CIPANDE CA KUSAMBILILAMO 26
‘Welini Kunondi’
“Ndi mwawela kunondi, nani kwene ndawela kunomuli.”—MALAKI 3:7.
LWIMBO NA. 102 ‘Mwa-azwa Atonte’
VINO TUMASAMBILILAPO *
1. Uzye Yeova akayuvwa uli lino umwi uwatiile ukumuombela watandika ukumuombela nupya?
WAKWE vino twasambilile umu cipande icafumileko, Yeova waikolanya kuli kacema musuma aakasakamala imfwele yonga na yonga. Nupya akalonda yonsi apumbuka. Yeova wanenyile Aina Izlaeli aatile kumupepa ukuti: “Ndi mwawela kunondi, nani kwene ndawela kunomuli.” Twamanya ukuti na likwene acili akayuvwa icili cimwi, pano walanda ukuti: “Nsisenuka awe.” (Malaki 3:7) Yesu walanzile ukuti Yeova na angeli yakaya sana nu luzango lino umuomvi wakwe Yeova uwapumbwike wawelela kuli aliwe.—Luka 15:10, 32.
2. I vyani vino tumasambilila mu cipande cii?
2 Lekini tusambilile pa vilangililo vyakwe Yesu vitatu ivikatusambilizya masambililo acindame pali vino tungazwilizya yano yapumbuka ukufuma kuli Yeova. Tumalanda pa miyele imwi ino tulinzile ukukwata pakuti twazwilizye imfwele iziponge ukuswilila kuli aliwe. Nupya tumasambilila ukuti tulaya nu luzango ndi cakuti tukwazwilizya yano yata ukulongana nu kusimikila ukuwelela kuli Yeova.
KULONDA ULUPIYA ULUPONGE
3-4. U mulandu ci uno umwanaci uwalandwa pali Luka 15:8-10, wikiileko sana amano ku kulonda ulupiya ulwaponzile?
3 Tulinzile ukuombesya ukulonda yonsi akulonda ukuwela kuli Yeova. Mu mulumbe uwalembwa umwi buku lilandwe lyakwe Luka, Yesu walanzile pa mwanaci uwaponzizye ulupiya ulucindame sana. Cilangililo cii cikalenga tumanye vino waombisye ukulonda ulupiya ulwaponzile.—Welengini Luka 15:8-10.
4 Yesu walondolwile vino umwanaci wayuvwile lino wazanyile ulupiya ulucindame ulwaponzile. Mu manda yakwe Yesu, ndi cakuti mukazyana akutwalwa nyina wamupeelanga impiya izili 10. Lupiya luu lufwile lwacindime sana ku mwanaci wiya pano limwi lwali pa mpiya 10 zino ya nyina yamupeezile pa wanda wa winga wakwe. Umwanaci welenginye ukuti ulupiya lwaponiile pansi. Fwandi wakozizye ulukozyo pa kulonda, lelo ataaluweni. Ulukozyo lwakwe lutaakanga icakuti lungamwazwa ukulola ulupiya. Lyene watandike ukupyela ing’anda yonsi. Mu vikona vino wapyezile amuno wizile alola ulupiya lwayengesa. Uvwile ningo sana! Wamile auze na ina mupalamano kuti yazangile pamwi.
5. U mulandu ci uno insita zimwi cingatalila ukuzana yano yata ukulongana nu kusimikila?
5 Ku cilangililo cino Yesu walanzile, tukasambililako ukuti nga twaponzya cimwi tulinzile ukuombesya pa kucizana. Vivyo kwene avino tulinzile nu kuombesya pakuti tuzane yano yata ukulongana nu kusimikila. Limwi papita imyaka iingi pano yateelile ukuzanwa pamwi naswe. Limwi yakuukila nu ku ncende kuno aina yatayamanya nu kuyamanya. Nomba pa nsita ii yafwile yakulondesya ukuwela kuli Yeova. Yakalonda ukuombela pamwi na ya kapepa yauze nomba yakalondekwa ukwazwiwa.
6. Uzye yonsi umu cilongano yangazwilizya uli ukulonda aata ukulongana nu kusimikila?
6 Aaweni angaombako umulimo wa kulonda yano yata ukusimikila nu kulongana? Swensi kwene, ya eluda, ya painiya, ya lupwa na ya kasimikila umu cilongano tungazwilizyako ukuyalonda. Uzye mwakwata cuza nanti lupwa uwata ukulongana nu kusimikila? Uzye mwatala mwazana umwi uwata ukusimikila nu kulongana lino mukusimikila uku ng’anda ni ng’anda nanti ukukazanwa antu aingi? Mungamulondolwela ukuti ndi cakuti angatemwa yamwi ukumutandalila, angamupeela adilesi yakwe nanti foni namba pakuti mukatwalile ya eluda aaya mu cilonganino cinu.
