CIPANDE CA KUSAMBILILAMO 25
“Nene Kwene Ndalonda Imfwele Zyane”
“Nene kwene ndalonda imfwele zyane, nupya nene kwene ndazisunga.”—EZEK. 34:11.
LWIMBO NA. 105 ‘Leza U Kutemwa’
VINO TUMASAMBILILAPO *
1. U mulandu ci uno Yeova waikolanyizizya kuli nyina akonsya?
“UZYE kwene nyina angilila umwanakwe wino akoonka?” Lii ali iuzyo lino Yeova uzizye umu manda yakwe kasesema Ezaya. Leza wanenyile antu yakwe ukuti: “Lelo kwene nanti angilila, nemo ntalatala imwilile.” (Eza. 49:15) Ilingi asiikolanya kuli nyina. Nomba pa nsita ii yene wacisile vivyo. Yeova wakolinye vino akayuvwa pa aomvi yakwe ku kutemwa kuno nyina wakwata pa mwana pa mulandu wakuti walondanga yamanye vino wayatemwa sana. Avyazi anaci aingi yangazumilizyako kuli vino nkazi Jasmin walanzile, watiile: “Ndi cakuti ukonsya umwana, kukaya ukukwata ukutemwa ukuiyele ukukatwalilila amanda pe.”
2. Uzye Yeova akauvwa uli ndi cakuti umwanakwe wenga wapumbuka kufuma kuli aliwe?
2 Yeova akamanya na lino sile umwanakwe wenga wata ukusimikila nu kulongana. Fwandi elenganyini vino akauvwa sana uyi ndi cakuti walola kuno aomvi yakwe aingi cila mwaka yakuta ukusimikila. *
3. I vyani vino Yeova akalonda?
3 Aina na ya nkazi yano yata ukusimikila, yakawela umu cilongano nupya tukaya ni nsansa lino yawela umu cilongano. Yeova akalonda yawele umu cilongano, naswe kwene avino tukalonda. (1 Pet. 2:25) Tungacita uli pakuti tuyazwe ukuwela? Lino tutatala twasuka iuzyo lii, cingazipa nga twatala twamanya ivikalenga yamwi yate ukuzanwa umu kulongana nu kuombako umulimo wa kusimikila.
I CANI CIKALENGA YAMWI YATE UKUOMBELA YEOVA?
4. I vyani vikacitikila yamwi pa mulandu ni ncito zino yakaomba?
4 Yamwi yaleka incito ino yakaomba ukuya icindame sana mu umi wao. Umwina Hung, * aakaikala ku Southeast Asia walanzile ukuti: “Nasumbanga sana insita na maka ku ncito. Ntelenganyanga ningo, pano nalolanga kwati nga nakwata sana impiya alino ningaombela ningo Yeova. Fwandi naombanga insita ikulu. Natandike kukanaya umu kulongana panono panono icakuti nateleliile sile. Satana akaomvya insi kuleenga antu yate ukuombela Leza panono panono.”
5. Uzye nkazi umwi wacisile uli lino wakweti intazi?
5 Aina yamwi na ya nkazi yakakwata intazi izingi zikalenga yatoovoke. Nkazi Anne aakaikala uku Britain wakwata ana 5. Walondolwile ukuti: “Umwanane munono wavilwe umulemale. Lino papisile insita, umwanane umukazyana wakwe citatu wazinzilwe umu cilongano, lyene umwanane muze umulumendo wizile alwala ulwale wa mu melenganyo. Nali sana nu ulanda icakuti natiile ukuya mu kulongana nu kusimikila. Cisiile lyene nateleliile sile.” Tukauvwila sana ya Anne nu lupwa lwao uluse kumwi na yauze aakakwata intazi zya musango uu!
6. Uzye ukukanaomvya amazwi aaya pali Kolose 3:13, kungalenga uli umwi ukuta ukuombela pamwi na amu cilongano?
6 Welengini Kolose 3:13. Aomvi yakwe Yeova yamwi yakasoka pa mulandu na vino umwi uwa mu cilongano wacisile. Mutumwa Paulo wamanyile ukuti insita zimwi ‘tungailizyanya’ pa mwina nanti nkazi. Nupya limwi tungafyengwa. Nga tutacenjile, tungatandika ukuya nu lupato. Ndi cakuti umuntu wasoka, cingalenga ate ukuombela pamwi na antu yakwe Yeova. Uvwini ivyacitikiile umwina Pablo aakaikala uku South America. Umwi wamubepizye ukuti watacita vimwi iviipe, na cico calenzile apokwe imilimo ino wakweti umu cilongano. Uzye umwina wii wacisile uli? Umwina Pablo walanzile ukuti: “Nasosile sana icakuti panono panono natiile ukuombela pamwi na amu cilongano.”
