1. Uzye katiina ka kuli Leza ali cani, nupya kacindama uli kuli yayo atemwa Yeova?

AINA KLISTU yatemwa Leza nupya yakamutiina. Yamwi yakalola ukuti ivintu vivyo vitange viombele pamwi. Nomba tusikulanda pa kutiina ukungalenga umuntu ukuvwa sana intete. Tumalanda pa kutiina ukuiyele. Antu aya na katiina ka musango uu yakacindika sana Leza. Yasilonda ukusosya Isi uwa kwi yulu pa mulandu wakuti yasilonda ucuza wao na aliwe ononeke.—Masa. 111:10; Mapi. 8:13.

2. Ukulingana na mazwi ya Mwene Davidi aya pa Masamu 86:11, i vintu ci viili vino tumalandapo?

² Welengini Masamu 86:11. Lino mukwelenganya pa mazwi yaa, mumalola ukuti Umweni Davidi wamanyile umulandu uno cacindamila ukucindika Yeova. Lekini tulande pali vino tungaomvya amazwi yano Umwene Davidi walanzile umwi pepo. Ica kutandikilapo, tumalanda pa milandu ino tulinzile ukucindikila sana izina lyakwe Leza. Cakwe ciili, tumalanda pali vino tungalanga ukuti tukacindika sana izina lyakwe Leza muli vyonsi vino tukacita cila wanda.

3. I vyani vyacitikiile Mose ivyamwazwilizye ukutwalilila ukucindika sana izina lyakwe Leza?

³ Elenganyini pali vino Mose uvwile lino waselanga umu cipongo icali umu ciliwe nu kulola icilolwa ca lulumbi lwakwe Yeova. Ibuku lyakuti Insight on the Scriptures likalanda ukuti  “cii cali icizungusyo cino umuntu aliwensi atatazile alolepo lino Yesu atali aize pano nsi!” Mose uvwile amazwi yano umungeli walanzile akuti: “Nene [Yeova, Yeova], Leza wa luse na mizu, asisoka zuwa, uwazula nu kutemwa kwa manda pe, uwatailwa na antu yakwe. Ndatwalilila kutemwa kwane ku antu mazimbi amu mazimbi ku nkulo zyonsi nu kwelela ukakasi wao, uyi wao, na maifyo yao.” (Kufu. 33:17-23; 34:5-7) Mose afwile welenganyanga pa cizungusyo cici lino waomvya izina lyakwe Yeova. Ali mulandu kwene uno Mose wacelwile antu yakwe Leza Aina Izlaeli “ukucindika izina ilya lulumbi nupya ilya koofya lyakwe [Yeova] Leza winu.”—Malan. 28:58.

4. U kwelenganya pa miyele ci ukungatwazwa ukulacindika sana Yeova?

⁴ Lino tukwelenganya api zina lyakwe Yeova, tulinzile nu kwelenganya pali vino waya. Tulinzile nu kwelenganya pa miyele yakwe wakwe amaka yano wakwata, amano, umulinganya nu kutemwa. Ukwelenganya pa miyele ii na yuze kungalenga ukuti twamucindika sana.—Masa. 77:11-15.

5-6. (a) Uzye izina lyakwe Leza likapiliula cani? (b) Ukulingana ni lembelo lyakwe Kufuma 3:13, 14 na lyakwe Ezaya 64:8 u mu nzila cino muno Yeova akalengela ivintu ukucitika?

⁵ I vyani vino twamanya pa upiliulo wi zina lyakwe Leza? Asambilila aingi yazumila ukuti izina lyakuti Yeova lifwile likapiliula ukuti “Akalenga Iciliconsi Ukuya Vino Akulonda.” Upiliulo uwo ukatwiusyako ukuti kusi icingalesya Yeova ukucita vino akulonda ukucita nupya angalenga ivintu ukucitika. Angacita uli vivyo?

⁶ Yeova akalenga ivintu ukucitika lino akaya ivili vyonsi ivikulondekwa pakuti afikilizye ukulonda kwakwe. (Welengini Kufuma 3:13, 14.) Ilingi yakatukomelezya ukwelenganya pa miyele ya kuzungusya ino Leza wakwata. Yeova angalenga aomvi yakwe aatamalilika ukuya vyonsi vino akulonda pakuti yamuombele nu kufikilizya ukulonda kwakwe. (Welengini Ezaya 64:8.) Yeova akafikilizya  ukulonda kwakwe umu nzila zii. Kusi icingamulesya ukufikilizya ukulonda kwakwe.—Eza. 46:10, 11.

