1. I vyani vino asambi yakwe Yesu yanenyile iumba lya antu aingi ukucita?

IUMBA ilikulu ilya aonsi na anaci yaile uku Yelusalemu. Yafumile umu mpanga izingi nupya yalandanga indimi zipusanepusane. Pa wanda uwa, icintu cimwi icakuzungusya cacitike. Ayuda yamwi yatandike ukulanda indimi zino afumile uku mpanga zyuze yalandanga! Cii cazungwisye sana iumba, nomba vino Ayuda walandanga na vino umutumwa Petulo wayanenyile vyali i vyakuzungusya. Iumba lyasambilile ukuti yangapusuka ndi cakuti yataila Yesu Klistu. Vino yasambilile vyayafisile sana pa mwenzo. Antu yatemilwe sana icakuti yuzizye nu kuti: “I vyani vino tulinzile ukucita?” Lyene Petulo wayanenyile ukuti: “Cila muntu abatiziwe.”—Mili. 2:37, 38, NWT.

2. I vyani vino tumasambilila umu cipande cii? (Lolini icikope icili pa nkupo.)

² Ivyalondelilepo ukucitika vyali i vya kuzungusya. Antu 3,000 yabatiziwe pa wanda uwa ukuya asambi yakwe Klistu. Kuu kwali u kutandika kwa mulimo ukalamba uwa kupanga asambi uno Yesu wanenyile alondezi yakwe ukuomba. Na ndakai kwene alondezi yakwe yacili yakaomba umulimo uu. Ndakai, tutanga tulande nu muntu pa maawazi sile papo kwene alinga nu kubatiziwa. Pangapita imyezi, umwaka nanti sile imyaka iingi pakuti umusambi abatiziwe. Cikalondekwa ukuombesya pakuti twazwe umwi ukuya umusambi wakwe Klistu, wakwe vino mwamanya ndi cakuti mukasambilizya umwi Baibo. Mu cipande cii, tumasambilila pali vino mungacita pakuti mwazwe wino mukasambilizya Baibo ukulunduluka ukufika uku lubatizyo.

3. Ukulingana na Mateo 28:19, 20, i vyani vino musambi alinzile ukucita pakuti alunduluke ukufika uku lubatizyo?

³ Lino umusambi wa Baibo atatala wabatiziwa, alinzile ukulacita vino Baibo ikasambilizya. (Belengini Mateo 28:19, 20.) Ndi cakuti umusambi akucita vino akusambilila, alaya wa “muntu wa mano” uwa mu cilangililo cakwe Yesu uwakuuzile ing’anda yakwe pa lwala. (Mate. 7:24, 25; Luka 6:47, 48) Tungaazwa uli umusambi ukulacita vino akusambilila? Lekini tusambilile pa vintu vitatu vino tungacita.

4. Tungazwa uli umusambi ukulunduluka ukufika uku lubatizyo? Lolini kambokosi kakuti “ Mwaazwa Umusambi Winu Ukwimika Mauyo nu Kuyafikilizya.”

⁴ Mwaazwa umusambi winu ukwimika mauyo. U mulandu ci uno mulinzile ukucitila vivyo? Elenganyini pa cilangililo cii: Ndi cakuti mukuya kumwi ukutali limwi mungasoololapo ukwimilila pa ncende imwi isuma. Fwandi cingamulenga ukukanasakamala pa utali wa lwendo. Vikwene avino cingaya ndi cakuti umusambi akwimika mauyo yano angafikilizya pa nsita inono, angatandika ukulola ukuti nu uyo wa kubatiziwa kwene angaufikilizya. Mungaomvya iciputulwa cakuti “Ezyini vii” icaya umwi buku lyakuti Mungaya ni Nsansa Manda Pe! uku kwazwa umusambi ukwimika mauyo. Pa cisila ca kumala isambililo lyonga na lyonga, mwalanzyanya nu musambi pa mauyo aakulanda pali vino wasambilila. Ndi cakuti imukwata uyo uno mukulonda ukuti umusambi aimike, lembini apakuti “Vyuze.” Lyonsi mwapituluka nu musambi winu mu mauyo yano angafikilizya pa nsita inono alino na angasenda insita pakuti akayafikilizye.

5. Wakwe vino Mako 10:17-22 ikalanda, i vyani vino Yesu wanenyile umonsi uwa vyuma ukucita, nupya u mulandu ci?

⁵ Mwaazwa umusambi winu ukusenuka umu umi wakwe. (Belengini Mako 10:17-22.)  Yesu wamanyile ukuti cali i citale uku monsi uwa vyuma ukukazya vyonsi vino wakweti. (Mako 10:23) Lelo, Yesu wanenyile umonsi wii ukusenuka umu umi wakwe. U mulandu ci? A pa mulandu wakuti Yesu wamutemilwe. Insita zimwi tungafilwa ukukomelezya umusambi ukulacita vino akusambilila pa mulandu wakuti ale tukulola ukuti atatala waipekanya ukusenuka. Pangapita insita pakuti antu yate ukucita ivintu vino yacitanga mpiti nu kuzwala untu upya. (Kolo. 3:9, 10) Nomba nga mwatandika zuwa ukulanda nawe pali vino alinzile ukusenukamo, cingalenga asenuke zuwa. Kulanzyanya nawe pa vintu vii, kungalanga ukuti mwamwikako amano.—Masa. 141:5; Mapi. 27:17.

