1. I vyani vino Yeova watucitila swensi?

YEOVA wapalamika swensi wenga na wenga kuli aliwe. (Yoa. 6:44) Elenganyini pali vino cii cikupiliula. Lino Yeova wacecetanga antu aingi aaya pano nsi, waweni ukuti mwaya na ucisinka nupya mungamutemwa. Yeova wamumanya ningo, akamyuvwikisya, nupya wamutemwa. Kumanya vii kukatukomelezya!

2. I cilangililo ci cino Yesu wapeezile icingatwazwa ukuvwikisya vino Yeova akatusakamala swensi wenga na wenga?

² Yeova akamusakamala sana, nupya akasakamala na ina inu na ya nkazi yonsi. Pakuti tuvwikisye icisinka cii, Yesu wakolinye Yeova kuli kacema. Ndi cakuti imfwele yonga yaponga pa mfwele 100, i vyani vino kacema akacita? “Akasya zyonsi makumi fundimbali na fundimbali [99] kuti apite ku kulonda yonga iyati ponga.” Lino kacema wazana imfwele iponge, asisokela imfwele. Akaya nu luzango. I cisinka ci cikulandwapo? Imfwele yonga na yonga yacindama kuli Yeova. Yesu watiile: “So uwa mwiyulu asyalonda nanti wenga uwamu anono yaa, aponge.”—Mate. 18:12-14.

3. I vyani vino tumasambililapo umu cipande cii?

³ Tutanga tutemwe ukulatoovola aina itu na ya nkazi. Tungacita uli pakuti tutaleenga yauze ukuluvyanya? Nupya tungacita uli ndi cakuti umwi watusosya? Tumaasuka mauzyo yaa umu cipande cii. Nomba lekini tutandikilepo ukulanda pa “ana yaa anono” aalandwapo muli Mateo cipande 18.

4. Uzye “ana yaa anono” ali ya weni?

⁴ “Ana yaa anono” aasambi yakwe Yesu amisinku ipusanepusane. Yaya wa “ana anono” pa mulandu wakuti yakaitemelwa ukusambilila kuli Yesu. (Mate. 18:3) Nanti icakuti yafuma uku ncende izipusanepusane nupya yakalondela intambi izipusanepusane, yonsi yaya nu utailo muli Klistu. Nupya na Klistu kwene wayatemwa sana.—Mate. 18:6; Yoa. 1:12.

5. Uzye Yeova akauvwa uli ndi cakuti umwi walenga umuze ukuluvyanya nanti wasosya wenga apa aomvi yakwe?

⁵ “Ana yaa anono” yonsi yacindama kuli Yeova. Pakuti muvwikisye vino Yeova akayuvwa, elenganyini pali vino tukayuvwa pa ana. Yacindama kuli sweswe. Tukalonda ukuyacingilila pa mulandu wakuti yatakwata amaka, yatamanya ivingi, nupya yatakwata amano wa ikolo. Tusiuvwa ningo ndi cakuti umwi akucuzya umuze, nomba tukasoka sana ndi cakuti umwi akucuzya umwana. Vikwene avino na Yeova akalonda ukutucingilila. Akasoka ndi cakuti umwi walenga umuze ukuluvyanya nanti wasosya wenga apa aomvi yakwe.—Eza. 63:9; Mako 9:42.

6. Ukulingana na 1 Kolinto 1:26-29, uzye antu amu nsi yakalola uli asambi yakwe Yesu?

⁶ U mu nzila ci na yuze muno asambi yakwe Yesu yaya wa “ana anono”? Uzye aaweni yano amu nsi yakalola ukuti yacindama? Aakankala, alumbuka sana na yano yaya umu utunguluzi. Nomba asi vino asambi yakwe Yesu yaya, fwandi antu amu nsi yakayalola ukuti yatacindama, nu kuyalola kwati ”ana anono.” (Belengini 1 Kolinto 1:26-29) Nomba Yeova wene asi vino akayalola.

