1. I cintu ci icicindame sana icikatulenga ukuya ni nsansa?

TUKAZANGA sana ukuvwa vino antu yakwe Yeova yakuvulilako! Mwacizo twatungulwile masambililo ukuluta pali 10 milyoni. Cii cikalangilila ukuti aomvi yakwe Leza yakaengesa wa luswepo! Nupya elenganyini na pa yantu uwingi aizile uku Ciusyo. Yasambilile pali vino Leza walangilile ukuti watutemwa lino watumile umwana wakwe ukwiza tufwila pakuti tuye nu umi.—1 Yoa. 4:9.

2, 3. (a) I cani icisitulesya ukutwalilila ‘ukuengesa wa ntanda izikapeela uluswepo’? (b) I vyani vino tumasambilila umu cipande cii?

² Umu nsi yonsi, antu yakwe Yeova yakavwanga indimi izipusane pusane. Nomba cii cisitulesya ukukanaya alemane lino tukulumbanya Tata witu, Yeova. (Umbw. 7:9) Asi mulandu nu lulimi luno tukavwanga nanti kuno tukaikala, tungatwalilila ‘ukuyengesa wa ntanda zino zikapeela luswepo.’—Filipi 2:15.

³ Lino tukuombako umulimo wa kusimikila, lino tukuombela pamwi, na lino tukutwalilila ukuya apempule, tukalumbanya Yeova. Uzye tungalanga uli ukuti tukaengesa wa luswepo umu vintu kwene vii vitatu?—Welengini Mateo 5:14-16.

4, 5. (a) I vyani vyuze vino mungacita lino mukusimikila pakuti mwaengesa wa luswepo? (b) I visuma ci ivingacitika ndi cakuti tuli ni nsansa? (Lolini cikope ca kutandikilako.)

⁴ Icipande icatangi “Uluswepo Umu Mfinzi,” icali umu Lupungu Lwa Mulinzi lwakwe Juni 1, 1925 calanzile ukuti: “Kusi angaya ni cisinka uku Mwene umu manda yaa akusyalikizya . . . kano sile ndi cakuti waombesya umwineco nu kulenga aengese wa luswepo.” Calondolwile nu kuti “Angacita vivyo ndi cakuti akunenako antu yauze ilandwe lisuma nu kulondela inzila zya luswepo lyonsi.” Fwandi inzila yonga ino tungaengesa wa luswepo u kusimikila ilandwe lisuma nu kupanga asambi. (Mate. 28:19, 20) Nupya tungalumbanya Yeova ndi cakuti tuli ni miyele isuma. Antu yano tukasimikilako alino na apita nzila yakaika sana mano kuli vino tukacita. Ndi cakuti tukumwentula nu kulamuka antu yano tukukomaana nayo cikalanga vino twaya na vino Leza wino tukapepa waya.

⁵ Yesu wanenyile asambi yakwe ukuti: “Na lino mwingila mu ng’anda mutale muti, ‘Mutende uye namwe.’” (Mate. 10:12) Mu ncende ino Yesu wasimikilangamo, antu yatemilwe ukupokelela antu umu mang’anda yao. Mu ncende izingi ndakai citaseeka sana ukupokelela antu. Antu yakauvwa intete ndi cakuti wino yatamanya wiza pa ng’anda. Lelo ndi cakuti tuli ni nsansa lino twaya pa mwao, cingangupala ukulanzyanya nayo. Twasininkizya cii pano tukalola vino cikaya lino aina na ya nkazi yakusimikila ukukazanwa antu aingi ukuomvya tusitandi twa mpapulo. Lino mukusimikila ukuomvya inzila kwene ii, alino muli ni nsansa, antu aingi yakatemwa. Cico cingalenga iiza pano muli nu kusendapo impapulo. Fwandi ukuya ni nsansa kungamwazwa ukutandika ukulanzyanya.

