CIPANDE CA KUSAMBILILAMO 30
Mwatwalilila Ukutemwa Yeova na Antu
“Lekini ukutemwa kutulenge ukukula muli vyonsi.”—EFES. 4:15.
LWIMBO NA. 2 Wewe Yeova
VINO TUMASAMBILILAPO a
1. I vyani vino mwizile imumanya lino mwatandike ukusambilila Baibo?
UZYE mukwiusya lino mwatandike ukusambilila Baibo? Mufwile mwazungwike sana lino mwamanyile ukuti Leza wakwata izina. Limwi mufwile muvwile ningo sana lino mwamanyile ukuti Leza asioca antu umu moto wa pe. Nupya mufwile muvwile ningo ukumanya ukuti aatemwikwa inu afwa yalaya nu umi nupya nu kuti mulikala pamwi nayo umu paladaise.
2. Ukulunda pa kusambilila icumi ica muli Baibo, a muli vyani muno mwasenwike? (Efeso 5:1, 2)
2 Lino mwatwalilile ukusambilila Izwi Lyakwe Leza, mwatwalilile ukutemelwako Yeova. Ukutemwa kwalenzile mwalondesya ukuomvya vino mukusambilila. Mwatandike ukuomvya ivisinte ivya muli Baibo lino mukupingula pa vintu. Nupya mwatandike ukulonda ukucita ivintu ivisuma pano mwalondanga ukuzanzya Leza. Wakwe vino umwana akakolanya isi uwaya nu kutemwa, namwe kwene mwatandike ukukolanya Tata winu uwa kwi yulu.—Belengini Efeso 5:1, 2.
3. A mauzyo ci yano tungayuzya sweineco?
3 Tungayuzya sweineco tuti: ‘Uzye ukutemwa kuno natemwa Yeova kukuya kukulilako ukucila vino cali lino natandike ukuya umwina Klistu? Ukufuma pano nabatiziwilwe, uzye vino nkaelenganya na vino nkacita vikalangilila ukuti nkakolanya Yeova, sana sana umu kulanga ukutemwa uku ina na ya nkazi?’ Ndi cakuti ‘ukutemwa kuno mwakweti pa kutandika’ kukuya kukuceepa, mutalinzile ukutoovoka. Vikwene i vyacitikiile na ina Klistu aakutandikilako. Yesu atayatazyezile, nupya naswe kwene atalatutazyela. (Kuso. 2:4, 7) Wamanya ukuti tungatwalilila ukuya nu kutemwa wakwe kuno twakweti pa kutandika lino twasambilile icumi.
4. I vyani vino tumasambilila umu cipande cii?
4 Umu cipande cii tumalanda pali vino tungatwalilila ukulunduluka umu kutemelwako Yeova na antu yauze. Lyene tumasambilila na pa visuma ivikatucitikila nu kucitikila antu yauze ndi cakuti tukutemelwako Yeova alino na ina na ya nkazi.
MWATWALILILA UKUTEMWA YEOVA
5-6. Iintazi ci zino umutumwa Paulo wakwatanga lino waombanga umulimo wa kusimikila, nomba i vyani ivyamwazwile ukutwalilila ukuombela Yeova?
5 Nanti cakuti umutumwa Paulo waipakizyanga ukuomba umulimo wakwe Yeova, wakwatanga intazi izingi sana zino walondekwanga ukucimvya. Insita izingi wapitanga injendo izitali sana, nupya pa nsita iya citangukanga ukuya pa lwendo. Lino wayanga pa njendo zii, insita zimwi Paulo wayanga umu “mazanzo ya pa nguzi” nu mu “mazanzo ya vipondo.” Nupya kwayanga insita zimwi lino antu aamupasile yamumanga. (2 Kol. 11:23-27) Nupya asi lyonsi lino Aina Klistu yataizyanga pali vino Paulo waombesyanga pakuti ayazwe.—2 Kol. 10:10; Filipi 4:15.
6 I vyani ivyazwilizye Paulo ukutwalilila ukuombela Yeova? Paulo wasambilile imiyele ino Yeova wakwata ukupitila umu Malembo alino na kuli vino wamucitilanga. Paulo wasininkizye ukuti Yeova wamutemilwe sana. (Loma 8:38, 39; Efes. 2:4, 5) Na cii calenzile ukuti atemelweko sana Yeova. Paulo walangilile vino watemilwe Yeova ukupitila umu ‘kuombela antu amuzilo nupya watwalilile ukuyaombela.’—Aeb. 6:10.
