CIPANDE CA KUSAMBILILAMO 28
LWIMBO NA. 123 Lyonsi Twatontela Vino Leza Watantika
Mungapusanya Uli Icumi ku Ufi?
“Imililini ndi, munyepe icumi umu misana inu.”—EFES. 6:14.
VINO TUMASAMBILILAPO
Tumasambilila vino tungapusanya icumi cino Yeova watusambilizya uku ufi uno Satana na antu akatukanya yakasambilizya.
1. Uzye mukauvwa uli pa cumi cino mwasambilila?
ANTU yakwe Yeova yatemwa icumi cino yakasambilila umwi Izwi lyakwe Leza. Utailo witu wasintilila pa cumi. (Loma 10:17) Twazumila ukuti Yeova u wikako icilongano ca Ina Klistu icaya ali “lucesi nupya icatungilila icumi.” (1 Tim. 3:15) Nupya tukaitemelwa ukuvwila ‘aakatutungulula nu kuyatontela’ lino yakulondolola icumi icaya muli Baibo na lino yakutupeela utunguluzi ukauvwana nu kulonda kwakwe Leza.—Aeb. 13:17.
2. Ukulingana Yakobo 5:19, i vyani limwi ivingacitika pa cisila ca kusambilila icumi?
2 Nanti cakuti twazumila icumi alino nu utunguluzi uno Leza akatupeela ukupitila umwi iuvi lyakwe, tungafuma umu cumi. (Belengini Yakobo 5:19.) Satana angatemwa ndi cakuti twatandika ukutwisika icumi ca muli Baibo nanti utunguluzi uno tukapokelela ukufuma umwi iuvi lyakwe Leza.—Efes. 4:14.
3. U mulandu ci uno tulinzile ukutwalilila ukuya acisinka uku cumi? (Efes. 6:13, 14)
3 Belengini Efeso 6:13, 14. Likwene sile Ciwa ali nu kuomvya malyasi aufi pakuti alenge antu ukukatukila Yeova. (Kuso. 16:13, 14) Nupya tungenekela ukuti Satana alaombesya pakuti akaponzye antu yakwe Yeova. (Kuso. 12:9) Ali mulandu uno cacindamila ukulaisambilizya pakuti twamanya upusano uwaya pa cumi nu ufi na pakuti lyonsi twauvwila icumi. (Loma 6:17; 1 Pet. 1:22) Icicindama sana ukucita vivyo pakuti tukapusuke lino kulaya ucuzi ukalamba.
4. I vyani vino tumasambilila umu cipande cii?
4 Umu cipande cii, tumasambilila pa miyele iili icindame ingatwazwa ukumanya icumi icaya muli Baibo alino nu kulauvwila utunguluzi uno tukapokelela ukufuma umwi iuvi lyakwe Leza. Lyene tumasambilila na pa vintu vitatu ivingatwazwa ukutwalilila ukuya umu cumi.
IMIYELE INGATWAZWA UKUMANYA ICUMI
5. Uzye ukuya na katiina kuli Yeova kukatwazwa uli ukumanya icumi?
5 Kutiina Yeova. Ndi cakuti twaya na katiina kuli Yeova, tulamutemwa sana icakuti tutalacita icintu icili consi icingamusosya. Tukulondesya ukusambilila upusano uwaya pa cisuma ni ciipe na pa cumi nu ufi, pakuti Yeova atutemwe. (Mapi. 2:3-6; Aeb. 5:14) Tutalinzile ukuleka ukutiina antu kwalenga twafilwa ukutemwa Yeova, pano ukuzanzya antu ilingi kukasosya Yeova.