7. I vyani vino mwasambilila kuli vino eluda uwi zina lyakuti Thomas walanzile?
7 I vyani vino ya eluda yangacita pakuti yazane akulonda ukuwela kuli Yeova? Uvwini vino eluda uwizina lyakuti Thomas * aakaikala uku Spain walanzile. Wazwilizya ya Nte ukucila pali 40 ukuwela mu cilongano. Umwina Thomas walanzile ukuti: “Nkatala inuzya aina na ya nkazi apusanepusane ndi cakuti yamanya kuno antu aata ukulongana nu kusimikila yakaikala. Nanti ukuzyako ya kasimikila ndi cakuti yakwiusyako yamwi aata ukulongana. Aingi yakaya ni nsansa pa kwasuka pano yakayuvwa ukuti nayo kwene yakulondako antu ya musango uwo. Lyene lino natandalila aina na ya nkazi aata ukulongana, nkayuzya pa ana yao na ya lupwa. Yamwi pali yayo izanga na ana yao ku kulongana, limwi ana yao yafisile na pali ukasimikila. Fwandi nayo kwene yangazwiwa ukuwela kuli Yeova.”
WEZYINI ANA YAKWE YEOVA APONGE
8. Mu cilangililo ca mwana muponge icalembwa pali Luka 15:17-24, uzye isi wacisile uli ku mwana uwalapiile?
8 I miyele ci ino tulinzile ukukwata pakuti twazwe yayo akulondesya ukuwela kuli Yeova? Lolini vino tungasambilila ku cilangililo cino Yesu walanzile ica mwana muponge uwafumile pa ng’anda. (Welengini Luka 15:17-24.) Yesu walondolwile ukuti umwana wii wizile ailuka ukuti vino wacisile uuwelewele nupya wapingwilepo ukuswilila uku ng’anda. Isi wasimwile mu kumukomaanya nupya wamukuukwile ukulangilila ukuti wamutemilwe sana. Umwana wiya wayuvwile uyi pali vino wacisile nupya welenganyanga ukuti isi atalinzile kumulola wa mwana. Isi uvwile uluse pali vino umwanakwe wayuvwanga. Lyene isi wacisilepo vimwi ivyalangililanga ukuti wamupokeliile wa mwana wino watemwa. Pa kulangilila ukuti wamupokeliile, isi wapekanyizizye umwanakwe uwalapiile umutebeto nu kumupeela ivyakuzwala ivisuma.
9. I miyele ci ino tulinzile ukukwata pakuti twazwe aata ukusimikila nu kulongana kuwela kuli Yeova? (Lolini kambokosi kakuti “Vino Tungaazwa Aakulondesya Ukuwela Kuli Yeova.”)
9 Mu cilangililo cii, Yeova waya wakwe isi. Watemwa aina na ya nkazi aata ukusimikila nu kulongana nupya akalonda ukuti yawele kuli aliwe. Nga tukukolanya Yeova, tungayazwa ukuwela kuli aliwe. Pa kucita vii, tulinzile ukuya ateekele, kuya ni cikuuku nu kutemwa. U mulandu ci uno tulinzile ukulangila imiyele ii, nupya tungacita uli vivyo?
10. U mulandu ci uno tulinzile ukuyela ateekele lino tukwazwa umwi kuwela kuli Yeova nupya?
10 Tulinzile ukuteekela pano cikasenda insita pakuti umwi awele kuli Yeova. Aingi aatazile iyatapo ukusimikila nu kulongana yasimike ukuti izile iyatandika ukuombela Yeova nupya pa cisila ca kutandalilwa na ya eluda na antu yauze pa miku iingi. Nkazi uwizina lyakuti Nancy aakaikala uku Southeast Asia walemvile ukuti: “Cuza wane uwa mu cilongano wangavwile sana. Wantemilwe sana wakwe mangulenzi. Wanjiusyangako pa nsita zino twayanga capamwi nawe mpiti. Wakutikisyanga lino namulondolwelanga vino nayuvwanga, nupya wampandangako amano. Walangilile ukuti wali a cuza wa cumi, uwaipeelisye ukungazwa insita ili yonsi.”