7. Iinzila ci yonga ingalenga tutemelweko sana Yeova?
7 Tungatwalilila ukutemelwako Leza ndi cakuti tukuisambilizya sana Izwi lyakwe. Lino mukubelenga Baibo, mwalola vino cila ciputulwa cikumusambilizya pali Yeova. Mwayuzya imuti: ‘Uzye ivyeo vii vikulangilila uli vino Yeova wantemwa? Uzye ivyeo vii vikulangilila ukuti u mulandu ci uno ndinzile ukutemwa Yeova?’
8. Uzye ipepo lingatwazwa uli ukutemelwako Leza?
8 Inzila na yuze ingalenga tutemelweko sana Yeova u kulapepa sana kuli aliwe ukufuma pansi ya mwenzo. (Masa. 25:4, 5) Yeova alaasuka mapepo itu. (1 Yoa. 3:21, 22) Khanh, nkazi aakaikala uku Asia, watiile: “Pa kutandika natemilwe Yeova pa mulandu na vino nasambilile kuli aliwe. Nomba lino naweni vino wasukanga mapepo yane, namutemilweko sana. Na cii calenzile ukuti nalondesya ukucita ivintu ivya kumuzanzya.” b
MWATWALILILA UKUTEMWA ANTU YAUZE
9. Uzye Timoti walangilile uli ukuti walundulukanga muli vino walanganga ukutemwa uku ina na ya nkazi?
9 Lino Paulo wizile aya umwina Klistu, wazanyile umulumendo uwacance uwali ni miyele isuma uwi zina lyakuti Timoti. Timoti watemilwe Yeova na antu. Paulo wanenyile Aina Filipi ukuti: ‘Pano ntakweti ali wensi uwaya wakwe Timoti aangamukomelezya monsi muno mukulondekwa.’ (Filipi 2:20) Paulo atalanzile ukuti icalenzile atemwe Timoti a pa mulandu wakuti waombanga ningo umulimo nanti pali vino walandanga ningo malyasi aku yantu yonsi, lelo a pa mulandu na vino watemilwe aina na ya nkazi. Ukwaula nu kutwisika amu vilongano vino Timoti watandalilanga yalondesyanga ukuti akawele nupya.—1 Kol. 4:17.
10. Uzye ya Anna na ya iya yalangilile uli ukutemwa kuno yatemilwe aina na ya nkazi?
10 Naswe kwene tukalonda inzila zino tungazwilizyamo aina na ya nkazi. (Aeb. 13:16) Uvwini ivyacitikiile ya Anna yano twalanzilepo umu cipande icafumako. Pa cisila ca cimuza icipisye, yene pamwi na ya iya yatandalile ulupwa lumwi lwakwe ya Nte. Nomba lino yafisile kuuku yazanyile ukuti icimuza capalulwile ipaala. Na cii calenzile ukuti ulupwa lutakwata ivyakuzwala ivisuma. Ya Anna yatiile: “Twasenzile ivyakuzwala vyao, ituya ituyafulila, nu kuviwezya ala ituvipeta ningo nu kuviciisa. Swemo twalolanga kwati pasi vino tucisile, nomba vino twacisile vyalenga tutwalilile ukuya ya cuza ukufika na ndakai.” Pa mulandu wakuti ya Anna na ya iya yatemwa aina na ya nkazi, cikalenga yalola inzila zino yangayazwilamo.—1 Yoa. 3:17, 18.
11. (a) Uzye antu yauze yakauvwa uli ndi cakuti tukuyalanga ukuti twayatemwa? (b) Ukulingana na Mapinda 19:17, uzye Yeova akacita uli nga walola tukulanga ukutemwa?
