1. I vyani vino Yeova wamucitila?

UZYE cali uli pakuti muye ya Nte Yakwe Yeova? Limwi muvwile ilyasi lisuma uku avyazi inu, yano mwaombanga nayo nanti yano mwasambililanga nayo, nanti limwi ya Nte Yakwe Yeova yamutandalile ale yakusimikila uku ng’anda ni ng’anda. (Mako 13:10) Lyene umwi watandike ukuya pamwi namwe pa nsita ikulu pa kumusambilizya Baibo. Lino mwasambililanga Baibo, mwatandike ukutemwa Yeova, nupya mwasambilile ukuti wamitemwa. Yeova wamilesile umu cumi, ndakai lyene mwemwe asambi yakwe Yesu Klistu, nupya mwakwata nu upaalilo wa kwikala amanda pe. (Yoa. 6:44) Ukwaula nu kutwisika mukataizya sana pali vino Yeova walenzile umwi ukumusambilizya icumi na pali vino wamupokeliile ukuya aomvi yakwe.

2. I vyani vino tumasambililapo umu cipande cii?

² Pa mulandu wakuti lyene twamanya icumi, twakwata isyuko lya kwazwa yauze ukulapitila pamwi naswe umu nzila ya ku umi. Cinganguka ukusimikila uku antu, nomba limwi cingatutalila ukuzya yauze ndi cakuti yangatemwa ukuti twasambilila nayo Baibo. Uzye vii avino mukayuvwa? Ndi cakuti avino mukayuvwa, ivisinka ivili mu cipande cii vingamwazwa. Tumalanda pali vino vikalenga twaombako umulimo wa kupanga asambi. Tumalanda na pali vino tungacimvya intazi izingalenga twafilwa ukutungulula masambililo ya Baibo. Tumatandikilapo ukulanda pa mulandu uno tulinzile ukusimikila nu kusambilizya antu ilyasi lisuma.

3. I cani cikalenga twasimikila?

³ Lino Yesu wali pano nsi, wanenyile alondezi yakwe ukulaomba umulimo uwakweti imbali ziili. Inkoleelo, wayanenyile ukulasimikila ilyasi lisuma pa Wene, nupya wayalangilile vino yali nu kuomba. (Mate. 10:7; Luka 8:1) Wakwe, Yesu wanenyile alondezi yakwe ivya kucita ndi cakuti antu yakuvwa ukwi lyasi lisuma alino ni vya kucita nga yakana. (Luka 9:2-5) Nupya walanzile nu kuti asambi yakwe yali nu kusimikila ku antu aingi nu mu ncende izingi, lino walanzile ukuti yalasimikila “ku yantu amu nko zyonsi.” (Mate. 24:14; Mili. 1:8) Nampo nga antu yali nu kuzumila nanti ukukana ukukutika ukwi lyasi lisuma, Yesu wanenyile alondezi yakwe ukunena antu pa Wene wakwe Leza na vino wali nu kucita.

4. Ukulingana na Mateo 28:18-20, i vyani na vyuze vino tulinzile ukucita ukulunda pa kusimikila pa Wene?

⁴ I cintu ci cakwe ciili cino Yesu wanenyile asambi yakwe ukucita? Wanenyile alondezi yakwe ukusambilizya asambi ukulauvwila ivintu vyonsi vino wayanenyile. Yamwi yangalanda ukuti lino Yesu walandanga pa mulimo wa kusimikila nu kusambilizya walandanga sile pa ina Klistu ya kutandikilapo, nomba uzye vivyo i vya cumi? Awe, Yesu walangilile ukuti umulimo uu wali nu kutwalilila nu mu manda itu kwene “ukufika nu ku mpelelekezyo ya nsi.” (Belengini Mateo 28:18-20.) Yesu walanzile vii lino walolekiile uku asambi yakwe ukucila pali 500. (1 Kol. 15:6) Nupya umu vyeo vino Yesu wasokolwelile Yoani, walangilile ukuti asambi yakwe yonsi yalinzile ukwazwa yauze ukusambilila pali Yeova.—Kuso. 22:17.

5. Ukulingana na 1 Kolinto 3:6-9, uzye Paulo walondolwile uli vino ukusimikila nu kusambilizya vyalemana?

⁵ Mutumwa Paulo wakolinye umulimo wa kupanga asambi uku kulima, ukulangilila ukuti tulinzile ukucita na vyuze ukucila sile ukukomela imbezu. Wiwisyeko aina Kolinto ukuti: “Nemo nakomiile, Apolo nawe wakontelile . . . Mwemwe calo cakwe Leza cino akulima.” (Belengini 1 Kolinto 3:6-9.) Sweswe yaomvi “mu calo cakwe Leza.” Fwandi tukakomela imbezu lino tukusimikila nupya tukakontelela lino tukusambilizya. (Yoa. 4:35) Nomba twamanya ukuti Leza aliwe akalenga imbezu ukukula, kuli kuti, aliwe akalenga antu ukupalama kuli aliwe.

