“Lino twatandike ukulwa nu muvyala wane, namulemile pa nsingo nupya watiile kufuuta ningo. Nalondanga kumukoma.”—Ya Paul.

“Natandike ukusoka pa tuntu sile utunono. Natandike ukutama iviya, nu twakucinya na vyonsi vino nazana apa ng’anda.”—Ya Marco

Sweingi tutaya nu unkalwe wakwe yaa yano itulandapo papela. Nomba kukaya insita zimwi zino cikatutalila ukuikanya. Ni cikalenga u mulandu nu luyembu luno twapyana kufuma ku muntu wa kutandikilapo, Adamu. (Loma 5:12) Antu yamwi yaya wakwe ya Paul na ya Marco, yakafilwa ukuikaanya nga yasoka. Yamwi nayo cikayatalila ukuikaanya mu melenganyo. Yakatwalilila ukwelenganya pa vintu ivikayatinya nanti ukuyatoovola. Yamwi yene yangakwata uwavya wa kufilwa ukuikaanya kucita uzelele, kumwesya uwengwa, nanti kuomvya milembo ikavulunganya uwongo.

Yayo aakatungululwa na melenganyo yaipe, vilondwa vyao ni vicitwa vyao, yasiya nu umi usuma. Nomba tungacimvya vyonsi vii. Tungacita uli? Ndi cakuti tukuikaanya. Pa kutwazwa ukucita vivyo, lekini tulande pa mauzyo yaa yatatu: (1) Uzye kuikaanya kuli kutuuli? (2) U mulandu ci uno kwacindamila? (3) Tungacita uli pa kukwata imiyele ii iyaya pa miyele ino umupasi wa muzilo ukatulenga ukukwata”? (Gala. 5:22, 23) Lyene tumalanda pali vino tungacita palwitu ndi cakuti insita zimwi cikatutalila ukuikaanya.

Umuntu aakaikaanya asicita ivitalungime ndi wasoka. Nomba akaikanya ukulanda nanti ukucita ivintu visizanzya Leza.

Yesu watulangilile vino ukuikaanya kukasenula. Baibo ikalanda ukuti: “Na lino yamutusile, wene atavwanzile vya cilanduzi. Lelo wene wapaalilanga muli Leza, kapingula uwaula lufyengo.” (1 Pet. 2:23) Yesu waikanyanga lino alwani yakwe yamutumfyanga lino yamupopelanga pa cimuti ca kucuziwilwapo. (Mate. 27:39-44) Walangilile ukuti waikaanyanga na lino intunguluzi zya mapepo zyamuzyanga mauzyo pakuti yakwate apa kumupeelela imilandu. (Mate. 22:15-22) Nupya watulangilile vino tungacita lino Ayuda yamwi yasozile amawe kuti yamutame! Atayacitiile iviipe lelo wafisime. “Alino afuma mu Ng’anda ikulu yakwe Leza.”—Yoa. 8:57-59.

Uzye tungakolanya vino Yesu wacisile? Ee tungamukolanya. Mutumwa Petulo walemvile ati: “[Klistu] wene wamupeela cilangililo ca kucula kwakwe pa mulandu winu.” (1 Pet. 2:21) Nanti icakuti tutamalilika, tungakolanya sana vino Yesu waikanyanga. U mulandu ci uno icicindamila ukucita vivyo?

Kuikaanya kwacindama sana pakuti twazanzya Yeova. Nanti icakuti twaombela Yeova na ucisinka pa myaka iingi, tungata ukuya ya cuza yakwe ndi cakuti tusikuikaanya muli vino tukucita nanti vino tukulanda.

Elenganyini pali Mose, uwali “umuntu umwi mufuke cuze ukuluta antu yonsi amuno nsi” aliko pa nsita iya. (Mpe. 12:3) Mose wateekelelanga sana Aina Izlaeli lino yailizyanyanga pa myaka iingi, nomba wanda umwi, Mose wafizilwe ukuikaanya. Wasosile sana lino Aina Izlaeli yatandike ukuilizyanya pa mulandu wa kuulizya manzi. Walanzile ni cipyu pa kunena antu ukuti: “Muvwikisye yacisanguka mwe! Uzye tutange tumufumizye amanzi mu ciliwe cii?”—Mpe. 20:2-11.

Mose wafizilwe kuikaanya. Ataataizye Yeova pali vino wacisile icizungusyo ca kuyapeela amanzi. (Masa. 106:32, 33) Ni cafumilemo i cakuti Yeova atamuzumilizye ukwingila umu Mpanga ya Ulayo. (Mpe. 20:12) Kukanaikaanya kwalenzile Mose ukulanguluka umi wakwe onsi.—Malan. 3:23-27.