11 Ndi cakuti tuli ni cikuuku nupya tukulanga ukutemwa kuli yauze, yalalola vino tukaezya na maka ukukolanya Yeova. Nupya yangataizya pali vino twaya ni cikuuku ukucila na pali vino tungelenganya. Khanh wino itulandapo mpiti, akaiusya sana antu yano yamwazwilepo. Watiile: “Nkataizya sana ya nkazi aansendanga umu mulimo wa kusimikila. Iizanga umu kunsenda pa ng’anda, kungama ukuti tukalile capamwi icakulya, nupya yasininkizyanga ukuti nafika ningo pa ng’anda. Nkalola ukuti yaombesyanga sana pakuti yacite vyonsi vii. Nupya ukutemwa u kwalenganga yacita vii.” Ukuya kwene asi yonsi aangatutaizya pali vino tukayacitila. Khanh walanzile pa yantu aamwazwilizye ukuti: “Ningatemwa ukuyacitila ivisuma pali vino yancitiile, nomba ntamanya kuno yakaikala. Nanti ciye vivyo, Yeova wamanya nupya nkapepa ukuti akayalambule pali vino yangazwile.” Vino Khanh walanzile i visinka sana. Yeova akalola nu tuntu utunono tuno tukacitila antu yauze. Akalola ukuti tuntu tuto twacindama sana nu kuti i nkongole ino alinzile ukuwezya.—Belengini Mapinda 19:17.
Ndi cakuti umwi watandika ukulunduluka umu mulimo wakwe Yeova, akalola inzila zino angazwilamo antu yauze (Lolini palaglafu 12)
12. Uzye aina yangalanga uli ukuti yatemwa amu cilongano? (Loliniko ni vikope.)
12 Ndi cakuti mwemwe ina, uzye mungacita uli pakuti mwalanga ukutemwa kuli yauze nu kulalondesya ukuyazwa? Umwina uwacance uwi zina lyakuti Jordan uzizye eluda pali vino angacita pakuti angaazwilizya sana amu cilongano. Eluda wamutaizye pali vino walundulukanga nupya wamupanzileko mano pali vino angacita pakuti alunduluka sana. Wakwe, eluda wakomelizye Jordan ukuti angaafika zuwa pa Ng’anda ya Wene pakuti angalamuka antu, kulaasuka pa kulongana, kulazanwa lyonsi ukwi iumba lino wayako pakuti angasimikila lyonsi, alino nu kulalola inzila na zyuze zino angazwilamo antu yauze. Lino Jordan wacisile vii, atasambilile sile ivintu na vyuze ivipya, lelo wasambilile na vino angalanga sana ukutemwa uku ina na ya nkazi. Jordan wizile asambilila ukuti ndi cakuti umuntu waya umuomvi akatumikila asi ali lino akatandika ukwazwa antu; lelo akatwalilila sile ukucita vivyo kwene.—1 Tim. 3:8-10, 13.
13. Uzye ukutemwa kwalenzile uli umwina Christian ukulinga ukuya eluda nupya?
13 Nga ndi cakuti mwalipo aomvi akatumikila nanti ya eluda? Yeova akaiusya vino mwaombanga nu kutemwa kuno mwakweti ukwalenzile mwalondesya ukumuombela. (1 Kol. 15:58) Nupya akalola vino mwatwalilila ukulanga ukutemwa kuli aliwe. Umwina Christian uvwile sana uyi lino yamufusile pali u eluda. Lelo walanzile ukuti: “Napingwilepo ukulaombela Yeova apapezile amaka yane asi mulandu inje eluda nanti foo.” Lino papisile insita, wizile asontwa nupya ukuya eluda. Ya Christian yalanzile ukuti: “Nuvwanga intete ukutandika ukuomba nupya. Lelo napingwile ukuti ndi cakuti Yeova pa mulandu nu luse lwakwe wazumilizya ukuti ntandike ukuomba nga eluda nupya, ndaomba pa mulandu wakuti namutemwa nupya natemwa aina na ya nkazi.”
14. I vyani vino mwasambilila kuli vino nkazi aakaikala uku Georgia walanzile?
14 Aomvi yakwe Yeova yakalanga ukutemwa nu ku yantu yauze. (Mate. 22:37-39) Wakwe, nkazi Elena aakaikala uku Georgia, watiile: “Pa kutandika, icalenganga nasimikila a pa mulandu wakuti natemilwe Yeova. Nomba lino natandike ukutemelwako Tata wane uwa kwi yulu, ukutemwa kuno natemilwe antu kwakulilangako. Nezyanga ukwelenganya pa ntazi zino yakwatanga nu kwelenganya pi lyasi lino yangatemwa ukuvwa. Ukwelenganya kwa musango uu kwalenganga nalondesya ukuyazwa.”—Loma 10:13-15.