6. Lino tukusambilizya antu, i vyani vino tulinzile ukuyazwa ukucita?

⁶ Tukalonda ‘yonsi aakalondesya ukuya umu nzila ya ku umi wa pe.’ (Mili. 13:48) Pakuti twazwe antu yaa ukuya asambi, tulinzile ukuyazwa (1) ukuvwikisya, (2) ukuzumila, na (3) ukulacita vino yakusambilila muli Baibo. (Yoa. 17:3; Kolo. 2:6, 7; 1 Tesa. 2:13) Yonsi kwene umu cilongano yangazwa asambi lino yakuya apa nkoleelo umu kuyalanga ukutemwa nu kuyalenga ukuyuvwa ukuti iyapokelela lino iza umu kulongana. (Yoa. 13:35) Akutungulula isambililo alinzile ukusumba insita ikulu ukwazwa umusambi ukusenuka umu “ivintu ivikome ivyaya wa maliinga” vino wazumilamo na vino akacita. (2 Kol. 10:4, 5) Pangapita imyezi iingi pakuti umwi asenuke umu umi wakwe nga alinge ukubatiziwa. Nomba ukusenuka kuko kungamwazwa.

7. I cani cikalenga twalondesya ukusimikila nu kupanga asambi?

⁷ U mulandu ci uno tukasimikila nu kusambilizya antu ukuya asambi? Ica nkoleelo, a pa mulandu wakuti twatemwa Yeova. Nga mukwezya na maka ukuvwila isunde lya kusimikila nu kupanga asambi, ala mukulanga ukuti mwatemwa Leza. (1 Yoa. 5:3) Elenganyini pali cii, ukutemwa kuno mwatemwa Yeova  kwalenga ukuti mwasimikila uku ng’anda ni ng’anda. Uzye camwangukiile ukulondela isunde lii? Cifwile citangwike. Uzye muvwile intete lino mwaile umu kusimikila pa muku wa kutandikilapo? Ukwaula nu kutwisika muvwile intete. Nomba mwamanyile ukuti ali mulimo uno Yesu akulonda mwaomba, nupya muvwilile isunde lii. Nupya pa cisila ca kusimikilako pa nsita imwi, camwangukiile ukulasimikila. Nomba mukauvwa uli ukutungulula isambililo lya Baibo? Uzye mukauvwa intete nga mwelenganyapo? Mufwile mukauvwa. Nomba nga mwapepa kuli Yeova ukumulenga ukuti amwazwe ukuya asipe nu kutandika ukutungulula isambililo lya Baibo, angamwazwa ukulondesya ukupanga asambi.

8. Ukulingana na Mako 6:34, i vyani na vyuze ivikalenga twasambilizya yauze?

⁸ Cakwe ciili, ukutemwa antu u kukalenga twayasambilizya icumi. Pa nsita imwi, Yesu na asambi yakwe yatonsile pa mulandu wakuti yasimikiile sana. Yalondanga ukuya ku ncende umu kupuza, nomba iumba lya antu lyayakonsile. Yesu uvwilile antu uluse, nupya watandike ukuyasambilizya “ivintu ivingi.” (Belengini Mako 6:34.) Waombiisye sana nanti cakuti watonsile. U mulandu ci? Yesu wamanyile vino iumba lii lyayuvwanga. Walondesyanga ukuyazwa pa mulandu wakuti waweni ukuti yacuulanga nupya yalondekwanga upaalilo. Na ndakai kwene antu yakwata intazi nupya yakalondekwa upaalilo, nanti cakuti yakaloleka kwati yaya ni nsansa nupya yakwata vino yakalondekwa umu umi. Yaya wa mfwele iziponge, nupya yatakwata kacema uwa kuyatungulula. Mutumwa Paulo walanzile ukuti antu yaa yatamanya Leza nupya yatakwata upaalilo. (Efes. 2:12) Yaya mu “museo usaalale” uukatwala uku ononosei. (Mate. 7:13) Nga twelenganya sana pali vino antu aaya umu cifulo citu yakalondesya ukumanya Leza, ukutemwa nu luse kukalenga twalondesya ukuyazwa. Nupya inzila isuma ino tungayazwilamo u kutandika ukusambilila nayo Baibo.

