‘ukuyela masunde’ yakwe Yeova, kuli kuti ukulondela vino yakalanda. (Welengini 1 Yoane 2:3-6; 2 Yoane 4, 6.) Yesu watulangilile ningo ivya kuvwila Yeova. Fwandi inzila yonga icindame ino tunguvwila Yeova, u kulondela sana vino Yesu wacitanga.—Yoa. 8:29; 1 Pet. 2:21.

5. I vyani vino tulinzile ukusininkizya?

⁵ Pakuti twaikalilila umu cumi, tulinzile ukusininkizya ukuti Yeova ali Leza wa cumi nu kuti vyonsi vino akatunena umwi Izwi Lyakwe Baibo i vya cumi. Nupya tulinzile ukusininkizya ukuti Yesu ali Mesiya uwalavilwe. Antu aingi ndakai yakatwisika ukuti Yesu wasontwa ukuya Umwene wa Wene wakwe Leza. Yoane wacelwile ukuti kwali nu kuya “asomvi aingi” aali nu kuponzya yayo aatazumile sana icumi cino yasambilile pali Yeova na Yesu. (2 Yoa. 7-11) Yoane walemvile ati: “Uzye lyene aweni uwa ntumpu? Uwa ntumpu umuntu ali wensi wino akati Yesu asi Katuula uwalavilwe [Klistu].” (1 Yoa. 2:22) Inzila yonga ino tungakanilamo ukusombwa, u kulabelenga Izwi Lyakwe Leza. Nga twacita vivyo, ali lino tulamanya ningo Yeova na Yesu. (Yoa. 17:3) Lyene tulasininkizya ukuti twasambilila icumi.

6. Iintazi ci yonga ino Aina Klistu yacance yakakwata?

⁶ Aina Klistu yonsi yalinzile ukuicingilila pakuti yatasombwa na mano ya antunze. (1 Yoa. 2:26) Sana sana Aina Klistu acance yalinzile ukucenjela sana uku citeyo cii. Alexia, * nkazi uwa myaka 25 uwa ku France, walanzile ukuti: “Lino nali pa sukulu, nasambilile pa kusanguka na pa vintu vyuze vino yakasambilizya, nupya ivisambilizyo vii vyalenzile ntandike ukutwisika icumi. Insita zimwi visambilizyo vivyo navitemwanga sana. Nomba nelenginye ukuti citanga cizipe ukusuula vino Baibo ikasambilizya nu kuzumila  vyonsi vino ya mwalimu yasambilizyanga.” Alexia wabelenzile ibuku lyakuti Life—How Did It Get Here? By Evolution or by Creation? Mu milungu sile inono, watile ukutwisika. Alexia walanzile ukuti: “Nasininkizye ukuti muli Baibo mwaya icumi. Nupya nasininkizye ukuti ukulondela masunde kukaleta insansa nu mutende.”

7. I vyani vino tutalinzile ukucita, nupya u mulandu ci?

⁷ Aina Klistu yonsi, ance na ikolo yalinzile ukucenjela pakuti yataaloleka kwati yakuombela Yeova ala pa nsita ili imwi kwene yakucita iviipe. Yoane walanzile ukuti citanga ciombe ukwikalilila umu cumi pa nsita ili yonga ukucita iviipe. (1 Yoa. 1:6) Ndi cakuti tukulonda ukuti Yeova atutemwe, tulinzile ukulaiusya ukuti akalola vyonsi vino tukacita. Nanti icakuti antu yasilola vino tukacita mu umfisolo, Yeova wene akalola vyonsi vino tukacita.—Ayeb. 4:13.

8. I vyani vino tulinzile ukutalukako?

⁸ Tutalinzile ukwelenganya wakwe vino antu amu nsi yakaelenganya pa luyembu. Mutumwa Yoane walemvile ukuti: “Ndi twati tusi na maifyo, ale twaisomba sweisikulu.” (1 Yoa. 1:8) Mu nsita yakwe Yoane, asangu yalandanga ukuti umuntu angayembukila ku mufulo ala kuu akuombela Leza. Na ndakai kwene tukaikala na antu aakaelenganya vikwene. Aingi yakalanda ukuti yazumila muli Leza, lelo yasilola uluyembu wakwe vino Yeova akalulola, sana sana pi lyasi lya kupanga icupo. Vino Yeova akalola ukuti i vicitwa iviipe, yene yakavilola ukuti vyaya sile ningo.

