1-2. U mu nzila ci muno umwina Klistu angaya wa cikuulwa icikome? (1 Kolinto 15:58)

 UKU KUSILA kwakwe ya 1970, umu Tokyo uku Japan mwali icikuulwa icatalimfile sana ukucila ivikuulwa vyonsi. Antu yasakamalanga ndi cakuti icikuulwa cii cali nu kutwalilila ukuyako ndi cakuti umu musumba uwa mwacitika icilundumusi. Uzye yakakuula ya cikuulwa cii yacisile uli pakuti cikatwalilile ukuyako ndi cakuti kwacitika icilundumusi? Ya kakuula yakuuzile icikuulwa cii ukuya icikome nupya yacikuuzile umu nzila ya kuti nanti cakuti icilundumusi catekanya umusili citanga cipone. Aina Klistu yaya wa cikuulwa cii. U mu nzila ci?

² Umwina Klistu alinzile ukuya umusipe nupya alinzile ukuya umuiteyanye ukusenuka. Alinzile ukuya umukome nupya aasitenta lino cikulondekwa ukulondela masunde yakwe Yeova. (Belengini 1 Kolinto 15:58.) Alinzile “ukuya uwa cuvwila” nupya aasikana ukulondela masunde. Nupya pa nsita ili imwi kwene, alinzile ukuya umuntu “asiumilila pali vino akwelenganya” ndi cakuti calondekwa ukusenuka. (Yako. 3:17) Umwina Klistu uwaya ni miyele yii asiumilila sile pa cintu conga nanti ukuzumila ivili vyonsi. Umu cipande cii, tumalola vino tungacita pakuti tuye antu aasitenta. Nupya tumalola ni nzila 5 zino Satana akaomvya pakuti atulenge tufilwe ukutwalilila ukuya akome na vino tungacita pakuti tucimvye matunko yakwe Satana

3. A masunde ci yano Kapeela wa Masunde watupeela aya pali Milimo 15:28, 29?

³ Yeova ali wino wakwata insambu izyakupanga masunde nupya masunde yano akapangila antu yakwe yakaya aangupale. (Eza. 33:22) Wakwe, umu manda ya Ina Klistu aakutandikilako  iumba ilikatungulula lyalanzile pa vintu vitatu vino umwina Klistu alinzile ukucita pakuti atwalilile ukuya umusipe, kuli kuti (1) kukanapepa utulubi nu kulapepa sile Yeova, (2) kulauvwila isunde ilikalanda pa kucindika uwazi, na (3) ukulalondela masunde aakalanda pa kutaluka uku uzelele. (Belengini Milimo 15:28, 29.) Uzye Aina Klistu ndakai yangacita uli pakuti yatwalilile ukuya ni cuvwila kuli Yeova umu vintu vii vitatu?

4. Uzye tukalanga uli ukuti tukapepa sile Yeova? (Kusokolola 4:11)

⁴ Tutalinzile ukulapepa utulubi, lelo tulinzile ukulapepa sile Yeova. Yeova wanenyile Aina izlaeli ukuti ali wino yalinzile ukulapepa sile. (Malan. 5:6-10) Lino Ciwa watusinsile Yesu, Yesu walangilile ukuti tulinzile ukulapepa sile Yeova. (Mate. 4:8-10) Ali mulandu uno tusipepela utulubi. Nupya tusipepa antu, wakwe ukucindikisya intunguluzi zya mapepo, intunguluzi zya mauteeko, nanti ya kimba ya nyimbo aalumbuka nanti aakateeya ivyangalo nu kulayalola kwati aya leza. Lelo twaya uku lusansa lwakwe Yeova nupya tukamupepa sile wenga pano aliwe “waumvile ivintu vyonsi.”—Belengini Kusokolola 4:11.

