1. U mulandu ci uno aomvi yakwe Yeova insita zimwi yakauvwa ukuzukilwa?

SWEINGI tukauvwa ukuzukilwa insita zimwi. Yamwi ukuzukilwa kukaya sile ukwa pa kasita sile akanono. Yauze nayo yakauvwa ukuzukilwa pa nsita itali. Tungauvwa ukuzukilwa nanti cakuti tuli pamwi na antu aingi. Yamwi cikayatalila ukupanga ivyuza nga yakuukila umu cilongano cuze. Yamwi yaya pamwi na ya lupwa yano yakacitila pamwi ivintu ivingi, nomba yakauvwa sana ukuzukilwa ndi cakuti yasya ya lupwa yayo nu kukuukila kuze. Nupya yamwi nayo yakaluuka ukuya pamwi na atemwikwa yao afwa. Aina Klistu yamwi nayo, sana sana akuti alino yacisambilile icumi, yakauvwa ukuzukilwa pa mulandu wakuti ya lupwa ni vyuza asipepa Yeova yakayakanya nu kuyazunya.

2. A mauzyo ci yano tumaasuka?

² Yeova watumanya ningo nupya akatuvwikisya. Lino tukuvwa ukuzukilwa, akamanya nupya akalonda ukutwazwa. Uzye Yeova akatwazwa uli? I vyani vino tungacita pakuti tuyazwe sweineco? Nupya tungacita uli pakuti twazwe yauze amu cilongano aakauvwa ukuzukilwa? Lekini tuzane amasuko uku mauzyo yaa.

3. Uzye Yeova walangilile uli ukuti wasakamalanga Eliya?

³ Yeova akalonda ya kapepa yakwe yonsi ukuya ni nsansa. Waya umupipi kuli swensi wenga na wenga nupya akalola ndi cakuti tukuvwa uyi nanti ukutoovoka. (Masa. 145:18, 19)  Elenganyini pali vino Yeova wasakamiile pali vino kasesema Eliya wayuvwanga na vino wamwavwile. Umonsi wii uwa utailo waliko pa nsita ino ivintu vyatazile sana umu Izlaeli. Antu aamaka aatapepanga Yeova yacuzyanga aamupepanga nupya yalondanga sana ukukoma Eliya. (1 Yamw. 19:1, 2) Nupya, Eliya welenganyanga ukuti ali kasesema sile uwasiile akuombela Yeova, na cii calenzile atandike ukutoovoka. (1 Yamw. 19:10) Papo kwene sile, Leza wazwile Eliya. Yeova watumile umungeli ukuyakomelezya Eliya ukuti ataali wenga. Umungeli wanenyile Eliya ukuti kwali Aina Izlaeli na yauze aingi aatwalilile ukuombela Yeova na ucisinka!—1 Yamw. 19:5, 18.

4. Uzye ilembelo lyakwe Mako 10:29, 30 likalanga uli vino Yeova akasakamala yayo aakasya ya lupwa ni vyuza?

⁴ Yeova wamanya ukuti pakuti tusoolole ukumuombela, sweingi tukalondekwa ukusya vimwi. Pa vintu vino tukalondekwa ukusya paya na ya lupwa ni vyuza asiombela Yeova. Pa mulandu wakuti Petulo afwile wasakamiile, uzizye Yesu ukuti: “Swemo twasya vyonsi nu kukulondela. Uzye lyene tulapelwa cilambu cii?” (Mate. 19:27) Umu cikuuku, Yesu wanenyile asambi yakwe ukuti amu cilongano yalaya kwati a lupwa. (Belengini Mako 10:29, 30.) Nupya Yeova, Tata witu uwa kwi yulu walaya ukuti atalatazyela yayo aakalonda ukumuombela. (Masa. 9:10) Elenganyini pali vimwi vino mungacita pakuti Yeova amwazwe lino mukuvwa ukuzukilwa.

5. U mulandu ci uno cazipila ukwelenganya pali vino Yeova akumwazwa?

⁵ Mwaelenganya pali vino Yeova akumwazwa. (Masa. 55:22) Kucita vivyo kulamwazwa ukukanaelenganya ukuti mwaya mwenga. Nkazi umusimbe uwi zina lyakuti Carol, * aatakwata lupwa ali wensi umu cumi walanzile ukuti: “Nga nelenganya pali vino Yeova wangazwa ukuzizimizya intazi, cikalenga nayuvwa ukuti ntaya nenga. Nupya cikalenga nsininkizye ukuti Yeova alatwalilila ukungazwa.”