9. Ukulingana na Filipi 2:13, uzye Yeova angamwazwa uli?

⁹ Limwi mukauvwa intete ukutandika ukusambilizya umwi Baibo pa mulandu wakuti mwamanya ukuti mulalondekwa insita ikulu iya kupekanya nu kusambilila nawe. Ndi cakuti avino mukayuvwa, nenini Yeova. Mwamulenga ukuti amwazwe ukuzana wino mungatungulula isambililo. (Belengini Filipi 2:13.) Mutumwa Yoani watunenyile ukuti Leza akaasuka mapepo nga tukumulenga ukulingana nu kulonda kwakwe. (1 Yoa. 5:14, 15) Fwandi mungasininkizya ukuti Yeova alamwazwa ukulondesya ukulasambilizya antu.

10-11. I cani cingalenga twasitooka ukutandika ukutungulula isambililo lya Baibo?

¹⁰ Twamanya ukuti umulimo wa kusambilizya wacindama, nomba limwi cingatutalila ukuomba ukulingana na vino tukulonda umu mulimo wa kupanga asambi. Lekini tulandeko pa ntazi zimwi na vino tungazicimvya.

¹¹ Limwi tungafilwa ukuomba ukulingana na vino tukulonda. Wakwe, ya kasimikila yamwi aakote nupya yamwi nayo yakalwalilila. Uzye vii i vikamucitikila? Ndi cakuti i vikumucitikila, lolini vino itusambilila ukufuma pano ulwale wakwe COVID-19 watandikila. Itusambilila ukuti tungatungulula masambililo ya Baibo ukuomvya foni nanti viombelo vyuze ivyakulanzyanyizizyamo. Fwandi mungatandika nanti ukutungulula isambililo lya Baibo ale muli uku ng’anda uku mwinu. Nupya umu kucita vii mwaya usuma nauze. Yamwi yakalonda ukusambilila Baibo, nomba yasizanwa pa mang’anda pa nsita ino aina na ya nkazi yakailapo.  Nomba limwi yangazanwa katondo nanti manguzi. Uzye mungaya umu kutungulula isambililo pa nsita zii? Yesu wasambilizye Nikodema insita ya usiku, pano ali ino Nikodemo wasoolwilepo.—Yoa. 3:1, 2.

12. I vyani vikalenga tusininkizye ukuti tungaya ya kasambilizya yasuma?

¹² Limwi tungaelenganya ukuti tutanga tukwanisye ukutungulula isambililo lya Baibo. Limwi tungaelenganya ukuti tulinzile ukumanya ivingi sana nanti ukuya kasambilizya musuma lino tutatala twatandika ukusambilila na umwi. Ndi cakuti avino mukayuvwa, lolini ivintu vitatu ivingamwazwa ukusininkizya ukuti mungakwanisya ukusambilizya umwi. Ca kutandikilako, Yeova akamulola ukuti mungasambilizya yauze. (2 Kol. 3:5) Cakwe ciili, Yesu uwapeelwa “amaka yonsi umwi yulu na pano nsi” wamupeela insambu zya kusambilizya. (Mate. 28:18) Cakwe citatu, mungataila yauze ukuti yalamwazwa. Yesu wataile vino Isi wamusambilizye nupya avino walandangapo, naswe kwene avino tulinzile ukucita. (Yoa. 8:28; 12:49) Nupya munguzyako umwangalizi wi umba, painiya aakaomba ningo, nanti kasimikila uwamanya ukusambilizya ningo ukumwazwa ivya kutandika nu kutungulula isambililo lya Baibo. Inzila yonga ino mungayelamo ya kasambilizya yasuma u kuzanwako pi sambililo lino kasimikila aakaomba ningo akutungulula.

13. U mulandu ci uno tulinzile ukuitemelwa ukuomvya inzila izipusanepusane pa kusambilizya?

¹³ Limwi cingatutalila ukuomvya inzila izipya ni viombelo pa kusimikila. Vino tukatungulula masambililo ya Baibo ndakai vyasenuka. Ibuku lino tukuomvya sana ilyakuti, Mungaya ni Nsansa Manda Pe! likulondekwa ukupekanya isambililo nu kutungulula umu nzila ipusaneko na vino twacitanga mpiti. Tukabelenga mapalaglafu anono nupya tukalanzyanya sana nu musambi. Lino tukusambilizya, tukaomvya sana mavidyo ni viombelo vyuze ivya pa intaneti wakwe JW Library^®. Ndi cakuti mutamanya ukuomvya iviombelo vii, munganenako umwi amusambilizye. Swe antu twatemwa ukucita ivintu mu nzila ino twaelezya. Citanguka ukuelezya ukucita ivintu mu nzila ipya. Nomba ndi cakuti Yeova na antu yauze yatwazwa, cingatwangukila ukuelezya nupya tungaipakizya ukusambilila na antu. Wakwe vino painiya umwi walanzile, “inzila ii ya kusambilililamo iisuma sana uku musambi na kuli kasambilizya.”