6. Uzye ukutiina antu kwalenzile uli inengu 10 ukukanalanda icumi?
6 Ndi cakuti tukutiina antu ukucila ukutiina Leza, tungatandika ukufuma umu cumi. Elenganyini pa nengu 12 zino yatumile ukuya umu kulola impanga ino Yeova walaile ukupeela Aina Izlaeli. Inengu 10 pa nengu zizyo yatiinanga sana Aina Kenani ukucila vino yatemilwe Yeova. Yanenyile Aina Izlaeli yauze ukuti: “Tutanga tukalwisye antu yaaya, pano yene yakweti amaka ukutucila.” (Mpe. 13:27-31) Kulingana na vino antu yalolanga, Aina Kenani yali akome ukucila Aina Izlaeli, nupya vivyo kwene ali vino cali. Nomba Aina Izlaeli aalandanga ukuti yatali nu kukwanisya ukucimvya alwani yao, yalangilile ukuti yatataile Yeova. Nga cazifile inengu ziizi 10 izika mano kuli vino Yeova walondanga Aina Izlaeli ukucita. Nupya nga yelenginye pa vintu vino wayacitiile uku cisila. Ukucita vii nga kwayazwile ukwiluka ukuti maka yano Aina Kenani yakweti yali anono sana ngu kuyalinganya ku maka yano Yeova wakwata. Ukupusanako ni nengu 10 izitali na ucisinka, Yoswa na Kalebu yene yalondanga ukuzanzya Yeova. Yanenyile antu iyati: “Ndi cakuti tukuzanzya Yeova, alatutwala umu mpanga yii, nupya alaipeela kuli sweswe.”—Mpe. 14:6-9.
7. Tungacita uli pakuti twaya na katiina kuli Yeova? (Loliniko ni cikope.)
7 Pakuti twaya na katiina kuli Yeova tulinzile ukulamuzanzya muli vyonsi vino tukupingulapo ukucita. (Masa. 16:8) Lino mukubelenga ilyasi limwi ilya muli Baibo, mwayuzya ukuti, ‘Uzye nga anene vyacitikile, nga nacisile uli?’ Wakwe, elenganyini ukuti mukukutika lino inengu 10 zikulanda ukuti, Aina Izlaeli yatange yacimvye Aina Kenani. Uzye nga mwazumile vino yalanzile nu kutandika ukutiina antu nanti nga mwalesile ukutemwa kuno mwatemwa Yeova na vino mukalonda ukulamuzanzya ukusila? Aina Izlaeli yatataile ukuti vino Yoswa na Kalebu yalanzile vyali ivya cumi. Ni vyacitike ivya kuti yapanyizye isyuko ilya kwingila umu Mpanga ya Ulayo.—Mpe. 14:10, 22, 23.
Nga weni wino mwataile? (Lolini palaglafu 7)
8. I miyele ci ino tulinzile ukuombesya ukukwata, nupya u mulandu ci?
8 Kuicefya. Yeova akasokola icumi kuli yayo aicefya. (Mate. 11:25) Twazumila ukusambilila icumi. (Mili. 8:30, 31) Nanti ciye vivyo tulinzile ukucenjela pakuti tutaya ni cilumba. Ndi cakuti tuli ni cilumba, tungatandika ukulola ukuti vino tukwelenganya i vili vimwi ni visinte vya masunde nanti utunguluzi ukafuma umwi iuvi lyakwe Yeova.
9. Tungacita uli pakuti tutwalilile ukuya aicefye?
9 Pakuti tutwalilile ukuya aicefye tulinzile ukwiusya vino twacepesya ngu kuilinganya kuli Yeova. (Masa. 8:3, 4) Nupya tungapepa kuli Yeova ukuti atwazwe ukuya aicefye nu kuzumila ukusambiliziwa. Yeova alatwazwa ukucindikisya ivyeo vino tukasambilila umwi Izwi lyakwe alino na vino tukapokelela ukupitila umwi iuvi lyakwe ukucila ukwika sile mano kuli vino tukwelenganya. Lino mukubelenga Baibo, mwaika mano ku usininkizyo ukalanga ukuti Yeova watemwa ukuicefya nupya wapata cilumba nu kuitutumula. Nupya mwaezya na maka ukuya aicefye sana sana lino yamupeela umulimo umwi uukulondekwa ukuti mwatungulula yauze.
TUNGACITA ULI PAKUTI TUTWALILILE UKUVWILA ICUMI?