6. I cani icikaazwa atwalane yamwi akoloci ukutwalilila ukuombesya umu mulimo wa kusimikila?

⁶ Umwina umwi na mamakwe aakaikala uku England yakalwalilila nupya cii cikalenga ukuti cayatalila ukusimikila uku ng’anda ni ng’anda. Yapingwilepo ukuti yaombela apiipi ni ng’anda yao pakuti yangatwalilila ukuengesa wa luswepo. Yikanga impapulo pa tebo pa nsita ino avyazi izanga umu kusenda ana yao api sukulu ilyaya apiipi ni ng’anda yao. Avyazi aingi yakasendapo mabuku yakuti Amauzyo yano Acance Yakauzya—na Masuko Angayazwa, ibuku 1 na 2, alino nu tumabuku tuuze. Nkazi umwi painiya uwaya umu cilongano cao waomvileko nayo umu mulimo wa kusimikila. Vino wazengelanga antu alino na vino atwalane yaaya yaombesyanga vyalenzile umuvyazi umwi ukuzumila ukutandika ukusambilila Baibo.

7. I vyani vino mungacita pakuti mwazwe aenyi atiiza ku ncende inu?

⁷ Pa myaka inono iyapitapo, umu mpanga izingi mwaya imbutusi izingi sana. Uzye mungacita uli pakuti mwazwe antu ya musango uwo ukumanya Yeova na vino akalonda? Ica kutandikilapo, mulinzile ukwezya ukusambilila ivya kulamuka mu ndimi zino antu yayo yakavwanga. JW Language app ingamwazwa sana ukucita vivyo. Nupya limwi mungasambilila na mazwi yamwi angalenga yatemwe ukuvwa vino mukulanda. Nga mwacita vivyo mungamanya ni vyakulanda pa kuyalangilila vino yangaomvya jw.org alino nu kuyalanga amavidyo ni mpapulo izyayako mu lulimi lwao.—Malan. 10:19.

8, 9. (a) I vyani vino tukasambilila pa kulongana kwa mukasi ka mulungu? (b) Uzye avyazi yangazwa uli ana yayo ukulaasukapo pa kulongana?

⁸ Yeova watupekanyizizya ukulongana kwakuti Swe Ina Klistu nu Mulimo Witu pakuti twasambilila ivya kuomba ningo mulimo wa kusimikila. Ivyeo vino yakatusambilizya  pa kulongana kuu vikatwazwa ukukanauvwa intete lino tukuswilila kuli yano twasimikile na lino tukutungulula masambililo ya Baibo.

⁹ Aenyi aingi nga yiza yakalola ukuti ana itu yakwasukapo pa kulongana. Mwe yavyazi mulinzile ukuleka ana inu yaengesa wa luswepo lino mukuyasambilizya ivya kwasuka pa kulongana mu mazwi yao sile. Ivyasuko vyao ivyangupale nupya ivyuvwike vingalenga akulondesya ukumanya icumi yalondesya ukusambilila.—1 Kol. 14:25.

10. Uzye ukupepa kwa lupwa kukaazwa uli amu lupwa ukuya alemane?

¹⁰ Ndi cakuti tukwezya na maka ukusambilizya amu lupwa ukuombela pamwi mu mutende alino nu kuombela pamwi ni cilongano, ala tukulumbanya Yeova. Inzila yonga ino avyazi yangacitilamo vivyo u kupekanya ukuti amu lupwa yazanwa apa Kupepa Kwa Lupwa cila mulungu. Papo paya nu kutamba JW Broadcasting ikafuma cila mwezi. Ndi cakuti yamala ukutamba, limwi yangaleka cila muntu alande vino angaomvya ivyeo vino watauvwa. Lino avyazi yakutungulula amapepo ya lupwa, yalinzile ukwiusya ukuti vino cila mwana angalondekwa ukutungululwa vikapusanapusana kulingana nu musinku. Mwaleka cila muntu mu lupwa aipakizya lino mukusambilila.—Masa. 148:12, 13.

11-13. Uzye swensi tungacita uli pakuti tuye alemane mu cilongano nu kulaazwa yauze ukuengesa wa luswepo?