14. I vyani vino tulinzile ukwiusya ndi cakuti tukaombela mu cifulo cino antu yasikutika kuli sweswe, nupya ilembo lyakwe 1 Kolinto 3:6, 7 lingatukomelezya uli?

¹⁴ Limwi tukaikala uku ncende kuno catala ukutandika masambililo ya Baibo. Yamwi yasiika amano ukwi lyasi lisuma nupya yakatukanya. I cani cingatwazwa ukutwalilila ukutaila ukuti antu yaa yanguvwa ukwi lyasi lisuma ilyaya muli Baibo? Mwaiusya ukuti ivintu umu nsi vikasenuka, nupya yaya kwene aatalondanga ukuvwa ukwi lyasi lisuma yangatandika ukulondesya vyakwe Leza. (Mate. 5:3) Yamwi aakananga ukupokako impapulo zitu izile iyazumila ukutandika ukusambilila Baibo. Nupya twamanya ukuti Yeova ali mwineco wa uzombozi. (Mate. 9:38) Akalonda ukuti twakomela nu kukontelela, lelo aliwe akamezya. (1 Kol. 3:6, 7) Nupya tukakomeleziwa sana ukumanya ukuti nanti icakuti ndakai tusikusambilila na antu Baibo, Yeova akatupaala pali vino tukaombesya apapezile amaka itu asi pa mulandu na antu yano tukasambilizya nanti yano tukapeela impapulo zitu! *

15. Uzye Yeova akauvwa uli ndi cakuti umwi wasambilila icumi nu kutandika ukunenako yauze pali vino akusambilila?

¹⁵ Yeova akauvwa ningo ndi cakuti umwi wasambilila icumi nu kutandika ukunenako yauze pa cumi kwene cico. (Mapi. 23:15, 16) Yeova afwile akaya sana ni nsansa ndakai nga walola vino aomvi yakwe yakaombesya lino yakusimikila nu kusambilizya! Wakwe, asi mulandu nu ulwale uwipisye uwaliko umu mwaka wa mulimo uwa 2020, twatungulwile masambililo ya Baibo 7,705,765, icalenzile nu kuti antu 241,994 yaipeele kuli Yeova nu kubatiziwa. Nupya asambi yaa apya, yamatungululanga masambililo ya Baibo nu kupanga asambi aingi. (Luka 6:40) Ukwaula nu kutwisika, tukalenga Yeova ukuya ni nsansa lino tukuombako umulimo wa kupanga asambi.

16. Uuyo ci usuma uno tungimika?

¹⁶ Umulimo wa kupanga asambi wakoma, nomba ndi cakuti Yeova watwazwa tungaombako umulimo uu uwa kwazwa apya ukutemwa Tata witu uwa kwi yulu. Uzye tungimika uyo wa kutandika ukutungulula isambililo nanti lyonga? Tungazunguka ukulola ivingacitika nga tukuuzyako yonsi yano twazana nga yangatemwa ukusambilila. Tungataila ukuti Yeova alapaala ukuombesya kwitu.

17. Uzye tuluvwa uli nga twatandika ukutungulula isambililo lya Baibo?

¹⁷ I syuko sana ukuombako umulimo wa kusimikila nu kusambilizya yauze icumi! Mulimo uu ukalenga tuye ni nsansa zya cumi. Umutumwa Paulo uwavwile antu aingi ukuya asambi, walondolwile vino wayuvwile lino watiile: “Uzye pa nsita ya kuyapo kwa Mwene Yesu, a weni aalaya upaalilo witu, insansa zitu ni cisote ca ucindami witu? Icumi mwemwe kwene muli ucindami witu ni nsansa zitu.” (1 Tesa. 2:19, 20; Mili. 17:1-4) Na ndakai kwene antu aingi avino yakayuvwa. Nkazi Stéphanie wino wene na iya yazwa antu aingi ukubatiziwa walanzile ukuti, “Kutaya uluzango ulwacila pa kwazwa antu ukuipeela kuli Yeova.”