7. Uzye Yeova akalonda twayuvwa uli pa aina na ya nkazi?

⁷ Yeova watemwa aomvi yakwe yonsi, asi mulandu yamuombela pa myaka iingi nanti alino yatandike ukumuombela. Aina itu na ya nkazi yonsi yacindama kuli Yeova, fwandi yacindama na kuli sweswe kwene. Tukalonda ukutemwa “aina yonsi,” asi sile yamwi. (1 Pet. 2:17, NWT.) Tulinzile ukucita ivili vyonsi vino tungakwanisya pa kuyacingilila nu kuyasakamala. Ndi cakuti twamanya ukuti itusosya umwi, tutalinzile ukwililako sile nu kwelenganya ukuti umuntu wiyo alinzile ukutweleela nu kwililako. U mulandu ci uno yamwi yangasokela zuwa? Pa mulandu ni nkulilo, aina yamwi na ya nkazi yakaelenganya ukuti aasilesile. Yamwi alino yamanyile icumi, fwandi yatatala yasambilila ukuti yalinzile ukweleela yauze nga yaluvyanya. Asi mulandu na vino iyatuluvyanya nanti vino ituluvyanya yauze, tulinzile ukwezya na maka ukupanga umutende. Nupya umuntu aakasoka zuwa alinzile ukumanya ukuti akulondekwa ukusenuka pakuti ataasoka zuwa. Ukucita vivyo kulalenga aye nu luzango nupya alaya na ucuza usuma na ina.

8. I miyele ci imwi ino antu yakweti umu nsita yakwe Yesu ino asambi yatandike ukukonkelezya?

⁸ U mulandu ci uno Yesu walandiile pa “ana yaa anono”? Asambi yakwe yamuzizye ukuti: “Uzye mukulu kuluta yonsi mu Wene wa mwiyulu aweni?” (Mate. 18:1) Ayuda aingi aliko pa nsita iya, yalondanga ukuti antu aingi yayalola ukuti yali acindame sana. Uwasambilila umwi walanzile ukuti: “Ukucindikwa nu kulumbuka vyali i vintu vimwi ivicindame sana umu umi wao.”

9. I vyani vino asambi yakwe Yesu yaalinzile ukucita?

⁹ Yesu wamanyile ukuti Ayuda aingi yelenganyanga ukuti cacindama ukuya umucindame ukucila yauze, fwandi asambi yakwe yalinzile ukuombesya pakuti yate  ukwelenganya ivya musango uwo. Wayanenyile ukuti: “Mukulu uwa muli mwemwe alinzile aye kwati munono na wino akuteeka nawe alinzile aye kwati muomvi.” (Luka 22:26) Tukalanga ukuti twaya wa ance lino tukulola yauze ukuti yacindama ukutucila. (Filipi 2:3) Ukuya ni miyele ii, kukatwazwa ukukanalenga yauze ukuluvyanya.

10. U kusunda ci kwakwe Paulo kuno tulinzile ukuvwila?

¹⁰ Aina itu yonsi na ya nkazi yatucila muli vimwi. Cingatwangukila ukulola vivyo nga tukwika amano ku miyele isuma ino yakwata. Tulinzile ukuvwila ukusunda kuno Paulo wapeezile aina Kolinto ukwakuti: “Uzye aweni uwakwisile kuya mukulu kuluta pa auzo? Uzye Leza atakupile vyonsi vino wakwata? Uzye lyene ungaitumika uli kwati cino wakwata cisi uwila?” (1 Kol. 4:7) Fwandi tulinzile ukucenjela pakuti tutaleka yauze yatukumbwa nanti kulailola ukuti twacindama ukuyaluta. Wakwe, aina aakalanda ningo malyasi nanti ya nkazi aakatungulula masambililo ya Baibo aingi, yalinzile ukulenga ululumbi lwaya kuli Yeova pa milimo ino yakaomba.