¹¹ Uzye acance yangacita uli pakuti yaombela pamwi na amu cilongano nu kukomelezya yauze ukuengesa wa luswepo? Ndi cakuti mwemwe yacance, uzye mutange mwalanga ukuti mwika amano ku Ina Klistu aikolo? Mungayuzya pakuti yamulondolwele ivyayacitikila mu myaka yonsi ino yaombela Yeova. Mungakomeleziwa sana, nupya mwensi mweili mungaleka luswepo lwa cumi lwaengesa. Nupya swensi kwene tulinzile ukulapokelela aenyi akaiza mu kulongana naswe pa Ng’anda ya Wene. Nga tukucita vivyo tulaya alemane nupya tulaleka na enyi yalondesya ukuengesa wa luswepo. Tungaezya ukulamuka aenyi atiyiza ala tukumwentula nu kumwentula, limwi tungayazwa nu kuzana pa kwikala. Mwayalondolola kuli yauze, nupya mwaleka yauvwa ukuti yatiyapokelelwa.

¹² Ndi cakuti mwapeelwa mulimo wa kutungulula ukukomaana kwa kuya mu mulimo  wa kusimikila mulinzile ukwazwa akoloci ukuombako mulimo wa kusimikila. Uzye akoloci aya mu cilongano cinu yakwata ivifulo vya kuombelamo visuma? Insita zimwi mungayapeela ukuomba nu wacance pakuti ayazwako muli vimwi. Nupya mulinzile ukulangulukilako yayo akuti yalwalilila nanti akuti kuli ivyalenga yataombesya. Fwandi ukucita vivyo kungalenga acance na akoloci alino na yayo aakaombesya na aasiombesya kwene ukuya acincile lino yakuomba mulimo wa kusimikila.—Levi 19:32.

¹³ Kalemba wa masamu walanzile ukuti: “Lolini vino cazipa na vino cazanzya antu yakwe Leza, ukwikala pamwi wa cina nyina!” (Welengini Masamu 133:1, 2.) Ukuya pamwi na yauze kwalenzile aina Izlaeli yaipakizya ukukolanya imiyele isuma ino yakapepa yakwe Yeova yaakweti. Caali kwati yakuyapaka amafuta ya muzilo asuma nupya anunkile. Mulinzile ukuya ni miyele isuma pakuti mwaombela pamwi na ina na ya nkazi. Ndi cakuti avino mukacita ukufuma na mpiti, tukumutaizya sana. Uzye mungezya na maka ukumanya ningo aina na ya nkazi mu cilongano cino mwayamo?—2 Kol. 6:11-13.

14. I vyani vino mungacita pakuti mwaengesa wa luswepo uku ina mupalamano inu?

¹⁴ Uzye mutange mwezyeko ukuombesya pakuti muleke icumi ca muli Baibo caengesa wa luswepo uku inamupalamano? Ndi cakuti muli ni miyele isuma nupya mukalanda amazwi asuma cingalenga yauze ukulonda ukusambilila icumi. Mwayuzya mweineco ukuti: ‘Uzye ainamupalamano yane yamanya uli? Uzye nkasunga ningo apa ng’anda pane nupya apa usaka? Uzye nkaitemelwa ukwazwilizyako yauze?’ Lino mukulanzyanya na ya Nte yauzo, uzye mungayanenako vino imiyele yao isuma yalenga ya lupwa yao, ainamupalamano, yano yakaomba nayo nanti yano yakasambilila nayo ukusambililako? Ndi cakuti mwacita vivyo muluvwa malyasi uwingi yano yalamulondolwela pa visuma ivyayacitikila.—Efes. 5:9.

15. U mulandu ci uno cacindamila ukutwalilila ukuya apempule?

¹⁵ Ndi cakuti tukulonda ukutwalilila ukuengesa wa luswepo tulinzile ukuya apempule pa mulandu na manda yaa yano tulimo. Insita izingi Yesu wanenanga alondezi yakwe ati: “Pempulini.” (Mate. 24:42; 25:13; 26:41) Ndi cakuti tukulola ukuti ucuzi ukulu cuze watiulengela, nu kwelenganya ukuti ukwiza kwene uliza nomba asi pali ino nsita, tulata ukulola vino umulimo witu uwa kusimikila upamvizye. (Mate. 24:21) Nupya ndi caya vivyo uluswepo lwitu lutalaaengesa ku inamupalamano, lulaazimantukila nanti sile ukuzimilila.