YEOVA ALATUPAALA NDI CAKUTI TUKUTEMWA ANTU YAUZE
Ndi cakuti umwi wacita icintu cimwi icikulangilila ukutemwa cingalenga ivintu vizipile antu aingi (Lolini mapalaglafu 15-16)
15-16. Wakwe vino tukulola pa vikope, a mapaalo ci yano tukakwata ndi cakuti tukutemwa antu yauze?
15 Ndi cakuti tukulanga ukutemwa uku ina itu na ya nkazi, ivintu vikatuzipila swensi kwene. Lino ulwale wakwe COVID-19 watandike, umwina Paolo pamwi na mamakwe yazwilizye ya nkazi aingi acikoloci ukumanya ivya kuomvya mafoni, matabuleti, na makompyuta pa kuomba umulimo wa kusimikila. Nkazi umwi wino catalilanga ukuomvya iviombelo vii pa kutandika, wizile amanya ivya kuviomvya. Nupya waomvizye iviombelo kwene vii pa kwama ya lupwa yakwe ukwizazanwa uku Ciusyo. Yalupwa yakwe 60 yazanyilwe uku Ciusyo ukuomvya intaneti. Vino ya Paolo na aci yao yaombisye vyalenzile ukuti nkazi wii alino na ya lupwa lwakwe yaipakizye. Lino papisile insita nkazi walembiile ya Paolo ati: “Tukutaizya sana pa kutusambilizya swe yakoloci. Ntalatala nilile pali vino Yeova akatusakamala alino na pali vino mwaombisye ukutwazwa.”
16 Ivyacitike vyalenzile ukuti umwina Paolo asambilileko isambililo ilicindame. Ya Paolo yasambilile ukuti ukutemwa kwacindama ukucila amano nanti vino twamanya. Yatiile: “Naomvilepo umu mulimo uwa kutandalila ivilongano. Ndakai, namanya ukuti nanti cakuti aina na ya nkazi yangiilila malyasi yano nalandanga, lelo yacili yakaiusya vino na yazwilizye.”
17. Aaweni na yauze alaipakizya ndi cakuti tukulanga ukutemwa?
17 Ndi cakuti tukulanga ukutemwa kuli yauze, tukaipakizya ivisuma vino tusikwenekela nu kwenekela. Ya Jonathan aakaikala uku New Zealand, yazumiile ukuti vii i vya cumi. Uwanda umwi pa Cibelusi, yaweni painiya umwi ala akusimikila umu museo. Uwanda kwene uwa, ya Jonathan yasoolwilepo ukulaomba na painiya wii cila manguzi pa Cibelusi. Lino yapingwilepo ukucita vii yataamanyile vino yene yali nu kuipakizya pa cikuuku cino yalangizye kuli painiya. Yatiile: “Pa nsita yii ntatemilwe ukuomba umulimo wa kusimikila. Nomba lino naweni imisambilizizye yakwe painiya ni visuma ivyafumangamo, calenzile intemwe sana umulimo wa kusimikila. Umwina wii wizile aya a cuza wane umusuma sana nupya wangazwile ukukomelako muli ukapepa, kutandika ukulaipakizya umulimo wa kusimikila, nupya wangazwile ukupalama sana kuli Yeova.”
18. I vyani vino Yeova akalonda twacita?
18 Yeova akalonda ukuti swensi kwene twatwalilila ukutemwa Yeova alino na antu yauze. Wakwe vino itusambilila, tungatemelwako Yeova ndi cakuti tukubelenga Izwi lyakwe nu kwelenganyapo alino nu kulalanda nawe umwi pepo. Tungatemelwako aina na ya nkazi ndi cakuti tukuyazwilizya umu nzila izipusanepusane. Lino ukutemwa kwitu kukukomelako, tulaya tukupalama sana kuli Yeova alino nu ku ina na ya nkazi. Nupya tulatwalilila ukuipakizya ucuza usuma nayo amanda pe!
LWIMBO NA. 109 Mwatemwana Sana nu Mwenzo Onsi
a Asi mulandu twacitandike likwene nanti itulengela umu kuombela Yeova, swensi tungatwalilila ukulunduluka. Icipande cii cimalanda pa nzila icindame ino tungacitilamo vivyo, kuli kuti kutwalilila ukutemwa Yeova alino na antu yauze. Lino tukusambilila icipande cii, mulole vino mwalunduluka na vino mungacita pakuti mutwalilile ukulunduluka.
b Asi mazina yao acumi cumi.