7. I vyani vino tungacita pakuti twataizya sana Tata witu uwa kwi yulu?

⁷ Tungalanga ukutaizya kuli Tata witu wa kwi yulu nga tukwelenganya pali vino wacita na pali vino akatulenga ukucita. Wakwe, nga tukwelenganya pa visuma vino waumba tukataizya pali vyonsi vino Yeova wacita. (Masa. 8:3, 4) Nga twelenganya pali vino Yeova watwazwilizya ukucita pakuti tufikilizye ukulonda kwakwe, tukamucindikilako sana. Izina lyakuti Yeova ilya kucindikisya umu cumi! Pano umwi zina lilyo mwaya vyonsi vino Tata witu waya, vino wacita na vino alacita uku nkoleelo.—Masa. 89:7, 8.

8. Uzye ilembelo lya Malango 32:2, 3 likasokolola vyani pali vino Yeova akalola izina lyakwe?

⁸ Lino kwasyala sile panono ukuti Aina Izlaeli ingile umu mpanga ya ulayo, Yeova wasambilizye Mose amazwi ya mu lwimbo. (Malan. 31:19) Mose nawe wali nu kusambilizya antu ulwimbo luu. (Welengini Malango 32:2, 3.) Lino tukwelenganya pa vikomo 2 na 3 tumalola ukuti Yeova asilonda izina lyakwe ukufisama nanti ukuloleka kwati ilya muzilo sana icakuti tutanga tulilumbule nu kulilumbula. Akalonda izina lyakwe ukumanyikwa kuli yonsi. Lyali isyuko sana uku yantu ukuvwa Mose akuyasambilizya pali Yeova na pi zina lyakwe ilya lulumbi! Vino Mose wayasambilizye vyakomizye utailo wao nu kuyakomelezya wakwe vivi kwene vino imvula ikalenga ivimelwa ukukula. Tungacita uli pakuti twasambilizya umu nzila iyo?

9. Tungacita uli pakuti tulenge izina lyakwe Yeova licindikwe?

⁹ Lino tukusimikila uku ng’anda ni ng’anda nanti kuno kukazanwa antu aingi, tungaomvya Baibo ukulanga antu izina lyakwe Leza ilyakuti Yeova. Tungayapeela lupapulo, ukuyatambisya mavidyo asuma ni vyeo ivyaya pa webusaiti itu ivikacindika Yeova. Lino tuli uku ncito, uku sukulu nanti lino tukuya kumwi tungazana isyuko lyakulanda na antu pali Leza witu na pali vino waya. Tungayanenako pa vintu ivisuma vino Yeova alatucitila uku nkoleelo na vino alacita pano nsi nupya nga yuvwa vivyo yangiluka pa muku wa kutandikilapo vino Yeova watutemwa. Nga tukunenako yauze pa cumi icikalanda pali Tata witu uwaya nu kutemwa, ala tukulenga izina lyakwe Leza ukucindikwa. Tukaazwa antu ukumanya ukuti yayasambilizya ivya ufi pali aliwe. Vino tukasambilizya antu muli Baibo vikayakomelezya sana.—Eza. 65:13, 14.

10. Lino tukutungulula masambililo ya Baibo, u mulandu ci uno tulinzile ukucita na vyuze ukucila sile pa kuyasambilizya vino Leza akalonda yacita na masunde yakwe?

¹⁰ Lino tukutungulula masambililo ya Baibo, tukalonda ukwazwilizya asambi itu ukumanya nu kutandika ukuomvya izina lyakwe Yeova. Nupya tukalondesya ukuyazwa ukumanya ningo Yeova. Uzye tungacita vivyo ndi cakuti tukuyasambilizya sile ivya kucita na vino yalinzile ukulondela? Umusambi musuma angasambilila masunde yakwe Leza nu kulalondesya ukuyalondela. Nomba uzye umusambi anguvwila Yeova pa mulandu sile uwa kuti wamutemwa? Iusyini ukuti, Eva wamanyile masunde yakwe Leza nomba wene na Adamu yatatemilwe Leza Kapeela wa masunde. (Utan. 3:1-6) Fwandi tulinzile ukucita na vyuze ukucila sile ukuyasambilizya vino Leza akalonda yacita na masunde yakwe.

