Ya tata yali aa eluda umu ceici cako ya United Church of Canada icayeliile kuno twikalanga. Na cii calenganga ukuti nemo na kaci wane yatutuma ukuyazanwa ukwi sukulu ilikayako cila katondo pa Mulungu, nupya pa 11 awazi yatusendanga umu kupepa uku ceici. Lyene umusanya, twayanga na ya mayo umu kulongana uku Ng’anda ya Wene. Vii vyalenzile tulole upusano uwaya pa maceici yaa yaili.

Ya mayo yatandike ukunena ya cuza yao ya Bob na ya Marion Hutcheson ivintu ivipya vino yasambililanga, nupya nayo kwene yazumiile ukutandika ukusambilila icumi. Umu 1958 ulupwa lwakwe ya Hutcheson lwatusenzile nemo pamwi na alumendo yao yatatu uku Ukongano wa Mpanga Izingi uwa manda 8, uwakweti umutwe wakuti Divine Will uwayeliile umu Musumba wa New York. Nga nelenganya pali vino vyacitikanga uku cisila, nkalola ukuti citayangukiile pakuti yansendeko, nomba ukongano uu waya pa vintu ivisuma vino ntalatala nilile umu umi wane.

Lino nali umulumendo, twikalanga uku famu kuno twateekanga ing’ombe, ya kapoli, imfwele, alino ni nkoko nupya naipakizyanga sana ukusakamala iviteekwa. Nalondanga ukuya vetinali. Nupya ya mayo yanenyile eluda uwa mu cilongano vino nalondanga ukucita. Eluda wanjiwisyeko ukuti tukwikala “umu manda aakusyalikizya” nupya wanguzizye vino ukuya uku yunivesiti kwali nu kukuma ucuza wane na Yeova.  (2 Tim. 3:1) Ni vyacitike i vyakuti, nasoolwilepo ukukanaya uku yunivesiti.

Nanti cakuti nacisile vii, nelenganyanga pali vino nali nu kulacita nga namala isukulu. Nupya nanti cakuti lyonsi naombanga umulimo wa kusimikila pa Cibelusi na pa Mulungu, ntaipakizyanga ukuomba nupya ntailolanga ukuti nene painiya. Pa nsita kwene yii, ya tata na ya tata anono yataali aa Nte, fwandi yankomelezyanga ukuti nkaye umu kuombela uku kampani akakapeela mainsyuwalansi umu Toronto. Ya tata anono yakweti icifulo icikalamba pa kampani kaa, fwandi nazumile ukuya umu kuombelako.

Lino naombanga incito yii, naombanga insita ikulu nupya nazanwanga na antu aatapepanga Yeova, na cii calenzile ukuti ntazanwa sana umu kulongana alino nu mu mulimo wa kusimikila. Pa kutandika nikalanga na kuuku aataali Nte, nomba lino wizile afwa nakuukile uku ncende yuze.

Ulupwa lwakwe ya Hutcheson luno lwansenzile uku ukongano umu 1958, lwali sile kwati aavyazi yane. Yangamile ukuti nkaikala uku myao nupya yangazwile ukukomya ucuza wane na Yeova. Umu 1960, nemo pamwi nu mwanao John twabatiziwe. Vino John wizile atandika upainiya, calenzile ukuti nani kwene nalonda ukulaombesya umu mulimo wa kusimikila. Aina umu cilongano yalolanga vino nalundulukanga, nupya umu kupita kwa nsita nizile inja umuomvi wi Sukulu lya Mulimo Wakwe Leza. a

Umu 1966, nizile intwala Randi Berge uwali painiya umucincile nupya uwalondesyanga ukuomba kuno kwalondekwanga ya kasimikila. Umwangalizi uwatandalilanga icilongano citu watutemilwe sana nupya watukomelezyanga ukuti tungaya umu kwazwilizya icilongano ica mu Orillia uku Ontario. Fwandi twizile itupingula ukuyako.

Lino twafisile sile umu Orillia, nizile intandika upainiya wa nsita yonsi. Nupya nali ni nsansa wakwe zino Randi wakwatanga. Lino nizile intandika ukuombesya muli upainiya, nizile inja sana ni nsansa nupya naipakizyanga ukuomvya Baibo nu kulola kuno antu yuvwikisyanga icumi. Nuvwile ningo sana lino nazwile atwalane yamwi umu Orillia ukusenuka nu kuya aomvi yakwe Yeova.

