Navilwe umu 1954 mu St. Paul, ku Minnesota, mu U.S.A., nupya avyazi yane yatali apina nanti aakankala nupya twali sweswe ya Katolika. Nene mwana wakwe ciili umu ana 5. Natandike ukusambilila pi sukulu lyakwe ya Katolika, nupya nali nene kampenga. Nomba ntamanyile ivingi pali Baibo. Nanti icakuti nazumiile ukuti kufwile kwali Leza uwaumvile ivintu vyonsi, ntataile ukuti icalici lyakwe ya Katolika lingangazwa ukulapepa Leza.

Lino nali umu mwaka wa kutandikilako api sukulu lya William Mitchell pano nasambililanga uloya, ya Nte Yakwe Yeova yantandalile pa ng’anda. Yazanyile ale nene mupamviwe nkuwasya, lyene atwalane yaa aali ni cikuuku yazumiile ukuti yalawela nupya. Lino yawezile, nayuzizye mauzyo yaili aakuti: “U mulandu ci uno antu aipe yakatungulukila sana kuluta antu asuma?” ni lyakuti “Uzye antu yangacita uli pakuya ni nsansa zya cumi?” Nazumile ukupokako ibuku lyakuti The Truth That Leads to Eternal Life na Baibo wa New World Translation of the Holy Scriptures uwakweti inkupo isuma yakwe gilini. Nupya nazumile ukutandika ukusambilila Baibo. Ukusambilila Baibo kwangavwile  ukumanyikisya ivintu ivingi. Nali ni nsansa ukumanya ukuti Uwene Wakwe Leza ali uteeko uulateeka antu yonsi pano nsi. Naweni ukuti mauteeko ya antunze yafilwa ukuteeka nupya yalenga kuye ukuwaika, ucuzi, ulufyengo ni vintu vyuze iviipisye.

Naipeezile kuli Yeova uku kutandika kwa mwaka wa 1982 nupya nawatiziwe pa cisila ca mwaka onga pa Ukongano uwakweti umutwe wakuti: “Icumi pa Wene Wakwe Leza” uwayeliile umu cikuulwa cikalamba umu musumba wa St. Paul. Naswilile ku Civic Center uwanda uwalondeliilepo ku kulemba masindano pakuti inje loya. Uku kutandika kwakwe Okotoba nizile imanya ukuti napaasile, nupya nazumiliziwe ukuya loya.

Pa ukongano wa Citungu uwatangi “Icumi pa Wene Wakwe Leza” twaloline na ya Mike Richardson aombelanga pa Betele ya mu Brooklyn, nupya yandondolwelile ukuti kwali iofesi ilikalolekesya pa masunde ilyapanzilwe api Ofesi Likalamba. Niwisye amazwi yakwe mutungwi uwa ku Etiopia aalembwa pa Milimo 8:36 nupya nayuzizye ukuti, ‘I cani cingandesya kuuzya kuombako muli dipatimenti ii ikalolekesya pa masunde?’ Nuuzizye ukuombako umulimo wa pa Betele.

Avyazi yane yataatemilwe pali vino nizile inja Nte Wakwe Yeova. Ya tata yanguzizye ndi cakuti ukuombela pa maofesi yakwe ya Nte kwali nu kulenga nkwate ivintu vino nali nu kukwata nga naombanga uloya. Nayalondolwelile ukuti nkwazwilizyako sile. Nayanenyile ukuti yalampeela madola 75 cila mwezi, luu ali lupiya luno yapeelanga aombelanga pa Betele pa nsita iya.

Pa mulandu wakuti nazumile ukutandika ukuomba mu cilye, ntatandike ukuombela pa Betele papo kwene sile, fwandi natandike ukuombela pa Betele ya mu Brooklyn, ku New York, umu 1984. Yampezile umulimo wa kuombela ku dipatimenti iikalolekesya pa masunde (Legal). Vino naomvileko ku cilye cali nu kungavwa sana ukuomba ningo umulimo uu.

Icikuulwa ca Stanley, icaya mu New Jersey yacikazile umu Novemba 1983. Aina yalenzile ndi cakuti yangatandika ukuzifya amalaiti ni mipaipi ya manzi umu cikuulwa cii. Lino aina yakomanyile na aomvi ya mu uteeko, yalondolwile ukuti yalondanga ukulaomvya icikuulwa ca Stanley ku maukongano yakwe ya Nte Yakwe Yeova. Cii calenzile kuye intazi. Amasunde ya mu musumba wa Jersey pali vino ivikuulwa vilinzile ukuomviwa yalandanga ukuti ivikuulwa vya kupepelamo vilinzile sile ukuya ku ncende ukukaikalila antu. Cikuulwa ca Stanley cayeliile  uku ncende ukwacitikilanga uculuzi, fwandi amu uteeko yakanyizye aina ukuzifya icikuulwa cii. Aina yalenzile nupya, nomba nu muku kwene uu yayakanyizye.

