SWENSI twazumila ukuti Yeova akutungulula antu yakwe ndakai nu kuyapeela ivingayazwa pakuti yatwalilile ukupalama kuli aliwe umu “manda akusyalikizya.” (2 Tim. 3:1) Nomba swensi kwene tulinzile ukulauvwila Yeova. Tungakolanya ivikatucitikila kuli vino vyacitikilanga Aina Izlaeli lino yali umu lwanga. Yalondekwanga ukucitapo cimwi nga yuvwa ukulila kwa ntandala.

Yeova wanenyile Mose ukupanga intandala zyakwe siluva ziili izya kuomvya “pa kwama iuvi napa kuyamanyisya ukutenuka pa nsakwe.” (Mpe. 10:2) Simapepo walizyanga intandala umu misango ipusanepusane ukulangilila na vino antu yalinzile ukucita. (Mpe. 10:3-8) Ndakai antu yakwe Leza yakapokelela vino yalinzile kulondela mu nzila izipusanepusane. Umu cipande cii tumalanda pa nzila zitatu zino tukapokelelelamo vino tulinzile ukulondela na vino inzila zizyo zyakolana ni ntandala zino yalizyanga mpiti mu Izlaeli. Inzila zii zitatu a maukongano akayako, masukulu yakwe ya eluda na vino tulinzile ukulondela lino vimwi vyasenuka.

Ndi cakuti Yeova akulonda “iuvi” likongane pa mulyango wi Taalu, ya simapepo yalizyanga intandala zyonsi. (Mpe. 10:3) Imitundu yonsi iyali umupipi, yakolongananga api Taalu nga yuvwa ukulila kwa ntandala. Antu aikalanga umupipi nu mulyango wi Taalu izanga zuwa ndi cakuti yuvwa sile ukulila kwa ntandala. Yamwi iikalanga ukutali nupya yalondekwanga kuombesya ni nsita pakuti yafike. Asi mulandu na kuno ikalanga, Yeova walondanga yonsi ukukolongana nu kuvwa kuli vino wali nu kuyanena.

Ndakai tusikongaana umwi taalu, lelo tukakongana pamwi na antu yakwe Leza. Pa maukongano ya citungu alino nu maukongano yauze aiyele, apano tukapokelela ivyeo vicindame nu utunguluzi. Ukuzinguluka insi yonsi, antu yakwe Yeova yakaipakizya maukongano ali yamwi. Fwandi yonsi aakazanwa uku maukongano yaa, yakaipakizya sana ukuya api umba lya antu aya ni nsansa. Yamwi yakapita intamfu itali ukucila yauze. Lelo yonsi aakaipelesya kuzanwako yakaipakizya sana.

Uzye yayo aya uku ncende zya kutali nu kukayela maukongano akalamba yangaipakizya? Pa mulandu ni ivyakupangapanga ivyayako ndakai, antu aingi yakaipakizya ukongano onsi nu kuyuvwa ukuti nayo kwene yali papa kwene apakucitikila ukongano. Wakwe lino Mwimilizi wa cisinte watandalile iofesi lya musambo wa mu Benin, yatambisizye puloglamu ii umu Arlit, ku Niger  itauni muno yakaimba mawe ilyayela mu Sahara Desert. Aina, ya nkazi alino na yauze ali 21 yazanyilweko. Nanti icakuti yali uku ncende yuze, yayuvwanga ukuti yali pamwi ni umba lya antu yonsi azanyilwe ku ukongano ali 44,131. Umwina umwi walemvile ukuti: “Tukutaizya sana ukufuma pa nsi ya myenzo pa kututambisya puloglamu ii. Cikulanga sile vino mwatutemwa wakwe cimwi.”

Lino ya Simapepo yalizya intandala yonga “intunguluzi zya nko zya ina Izlaeli” zyali nu kwiza ukwi taalu lya ukongano. (Mpe. 10:4) Yayanga kuli Mose mu kusambilila. Kucita vivyo kwali nu kuyazwa ukuomba ningo imilimo ino yapeezilwe mu mitundu yao. Ndi cakuti mwali pa ntunguluzi zizi, uzye nga mutacisile vyonsi vino mungacita pakuti muzanweko nu kuipakizya?