Lino naile uku Toronto, nazanyile Arnold MacNamara umwina uwaombelanga pa Betele nupya wanguzizye ndi cakuti ningazumila ukuomba nga painiya umuiyele. Lilyo kwene sile, nazumiile nu kulanda ukuti: “Emukwai! Kuli konsi kuno mungantuma, nomba uku Quebec kwene foo.” Icalenzile nkane ukuya uku Quebec a pa mulandu na vino antu avwanganga Icizungu uku Canada yelenganyanga pa yantu aavwanganga Cifrench aikalanga umu Quebec ku Canada kwene. Pa nsita iya, antu yamwi aikalanga uku Canada yalondanga ukuti antu amu Musumba uwa Quebec umu Canada yate ukuteekwa nu uteeko uwa Canada.

Ya Arnold yaswike iyati, “Pa nsita yii uku Musumba uwa Quebec ali kuno aku musambo yakutuma ya painiya aiyele.” Papo kwene nazumiile ukuyako. Namanyile ukuti mamane Randi walondesyanga ukuya umu kuombelako. Lino papisile insita, nizile iniluka ukuti vii vino twapingwilepo ukucita ali cintu icicindame sana cino twacisile umu umi witu.

Pa cisila ica kumala isukulu lya Cifrench ilyaliko pa milungu 5, nemo na mamane pamwi na atwalane yamwi twaile uku Rimouski uku Katutu ka Montreal ukwatalimfile makilomita 540. Lino nabelenganga ivya kumanyisya vimwi pa kukomaana, calolike sile ukuti kwali ivingi vino twalondekwanga ukusambilila. Mu cifulo cakuti ndande inti, ‘Antu aingi aliza uku ukongano yalafuma uku mpanga iya Austria,’ napusiile nu kulanda ukuti, ‘Antu aingi aaliza yalaya i vyunyi vikulu.’

Lino twali umu Rimouski, swensi kwene 4 twaombelanga pamwi na ya nkazi asimbe 4 aombesyanga alino nu lupwa lwakwe ya Huberdeau pamwi na anao yaili aakazyana. Umwina na nkazi Huberdeau yasonkiile ng’anda ikulu nupya mumu kwene mwali miputule imwi muno ya painiya iikalanga nupya yazwilizyangako ukulipila uku ng’anda. Twamanga ing’anda yii ukuti ‘Ing’anda Itiswe’ pa mulandu wakuti yapensilwe na kaala Itiswe. Ilingi umu ng’anda twikalanga antu 12 nanti 14. Pa mulandu wakuti nemo na mamane twali sweswe ya painiya aiyele, twayanga umu kusimikila cila katondo, musanya, na manguzi. Fwandi tuvwanga ningo sana ndi cakuti twapita na umwi umu kusimikila asi mulandu ikuzuuka manguzi.

Twizile itutemwana sana na ya painiya yaa icakuti izile iyaya sile kwati aya lupwa itu. Insita zimwi twizizyanga pamwi nu kwelekela pamwi. Umwina umwi wali a kimba wa nyimbo, fwandi pa Cibelusi manguzi twimbanga inyimbo nu kucina.

Uku Rimouski antu yatemilwe sana ukusambilila Baibo. Umu myaka sile 5, twali ni nsansa ukulola kuno masambililo aa Baibo yalundulukanga ukufika ukulubatizyo. Ya kasimikila umu cilongano izile iyavulilako ukufika kuli 35.

Lino twali uku Quebec, twasambiliziwe ningo sana ivya kuya ya kasimikila. Twailolile vino Yeova watwazwanga umu mulimo wa kusimikila na vino watupeelanga vino twalondekwanga. Nupya twasambilile ukutemwa antu aakalanda Icifrench, lulimi lwa Cifrench, ni ntambi zyao. Na cii catwazwile ukutemwa intambi izya yantu na yauze.—2 Kol. 6:13.