11. Lino tukusambilizya asambi itu pa masunde yakwe Leza na vino akalonda twacita, tungacita uli pakuti tuyazwe ukutemwa sana Kapeela wa Masunde?

¹¹ Vino Yeova akalonda twacita na masunde yakwe vingatwazwa sana. (Masa. 119: 97, 111, 112) Nomba asambi itu yatange yelenganye vivyo ndi cakuti yatamanyile ukuti Yeova aliwe wikako masunde yayo pa mulandu wakuti watutemwa. Fwandi limwi tunguzya asambi itu ukuti: “Mukwelenganya ukuti u mulandu ci uno Leza wanenela aomvi yakwe ukucita ivintu vii nanti ukutaluka uku vintu vii? Nupya vivyo vikutusambilizya cani pali vino waya?” Nga tukwazwa asambi itu ukwelenganya pali Yeova nu kutwalilila ukutemwa sana izina lyakwe ilya lulumbi, tulayafika sana pa mwenzo. Asambi itu yatalatemwa sile masunde lelo yalatemwa na Kapeela wa masunde kwene. (Masa. 119:68) Yalakwata utailo ukome nupya ukucita vivyo kulayazwa ukuzizimizya intazi izikome izilaizila.—1 Kol. 3:12-15.

12. I vyani vino Davidi wacisile ivyalenzile atatwalilila ukuya nu mwenzo onga, nupya i vyani vyacitike?

¹² Mazwi aaya pa Masamu 86:11 akuti: “Umpeele umwenzo onga” yacindama sana. Umwene Davidi wapeezilwe umupasi wa muzilo ukulemba amazwi yaa. Umu umi wakwe waweni vino cangwike ukukanaya nu mwenzo onga. Apa nsita imwi, wali api paala lyene waweni muka mwineco akufulala. Uzye pa nsita iya, umwenzo wakwe Davidi wali onga nanti utaali onga? Wamanyile isunde lyakwe Yeova ilyakuti: “Utakumbwa umuci wa muzo.” (Kufu. 20:17) Nomba watwalilile ukulolekesya. Umwenzo wakwe wapatukiine pali vino walondesyanga umwanaci kuli kuti Batisheba na vino walondesyanga ukuzanzya Yeova. Nanti icakuti Davidi watemilwe Yeova nupya wamutiinanga pa nsita itaali, wacisile ivya ucenjezi. Pa mulandu na vivyo, Davidi wacisile ivintu iviipe. Wazewanyizye izina lyakwe Yeova. Davidi nupya waletelile na antu ya kaele ukwikako sile nu lupwa lwakwe.—2 Sam. 11:1-5, 14-17; 12:7-12.

13. Uzye twamanya uli ukuti umwenzo wakwe Davidi wizile iuya onga nupya?

¹³ Yeova wasunzile Davidi, nupya watwalilile ukuya cuza wako Yeova nupya. (2 Sam. 12:13; Masa. 51:2-4, 17) Davidi wiwisye iviipe ivyacitike lino walenzile umwenzo wakwe ukupatukana. Uzye Yeova wazwilizye Davidi ukuya nu mwenzo onga? Ee, pano pa cisila Baibo yalanzile pali Davidi ukuti umuntu uwatiinanga Yeova nu mwenzo onsi.—1 Yamw. 11:4; 15:3.

14. Iuzyo ci lino tulinzile ukuyuzya sweineco, nupya u mulandu ci?

¹⁴ Ivyacitikiile Davidi vikatukomelezya nu kutucelula. Ivintu iviipe vino wacisile vikacelula antu yakwe Leza ndakai. Asi mulandu twacitandike ukuombela Yeova nanti twamuombela pa myaka iingi, tulinzile  ukuyuzya sweinceco ukuti, ‘Uzye nkataluka uku matunko yakwe Satana angalenga ntaya nu mwenzo onga?’