7. I vyani vingacitika nga umwi watwalilila ukuyuvwa uwa mulandu?
7 Ndi cakuti umwi wacisile uluyembu lwipisye mpiti, angayuvwa uwa mulandu pa nsita itali, na cico cingalenga alola kwati Leza atanga amutemwe nupya. Nanti icakuti walapiile nu kuyelelwa uluse, angayuvwa ukuti ataalinga ukuya pa antu yakwe Leza. Vivyo kwene avino umwina Francisco wayuvwanga. Walondolwile ukuti: “Nasunzilwe pa mulandu wa kucita uzelele. Nanti icakuti pa kutandika natwalilile ukuya mu kulongana, nizile inja sana nu ulanda nu kulayuvwa ukuti ntalinzile ukuya pamwi na antu yakwe Yeova. Kampingu wancuzyanga, nupya nasininkizye ukuti Yeova atanjeliile uluse. Vikwene avino natiile ukuya mu kulongana.” Uzye mukayuvwa uli pa ina na ya nkazi aakakwata intazi zino twalandapo? Uzye mukayuvwila uluse? Nga Yeova wene akayuvwa uli pali aliyo?
YEOVA WATEMWA AOMVI YAKWE
Kacema Umwina Izlaeli wasakamalanga sana imfwele iponge (Lolini mapalaglafu 8-9) *
8. Uzye Yeova akailila yao amuombelanga? Londololini.
8 Yeova asiilila yayo amuombelanga nomba aata ukuzanwa pamwi na antu yakwe ndakai, nupya asiilila imilimo ino yamuombiile. (Ayeb. 6:10) Kasesema Ezaya walemvile icilangililo icisuma ukulangilila vino Yeova akasakamala antu yakwe. Ezaya walemvile ukuti: “Amasunganga imfwele zyakwe wakwe kacema. Amakolonganikanga utwana twa mfwele, nu kutupakatila apa minwe yakwe.” (Eza. 40:11) Uzye Yeova kacema mukalamba akauvwa uli ndi cakuti umuomvi wakwe wenga wata ukumuombela? Yesu wasokolwile vino Yeova akayuvwa lino uzizye asambi yakwe ukuti: “Uzye mwemo mungelenganya uli pali vino umuntu akacita ndi wakweti mfwele mwanda, lyene yonga yaponga? Akasya zyonsi makumi fundimbali na fundimbali kuti apite ku kulonda yonga iyatiponga. Lino waizana, cumi kwene aya ni nsansa cuze kuluta pa mfwele makumi fundimbali na fundimbali izitaponzile.”—Mate. 18:12, 13.
9. Uzye ya kacema aliko mu nsita ino ivyalumbulwa muli Baibo vyacitikanga yasakamalanga uli imfwele zyao? (Lolini icikope icili pa nkupo.)
9 U mulandu ci uno tungakolanyizizya Yeova kuli kacema? A pa mulandu wakuti ya kacema asuma aliko mu nsita ino ivyalumbulwa muli Baibo vyacitikanga yasakamalanga ningo sana imfwele. Pa nsita imwi, Davidi walwile na cisama na cibele pakuti sile acingilile imfwele zyakwe. (1 Sam. 17:34, 35) Kacema musuma wamanyanga ndi cakuti imfwele nanti yonga isipo. (Yoa. 10:3, 14) Kacema wa musango uu wasyanga imfwele 99 mu citata icicingililwe nanti kuli kacema muze kuti amulolelako nu kuya umukulonda imfwele yonga iyatiponga. Yesu waomvizye icilangililo cii pa kusambilizya icumi cicindame icakuti: “Mu musango uli onga kwene, So uwa mwi yulu asyalonda nanti wenga uwamu anono yaa, aponge.”—Mate. 18:14.