11. I vyani vino Yesu watusambilizye umu cilangililo ca mwene nu muzya wakwe?

¹¹ Lino Yesu wamazile ukucelula alondezi yakwe ukuti yatalinzile ukulenga yauze ukuluvyanya, wapeezile icilangilo ca mwene nu muzya wakwe. Umwene welezile umuzya pa nkongole zino wakweti zino ataali nu kukwanisya ukulipila. Lino papisile insita, umuzya wiya wakanyile ukweleela umuzya muze pa nkongole izinono zino wakweti. Na pa kusyalikizya, umwene wisile umuzya wii aatali ni cikuuku umu cifungo. I vyani vino tukusambililako? Yesu watiile: “Vikwene avino na Tata wa kwi yulu alacita kuli mwemwe ndi cakuti musikwelela auzo nu mwenzo onsi.”—Mate. 18:21-35, NWT.

12. Uzye tukasosya uli yauze ndi cakuti twakana ukuyeleela?

¹² Vino umuzya wacisile vitasosizye sile aliwe, lelo vyasosizye na yauze kwene. Ica nkoleelo, atalangizye icikuuku nu luse uku muzya muze lino “wamutwazile umu cifungo kufikila ace alipile inkongole zino wakweti. Cakwe ciili, wasosizye azya yauze aaweni vino wacisile. “Lino aomvi yauze yaweni ivyacitiike, yuvwile sana uyi.” Mu nzila ili imwi kwene, vino tukacita vikakuma yauze. I cani cingacitika ndi cakuti umwi watusosya nupya twakana ukumweleela? Ica nkoleelo, tungamusosya pa mulandu wakuti twakana ukumweleela, nupya tungata ukumwikako mano nu kumulanga ukutemwa. Cakwe ciili, tukalenga amu cilongano ukukanauvwa ningo nga yalola ukuti tusikuvwana nu muntu wiyo.

13. I vyani vino mwasambilila kuli vino vyacitikiile painiya umwi?

¹³ Nga tweleela aina na ya nkazi, tukauvwa ningo nupya tukalenga na yauze ukuvwa ningo. Vikwene i vyacitikiile painiya umwi uno tumaama ukuti Crystal. Yamusosizye kuli nkazi umwi uwa mu cilongano. Crystal walanzile ukuti: “Amazwi yamwi yano walandanga yali aipe icakuti yantotanga kwati u mupeni. Ntalondanga nu kulaombela pamwi nawe mu mulimo wa kusimikila. Natiile ukuya umucincile umu mulimo wa kusimikila nupya ntayanga nu luzango.” Crystal wayuvwanga ukuti wakweti insambu zya kusoka pali vino vyacitikanga. Nomba ataatwalilile ukusokela nkazi wiya nanti ukwika sile mano kuli vino wayuvwanga. Walondiile ukusunda kwa muli Baibo ukwali umu cipande cakuti “Mwaeleela nu Mwenzo Onsi” icali umu Lupungu Lwa Mulinzi lwakwe Okotoba 15, 1999.  Welezile nkazi wiya. Crystal walanzile ukuti: “Lyene namanya ukuti swensi kwene tukaombesya pakuti tusenuke, nupya Yeova waiteyanya ukutweleela cila wanda. Nkayuvwa umwangukilwe sana. Naya nu luzango nupya.”

14. Ukulingana na Mateo 18:21, 22, iintazi ci ino umutumwa Petulo wakweti nupya i vyani vino tukusambilila kuli vino Yesu waswike?