6. Uzye ilembelo lyakwe 1 Petulo 5:9, 10 lingakomelezya uli yayo aakayuvwa ukuzukilwa?

 ⁶ Mwaelenganya pali vino Yeova akwazwa aina na ya nkazi aakayuvwa ukuzukilwa. (Belengini 1 Petulo 5:9, 10.) Umwina Hiroshi uwaya sile Nte wenga umu lupwa pa myaka ingi, walanzile ukuti: “Cangupala ukulola ukuti yonsi kwene umu cilongano yakakwata intazi. Ukumanya ukuti swensi tukaombesya lino tukuombela Yeova, kukakomelezya swemuno tutakwata lupwa ali wensi umu cumi.”

7. Uzye ipepo likamwazwa uli?

⁷ Mwapepa lyonsi, ukubelenga Baibo, nu kuzanwa umu kulongana. Mulinzile ukunena Yeova vyonsi vino mukuyuvwa. (1 Pet. 5:7) Massiel walanzile ukuti, “Icangazwa sana ukukanayuvwa ukuzukilwa, u kupepa lyonsi kuli Yeova.” Lino nkazi wii uwacance wapingwilepo ukutandika ukuombela Yeova, wayuvwanga ukuzukilwa pa mulandu wakuti ya lupwa yasipepa Yeova. Nupya watiile: “Wali a Tata wane uwa cumicumi, nupya napepanga kuli aliwe cila wanda, nu kumunena vino nayuvwanga.”

8. Uzye ukubelenga Izwi lyakwe Leza nu kwelenganya pali vino mukubelenga kukamwazwa uli?

⁸ Mwabelenga Izwi lyakwe Leza lyonsi nu kwelenganya pa malyasi aakalangilila ukuti Yeova wamutemwa. Nkazi Bianca aakazizimizya amazwi aakutoovola ukufuma kuli ya lupwa, walanzile ati: “Ukubelenga nu kwelenganya pa malyasi amuli Baibo aakalanda pa aomvi yakwe Yeova azizimizye intazi wakwe ino nakwatako kwangazwa sana.” Aina Klistu yamwi yakaiusya malembelo aakayateekezya sana, wakwe Masamu 27:10 na Ezaya 41:10. Yamwi nayo yakakutika uku vyeo ivikopelwe limwi lino yakupekanya ukulongana nanti ukukutika uku mazwi ya muli Baibo aakopelwe limwi lino yakubelenga Baibo. Yakalanda ukuti ukucita vii kukalenga yatauvwa sana ukuzukilwa.

9. Uzye ukuzanwa umu kulongana kukamwazwa uli?

⁹ Mwaezya na maka ukuzanwa umu kulongana lyonsi. Mulaipakizya ivyeo vya kukomelezya, nupya mulamanyana ningo na ina inu na ya nkazi. (Aeb. 10:24, 25) Massiel wino itulandapo mpiti watiile: “Nanti cakuti nakweti insonyi, napingwilepo ukulazanwa ku kulongana konsi nu kwasukapo. Cii cangazwile ukupalama sana uku ina na ya nkazi umu cilongano.”

10. U mulandu ci uno cacindamila ukupanga ucuza na ina itu na ya nkazi umu cilongano?

¹⁰ Mwapanga ucuza na Ina Klistu aaya na ucisinka. Mwapanga ya cuza umu cilongano yano mungasambililako. Yangaya ance nanti  aikolo pali mwemwe nanti sile ankulilo izipusanepusane. Baibo ikatwiusyako ukuti “Akoloci alio yakwata amano.” (Yobo 12:12) Aikolo yangasambililako ivingi uku acance aaya na ucisinka. Davidi wali umwance pali Yonatani, nomba cico citalenzile yafilwe ukuipakizya ucuza usuma. (1 Sam. 18:1) Davidi na Yonatani yazwananga ukutwalilila ukuombela Yeova asi mulandu ni ntazi. (1 Sam. 23:16-18) Nkazi Irina uwaya ali Nte sile wenga umu lupwa walanzile ukuti: “Aina na ya nkazi yakaya ali ya lupwa itu. Yeova angalenga yaye ya lupwa yano tukalondekwa.”