5. U mulandu ci uno tukalondela masunde akalanda pali vino umi nu wazi vyacindama?

⁵ Tukalondela masunde akalanda pali vino umi nu wazi vyacindama. U mulandu ci? A pa mulandu wakuti Yeova walanda ukuti uwazi ukaimililako umi, uwaya u wila ukufuma kuli aliwe. (Levi 17:14) Lino Yeova wazumilizye antu ukulalya inyama, wayanenyile ukuti uwazi wene mutalinzile ukulya. (Utan. 9:4) Nupya waswilizye isunde lii lino wapeezile Aina Izlaeli Masunde ukupitila muli Mose. (Levi 17:10) Nupya wanenyile iumba ilikatungulula ilyatungululanga umu manda ya aina Klistu aakutandikilapo ukunena Aina Klistu yonsi ‘ukutaluka ku wazi.’ (Mili. 15:28, 29) Tukalanga ukuti twaya asipe nga tukulondela isunde lii lino tukupingula pa milwazizye ino tungazumila. b

6. I vyani vino tulinzile ukucita pakuti twalondela masunde yakwe Yeova akalanda pa kuya ni miyele isuma?

⁶ Tukalondela masunde yakwe Yeova akalanda pa kuya ni miyele isuma. (Aeb. 13:4) Paulo watukomelizye ukukanaleka imili itu ukulatutungulula, kuli kuti ukuombesya pakuti tute ukuya na melenganyo aipe. Tusilonda ukulola nanti ukucita ivintu ivingalenga tucite uzelele. (Kolo. 3:5; Yobo 31:1) Ndi cakuti twatunkwa ukucita iviipe, lilyo kwene sile tukakana nu kuta ukwelenganya pa vintu ivingalenga tonone ucuza witu na Leza.

7. I vyani vino tulinzile ukulalondesya ukucita, nupya u mulandu ci?

⁷ Yeova akalonda ukuti twamuvwila nu “mwenzo onsi.” (Loma 6:17) Vyonsi vino akatunena i vya kutuzipila nupya tutanga tusenule masunde yakwe. (Eza. 48:17, 18; 1 Kol. 6:9, 10) Tukaombesya pakuti twazanzya Yeova nupya tukakolanya imiyele ino kalemba wa masamu wakweti uwatiile: “Umwenzo wane ukulukisya ukuyela amasunde yako mpaka uwanda uno ndafwa.” (Masa. 119:112) Nanti ciye vivyo, Satana akaezya ukututoovola pakuti catutalila ukuya asipe. Iinzila ci zino akaomvya?

8. Uzye Satana akaomvya uli ukucuziwa pakuti atutoovole?

⁸ Kucuziwa. Ciwa akaomvya ukucuziwa alino nu kupatikiziwa pakuti tute ukuya asipe. Ciwa akalondesya “uwakuti alye” nu kutononela ucuza witu na Yeova. (1 Pet. 5:8) Aina Klistu aakutandikilapo yayatinyanga, ukuyuma, nu kuyakoma pa mulandu wakuti yatwalilile  ukuya asipe. (Mili. 5:27, 28, 40; 7:54-60) Na ndakai kwene Satana watwalilila ukutucuzya. Twasininkizya vii pa mulandu na vino ya kakanya yakacuzya aina itu na ya nkazi uku Russia alino nu mu mpanga zyuze.

9. Langililini umulandu uno tulinzile ukuyela aacenjele.

⁹ Kupatikiziwa. Ukulunda pa kucuziwa, Satana nupya akaomvya ni “imicenjelo.” (Efes. 6:11) Elenganyini pa mwina uwi zina lyakuti Bob, wino yateesile umu cipatala nupya wino yali nu kulepula. Umwina wii wamanyisizye ya dokota ukuti atali nu kuzumila ukwikilwamo uwazi. Dokota uwali nu kumulepula wazumile ukuti wali nu kucindika vino umwina wapingwilepo. Lelo, lino uwanda wa kumulepula utatala wafika, dokota muze wizile usiku mukulola umwina Bob ala ya lupwa yakwe iyapita. Dokota wanenyile ya Bob ukuti atali nu kuikilamo uwazi lelo uwazi wali nu kuya umupipi pakuti angaikilamo ndi cakuti yalondekwa ukwikilwamo. Limwi dokota afwile welenginye ukuti ya Bob yali nu kuzumila ukwikilwamo uwazi ndi cakuti ya lupwa lwao yasipo. Lelo ya Bob yatwalilile ukuya asipe, nupya yalanzile ukuti yatali nu kuzumila ukwikilwamo uwazi asi mulandu ni vyali nu kucitika.