I vyani vino tukusambililako? Nanti icakuti twaya umu cumi pa myaka iingi, tutalinzile ukulanda amazwi ya musalula kuli yano iyatuluvyanya nanti sile kuli yano tukulonda ukulungika. (Efes. 4:32; Kolo. 3:12) Icacumi ukuti lino tukuya tukukula, cingatutalila ukuya ateekele. Nomba iusyini ivyacitikile Mose. Tusilonda ukonona izina litu na Yeova pa mulandu sile wa kufilwa ukuikaanya. Uzye tungacita uli pa kukwata imiyele ii icindame?

Mwapepela umupasi wa muzilo. U mulandu ci? Pano ukuikaanya kwaya pa miyele ino umupasi wa muzilo ukatulenga ukukwata, nupya Yeova akapeela umupasi wakwe kuli yayo aakamulenga. (Luka 11:13) Ukuomvya umupasi wa muzilo Yeova angatupeela amaka yano tukalondekwa pakuti twaikaanya. (Filipi 4:13) Angatwazwa ukukwata imiyele na yuze ino umupasi wa muzilo ukatulenga ukukwata wakwe ukutemwa, ukungalenga tutwalilile ukulaikaanya.—1 Kol. 13:5.

Mwasenka uku vili vyonsi vingalenga cimutalile ukuikaanya. Mwataluka uku mawebusati ya pa intaneti ni vya kuizanzya umwaya imiyele iyiipe. (Efes. 5:3, 4) Tulinzile ukutaluka kuli vyosi vingalenga tucite iviipe. (Mapi. 22:3; 1 Kol.  6:12) Tuti limwi umuntu akatunkwa zuwa ukucita uzelele, umuntu wiyo alinzile ukutaluka uku kubelenga mabuku nanti ukutamba ma filimu akalanda pa uzelele.

Limwi cingatutalila ukulondela ukusunda kuu. Lelo nga tukuombesya, Yeova angatupeela amaka akutwazwa ukuikaanya. (2 Pet. 1:5-8) Alatwazwa ukuikaanya muli vino tukwelenganya, vino tukalanda na vino tukacita. Tungasininkizya vii ngatwalola vino ya Paul na ya Marco, yano itulandapo mpiti yasambilile ukuta ukuya nu unkalwe. Katulande pa mwina na muze uwasokanga zuwa lino akupisya motoka, icakuti walemanilanga na antu. Uzye wacisile uli? Walanzile ukuti: “Napepanga cila wanda. Nabelenganga ivipande ivyalandanga pa kuikaanya nu kwiusyako malembelo aangangazwa. Nanti icakuti ncili nkaombelapo pa wavya uu pa myaka iingi, nkayiusya nemwineco ukuti ndinzile ukulaikala cele cila wanda. Nupya nkakatuka zuwa lino nkuya uku ncito ukucila ukukatuka lino insita yatisila pa kuti ntapusana na ya kapisya yanji.

Insita zimwi swensi kwene cikatutalila ukuikaanya. Ndi cakuti ivya musango uwo vyacitika, limwi tunguvwa insonyi ukupepa kuli Yeova. Nomba pa nsita ii alino tulinzile ukupepa sana. Fwandi mwapepa kuli Yeova papo kwene sile. Mwamulenga ukuti amwelele, kumwazwa, nupya mwaombesya pakuti mutakaswilizyepo ukucita ivili vimwi. (Masa. 51:9-11) Mutaelenganya ukuti Yeova atanga auvwe ukwi pepo linu. (Masa. 102:17) Umutumwa Yoane watwiusyeko ukuti uwazi wa Mwana wakwe Leza “ulatuswefya kufuma ku maifyo onsi.” (1 Yoa. 1:7; 2:1; Masa. 86:5) Iusyini ukuti Yeova akanena aomvi yakwe ukulaeleela lyonsi. Fwandi tungataila ukuti nawe kwene alacita icili cimwi kwene na kuli sweswe.—Mate. 18:21, 22; Kolo. 3:13.

Yeova wasosile lino Mose wafizilwe ukuikaanya pa nsita imwi mu lwanga. Nanti ciye vivyo, Yeova wamwelezile. Nupya Baibo ikalanda pali Mose ukuti wali umuntu wa utailo wino tungakolanya. (Malan. 34:10; Ayeb. 11:24-28) Yeova atazumilizye Mose ukwingila umu Mpanga ya Ulayo, lelo alamuzumilizya ukwikala muli Paladaise pa mpanga ya pansi nu kwikala umi wa manda pe. Naswe kwene tungapalila ukwizaya nu umi wa manda pe uku nkoleelo ndi cakuti tukwezya na maka ukuya ni miyele icindame sana iya kuikaanya.—1 Kol. 9:25.