11. I vyani vino tulinzile ukucita pakuti tuye na ucuza usuma na yauze?

¹¹ Cingatala ukupanga ivyuza ivipya sana sana ndi cakuti mwakwata insonyi. Nkazi Ratna uwasambilile icumi nanti icakuti yauze yamukanyanga, walanzile ukuti: “Nizile iniluka ukuti nalondekwanga uwazwilizyo ukufuma uku ina na ya nkazi amu cilongano.” Cingatala ukunena umwi vino mukuyuvwa, nomba nga mwacita vivyo, cingalenga muye na ucuza upalamisye nu muntu wiyo. Ya cuza inu yakalondesya ukumukomelezya nu kumwazwa, nomba mulinzile ukuyanena pakuti yamanye vino yangacita.

12. Uzye umulimo wa kusimikila ungatwazwa uli ukupanga ivyuza ivisuma?

¹² Inzila yonga ino tungapangilamo ivyuza u kulaomba umulimo wa kusimikila na Ina Klistu yanji. Carol wino itulandapo mpiti watiile: “Napanga ivyuza ivingi ivisuma ukupitila mu kuombako umulimo wa kusimikila na ya nkazi alino ni milimo yuze yakwe Leza. Yeova wangazwa pa myaka ingi ukuomvya ya cuza kwene yaa.” Ivintu vikatuzipila sana ndi cakuti twapanga ucuza na Ina Klistu aaya na ucisinka. Yeova akaomvya ya cuza yaa ukutukomelezya lino twasakamikwa, wakwe lino tukuvwa ukuzukilwa.—Mapi. 17:17.

13. U mulimo ci uno yonsi umu cilongano yakwata?

¹³ Yonsi kwene umu cilongano yakwata umulimo wa kulenga muye umutende nu kulanga ukutemwa kuli yonsi, pakuti kusi ali wensi uwa kuyuvwa ukuti waya wenga. (Yoa. 13:35) Vino tukalanda nu kucita vingakomelezya sana yauze. Uvwini vino nkazi umwi walanzile, watiile: “Lino nasambilile icumi, amu cilongano izile iyaya ya lupwa lwane. Nga ntaali Nte wakwe Yeova ukuula aina na ya nkazi ukungazwa.” I vyani vino tungacita uku kwazwa yano ya lupwa yao yataaya umu cumi ukuyuvwa ukuti aina na ya nkazi umu cilongano yayatemwa?

14. Uzye tungaya uli ya cuza yasuma kuli yauze?

¹⁴ Mwaezya ukupanga ucuza na apya. Tungatandikilapo nu kulapokelela apya mu cilongano. (Loma 15:7) Nomba, kuli na vyuze vino tulinzile ukucita ukucila sile pa kuyalamuka. Tulinzile ukutwalilila ukukomya ucuza witu na aliyo. Fwandi mwaya ni cikuuku nupya mwalanga ukuti imuikako amano. Mwaezya ukumanya intazi zino yakupitamo ukwaula ukuyuzya mauzyo angalenga yuvwe insonyi. Yamwi cingayatalila ukumunena vino yakuyuvwa, fwandi mutalinzile ukuyapatikizya ukulanda. Lelo, mwailuka lino mukuyuzya mauzyo nupya mwayateekelela lino yakulondolola. Limwi mungayuzya pali vino yasambilile icumi.

15. Uzye Aina Klistu akula muli vyakwe Leza yangazwa uli yauze umu cilongano?

¹⁵ Yonsi kwene umu cilongano yangalunduluka muli vyakwe Leza ndi cakuti aina  Klistu aakula muli vyakwe Leza, sana sana ya eluda yakuikako amano. Melissa wino ya nyina yasambilizye icumi, walanzile ukuti: “Nkataizya sana pa ina aali wakwe ya tata, ayanga pamwi nani nupya anjisileko amano pa myaka ingi. Lyonsi lino nakwata ivya kulanda, ale kuli aamakutika.” Mauricio umwina uwacance uuvwanga uyi nu kuyuvwa ukuti wasiile wenga lino uwamusambilizyanga Baibo watiile ukulongana nu kusimikila, walanzile ukuti: “Vino ya eluda yanjisileko amano vyangavwile sana. Yalandanga nani lyonsi. Yaombanga nani mu mulimo wa kusimikila, ukunenako vino yasambililanga muli Baibo, nu kuteyela pamwi ivyangalo.” Melissa na Mauricio yatwalilila ukuombela Yeova umu mulimo wa nsita yonsi.