10. U mulandu ci uno ukuya ni myelenganyizizye iya mu nsi kwaipila? (1 Kolinto 3:19, 20)

¹⁰ Ukuya ni myelenganyizizye ya antu aatacindika masunde yakwe Yeova. Ndi cakuti tukwelenganya wa yantu aatacindika masunde yakwe Yeova, naswe kwene tungata ukuyacindika. (Belengini 1 Kolinto 3:19, 20.) “Amano ya mu nsi yii” yakalenga antu ukukanauvwila Leza. Aina Klistu yamwi aikalanga umu Pegamu nu mu Tiyatila izile iyatandika ukuya ni miyele iipe ino antu aliko pa nsita iiya yakweti wakwe ukucita uzelele alino nu kupepa utulubi. Yesu wakalipiile sana amu vilongano vii pa mulandu wakuti izile iyatandika ukuya ni miyele iipe. (Kuso. 2:10-20) Ndakai, antu amu nsi yii yakatupatikizya ukucita iviipe. Ya lupwa ni vyuza yangatunena ukuti twakomya sile ivintu nu kutupatikizya ukuti tute ukulondela masunde yakwe Yeova. Wakwe, limwi yangatunena ukuti asi lyonsi lino cacindama ukulondela masunde yakwe Leza nu kuti masunde amu Baibo yata ukuomba.

11. I vyani vino tutalinzile ukucita ndi cakuti tukulonda ukutwalilila ukuya akome?

¹¹ Insita zimwi, tungatandika ukwelenganya ukuti ivintu vino Yeova akatunena vitacindama. Limwi tungatunkwa ukuti ‘tucile umu vyalembwa.’ (1 Kol. 4:6) Vikwene avino intunguluzi izyaliko umu manda yakwe Yesu zyacitanga. Nupya intunguluzi zii zyalunzile masunde ya antu uku Masunde yakwe Leza, nupya catalilanga sana antu ukulondela masunde yaa. (Mate. 23:4) Yeova akatunena vino tulinzile ukulondela ukupitila umwi Izwi lyakwe alino nu mwi iuvi lyakwe. Tutakwata insambu izya kulunda masunde kuli vino Yeova akatunena. (Mapi. 3:5-7) Fwandi, tutalinzile ukucila muli vino vyalembwa muli Baibo nanti ukupangila aina na ya nkazi masunde pali vino yalinzile ukuipingwila.

12. Uzye Satana akasalanganya uli ufi?

¹² Kubepwa. Satana akaomvya “ucenjezi” ni “visambilizyo vya sile sile ivya muno nsi” pakuti aponzye antu nu kuyapatukanya. (Kolo. 2:8) Umu manda ya Ina Klistu aakutandikilako, Satana waponzyanga antu nu kuyapatukanya ukupitila umu mano ya untunze aasintilile pa myelenganyizizye ya mu nsi, kusambilizya ukusi ukwa mu malembo, alino nu kusambilizya ukuti Aina Klistu yalinzile ukulalondela Masunde yakwe Mose. Antu yaa yali asomvi pano yalenganga antu ukuta ukwika mano kuli Yeova, Intulo ya Mano. Ndakai, Satana akaponzya antu nu kuyapatukanya ukuomvya mawebusaiti aapa intaneti pa kusalanganya ufi nu kubepezya uteeko umwi ndi cakuti kumwi  kwacitika vimwi. Twaweni ivya musango uu lino kwali ulwale wakwe COVID-19. c Ya Nte Yakwe Yeova auvwilanga vino iuvi lyakwe Yeova lyayanenanga yatasakamikwanga sana wakwe vino antu amu nsi yii auvwanga uku malyasi ya ufi yasakamikwanga.—Mate. 24:45.