Ndakai ya eluda ya mu vilongano asi “ntunguluzi” nupya yasicuzya imfwele zino Leza wayapeela ukuti yasakamala. (1 Pet. 5:1-3) Lelo yakaezya na maka kucema ningo imfwele. Nupya yakaitemelwa kusambiliziwa mu masukulu wakwe Isukulu Lya Mulimo wa Wene. Mu masukulu yaa, ya eluda yakasambilila vino yangasakamala ningo icilongano. Pa mulandu nu kusambiliziwa ningo, ya eluda alino na amu cilongano yakapalama sana kuli Yeova. Nanti icakuti mutazanwapo ku masukulu yaa, mungaipakizya pano yayo aazanwako yakaomvya vino yakasambilila ku kwazwa icilongano.

Insita zimwi, ya simapepo mu Izlaeli nga yalizya intandala yapuutanga sile lyonga. Kucita vii kwalangililanga ukuti yonsi yalinzile ukutenuka. (Mpe. 10:5, 6) Lino yakukuuka, yakuukanga ukwaula icimvulunganya, nomba ukucita vii kwalondekwanga kuombesya. Yamwi yatalondanga kulakuuka ukuya ku ncende yuze. U mulandu ci?

Limwi yamwi yayuvwanga ukuti insita yakupita izanga zuwa nupya yayapumikizyanga. “Insita zimwi ikumbi likalanga sile ukufuma lino ilanzi lyatemba mpaka kufika na katondo.” Insita zimwi zyene yamalanga “manda yaili, nanti umwezi, nanti insita ntali, “ pakuti yakuuke. (Mpe. 9:21, 22) Uzye ale imiku inga ino yakuusile? Ibuku lya Mpendwa cipande 33 likalanda ukuti Aina Izlaeli yakuusile ukufika uku miku 40.

Insita zimwi Aina Izlaeli yamwi yazananga incende izisuma ukwali cisao. Cii calenzile ikale ningo ukwaula cili consi ica kuyatinya lino yali umu “lwanga lulu lukulu ulwakofya.” (Malan. 1:19) Limwi yatalanga iyatunkwa ukwelenganya ukuti nga yakuuka yataali nu kuzana incende isuma wakwe iya.

Lino yatandika ukukuuka kulingana ni ndupwa muno yali, yauze yene yalondekwanga ukuloleela mpaka insita yao iyakukatuka ifike. Yonsi kwene yuvwanga ukulila kwa ntandala, nomba yataali nu kukatuka pa nsita ili imwi. Intandala nga yalila yalangililanga ukuti amu mitundu iyayelile ku ufumondaka aali nu kutandikilapo, kuli kuti Yuda, Isakali na Zebuluni. (Mpe. 2:3-7; 10:5, 6) Yaa nga yapita, ya simapepo yalizyanga intandala yakwe ciili ukulangilila ukuti imitundu itatu iyaelile ku kaeya iyali nu kulondelelapo. Ya simapepo yatwalililanga ukucita vivyo kwene mpaka yonsi iyasila ukupita.

Limwi cikamutalila ukulondela ukusenuka ukukacitika umwi uvi. Limwi pa nsita imwi mwaweni ukuti ivyasenwike vyavulisye. Nanti limwi mwatemilwe vino ivintu vyali mpiti nupya mutalondanga ukuti visenuke. Asi mulandu ni vyacitike, limwi camutalile ukuya ateekele pakuti muyelezye ukusenuka kuko. Nomba ndi cakuti twatwalilila ukulondela kusenuka, tuliluka ukuti kusenuka kuko u kusuma nupya Yeova alatwalilila ukutupaala.

Mu manda yakwe Mose, Yeova watungulwile antu mamilyoni, aonsi, anaci na ana ukufuma umu lwanga. Ukwaula ukuyasakamala nu kuyatungulula nga yatapuswike. Ndakai tukatunguluka muli vyakwe Leza pa mulandu wa kuti Yeova akatutungulula. Akatwazwa ukupalama kuli aliwe pakuti utailo witu wakomelako! Acino lekini twaezya ukuya ni cuvwila wakwe vino Aina Izlaeli yacitanga nga yuvwa ukulila kwa ntandala!