10. Aaweni yano Yeova akaomvya ukupeela utunguluzi ku yantu yakwe?
10 Mwataila utunguluzi ukufuma ukwi iuvi lyakwe Yeova. Umu nsita ya Ina Izlaeli, Yeova waomvyanga Mose na Yoswa ukupeela utunguluzi ku yantu yakwe. (Yoswa 1:16, 17) Aina Izlaeli yaipakizyanga ivintu ivisuma lino yalolanga ukuti antu yaa imililangako Yeova Leza. Lino papisile insita, umu nsita ya Ina Klistu ya kutandikilako, atumwa 12 aliyo izile iyatandika kutungulula. (Mili. 8:14, 15) Pa yatumwa, pizile ipalundwako na ya eluda na yauze umu Yelusalemu. Lino yalondelanga utunguluzi wa onsi yaa ali nu utailo “ivilongano vyatwalilile ukukomeleka umu utailo nupya antu yavulilangako sile cila wanda.” (Mili. 16:4, 5) Na ndakai kwene, Yeova akatupaala ndi cakuti tukulondela utunguluzi uno akatupeela ukupitila umwi iuvi lyakwe. Nomba uzye Yeova angayuvwa uli nga tusikucindika yano wasonta? Pa kwasuka iuzyo lii, lekini tusambilile pali vino vyacitikiile Aina Izlaeli lino yali mupipi nu kwingila mu Mpanga ya Ulayo.
11. I vyani vyacitikiile yayo akanyile Mose wino Yeova wasoolwile ukutungulula antu yakwe? (Loliniko ni cikope.)
11 Lino Aina Izlaeli yali pa lwendo lwa kwingila mu Mpanga ya Ulayo, aonsi yamwi yatandike kutwisika ndi cakuti Yeova u wapeezile Mose mulimo wa kuyatungulula. Yatiile: “Antu yaa yonsi [asi sile Mose] amuzilo, nupya Yeova ali nayo. (Mpe. 16:1-3) Nanti cakuti Leza walolanga ukuti “antu yonsi” amuzilo, Yeova wasonsile Mose ukutungulula antu yakwe. (Mpe. 16:28) Vino yalwisyanga Mose, calangilile ukuti ya cipondoka yaya yalwisyanga Yeova. Yatisile amano kuli vino Yeova walondanga, yalondesyanga ukukwata amaka nu kulumbuka. Yeova wakomile intunguluzi zyakwe ya cipondoka alino na antu aingi aayatungililanga. (Mpe. 16:30-35, 41, 49) Ndakai tungataila ukuti Yeova wapata antu asicindika utunguluzi uno wika umwi iuvi lyakwe.
Nga weni wino mwatungilile? (Lolini palaglafu 11)
12. U mulandu ci uno tungatwalilila ukutaila iuvi lyakwe Yeova?
12 Tungatwalilila ukutaila iuvi lyakwe Yeova. Ndi cakuti caloleka ukuti tulinzile ukusenuka mu cumi cino twamanyile mpiti nanti muli vino umulimo witu ulinzile ukulaombwa, lilyo kwene sile aakatungulula yakatunena ukuti tusenuke. (Mapi. 4:18) Cino yakacitila vivyo a pa mulandu wakuti yakalonda kuzanzya Yeova. Nupya yakaezya na maka ukupingula pa vintu kulingana na vino Izwi lyakwe Leza likalanda, icumi cino antu yakwe Yeova yonsi yalinzile kulondela.
13. Uzye “mazwi” asuma ali cani, nupya yangatwazwa uli?
13 “Uwalemasya mazwi asuma.” (2 Tim. 1:13) Mazwi asuma yakalozya ku visambilizyo vya Ina Klistu ivyaya muli Baibo. (Yoa. 17:17) Visambilizyo vii a pasimpwa vyonsi vino twazumilamo. Iuvi lyakwe Yeova lyatusambilizya ukutwalilila ukulondela visambilizyo vii. Nga tukucita vivyo, tulapaalwa.