13. U mulandu cino uno tulinzile ukuya acenjele uku vintu ivingatupumvyanya?

¹³ Kupumvyanyiziwa ni vya mu nsi. Tutalinzile ukuta ukwika mano uku “vintu ivicindamisye.” (Filipi 1:9, 10) Ndi cakuti tukupumvyanyiziwa, tungaonona insita itu na maka uku vintu ivitacindime. Ivintu wakwe ukulya, kumwa, kucina, alino nu kwika mano uku ncito kungalenga ukuti tutaika mano uku vintu ivyacindama umu umi witu. (Luka 21:34, 35) Nupya ukulunda pali vii, tukapumvyanyiziwa na malyasi aakalanda pa vya miteekele alino na pa vikanza vya mu nsi. Tulinzile ukusininkizya ukuti tusikupumvyanyiziwa ni vintu vii. Pano nga tutacenjile, tungazana sile ukuti tukutungilila ivikanza vya miteekele ni vikanza vya mu nsi umu myenzo itu nu mu myelenganyizizye. Satana akaomvya inzila kwene zii pakuti angatulenga tute ukucita ivisuma. Lekini tulole vino tungacimvya iviteyo vyakwe Satana alino na vino tungacita pakuti tutwalilile ukuya akome.

14. I cintu ci conga icingatwazwa ukutwalilila ukuya uku lusansa lwakwe Yeova?

¹⁴ Mwaelenganya pa mulandu uno mwaipeelile kuli Yeova nu kubatiziwa. Mwasoolwile ukuipeela kuli Yeova pano mwalondanga ukuya uku lusansa lwakwe. Elenganyini pali vino vyalenzile musininkizye ukuti imuzana icumi. Lino mwasambilile icumi pali Yeova, mwamutemilwe nupya mwatandike ukumucindika pano a Tata winu uwa kwi yulu. Mwizile imuya nu utailo nupya calenzile ukuti mulapile. Vino mwasambilile vyalenzile mute ukucita vino Yeova wapata nu kutandika ukucita ukulonda kwakwe. Muvwile ningo sana lino mwilwike ukuti Leza wamweleela. (Masa. 32:1, 2) Mwatandike ukuzanwa umu kulongana nupya mwanenangako na yauze pa visuma  vino mwasambilile. Vino ndakai mwemwe Aina Klistu aipeela nu kubatiziwa, mukapita umu museo uwa ku umi, nupya mukalondesya ukutwalilila ukupitamo.—Mate. 7:13, 14.

15. U mulandu ci uno ukuisambilizya nu kwelenganya pali vino tukuisambilizya kwacindamila?

¹⁵ Mwaisambilizya Izwi Lyakwe Leza nu kwelenganya pali vino mukuisambilizya. Wakwe viivi vino icimuti cikatwalilila ukuyako ndi cakuti imisisi yaya pansi, ali vino naswe kwene tukatwalilila ukuya akome ndi cakuti tukuisambilizya Izwi Lyakwe Leza. Ndi cakuti icimuti cikuya cikukula, imisisi ikasalangana nu kwingila pansi. Ndi cakuti tukuisambilizya nu kwelenganya pali vino tukuisambilizya, utailo witu ulakomelako nupya tulasininkizya ukuti umu cumi inzila zyakwe Leza ali zya mpomvu. (Kolo. 2:6, 7) Mwaelenganya pali vino ukulondela utunguluzi wakwe Yeova kwazwile aomvi yakwe uku cisila. Wakwe, Ezekelo wakutikisyanga sana lino malaika wamulondolwelanga icilolwa cino waweni pali vino itempele lyali nu kuya. Icilolwa cii cakomelizye Ezekelo, nupya naswe kwene cikatwazwa ukumanya vino tungacita pakuti twatwalilila ukulondela masunde yakwe Yeova aya umu kupepa kwa cumi. d (Ezek. 40:1-4; 43:10-12) Naswe kwene tukaipakizya ndi cakuti tukuisambilizya ivizike ivyaya umwi Izwi Lyakwe Leza nu kwelenganyapo sana.