11. U mulandu ci uno tulinzile ukuyela ni cikuuku pakuti twazwe wino yasosya?
11 Ndi cakuti umuntu watasoka, cikawaya kwati icilonda. Nomba uluse lwaya wa mulembo uungazwa umuntu ukuvwako ningo. Yamwi aata ukusimikila nu kulongana yakauvwa uyi pa myaka iingi pali vino yamwi umu cilongano yayaluvyanyizye. Pa mulandu nu kuyuvwa vivyo, calenga yafilwe ukuwela kuli Yeova. Yamwi yangaelenganya ukuti yayafyenzile. Fwandi yangalondesya umwi ukukutika sana kuli aliyo nu kumanya vino yakuyuvwa. (Yako. 1:19) Ya María atazile iyata ukulongana nu kusimikila pa nsita imwi, yatiile: “Nalondekwanga uwakuvwa kuli vino nkulanda, uwa kunkomelezya, kumpandako mano nu kungazwa.”
12. Uzye ukutemwa kwakwe Yeova kwakolana uli ni ntambo?
12 Baibo ikalanda ukuti ukutemwa kwakwe Yeova kwaya wa ntambo. U mulandu ci uno kutemwa kwakwe Leza kwakolanila ni ntambo? Elenganyini pali cii: Elenganyini ukuti muli pali yemba lyene mwatandika ukutuwila umu manzi, lyene umwi wamusumbila icakumwazwa ukukanatuwila. Kwaula nu kutwisika mungataizya sana pa wazwilizyo uwo pano cingalenga mwaeleela sile ukwaula ukutuwila. Ca kumwazwa kukanatuwila citanga cilenge muye nu umi. Manzi iyazuka, nupya mutanga mupusuke suka sile umwi wamusenda mu wato. Mungalondekwa umwi amusumbile intambo nu kumukwetela ukuli uwato uze ungamupususya. Yeova wanenyile Aina Izlaeli amupondokiile ukuti: “Nayapalamike kunondi uku luse nu kutemwa.” (Ose. 11:4) Leza acili akauvwa icili cimwi na ndakai kwene pali yayo aata ukumuombela na yayo akwata sana intazi. Akalonda yamanye ukuti wayatemwa, nupya akalondesya kuyapalamika kuli aliwe. Nupya Yeova angamuomvya ukulanga antu yaa ukutemwa.
13. Uzye ivyacitikiile ya Pablo vikutulanga uli vino ukutemwa kungazwa yauze ukuwela kuli Yeova?
13 Cacindama sana kunena yayo aata ukulongana nu kusimikila ukuti Yeova wayatemwa sana nu kuti naswe kwene twayatemwa. Ya Pablo yano twalanzilepo mu cipande cafumako, yatiile ukusimikila nu kuya umu kulongana pa myaka 30. Yalanzile iyati: “Wanda umwi katondo lino nafumanga pa ng’anda, nkazi umwi umukoloci wankomenkinye nupya walanzile nani ni cikuuku. Natandike ukulila wa mwana. Namunenyile ukuti Yeova uwatakutuma uku kwizalanda nani. Uwanda kwene uu napingwilepo ukuwela kuli Yeova.”
MWAITEMELWA UKWAZWILIZYA ATONTE
14. Ukulingana ni cilangililo icaya pali Luka 15:4, 5, i vyani vino kacema wacitanga nga wazana imfwele iponge?
14 Tulinzile ukwazwilizya nu kukomelezya yano yata ukulongana nu kusimikila ndi cakuti twayazana. Wakwe vino cali uku mwana umuponge uwa mu cilangililo cakwe Yesu, yangauvwa uyi pa nsita itali pali vino vyacitike. Na cico cingalenga yatonte muli ukapepa pa mulandu na vino vyayacitikilanga lino yatiile ukulongana. Tulinzile ukuyazwa ukukomya utailo wao muli Yeova. Umu cilangililo ca mfwele iponge, Yesu walondolwile vino kacema wafukatilanga imfwele nu kuitwala uku zyuze. Kacema ala watasumba mpiti insita na maka ukulonda imfwele iponge. Nomba wiluka ukuti alinzile ukuisenda pano itange iipitile yonga ukuyafika ukuli izyuze.—Welengini Luka 15:4, 5.
15. Tungacita uli pakuti twazwilizyeko atonte aakulonda ukuwela kuli Yeova? (Lolini kambokosi kakuti “ Iciombelo Icicindame Sana.”)
