Yeova akalonda antu yaili yano yakutwalana ukuya ni nsansa nu kuya na ucuza ukome uulatwalilila. (Mate. 19:4-6) Ndi cakuti mukulonda ukutwala nanti ukutwalwa, mungazana uli uwakutwalana nawe? Pa mulandu wakuti Yeova ali Kaumba witu, wamanya vino tukalondekwa pakuti tuye ni nsansa umu cupo. Fwandi nga mukulondela ivisinte vino watupeela mungaya ni nsansa. Lekini tulande pa visinte vimwi vivyo.

Ca kutandikilapo, tulinzile ukumanya pali sweineco ukuti: “[Mu mwenzo] mwazula ucenjezi uwa misango yonsi, nupya uwipe wakwe cimwi.” (Yele. 17:9) Ndi cakuti antu yaili aakulonda ukutwalana yatandika ukwizizyanya, yakatemwana sana icakuti iyafilwa nu kupingula ningo pa vintu. Ndi cakuti antu yatwalana pa mulandu sile na vino yakuyuvwa pali cila muntu, cingalenga ize yaye sana nu ulanda pa mulandu wakuti vino yenekelanga vitacitike. (Mapi. 28:26) Ali mulandu uno citazipila antu atandika sile ukwizizyanya ukutandika ukulanda nanti ukucita ivintu ivikulangilila kwati yasya yatwalane.

Pa Mapinda 22:3 pakalanda ukuti: “Umuntu wamano akacevya uzanzo ungamuzana nu kuutuka autuka, lelo iciwelewele cene cikaitwala sile umu mazanzo.” Uuzanzo ci ungaya umukuomvya mawebusaiti ya kwizizyanyizyapo? Ica ulanda i cakuti yamwi yatandike ukwizizyanya na antu yano yatamanyile yano yazanyile sile pa intaneti, nupya izile iyazana ukuti antu yayo yayabepanga sile. Nupya antu aataya ni cisinka yakaika mazina ya ufi pa intaneti pakuti yabepa antu yakaele nu kuyalila impiya. Insita zimwi antu yayo aataya ni cisinka yakalanda nu kuti a Nte Yakwe Yeova.

Lolini uzanzo na uze uwayamo. Aakapanga mawebusaiti yaa yakapenduluka umu vintu vimwi pakuti yalole uzye aalikwi angalinga ukwizizyanya na wii. Nomba kutaya usininkizyo ukalangilila ukuti inzila zya musango uwo zikaomba. Citange ciye ica mano ukutaila puloglamu ya pa kompyuta iyapangwa sile na antu ukutupingwilla ivintu vimwi ivicindame wakwe ukutusoolwela uwa kutwalana nawe angalinga. Tutange tutaile mapuloglamu ya pa kompyuta wakwe vino tungataila ivisinte vya muli Baibo.—Mapi. 1:7; 3:5-7.

 Icisinte ca pa Mapinda 14:15 cikati: “Umuntu iciwelewele wene akataila muli vyonsi kwene, lelo uwa mano wene akawaka imipitile yakwe.” Lino mutatala mwapingulapo ndi cakuti umuntu umwi watalinga ukutwalana nawe, mulinzile ukumumanya ningo. Nomba ndi cakuti mukwizizyanya ukuomvya intaneti cingatala ukucita vivyo. Nanti cakuti mungalola ivyeo vyakwe cila muntu nu kusumba insita ikulu ukulanzyanya pa mameseji, uzye mungati imumumanya ningo umuntu wiyo? Yamwi aelenganyanga ukuti yazana icitemwiko ca cumi, yazungwike sana lino yaloline nu muntu wiyo.

Kalemba wa masamu walanzile ukuti: “Nsi iizya na antu antumpu, nanti ukuikumika ku antu asomvi.” (Masa. 26:4) Antu aingi yakalola ukuti caya sile ningo ukubepa pa vyeo vino yakaika pa intaneti pakuti antu yayakumbwa. Yangafisa imiyele yao iipe nanti limwi imiyele yao iipe itange ilolekele umu mameseji yano yakatumila yauze. Icicindama ukumanya masuko uku mauzyo yaa: Nanti cakuti yamwi yakalanda ukuti a Nte Yakwe Yeova, uzye umu cumi cumi a ina Klistu abatiziwe? Uzye yaya na ucuza usuma na Yeova? Uzye yacindikwa umu cilongano cao? Uzye yakacita ivintu iviipe nanti limwi aa “cuza aipe”? (1 Kol. 15:33; 2 Tim. 2:20, 21) Uzye antungwa ukutwala nanti ukutwalwa ukulingana na vino Baibo ikalanda? Mulinzile ukumanya masuko uku mauzyo yaa, nomba cingamutalila ukumanya masuko yayo ndi cakuti mutuzizyeko Nte muze uwamanya ningo umuntu wiyo. (Mapi. 15:22) Nupya umuomvi wakwe Yeova uwa cisinka atalinzile nu kwelenganya pa kutwalana nu muntu aatataila alino nu kuya “ukwi yoko ilili limwi” nu muntu wiyo.—2 Kol. 6:14; 1 Kol. 7:39.

Pa mulandu wakuti mwaya uzanzo mu kuomvya mawebusaiti ya kwizizyanyizizyapo, kwaya inzila izisuma zino tungalondelamo wino tukulonda ukutwalana nawe nu kumumanya ningo. Aekwi kuno mungazana aangalingana ukutwalana nawe? Nga tukuzanwa pamwi, tungamanyana na yauze lino tuli pa kulongana, ku maukongano aakalamba nu kukukomaana kuuze.

Ndi cakuti tusikulongana pamwi, wakwe vino cili lino kuli ulwalwe wakwe COVID-19, tukalongana ukuomvya intaneti nupya pa kulongana kwene kuu tungamanyana na ina na ya nkazi aatatala yatwala nanti ukutwalwa. Munguvwa lino yakulanda malyasi nu kulanga vino yaya nu utailo mu vyasuko vyao. (1 Tim. 6:11, 12) Limwi mungalanzyanya pa cisila ca kulongana umu tumaumba twakulanzyanyizizyamo pa zoom. Pa nsita ino ya Nte Yakwe Yeova yakaizizya pamwi pa intaneti ukwaula ukukomaana ingaya insita isuma iyakulola vino wino umutemwa akacitila antu yauze na cico cingalenga mumanye vino waya. (1 Pet. 3:4) Nga mwamanya ningo umuntu wiyo lino papita insita, mungalondelezya ndi cakuti mwakwata mauyo ali yamwi nupya nga mungalinga ukutwalana.

Ndi cakuti asimbe yakuleka ivisinte vya muli Baibo ukuyatungulula lino yakulonda uwa kutwalana nawe, yalaya ni nsansa mu cupo cao, wakwe vino pa Mapinda 18:22, [NWT] pakalanda ukuti: “Wensi uwazana umuci umusuma, ala wazana icintu icisuma, nupya ala wapaalwa na Yeova.”