¹⁴ Twamanya ukuti tulinzile ukweleela; pano ali cintu ca mpomvu ukucita. Nomba limwi cingatala ukucita vivyo. Umutumwa Petulo afwile wayuvwilepo vivyo pa nsita imwi. (Belengini Mateo 18:21, 22.) I cani cingatwazwa? Ica nkoleelo, mwaelenganya pali vino Yeova wamweleela. (Mate. 18:32, 33) Tusilondekwa nu kweleelwa, nomba akaitemelwa ukutweleela. (Masa. 103:8-10) Pa nsita ili imwi kwene, “naswe tulinzile ukutemwana.” Fwandi ukweleela asi cintu cino tulinzile ukupingulapo ukucita nanti foo. Tulinzile ukulaeleela aina na ya nkazi. (1 Yoa. 4:11) Cakwe ciili, twaelenganya pali vino vikacitika lino tweleela yauze. Tungazwa wino atatuluvyanya, ukulenga icilongano ukuya icilemane, ukucingilila ucuza witu na Yeova, alino nu kuya apepukilwe. (2 Kol. 2:7; Kolo. 3:14) Ica kusyalikizya, mwapepa kuli wino akalonda ukuti twaeleela. Mutalinzile ukuleka Satana aonone ucuza uno mwakwata na ina na ya nkazi. (Efes. 4:26, 27) Tulinzile ukwazwiwa na Yeova pakuti umu cilongano muye umutende.

15. Uzye ilembelo lyakwe Kolose 3:13 likatunena ukuti tulinzile ukucita vyani ndi cakuti umwina nanti nkazi wacita vimwi ivya kutusosya?

¹⁵ Nga ndi cakuti kapepa muzo wacita cimwi ica kumusosya? I vyani vino mulinzile ukucita? Mulinzile ukwezya na maka ukutwalilila ukupanga umutende. Mwanena  Yeova vino mukuyuvwa. Mwamulenga ukwazwa umuntu uwatamisosya nu kumwazwa ukulola imiyele isuma ino wakwata, imiyele ino Yeova watemwa muli aliwe. (Luka 6:28) Ndi cakuti mutange mwilile vino umwina nanti nkazi watacita, mwaelenganya pali vino mungalanda nawe. Cazipa lyonsi ukwelenganya ukuti umwina atalakulonda ukutusosya. (Mate. 5:23, 24; 1 Kol. 13:7) Lino mukulanda nawe mwaelenganya ukuti ataali akulonda ukumisosya. Nga ndi cakuti asikulonda ukupanga umutende? Mwamutekelela. Mutatoovoka twalililini ukwezya ukupanga umutende. (Belengini Kolose 3:13.) Icicindamisye i cakuti mutalinzile ukutwalilila ukumusokela, pano cingalenga ukuti ucuza winu na Yeova ononeke. Mutalinzile ukuleka icili consi ukumulenga ukuluvyanya. Nga mu kucita vivyo, ala mu kulangilila ukuti mwatemwa Yeova ukucila icintu icili consi.—Masa. 119:165.

16. U mulimo ci uno swensi kwene twakwata?

¹⁶ Tukataizya Yeova pa kutupeela isyuko lya kumuombela pamwi na ina na ya nkazi wa “ufyo onga nu mucemi wenga.” (Yoa. 10:16) Ibuku lyakuti Organized to Do Jehovah’s Will, apifwa 165, pakalanda ukuti: “Pa mulandu wakuti mukaipakizya ukulemana kuu, mulinzile ukuombesya pakuti ukulemana kuu kutwalilile.” Fwandi, tulinzile ukuisambilizya ukulalola aina na ya nkazi wakwe vino Yeova akayalola. Kuli Yeova, swensi kwene sweswe ana anono nupya twacindama. Uzye avino namwe mukalola aina na ya nkazi? Yeova akamanya nupya wacindika vino mukacita pa kuyazwa nu kuyasakamala.—Mate. 10:42.

17. I vyani vino tukulondesya ukucita?

¹⁷ Twatemwa ya kapepa yanji. Fwandi tukalondesya ukukanacita “ivingalenga umwina ukutoovoka umu utailo nanti kumulenga ukuluvyanya.” (Loma 14:13, NWT.) Tukalola aina na ya nkazi ukuti yacindama ukutucila nupya tukalonda ukuyelela ukufuma pansi ya mwenzo. Tutalinzile ukuzumilizya yauze ukutulenga ukuluvyanya. Lelo, “tulinzile kwezya kwikala mutende nu kwazwana kukwata utailo ukome.”—Loma 14:19.