Mu mulungu wa kutandikilapo uwa kuya pa Betele, iuvi lyatwazile umulandu ku cilye, ukuilizyanya pali vino yayakanyizye. Pa mulandu wakuti ale alino namazile imyaka iili ukuombela pa cilye icayeliile mu St. Paul ku Minnesota, namanyile ukuombela pa milandu wakwe ii. Loya witu wenga walanzile ukuti mu cikuulwa ca Stanley mwacitikilanga ivintu ivingi vipusanepusane wakwe ukutambisyamo mafyumu nu kwimbilamo inyimbo. Nomba u mulandu ci uno yangakanyizya ukupepelamo? Cilye capitulwike mu mulandu nu kulanda ukuti musumba wa Jersey utaacindike insambu zitu izya kupepa. Icilye cazumilizye ukuti tupeelwe insambu, nupya natandike ukulola vino Yeova wapolelelanga iuvi lyakwe pa kuomvya insambu zino twakwata ku kulenga mulimo wakwe utwalilile ukulunduluka. Nali sana ni nsansa ukuombako umulimo uu.

Aina yatandike ukuzifya icikuulwa cii, nupya lino nu mwaka onga utatala wasila kufuma pano ukuzifya kwatandikile, kwali ukukomaana kwako yayo aamalanga isukulu lya Gilyadi ilyalenga 79 mu Cikulwa ca Ukongano ica mu musumba wa Jersey apa 8, Sepetemba 1985. Nali sana ni nsansa ukwazwilizyako ukuomba umulimo uu, nupya nali sana ni nsansa ukuombako umulimo uwo ukucila incito ino naombanga yakwe uloya lino ntatala niza pa Betele. Ntamanyile ukuti nani Yeova angambomvya ukupingula imilandu iingi.

Muli ya 1980 ya dokota aingi ni vipatala yatacindike insambu zyakwe ya Nte aalondanga ukulwaziwa ukwaula ukuikilamo uwazi. Ya mama ali pa ukulu yakwatanga sana intazi pa mulandu wakuti ya kapingula yelenganyanga ukuti umwanaci ali pa ukulu atakwata insambu zya kukana ukwikilwamo uwazi. Ya kapingula yalandanga ukuti ndi cakuti nyina wakana ukumwikilamo uwazi angafwa nupya umwana angasyala ukwaula nyina.

Apa 29, Dizemba 1988, Nkazi Denise Nicoleau, uwazi wasizile sana pa cisila ca kukwata umwana umonsi. Pa mulandu wakuti calolike kwati Nkazi Nicoleau angafwa, dokota walondanga nkazi azumile ukwikilwamo uwazi. Nkazi Nicoleau wakanyile. Wanda uwalondelelapo katondo, aakalamba apa cipatala yuzizye ya kapingula ukuyapeela insambu zya kwikila nkazi uwazi. Ukwaula ukuvwa nanti ukunena nkazi na iya pilyasi lii, kapingula wazumilizye ukuti iikilemo nkazi uwazi.

Pali Cisano pa 30, Dizemba, ya dokota iikile Nkazi Nicoleau uwazi nanti icakuti ya iya na ya  lupwa yauze aamusunganga yakanyile. Uwanda kwene uwa, ya lupwa yamwi na eluda wenga nanti yaili yayanyefile pa kucinga ukuti Nkazi Nicoleau yatamwikila uwazi. Pa Ciwelusi katondo pa 31, Dizemba mu musumba wa New York ni ncende zyuze izyazingulwike musumba uu, yalandanga ilyasi kwene lii pa TV, pa ledyo nu mumanyunzipepa.

Pa Mande katondo, nalanzile na kapingula wa mu cilye icikalamba, Milton Mollen. Namulondolwelile ivisinka pa mulandu uu, nu kuleka cimanyikwe ukuti kapingula muze wazumilizye ya dokota ukwikilamo nkazi uwazi ukwaula ukumuzya. Kapingula Mollen wanenyile ukuti inje ukwi ofesi lyakwe umusanya pakuti tukalanzyanye ivisinka na vyuze na masunde aakalanda pa mulandu kwene uu. Umwangalizi wane umwina Philip Brumley wansukilile manguzi ukuyalolana na Kapingula Mollen. Kapingula wamile na ya loya ya cipatala ukuzanwako. Ukulanzyanya kwakomile. Pa nsita imwi Umwina Brumley walemvile pano walembanga ivyeo ukunena ati “teeka umwenzo.” Ningati ukusunda kuku kwazifile sana pano nasosile sana pakuti sile nsinile loya wa cipatala ukuti vino walandanga i vya ufi.

Lino papisile iawala lyonga, kapingula Mollen walanzile ukuti mulandu uu ulaya ali wa kutandikilapo ukuombelwapo uwanda uwalondelelapo katondo. Lino twafumanga mwi ofesi lyakwe, Kapingula Mollen walanzile ukuti loya wa cipatala “watakwata umulimo ukome mutondo.” Cikupiliula ukuti citali nu kwangukila loya ukupeela imilandu iyuvwike iyakuti cipatala cakweti insambu zya kupatikizya Nkazi Nicoleau ukwikilwamo uwazi. Nuvwile kwati Yeova akunena ukuti twali nu kucimvya. Nuvwile ningo sana ukulola vino Yeova watuomvyanga ukufikilizya ukulonda kwakwe.