9. U mulandu ci uno cacindamila acance ukucita vino Baibo ikasambilizya.

⁹ Cingatala sana ku Ina Klistu acance ukulondela vino Baibo ikasambilizya pa kupanga icupo ndi cakuti yano yakaomba nayo nanti yano yakasambilila nayo yakuyapatikizya ukulondela vino yamanya. Vikwene i vyacitikile  Aleksandar. Walanzile ukuti: “Akazyana yamwi uku sukulu yampatikizyanga ukuti tucite nayo uzelele. Yalandanga ukuti limwi nalaalanga na aonsi yanji pa mulandu wakuti ntakweti umukazyana.” Ndi cakuti vya musango uu vya mucitikila mwaiusya ukuti nga mwacita vino Baibo ikalanda mulayuvwa acilumba, mulaya nu umi usuma, mutalasakamikwa sana nupya mulatwalilila ukuya ya cuza yakwe Yeova. Lyonsi lino mwakana matunko cilamwangukila ukucita visuma. Mwaiusya ukuti vino amu nsi yakalola ukucita uzelele vyafuma kuli Satana. Fwandi nga mwakana ukwelenganya wakwe vino amu nsi yakaelenganya, ala “mwacimvya Mwipe wilya.”—1 Yoa. 2:14.

10. Uzye ilembelo lyakwe 1 Yoane 1:9, likatwazwa uli ukutwalilila ukuombela Yeova na kampingu musanguluke?

¹⁰ Twamanya ukuti Yeova aliwe wakwata insambu zya kutunena ukuti kucita vii u luyembu. Nupya tukaezya na maka ukukanayembuka. Nomba nga twayembuka, tukanena Yeova vyonsi vino itucita nu kulenga uwelelo. (Welengini 1 Yoane 1:9.) Nupya nga twacita uluyembu ulwipisye tukanena ya eluda yano Yeova wasonta ukutusakamala ukuti yatwazwe. (Yako. 5:14-16) Nomba tutalinzile ukutwalilila ukuyuvwa amulandu pa viipe vino twacisile mpiti. U mulandu ci? Pano Tata witu uwaya nu kutemwa wapeezile Umwanakwe ukuti atufwile pakuti imembu zitu zyelelwe. Ndi cakuti Yeova walanda ukuti alatweleela nga twalapila lino twaluvyanya, ale vivyo kwene avino alacita. Fwandi kusi icingatulesya ukutwalilila ukuombela Yeova na kampingu musanguluke.—1 Yoa. 2:1, 2, 12; 3:19, 20.

11. Tungacita uli pakuti tuicingilile ku visambilizyo ivingalenga tute ukuya nu utailo?

¹¹ Tulinzile ukutaluka ku visambilizyo vya asangu. Kufuma pano icilongano ca Ina  Klistu ya kutandikilapo cayelileko, Ciwa akaomvya asomvi aingi pakuti alenge aomvi yakwe Leza acisinka ukutandika ukutwisika. Fwandi tulinzile ukumanya upusano uwaya pa cisinka nu ufi. * Alwani itu yakaomvya intaneti ukulenga tute ukutaila Yeova nu kutemwa aina itu na ya nkazi. Mutalinzile ukutaila ufi uwo, pano ukafuma kuli Satana!—1 Yoa. 4:1, 6; Umbw. 12:9.

12. U mulandu ci uno tulinzile ukukomezya utailo witu mu cumi cino twasambilila?

¹² Pakuti tutaleka Satana atutonsye, tulinzile ukukomya utailo witu muli Yesu na muli vino Yeova akamuomvya ukucita ukulonda kwakwe. Nupya tulinzile ukutaila inzila yonga sile ino Yeova akaomvya ukutungulula iuvi lyakwe. (Mate. 24:45-47) Tukakomya utailo witu nga tukusambilila Izwi Lyakwe Leza lyonsi. Lyene utailo witu ulaya wa cimuti cino imisila yalimbwa mu musili. Paulo walanzileko ivikolane na vii lino walembelanga amu cilongano ca mu Kolose. Watile: “Mwemo mwazumila Klistu kuya Mwene winu. Caleka twalililini ukwikalilila muli aliwe. Ikini misisi munoli, nu kuleka kuti wene aye mufula wa umi winu. Muye akomeleke mu utailo winu.” (Kolo. 2:6, 7) Ndi cakuti twaombesya ukukomya utailo witu, Satana na antu yakwe yatalatulesya ukutwalilila ukwikalilila umu cumi.—2 Yoa. 8, 9.