15. Uzye katiina ka kuli Leza kangatucingilila uli ndi cakuti twalola ivikope iviipe?

¹⁵ Tuti limwi mwalola icikope cimwi pa TV nanti pa intaneti icalenga mwatandika ukwelenganya pa viipe, mukacita uli? Cinganguka ukwelenganya ukuti icikope cii nanti filimu ii musi ivya uzelele. Nomba uzye cingaya icikope cino Satana angaomvya pakuti mutatwalilila ukuya nu mwenzo onga? (2 Kol. 2:11) Icikope cico cingaya wa kacela kanono kano umuntu angaomvya ukulepwila ulumbao ulukulu. Pa kutandika watoola kacela kwene kaa kanono akonde nupya kasongole wingizya umu lumbao. Lyene lino akuya akwingizizyako ulumbao lupanduka. Uzye ivikope iviipe vingaya wa kacela kako akonde akangalepula ulumbao ulukulu? Ukutamba ivintu vii ivingaloleka kwati asi viipe, kungalenga umwi ukuyembukile Yeova nga papita insita. Fwandi mutaleka icintu icili consi iciipe ukwingila umu mwenzo winu! Mwatwalilila ukuya nu mwenzo onga pakuti mwatiina izina lyakwe Yeova!

16. A mauzyo ci yano tungayuzya nga twatunkwa ukucita iviipe?

¹⁶ Ukulunda pa vikope iviipe, Satana akaomvya ivintu na vyuze ivingi pa kututunka ukucita iviipe. Uzye tukacita uli? I canguke ukwelenganya ukuti ivintu vii asi viipe. Limwi tungelenganya ukuti: ‘Kwene ntalazingwa foo nga nacita ivintu vii, pano asi mulandu uwakuzingilwapo.’ Ukwelenganya vii kwaipa sana. Cingazipa ukuyuzya sweineco mauzyo wakwe: ‘Uzye Satana akwezya ukuomvya itunko lii pakuti ntatwalilila ukuya nu mwenzo onga? Uzye nga nacita ivintu vii ningaleta umuzewaya api zina lyakwe Yeova? Uzye ukucita vii kungalenga mpalame kuli Leza wane nanti ukuntalusya kuli aliwe?’ Mwaelenganya  pa mauzyo yaa. Mwalenga Yeova ukuti amupeela amano akwasuka mauzyo yaa na ucisinka. (Yako. 1:5) Ukucita vivyo kungatucingilila sana. Kungamwazwa ukuya asipe lino mukukana matunko, wakwe vino Yesu wacisile lino walanzile ukuti: “Senka pano Ciwa.”—Mate. 4:10.

17. U mulandu ci uno citazipila ukuya nu mwenzo upatukane? Langililini.

¹⁷ Citazipa ukuya nu mwenzo upatukane. Elenganyini ukuti umwi umba lyakwe ya kateya yakwe bola mwaya antu asiuvwana. Yamwi yakalonda aliyo yacindikwa sile, yamwi anono yasilonda ukuteya ukulingana na masunde lyene yauze nayo yasicindika wino akayatungulula. Iumba lya musango uwo litanga licimvye. Nomba iumba muno mwaya antu alemane lyene icanguke ukucimvya. Umwenzo winu ungaya wi umba lino likucimvya ndi cakuti vino mukwelenganya, vino mukulonda na vino mukuyuvwa vikuombela pamwi lino mukuombela Yeova. Iusyini ukuti Satana asilonda muye nu mwenzo onga. Akalonda amelenganyo inu, vino mukalonda na vino mukayuvwa vyalwisyanya na vino Yeova akalonda twacita. Nomba mwemo mukalonda umwenzo winu ukuya ulemenkane pakuti muombele Yeova ningo. (Mate. 22:36-38) Mutakezye ukuleka Satana akapaatule umwenzo winu!

18. Ukulingana na amazwi aya pali Mika 4:5, i vyani vino mukulondesya ukucita?

¹⁸ Mwapepa kuli Yeova wakwe vino Davidi wapefile ukuti: ‘Umpeele umwenzo onga kuti naopa izina lyako.’ Mwaezya na maka ukulaomvya amazwi aaya umwi pepo lii umu umi winu. Cila wanda mwalondesya ukuti vyonsi vino mukupingulapo viye ivinono nanti ivikulu vyalangilila ukuti mwacindika sana izina lyakwe Yeova. Nga mwacita vivyo mulalanga ukuti mu cumi mwemwe ya Nte Yakwe Yeova. (Mapi. 27:11) Nupya swensi kwene tulalanda amazwi yano kasesema Mika walanzile akuti: “Tumapitilanga umwi zina lyakwe Yeova Leza witu amanda pe.”—Mika. 4:5, NWT.