Ukwaula nu kwenekela, aku musambo yatutumile ukuya ukwi tauni lya Tracadie, uku ufumo ndaka uwa New Brunswick. Cii cali nu kututalilako panono, pano ala aali lino twacisainisyanyizye na aineco ya cikuulwa nupya ala nkafundako amanda yamwi api sukulu limwi. Nupya pa nsita kwene yii, ala asambi yamwi aa Baibo alino yacisonsilwe ukuya ya kasimikila nupya ala kwasyala sile panono ukuti tukuule ni Ng’anda ya Wene.

Pa mpela ya mulungu twapepiilepo nupya twaile itutandalako uku Tracadie umusumba uwapusineko nu wa Rimouski. Twapingwile ukuti pa mulandu wakuti a Yeova uwalondanga ukuti tukaombeleko, twali  nu kuyako. Twapingwilepo ukuyako nu kulola vino Yeova wali nu kutupaala alino nu kutwazwa ukucimvya intazi. (Malaki 3:10) Pa mulandu wakuti mamane watemilwe sana Yeova, vino ataali na ukaitemwe, alino na vino walondesyanga sana ukumanyilako ivintu na vyuze, catwangukilanga ukuya uku ncende yuze.

Umwina Robert Ross u wali sile eluda umu cilongano icipya cino twizile ituyamo. Waomvile upainiya na mamakwe Linda, nomba lino izile iyakwata umwana yapingwilepo ukuta ukuomba upainiya. Nanti cakuti yasakamalanga umwanao umunono umulumendo, yatukomelezyanga sana pa mulandu wakuti yapokelelanga aenyi nupya yaombesyanga umu mulimo wa kusimikila.

Pa cisila ca kuomba upainiya pa myaka iili umu Tracadie, yatupeezile umulimo na uze uno tutenekelanga, kuli kuti umulimo wa kutandalila ivilongano. Pa myaka 7, twatandalile ivilongano ivyomvyanga Icizungu nupya pa cisila twizile itutandika ukutandalila ivilongano ivyaomvyanga Cifrench umu Quebec. Umwangalizi uwa citungu umu Quebec uwi zina lyakuti Léonce Crépeault wanenanga ukuti nalandanga ningo malyasi. Nomba pa cisila ca nsita imwi wizile atandika ukunena ukuti, “Ungacita uli pakuti malyasi yako yaazwa sana antu?” b Vino wanenyile vyalenzile ukuti nelenganyeko pa kuzifya imisambilizizye yane pakuti ningaafika sana antu pa mwenzo.

Umulimo uno nkaiusya sana u mulimo uno naomvileko pa Ukongano uwakweti umutwe wakuti “Victorious Faith” uwayelile umu Montreal. Mulimo uno naomvile u wa kupekanya ivyakulya. Twenekelanga antu ukufika kuli 80,000, nupya inzila ino twali nu kuyasakamalilamo umu miliile yali nu kupusanako. Umuku uu wene ivintu vyapusineko sana wakwe ivyakulya, ivya kuomvya pa kupekanya ivyakulya, alino ni nzila iya kupekanyizizyamo. Twakweti mafuliji aakalamba 20, nupya pa nsita imwi yataombanga. Pa wanda uwa kutandikilako, tutaapekinye ivili vyonsi muno twali nu kulonganila ukongano pa mulandu wakuti uwanda uwafumileko ala umu cibansa mwacitikilanga ivyangalo ivya kucimvyanya. Fwandi lino ilanzi litatala lyatunka, twakavizye ivya kupangila ivyakulya ivya katondo. Twatonsile sana, nomba nanti cali vivyo nasambilile ivingi kuli vino aina na ya nkazi yaombisye, vino yali ni miyele isuma, alino na vino yalondesyanga ukumanyilako na vyuze. Twali aalemane sana nupya twatwalilila ukuya ivyuza ukufika na ndakai. Ala cazifile sana ukukwatila ukongano umu Quebec, umu musumba muno mwali sana ukucuziwa muli ya 1940 na ya 1950!

 Nasambilile ivingi sana uku yangalizi yanji apa ukongano uwayelile umu Montreal. Umwaka umwi, mwina David Splane wino ndakai waya umwi Iumba Ilikatungulula, wangalilanga ukongano wa citungu. Pa ukongano uwalondelilepo lino yampeezile umulimo uu, ya David yangazwile sana ukuomba.