14. Uzye Aina Klistu yamwi yatiile uli ukwika amano ku “mazwi asuma”?
14 I vyani vingacitika nga twata ukulondela “mazwi asuma”? Uvwini ivyacitiike. Mu nsita ya Ina Klistu ya kutandikilako, Aina Klistu yamwi yatandike kusalanganya malyasi ya ufi akuti uwanda wakwe Yeova iwiza. Kufwile kwali kalata imwi ino antu yelenganyanga ukuti Paulo u walemvile iyalanzile api lyasi kwene lii. Ukwaula nu kulondelezya visinka, Aina Klistu yamwi yazumiile nu kutandika ukusalanganya ilyasi kwene lii ku antu. Ndi cakuti iyiusya vino Paulo wayasambilizye lino wali nayo, nga yatabefilwe. (2 Tesa. 2:1-5) Paulo wacelwile aina ukuti yatalinzile kuzumila sile vyonsi vino yuvwa. Nupya pakuti ayacingilile kuli vino vyali nu kucitika uku nkoleelo, Paulo wamalilile kalata yakwe ciili ku Ina Tesalonika na mazwi yakuti: “Namulamuka, anene Paulo, nalemba kalata wii ni ikasa lyane wakwe vino nkacita lyonsi mu makalata.”—2 Tesa. 3:17.
15. Tungaicingilila uli uku ufi uukaloleka kwati i cumi? Langililini. (Loliniko ni vikope.)
15 I vyani vino tungasambilila ku mazwi yano Paulo walembiile Aina Tesalonika? Ndi cakuti tuvwa malyasi yamwi aasikuvwana ni cumi cino twasambilila muli Baibo nanti limwi tuvwa vimwi ivyakuti vyatupezya na mano, tulinzile ukwiluka. Mu uteeko wa Soviet Union, alwani itu yapeezile aina kalata uwalolekanga kwati wafumile ku maofesi yakalamba yakwe ya Nte. Muli kalata, yakomelizye aina ukuipatula, nu kupanga kaungwe. Kalata iya yalolekanga kwati i yacumi. Lelo Aina Klistu ali na ucisinka yatabefilwe. Ilwike ukuti ivyali muli kalata wiya vyapusine na vino yasambiliziwe. Ndakai, antu apata icumi insita zimwi yakaomvya intaneti pakuti yatuvulunganye nu kulenga tupatukane. Ukucila ukuvulunganyiziwa “nanti ukubepwa,” tungaicingilila nga twelenganyapo sana ndi cakuti vino ituvwa vikuvwana ni cumi cino twasambilila.—2 Tesa. 2:2; 1 Yoa. 4:1.
Mutazumila ufi ukaloleka kwati icumi (Lolini palaglafu 15) a
16. Ukulingana na Loma 16:17, 18, i vyani vino tulinzile ukucita ndi cakuti yamwi yafuma mu cumi?
16 Mwatwalilila ukuya alemane na antu aya na ucisinka kuli Yeova. Leza akalonda twaya alemane lino tukumupepa pamwi na ina itu na ya nkazi. Tulatwalilila ukuya alemane ndi cakuti twatwalilila ukulemasya icumi. Yonsi aakasalanganya malyasi asiuvwana ni cumi, yakaleta malekano mu cilongano, fwandi Leza watucelula ukuti “mwayataluka.” Nga tutacisile vivyo tungata ukuya acisinka kuli Yeova.—Belengini Loma 16:17, 18.
17. I visuma ci vino tulaipakizya nga twamanya icumi nu kucilemasya?
17 Ndi cakuti twamanya icumi nu kucilemasya, tulapalama kuli Yeova nupya tulakomya nu utailo witu. (Efes. 4:15, 16) Tulacingililwa ku visambilizyo vya ufi ni micenjelo yakwe Satana, nupya Yeova alatucingilila mu ucuzi ukalamba. Twalililini kulemasya icumi, “nupya Leza wa mutende alaya namwe.”—Filipi 4:8, 9.
LWIMBO NA. 122 Komelekini, Muzyansye!
a ULONDOLOZI WA CIKOPE: Icikope cikulangilila ivyacitike lino aina yapokelelile kalata iyalolekanga ukwati yafumile uku maofesi yakalamba lelo yafumile uku yalwani itu. Mu manda itu, alwani itu yangaomvya intaneti kukusalanganya malyasi ya ufi api iuvi lyakwe Yeova.