Kacema mpiti umu Izlaeli akusakamala imfwele iyaponzile (Lolini palaglafu 9)
YEOVA AKALONDA IMFWELE ZYAKWE
10. Kulingana ni lembelo lyakwe Ezekelo 34:11-16, i vyani vino Yeova walavile ukucita ku mfwele zyakwe iziponge?
10 Yeova watutemwa wenga na wenga ukwikako sile na “anono” yano yapumbuka kufuma mu cilongano. Kupitila muli kasesema Ezekelo, Leza walavile ukuti alalonda imfwele zyakwe nu kuzyazwilizya ukuya na ucuza usuma na aliwe nupya. Walondolwile na vino wali nu kucita pa kuyakulula. Vino wali nu kucita vyakolineko na vino kacema wa mu Izlaeli wacitanga ndi cakuti imfwele yapumbuka. (Welengini Ezekelo 34:11-16.) Inkoleelo kacema walondanga imfwele, nupya ukucita vivyo kwalondekwanga insita nu kuombesya. Lyene nga wazana imfwele iponge, waiswilizyanga ku zyuze. Ndi cakuti wazana imfwele yaticisika nanti ili sana ni nzala, kacema wazwilizyanga imfwele iyo itonte, kuinyepela cilonda nu kuilisya nga aisenda. Ya eluda, ya kacema ya vilongano vyakwe Leza, yalinzile ukucita vikwene pakuti yazwilizye wensi uwapumbuka kufuma umu cilongano. (1 Pet. 5:2, 3) Ya eluda yakalonda antu yaa, kuyazwa ukuwela mu cilongano nu kuyalanga ukutemwa lino yakuyazwilizya ukuya ya cuza yakwe Yeova. *
11. I vyani vino kacema musuma wamanyile?
11 Kacema musuma wamanyile ukuti imfwele zingaponga. Nupya ndi cakuti imfwele yafumile pa zyuze, kacema ataali nu kuifulula nga yawela. Lekini tulande pali vino Yeova wacisile lino wazwilizyanga aomvi yakwe yamwi yano yapumbwike ukufuma kuli aliwe.
12. I vyani vino Yeova wacitiile Yona?
12 Kasesema Yona atuvwilile Yeova nupya ataile uku Ninive. Nanti ciye vivyo, Yeova atakanyile Yona. Wakwe kacema musuma, Yeova wapuswisye Yona nu kumupeela amaka ya kuomba umulimo wakwe. (Yona 2:7; 3:1, 2) Lino papisile insita, Yeova waomvizye icimelwa ukwazwa Yona ukumanya vino umi wakwe cila muntu wacindama. (Yona 4:10, 11) I vyani vino tungasambililako? Ya eluda yatalinzile ukutonta ukwazwilizya yano yata ukusimikila nu kulongana. Nomba ya eluda yakaezya kumanya icalenzile imfwele ukupumbuka. Nupya lino imfwele iyo yawela kuli Yeova, ya eluda yakatwalilila ukuyikako mano nu kulanga ukutemwa.
13. I vyani vino tungasambilila kuli vino Yeova wacisile kuli kalemba wa Masamu 73?
13 Kalemba wa Masamu 73 watandike ukutoovoka lino waweni ivintu vikuzipila antu aipe. Watandike ukutwisika ndi cakuti mwaya ivisuma mu kucita ukulonda kwakwe Leza. (Masa. 73:12, 13, 16) Uzye Yeova wacisile uli? Atasokiile umonsi wii. Nupya, Leza walenzile amazwi yakwe kalemba wa masamu yalembwe muli Baibo. Lino papisile insita, kalemba wa Masamu wizile ailuka ukuti kutaali icili consi cingaluta pa kuya cuza wakwe Leza. (Masa. 73:23, 24, 26, 28) I vyani vino tukusambililako? Ya eluda yatalinzile kulapingula zuwa yayo aakatwisika ndi cakuti mwaya ivisuma mu kuombela Yeova. Kucila sile ukuyasuula, ya eluda yalinzile ukwezya na maka ukuvwikisya umulandu uno yakulandila nanti ukucitila vimwi. Lyene ya eluda yangamanya Malembelo yano yangaomvya pa kuyakomelezya.
14. U mulandu ci uno Eliya walondekwanga uwazwilizyo, nupya Yeova wamwazwile uli?
14 Kasesema Eliya utukanga Namwene Yezebele. (1 Yamw. 19:1-3) Welenganyanga ukuti kutaali kasema wakwe Yeova na muze, nupya wayuvwanga ukuti umulimo wakwe utacindime. Eliya wizile aya sana nu ulanda icakuti walondanga nu kufwa. (1 Yamw. 19:4, 10) Yeova ataasuzile Eliya, lelo wamwazwile ukumanya ukuti ataali wenga, ukuti walondekwanga ukutaila amaka yakwe Leza, nu kuti wakweti umulimo uno walondekwanga ukuomba. Yeova wakutike kuli vino vyasakamikanga Eliya nupya wamupeezile umulimo upya uwa kuomba. (1 Yamw. 19:11-16, 18) I vyani vino tukusambililako? Swensi kwene, sana sana ya eluda tulinzile kulasunga ningo imfwele zyakwe Leza. Nanti icakuti umuntu walanda ukuti watasoka nanti akuyuvwa ukuti Yeova atalatala amwelele, ya eluda yalinzile kukutikisya lino akuyalondolwela vino akuyuvwa. Lyene yalezya ukwazwa imfwele iponge ukuvwikisya ukuti Yeova waitemwa sana.