13. I vyani vino tulinzile ukwenekela, nupya u mulandu ci?

¹³ Tulinzile ukwenekela ukuti antu amu nsi yalatupata. (1 Yoa. 3:13) Yoane watwiwisyeko ukuti “insi yonsi ili pisika lya utesi wa Mwipe wilya.” (1 Yoa. 5:19) Lino tukuya tukupalamila ku mpelelekezyo ya nsi ii, Satana alatwalilila ukusokelako sile. (Umbw. 12:12) Akaomvya inzila zino tutanga twiluke zuwa izili wakwe uzelele nu ufi wa asangu pakuti sile atuponzye. Nupya akaomvya ni nzila zya mu kulungatika wakwe kuzunyiwa. Satana wamanya ukuti watasyala sile ni nsita inono, fwandi akwezya na maka ukulesya umulimo wa kusimikila nu konona utailo witu. Fwandi tutanga tuzunguke ukuti yalesya imilimo itu imwi nanti yonsi umu mpanga zimwi. Nanti ciye vivyo, aina na ya nkazi umu mpanga zizyo yatwalilila ukuzizimizya. Fwandi asi mulandu na vino Satana angacita uku antu yakwe Leza, tungatwalilila ukuya nu utailo!

14. Iinzila ci yonga ino tungazwilamo aina na ya nkazi ukutwalilila umu cumi?

¹⁴ Pakuti twazwe aina na ya nkazi ukutwalilila umu cumi, tulinzile ukuyalanga icikuuku. (1 Yoa. 3:10, 11, 16-18) Tulinzile ukutemwana lino tuli ni ntazi na lino ivintu vili ningo. Uzye imumanyako umwi wino watafwilwa aakulondekwa ukukomeleziwa nanti ukwazwiwa umu nzila zimwi? Nanti uzye muvwapo aina yamwi aaponzya ivintu ivingi mu uzanzo wa kuiponela aakulondekwa ukukuulila cipya cipya Mang’anda ya Wene nanti mang’anda ya kwikalamo? Tukalanga vino twatemwa ina itu na ya nkazi nu kuyalanga icikuuku asi sile muli vino tukalanda, lelo na muli vino tukacita.

15. Wakwe vino ilembelo lyakwe 1 Yoane 4:7, 8 likalanda, i vyani vino tulinzile ukucita?

¹⁵ Tukakolanya Tata witu uwaya nu kutemwa uwa kwi yulu lino tukulanga ukutemwa kuli yauze. (Welengini 1 Yoane 4:7, 8.) Inzila yonga icindame ino tungalangilamo ukutemwa, u kweleelana. Limwi umwi angatusosya nomba pa cisila alenga uwelelo. Tukalanga ukutemwa nga twamwelela nu kwililako  kuli vino watuluvyanyizye. (Kolo. 3:13) Umwina uwi zina lyakuti Aldo wasosile sana lino umwina wino wacindike sana walanzile amazwi aipe pa antu amu mutundu wakwe. Aldo walanzile ukuti: “Napefile pa miku iingi kuli Yeova ukuti angazwe ukukanaelenganya iviipe pa mwina wiya.” Nomba kuli na vyuze vino umwina Aldo wacisile. Wapingwilepo ukuomba nu mwina wiya umu mulimo wa kusimikila. Lino yaomvile yonsi, umwina Aldo walondolwile pali vino umwina walanzile. Umwina Aldo walanzile ukuti: “Lino umwina uvwile vino nayuvwile pa mazwi aipe yano walanzile, walenzile uwelelo. Imyuvwikile izwi lyakwe pa kulenga uwelelo yalenzile niluke vino walangulwike pa mazwi aipe yano walanzile. Pa cisila cakwe cico twizile ituya ya cuza nupya nu kwililako kuli vino vyacitiike.”

16-17. I vyani vino tulinzile ukulondesya ukucita?

¹⁶ Umutumwa Yoane watemilwe sana aina yakwe nupya walondanga yatwalilile ukuya nu utailo ukome, nupya vino wayuvwanga pali aliyo vyalolekiile mu makalata yatatu yano wayalembiile. Cikatukomelezya sana ukumanya ukuti aonsi na anaci ali wakwe aliwe yasoololwa ukuya ya kateeka yauze na Klistu!—1 Yoa. 2:27.

¹⁷ Lekini tutwalilile ukuomvya ivyeo vino twasambilila. Lekini twalondesya ukwikalilila umu cumi, ukuvwila Yeova muli vyonsi vino tukucita. Mwasambilila Izwi Lyakwe nu kulitaila. Mwataila sana Yesu. Mwakana mano ya untunze ni visambilizyo vya asangu. Mwakana ukuvwila yano yakumutunka ukucita iviipe nupya mutaloleka kwati mukaombela Yeova ala pa nsita ili imwi mukucita iviipe. Lyonsi mwalondela masunde yakwe Yeova. Nupya lekini twaazwa aina na ya nkazi ukuya nu utailo ukome nga tukuyeleela lino yatusosya nu kuyazwa muli vino yakulondekwa.