15 Tungalondekwa ukusumba sana insita na maka uku kwazwa yano yata ukulongana nu kusimikila ukucimvya intazi zikalenga yafilwa ukuombela Yeova nupya. Nomba ukuomvya umupasi wakwe Yeova, Izwi lyakwe ni mpapulo zino akatupeela mu cilongano, tungayazwa ukuya akome muli vyakwe Leza nupya. (Loma 15:1) Tungacita uli vivyo? Eluda umwi uwaomba pa myaka iingi watiile: “Aingi aakata ukulongana nu kusimikila yakalondekwa isambililo lya Baibo nga yapingulapo ukuwela kuli Yeova.” * Fwandi nga yamupeela umulimo wa kusambilila nu muntu uwata ukulongana nu kusimikila, mutalinzile ukukana. Eluda nupya walanzile ukuti: “Kasimikila aakutungulula umuntu wa musango uwo isambililo alinzile ukuya cuza musuma wino anganenako vino akuyuvwa.”
ULUZANGO UKWI YULU NA PANO NSI
16. Uzye twamanya uli ukuti angeli yangatwazwa?
16 Kwaya ivingi ivyacitika ivikalangilila ukuti angeli yakatwazwa ukuzana aata ukulongana nu kusimikila akulonda ukuwela kuli Yeova. (Umbw. 14:6) Ya Silvio atiile ukulongana nu kusimikila aakaikala ukuti Ecuador yapefile kuli Yeova nu kumulenga ukuti atume yamwi akwizayazwilizya. Lino yacili yakupepa yuvwile yamwi yakonkonsya pa ng’anda pa mwao. Aakonkonsizye a eluda yaili. Uwanda kwene uwa, ya eluda yatemilwe sana ukutandika ukwazwilizya ya Silvio.
17. Tuluvwa uli ndi cakuti twazwilizya aata ukulongana nu kusimikila ukuwela kuli Yeova?
17 Tulaya sana nu luzango ukwazwilizya atonte ukuwelela kuli Yeova. Uvwini vino ya Salvador ya painiya aakaika sana mano kuli yano yata ukulongana nu kusimikila yalanzile, yatiile: “Insita zimwi nkalila pa mulandu ni nsansa. Cikanzanzya sana ukwelenganya ukuti nkuombela pamwi na Yeova ukwazwilizyako aomvi yakwe acindame sana kuli aliwe ukufuma umu nsi ii yakwe Satana nu kuswilila umu cilongano.”—Mili. 20:35.
18. Ndi cakuti mwata ukulongana nu kusimikila, i vyani vino mulinzile ukusininkizya?
18 Ndi cakuti mwata ukuombela pamwi na antu yakwe Yeova, manyini ukuti Yeova acili wamutemwa. Akulonda muwele kuli aliwe. Mulinzile ukuombesya pakuti muwele kuli aliwe. Nomba wakwe isi uwa mu cilangililo cakwe Yesu, Yeova akumulolela ukuti mukawele, nupya alamupokelela ni nsansa.
LWIMBO NA. 103 Ya Kacema A Mawila
^ pala. 5 Yeova akalonda yonsi aata ukusimikila nu kulongana ukuswilila kuli aliwe. Tungakomelezya aata ukulongana nu kusimikila akuzumila ulwamo lwakwe Yeova ulwakuti: ‘Welini Kunondi.’ Mu cipande cii tumalanda pali vino tungayazwa ukucita vivyo.
^ pala. 7 Amazina yamwi asi mazina yao acumi.
^ pala. 15 Yamwi aata ukulongana nu kusimikila yangazwiwa ukupitila umu kusambilila ivipande vimwi ivyaya umwi buku lyakuti Vino Tungikala mu Kutemwa Kwakwe Leza, yauze nayo ukupitila umu kupituluka umu vipande ivyaya umwi buku lyakuti Palamini Kuli Yeova. Komiti wa Mulimo wakwata umulimo wakusoolola kasimikila aangatandika ukusambilila Baibo na wino wata ukulongana nu kusimikila.
^ pala. 68 ULONDOLOZI WA CIKOPE: Aina yatatu apusane yakwazwilizya umwina akulonda ukuwela kuli Yeova. Yakucita vivyo ukupitila umu kulanda nawe, ukumwazwa ukumanya ukuti watemwikwa nu kumuvwikisya lino akulanda.