UZYE TULINZILE UKUYUVWA ULI PA MFWELE ZYAKWE LEZA IZIPONGE?
15. Kulingana na Yoane 6:39, uzye Yesu walolanga uli imfwele zyakwe isi?
15 Uzye Yeova akalonda twayuvwa uli pa mfwele zyakwe? Tungasambilila kuli vino Yesu wacitanga. Wamanyile ukuti imfwele zyakwe Yeova zyonsi i zya mutengo mu manso yakwe Leza, fwandi wezyanga na maka ukwazwa “Ina Izlaeli, yao ali wa mfwele ziponge” kuwela kuli Yeova. (Mate. 15:24; Luka 19:9, 10) Pa mulandu wakuti wali a kacema musuma, Yesu wezyanga na maka ukukanaleka imfwele yakwe Leza nanti yonga ukuponga.—Welengini Yoane 6:39.
16-17. Uzye ya eluda yalinzile ukuyuvwa uli pa kwazwa yayo apumbuka? (Lolini kambokosi kakuti “ Vino Imfwele Iponge Ingaayuvwa.”)
16 Umutumwa Paulo wakomelizye ya eluda amu cilongano ca mu Efeso ukulakolanya Yesu. Walanzile ati: “Mu musango uu tungazwa atonte, ukwiusya mazwi ya Mwene Yesu yano wavwanzile umwisikulu ati, ‘Mukupeela mwaya upolelelo ukulu cuze kuluta mukupokelela!’” (Mili. 20:17, 35) Ilembelo lii likulanga umulimo ucindame uno ya eluda yakwata uwa kusakamala antu yakwe Yeova. Ya Salvador, ya eluda aakaikala uku Spain yalondolwile iyati: “Nga nelenganya pali vino Yeova akasakamala imfwele iziponge, nkakomeleziwa sana nupya cikalenga naezya na maka ukuzyazwa. Namanya ukuti Yeova akalonda nasakamala imfwele zii.”
17 Yonsi yano itulandapo mu cipande cii aapumbwike, yazwiliziwe ukuwela kuli Yeova. Na ndakai kwene, antu aingi yapumbuka nupya nayo kwene yakalonda ukuwela kuli Yeova. Cipande icilondelilepo cilalanda pa vintu na vyuze vino tungacita pa kuyazwa ukuwela kuli Yeova.
LWIMBO NA. 139 Mwaelenganya Ukuti Muli Umu Nsi Ipya
^ pala. 5 U mulandu ci uno yamwi aombela Yeova ni cisinka pa myaka iingi yapumbukila kufuma uku cilongano? Uzye Leza akauvwa uli pa antu yayo? Cipande cii cimaasuka mauzyo yaa. Nupya tumalanda na pali vino tungasambilila kuli vino Yeova wavwile aomvi yakwe aaliko mu nsita ino ivyalumbulwa muli Baibo vyacitikanga aapumbwike kufuma kuli aliwe pa nsita imwi.
^ pala. 2 IZWI ILYATILILONDOLOLWA: Uwata ukusimikila aakulandwapo u muntu aatasimikilapo pa myezi 6 nanti ukucilapo. Nanti ciye vivyo, aata ukusimikila yakatwalilila ukuya aina itu na ya nkazi nupya twayatemwa.
^ pala. 4 Amazina yamwi asi mazina yao acumi.
^ pala. 10 Cipande icilondelilepo cilalanda pali vino ya eluda yangacita ivintu vii vitatu.
^ pala. 60 ULONDOLOZI WA CIKOPE: Kacema Umwina Izlaeli uwisile sana amano ku mfwele wayanga mu kulonda imfwele nga yaponga nu kuyazwa ukuwelela ku zyuze. Ya kacema ya mu cilongano nayo avino yakacita.
^ pala. 64 ULONDOLOZI WA CIKOPE: Nkazi uwata ukusimikila nu kulongana aakuloleela basi ikatuke, walola ya Nte yaili aali ni nsansa yakusimikila kukazanwa antu aingi.