16, 17. I vyani vino mungacita pakuti mutwalilile ukuya apempule?

¹⁶ Vino amanda yaa yano tulimo yakuya yakwipilako sile, swensi kwene tulinzile ukutwalilila ukuya apempule. Yeova alacitapo cimwi pa nsita ilingane. Tutalinzile nu kulatwisika. (Mate. 24:42-44) Fwandi iikwene ali nsita ino tulinzile ukuya ateekele nu kutwalilila ukuya apempule. Tulinzile ukuwelenga Baibo cila wanda nu kulapepa lyonsi. (1 Pet. 4:7) Tulinzile ukukolanya aina na ya nkazi aakaipakizya visuma ivikafuma mu kuya apempule nu kuleka luswepo lwao lwaengesa. Tungawelenga pa mwina umwi wino tungakolanya sana mu cipande cakuti: “Imyaka 70 iyakulema ku cisempe ca Muyuda,” icaya mu Lupungu Lwa Mulinzi lwakwe Epulelo 15, 2012, amafwa 18-21.

¹⁷ Mwatwalilila ukuya acincile lino mukuombela Yeova. Nga mwacita vivyo mulaya sana ni nsansa, nupya mulalola kwati insita ikupita zuwa. (Efes. 5:16) Imyaka 100  iyapitapo aina na ya nkazi yaombesyanga sana. Nomba ndakai twacincila sana mu kuombela Yeova. Tukaleka uluswepo lwitu ukuengesa kuluta na vino cali mpiti.

18, 19. Uzye ya eluda mu cilongano yangatwazwa uli ukuya acincile? Langililini.

¹⁸ Tukakomeleziwa sana ukumanya ukuti ukukanamalilika kwitu kusitulesya ukuombela ningo Yeova. Tukataizya sana Yeova pa kutupeela “mawila” alikuti ya eluda mu cilongano. (Welengini Efeso 4:8, 11, 12.) Fwandi ndi ya eluda yamutandalila mwakutikisya vino yakuminena alino nu kuomvya amano yano yamupanda.

¹⁹ Ya eluda yaili mu England yaile zuwa zuwa kuli iya nu muci aali ni ntazi. Umuci wayuvwanga ukuti iya ataatungululanga ningo ulupwa muli vyakwe Leza. Iya walanzile ukuti ataali akasambilizya musuma nupya atatungululanga nu kupepa kwa lupwa. Ya eluda yanenyile atwalane yaa ukwelenganya pali vino Yesu wacitanga. Yalanzile ukuti Yesu wasakamalanga alondezi yakwe nu kuyapeela vino yalondekwanga. Ya eluda yakomelizye iya ukulakolanya Yesu. Nupya yakomelizye umuci ukuya muteekele. Nupya ya eluda yavwilizye aatwalane yaa ukumanya ivyakucita nu kuombela pamwi pakuti yakwata ukupepa kwa lupwa na ana yao yaili. (Efes. 5:21-29) Lino papisile insita ya eluda yataizye sana iya pali vino wezyanga na maka ukuombesya. Yamukomelizye ukuleenga umupasi wa muzilo kuti umwazwe ukutungulula ningo ulupwa. Vino ya eluda yaa yacisile vyalenzile ulupwa luu lwaengesa wa luswepo.

20. I vyani ivilacitika ndi cakuti mwatwalilila ukuengesa wa luswepo?

²⁰ Kalemba wa masamu walemvile ukuti: ‘Uwa nsansa u muntu wensi akaopa Yeova, akalondela inzila zyakwe.’ (Masa. 128:1) Ndi cakuti mukuengesa wa luswepo lino mukwazwa yauze ukutandika ukuombela Leza, ukutwalilila ukuombela pamwi na ina na ya nkazi alino nu kutwalilila ukuya apempule, mulaya sana ni nsansa. Yauze yalaalola imilimo inu isuma, nupya aingi yalaalumbanya Tata witu.—Mate. 5:16.