16-17. I vyani na vyuze vino tungacita pakuti twazweko yauze?

¹⁶ Mwaazwa yauze muli vino yakulondekwa. (Gala. 6:10) Ya Leo ya misyonali aakaombela ukutali nu kwayela ulupwa lwao yatiile: “Ilingi tukalondekwa ukucita sile utuntu tunono, wakwe ukulanga icikuuku pakuti twazwe yauze. Nkaiusya lino nali umu uzanzo wa pa museo. Nafisile pa ng’anda ala intonta sana. Lyene atwalane yamwi yangamile ukukuyaliila capamwi ivyakulya. Nsiiusya vino twaliile, lelo nkaiusya vino yandanzile icikuuku na vino yakutikanga kuli nene. Nizile inuvwako ningo!”

¹⁷ Swensi kwene tukauvwa ningo ukuya pamwi na ya Nte yanji lino tukulanzyanya pa malyasi yano ituvwa, wakwe lino tuli pa maukongano. Lelo, Carol wino itulandapo mpiti watiile, “Nkayuvwa sana ukuzukilwa pa maukongano.” U mulandu ci? Watiile: “Nanti icakuti kukaya aina aingi sana na ya nkazi, yonsi kwene yakaya pamwi ni ndupwa zyao. Nga nayalola, nkauvwa sana ukuzukilwa.” Yamwi nayo cikayatalila ukuzanwa ku ukongano pa cisila ca kufwilwa yawao. Uzye mwamanyako yamwi aakwata intazi zii? Uzye citanga cizipe nga mwayama pakuti muye capamwi nayo nu lupwa lwinu pa kulongana?

18. Uzye tungaomvya uli ilembelo lyakwe 2 Kolinto 6:11-13 lino tukwamako yauze uku ng’anda uku mwitu?

¹⁸ Mwaya pamwi na ina na ya nkazi. Mwaezya ukuya capamwi na ina na ya nkazi apusanepusane,  sana sana yaya aakayuvwa ukuti yaya yonga. Tukalonda ukuyula “imyenzo” itu ku antu ya musango uu. (Belengini 2 Kolinto 6:11-13.) Melissa wino itulandapo mpiti watiile: “Twayanga sana ni nsansa ndi cakuti aina na ya nkazi yatwama uku ng’anda ukumwao ukuti tukizizye pamwi nayo.” Uzye kwaya umwi umu cilongano wino mungama uku ng’anda uku mwinu?

19. A lilaci lino ukuya pamwi na ya kapepa yanji kukalondekwa sana?

¹⁹ Kungaya insita zimwi zino Aina Klistu yanji yangatemwa sana nga twakwata insita ya kuya pamwi nayo. Yamwi cingayatalila ukuya pamwi na ya lupwa yao asi ya kapepa lino yakuzevya maholide. Yamwi yangauvwa sana uyi ndi cakuti cafika pa wanda uno atemwikwa yao yafwililepo. Tukalanga ukuti twasakamala aina na ya nkazi akwata intazi zya musango uu, ndi cakuti tukuya pamwi nayo.—Filipi 2:20.

20. Uzye amazwi yano Yesu walanzile aaya pali Mateo 12:48-50 yangatwazwa uli lino tukuyuvwa ukuzukilwa?

²⁰ Kwaya ivingi ivingalenga ukuti insita zimwi umwina Klistu ayuvwa ukuti waya wenga. Nomba, tutalinzile ukwilila ukuti Yeova akamanya vino tukuyuvwa. Ilingi akaomvya aina na ya nkazi ukutupeela vino tukalondekwa. (Belengini Mateo 12:48-50) Naswe tukalanga ukuti tukataizya Yeova pali vino watupeela aina na ya nkazi umu cilongano lino tukuyazwa. Asi mulandu na vino tungayuvwa insita zimwi, tutaya swenga foo, pano Yeova akaya naswe lyonsi!