Twaomvile usiku onsi ukupekanyizizya vino twali nu kulanda uwanda uwalondelelapo katondo. Icilye cayelile mupipi na Betele ya ku Brooklyn, fwandi aingi yano twaombanga nayo yazanyilweko.Lino ya kapingula yuvwile vino twalondolwile, yapingwile ukuti yataali nu kwikilamo nkazi uwazi. Ya kapingula amu cilye cikalamba yavwangileko nkazi nu kulanda ukuti wali umulandu ukwikilamo umulwale uwazi ukwaula kumuzya vino akwelenganya.

Pa cisila, icilye cikalamba umu New York capeezile Nkazi Nicoleau insambu zya kulwaziwa ukwaula ukwikilwamo uwazi. Uu wali umulandu wa kutandikilapo apa milandu 4 ino ivilye vipusanepusane umu United States vyapingwile uno nazwilizyeko. (Lolini kambokosi kakuti “ Milandu Ino Twacimvya Mu Vilye Ivikalamba Sana Umu Mpanga Izipusanepusane.”) Naombako nu mu milandu ipusanepusane pa Betele iikalanda pa misungile ya ana, kutaana, masunde aakalanda pa vikuulwa ni viputulwa.

Lino twaloline na mamane Dawn pa muku wa kutandikilapo, ala yamuta nupya ala akweti ana yatatu. Waombanga incito ya kumwazwilizyako kukwata impiya nu kuomba upainiya. Wapisile sana mu ntazi, nupya cino natemilweko sana apali vino walondesyanga ukuombela Yeova. Umu 1992, twazanyilwe ku Ukongano wa Citungu uwayeliile mu New York, uwakweti umutwe wakuti “Light Bearers” nupya namuzizye ndi cakuti tungatandika ukwizizyanya. Lino papisile umwaka onga, twatwaline. Kukwata mama aakakolezya vyakwe Leza lyonsi nupya uwa nsansa, u wila kufuma kuli Yeova. Dawn wandetela ivintu ivingi visuma sana mu umi wane imyaka yonsi ino twikala pamwi.

Lino twatwaline ala ana yaa yali ni myaka wenga 11, muze 13 nu muze 16. Nalondanga ukuya isi umusuma sana kuli aliyo, fwandi nabelenganga sana impapulo zitu nu kucita vino nabelenga pakuti inje umuvyazi musuma ku ana akuzanamo. Pa myaka iingi twakweti intazi, nomba naya ni nsansa pano ana iza yampokelela nga cuza wao nupya isi uwaya nu kutemwa. Twapokelelanga sana ya cuza ya ana itu pa ng’anda nupya twatemwanga sana ukuya pamwi na acance yaa.

Umu 2013, Dawn nani twakukiile uku Wisconsin uku kwazwilizyako ukusakamala avyazi itu akoloci. Icanzungwisye i cakuti umulimo wane uwa pa Betele utasizile. Yangamile ukutwalilila ukwazwilizyako iuvi litu umu milandu ipusanepusane iyakumile icilye.

Umu Sepetemba 2018, naweni ukuti ilingi lino ntatala navwanga ndinzile ukukoola. Ya dokota yampimile nomba yatazanyile icalenganga. Lino papisile insita, dokota umwi wizile anena ukuti nkaye nkalole wino wasambilila pa ulwale ukaya kuli wongo wongo. Umu Januwale 2019, dokota na muze wanenyile ukuti nakweti ulwale utaseeka sana uwali nu konona umwili onsi.

Lino papisile manda yatatu nateyanga icangalo cino natemilwe sana nizile imvunika ikasa lyakwe ndilo. Nateyanga icangalo kwene ci pa myaka iingi nupya nateyanga ningo sana. Fwandi namanyile ukuti namata ukuteya ningo. Nazungwike sana vino ulwale wane wakomelangako nupya cantalilanga nu kuvwanga ningo, ukupita nu kumila ivyakulya.

Naya sana ni nsansa ukwazwa iuvi lyakwe Yeova mu mulimo uno namanyile uwa uloya. Nupya naya ni nsansa sana pa kumpeela umulimo wa kulemba ivipande ivingi muli ya magazini ivyaazwa sana ya dokota, ya loya na ya kapingula. Nalandanga nu ku antu aingi mu nsi yonsi, kuvwangilako ya Nte Yakwe Yeova pa nsambu zino yakwata pa kulwaziwa ukwaula ukwikilwamo uwazi. Lelo nkalanda wakwe vino kalemba wakwe Baibo Luka walanzile pali Luka 17:10 ukuti: ‘Nene muomvi sile nupya nati ncita vino ndinzile kucita.’—Luka 17:10.