16. Uzye ukuya aiteyanye kwacingiliile uli ya Bob? (Masamu 112:7)

¹⁶ Mwatwalilila ukuya akome. Umwene Devedi walanzile ukuti atali nu kuta ukutemwa Yeova lino wimvile ukuti: “Umwenzo wane watiuiteyanya.” (Masa. 57:7) Naswe kwene tungatwalilila ukuya nu mwenzo uyiteyanye nu kutwalilila ukutaila sana Yeova. (Belengini Masamu 112:7.) Lolini vino vii vyazwile ya Bob yano itulandapo mpiti. Lino yayanenyile ukuti uwazi wali nu kuya umupiipi nu kuuomvya ndi cakuti walondekwa, yali nu kufuma umu cipatala papo kwene sile. Pa cisila, ya Bob izile iyalanda ukuti: “Ntatwisikanga vino nali nu kupingulapo nupya ntatwisikanga ivyali nu kufumamo.”

17. I vyani vino tungasambilila kuli vino vyacitikiile ya Bob? (Loliniko ni cikope.)

 ¹⁷ Ya Bob yatwalilile ukuya akome pano yapingwile mpiti ukuti yali nu kutwalilila ukuya asipe na lino yatatala yayatwala uku cipatala. Ca nkoleelo, yalondesyanga ukuzanzya Yeova. Cakwe ciili, yaisambilizye Baibo ni mpapulo izikalanda pali Baibo pali vino yalinzile ukucindika uwazi. Na cakwe citatu, yasininkizye ukuti ukulondela utunguluzi wakwe Yeova kulalenga yatwalilile ukuya ni nsansa. Naswe kwene tungatwalilila ukuya akome asi mulandu ni ntazi zino tungakwata.

18. Uzye vino Balaki wacisile vikutusambilizya cani pali vino tulinzile ukutaila muli Yeova? (Lolini icikope icili pa nkupo.)

¹⁸ Mwataila Yeova. Lolini vino Balaki watungulwike pa mulandu wa kulondela utunguluzi wakwe Yeova. Pa nsita iya, Aina Izlaeli yataipekinye ukuya uku ulwi nupya yatakweti ni vyanzo. Lelo Yeova wanenyile Balaki ukuyalwisya Sisela umwene wa Ina Kenani alino ni umba lya asilika akweti ivyanzo. (Yakapi. 5:8) Kasesema umwanaci Debola wanenyile Balaki ukuti aye uku nyika ukwali Sisela alino na maceleta yakwe 900 ayasilika. Nanti cakuti Balaki wamanyile ukuti citali icanguke ukuyalwisya Sisela na asilika akweti maceleta asimulisyanga, uvwilile vino yamunenyile. Lino asilika yatentemukanga umwamba wa Taboli, Yeova walenzile imvula ikalamba ukufuma ukwi yulu ukutoonya. Maceleta yakwe Sisela yafizilwe ukupita umu matipa nupya Yeova walenzile Balaki ukuyacimvya. (Yakapi. 4:1-7, 10, 13-16) Vikwene ali vino Yeova alalenga ukuti naswe kwene tucimvye ndi cakuti twataila muli aliwe nu kutaila utunguluzi uno tukapokelela uku yantu yano akaomvya.—Malan. 31:6.

19. U mulandu ci uno mukulondela ukutwalilila ukuya akome?

¹⁹ Vino tukaikala umu manda yaa aakusyalikizya, tulatwalilila ukwezya na maka pakuti tuye akome. (1 Tim. 6:11, 12; 2 Pet. 3:17) Lekini twalondesya ukutwalilila ukuya akome asi mulandu nu kupumvyanyiziwa ni vya mu nsi, kucuziwa, kupatikiziwa, ukuya ni myelenganyizizye iipe, alino nu kubepwa. (Efes. 4:14) Nupya lekini twalondesya ukulapepa Yeova nu kuya antu aasitenta umu kuvwila masunde yakwe. Nupya pa nsita ili yonga kwene, tutalinzile ukulaumilila pali vino tukwelenganya. Umu cipande icilondelilepo, tulasambilila pali vino Yeova na Yesu yakalanga ukuti yasiumilila pa cintu conga.