Twaipakizye umu mulimo uwa kutandalila ivilongano pa myaka 36. Lyene umu 2011, izile iyampeela umulimo uwa kuya kasambilizya umwi Sukulu Lyakwe ya Eluda Amu Vilongano. Apa myaka sile iili, nemo na mamane twaizi umu ncende 75 nupya citali icanguke ukulakuuka. Nupya cila mulungu, ya eluda yataizyanga sana pano yalolanga vino Iumba Ilikatungulula liika sana mano kuli ukapepa wao na Yeova.

Nupya lino papisile insita, nasambilizyeko umwi Sukulu Lyakwe ya Kakosoola ya Wene. Asambi yuvwanga sana ukutoonta pa mulandu wakuti yayanga aapamviwe; pano pa maawazi 7 ala yakusambilila, alino pa maawazi yatatu cila manguzi ala yakucita ivya ku sukulu, nupya cila mulungu ala iyakwata imilimo 4 ukufika kuli 5 iya kuomba. Kasambilizya nani twelenganyanga ukuti yatanga yakwanisye ukucita vii vyonsi ndi cakuti Yeova atayazwile. Ntalilila vino asambi yailoliile ukuti ukutaila muli Yeova kwayazwile ukuomba imilimo ino yelenganyanga ukuti yatanga yakwanisye ukuomba.

Vino ya mayo ikanga sana mano uku yantu yauze calenzile ukuti umusambi uwa Baibo wino yatungululanga alunduluke, nupya calenzile nu ukuti ya tata yasenuke pali vino yalolanga icumi. Lino papisile amanda yatatu ukufuma pano ya mayo yafwilile, twazungwike lino twaweni ya tata iza uku Ng’anda ya Wene uku kuuvwa ilyasi lya ku yantu yonsi. Nupya yatwalilile ukuzanwa umu kulongana pa myaka 26. Nanti cakuti ya tata yatabatiziwe, ya eluda yanenyile ukuti ya tata yako ali yano yakafika zuwa umu kulongana cila mulungu.

Ya mayo yali i cilangililo icisuma sana kuli swe yana yao. Atowane akazyana yonsi yatatu pamwi na ya iya yakaombela Yeova na ucisinka. Aatowane yaili yakaombela apa musambo uwa ku Portugal, umuze nawe uku musambo uwa ku Haiti.

Ndakai, mamane Randi nani tukaomba upainiya uiyele umu Hamilton uku Ontario. Lino twaombanga umulimo uwa kutandalila ivilongano, twaipakizyanga ukuombela pamwi na yauze, ukuswilila kuli yano twasimikile alino nu ku masambililo ya Baibo. Lyene ndakai tukauvwa ningo ukulola kuno masambililo itu aa Baibo yakulunduluka muli ukapepa. Nupya nga tuli pamwi na ina na ya nkazi aya umu cilongano cino twayamo, tukakomeleziwa ukulola vino Yeova akayazwa lino vintu vili ningo na lino ivitala.

Nga twelenganya pali vino vyacitikanga uku cisila, tukataizya sana pali vino antu yauze iikanga sana mano kuli sweswe. Nupya naswe kwene, tukaezya apapezile amaka itu ‘ukusakamala’ yauze nu kuyakomelezya ukuti yaombesya umu mulimo wakwe Yeova. (2 Kol. 7:6, 7) Wakwe, twakomelizye ulupwa lumwi nupya pa lupwa lulo, aaci, umwanao mulumendo, alino nu mukazyana yakaomba umulimo wa nsita yonsi. Nuzizye na ya iya ndi cakuti yelenganyanga pa kutandika upainiya. Nomba yanenyile ukuti yakatungilila ya painiya yaa yatatu. Fwandi nani nayuzizye ukuti, “Uzye mungayatungilila ukucila vino Yeova angayatungilila?” Nayo kwene nayakomelizye ukuti yalinzile ukulaipakizya wakwe vino ulupwa lwao lwaipakizyanga. Lino papisile sile imyezi 6 nayo kwene yatandike upainiya.

Nemo na mamane Randi tulatwalilila ukunena “inkulo iiliza uku nkoleelo” pali Yeova na pa ‘milimo yakwe iya kuzunguka,’ nupya itutaila ukuti yalatwalilila ukuipakizya ukuombela Yeova wakwe vino naswe tukaipakizya.—Masa. 71:17, 18.