6. U mulandu ci uno tulinzile ukuzizya asambi mauzyo aangalenga yalande vino yakwelenganyapo?

⁶ Cacindama ukuzya umusambi vino akwelenganya api lyasi lino tukusambililapo. Cii cilalenga mumanye vino umusambi atauvwa na vino wazumilamo. Nga mukucita vii lyonsi, cilamwangukila ukulanzyanya nawe pa vintu vino vingamutalila ukuzumila. Ibuku lyakuti Mungaya ni Nsansa Manda Pe! lyakwata mauzyo aingi aangalenga umusambi ukulanda vino akwelenganya. Wakwe umwi Sambililo 04 mwaya iuzyo lyakuti: “Uzye mukwelenganya ukuti Yeova akauvwa uli nga mukuomvya izina lyakwe?” Umwi Sambililo 09 namo mwaya iuzyo lyakuti: “I vintu ci vimwi vino mungatemwa ukupepelapo?” Pa kutandika, cingatalila umusambi ukwasuka mauzyo yaa. Mungamusambilizya vino alinzile ukucita pakuti aelenganya pa malembelo alino ni vikope ivili umwi buku.

7. Uzye tungaomvya uli ningo ivyacitikile antu yauze?

⁷ Ndi cakuti umusambi uvwikisya vino alinzile ukucita, mwaomvya ivyacitikiile yamwi pa kumukomelezya ukucita vivyo kwene. Wakwe ndi cakuti umusambi asiiza lyonsi umu kulongana, mungamutambisyako vidyo yakuti Yeova Wansakamalanga iyaya pa ciputulwa cakuti “Londelezyini” umwi sambililo 14. Mu masambililo aingi umwi buku lyakuti Mungaya ni Nsansa Manda Pe!, mulaazana malyasi yaa mu ciputulwa cakuti “Londelezyini na Vyuze” ni cakuti “Londelezyini.” * Mwacenjela pakuti mutakolanya umusambi winu kuli yauze lino mu kumunena amazwi yakuti, “Ndi cakuti yangakwanisya nawe kwene ungakwanisya.” Mwaleka umusambi aipingwila. Nomba, mwalanda pa vintu ivicindame ivyazwile uwali ali muli vidyo ukulacita vino Baibo ikasambilizya. Limwi mungalanda pa cisinka icali cili umwi lembelo nanti vimwi vino umuntu wiyo wacisile. Nga calinga mwalanda sana pali vino Yeova wavwile umuntu wiyo.

8. Tungaazwa uli umusambi witu ukutemwa Yeova?

⁸ Mwaazwa umusambi winu ukutemwa Yeova. Mungacita uli vivyo? Mwalola insita zino mungazwa umusambi winu ukusambilila ivingi pa miyele yakwe Yeova. Mwaazwa umusambi ukuvwikisya ukuti Yeova a Leza wa nsansa aakaazwa yonsi amutemwa. (1 Tim. 1:11; Aeb. 11:6) Langini umusambi vino alaipakizya ndi cakuti akulondela ivyeo vii, nupya mumulondolwele na pa visuma ivikalanga ukuti Yeova wamutemwa. (Eza. 48:17, 18) Lino umusambi watwalilila ukutemelwako Yeova, alalondesya ukusenuka muli vimwi.—1 Yoa. 5:3.

9. Ukulingana na Mako 10:29, 30, i cani icingazwa umwi ukusya vimwi pakuti aye umusambi umubatiziwe?

⁹ Pakuti umusambi alunduluke ukufika uku lubatizyo, alinzile ukuipeelesya. Wakwe umonsi  uwa vyuma wino itulandapo mpiti, asambi yamwi yakalondekwa ukusya vimwi vino yakwata. Ndi cakuti incito ino yakaomba isiuvwana ni visinte vya masunde, limwi yangalondekwa ukulonda incito yuze. Aingi yangalondekwa ukuta ukuya na ya cuza ataatemwa Yeova. Yauze nayo yangayakaana kuli ya lupwa aatatemwa ya Nte Yakwe Yeova. Yesu walanzile ukuti yamwi cingayatalila ukuipeelesya ukucita vii. Nomba walavile ukuti yayo aakamulondela yatalatazyelwa. Alayalambula lino alayapeela ya kapepa yakwe ukuya ya lupwa yao. (Belengini Mako 10:29, 30.) Uzye tungazwa uli asambi ya Baibo ukuipakizya uwila uu usuma?

10. I vyani vino mukusambilila kuli vino vyacitikiile ya Manuel?

¹⁰ Mwatwalilila ukuya ya cuza nu musambi. Cacindama ukulanga umusambi ukuti mwamwikako sana amano. U mulandu ci? Uvwini vino ya Manuel aakaikala uku Mexico yalanzile. Yalondolwile vino aayasambilizyanga Baibo yacitanga, yatiile: “Lino tutatala twatandika ukusambilila, yanguzyanga vino indi. Cii calenganga nayuvwa umuntungwa ukuyanena ivili vyonsi. Nayuvwanga ukuti yansakamalanga sana.”

11. Uzye asambi itu yangaipakizya uli ndi cakuti yakuya pamwi naswe?

¹¹ Mwasumba insita ikulu na asambi inu wakwe vino Yesu wasumbanga insita ikulu na alondezi yakwe. (Yoa. 3:22) Ndi cakuti icilinga, mungamako umusambi winu aakulunduluka uku ng’anda uku mwinu pakuti muliile pamwi icakulya nanti ukutambila pamwi puloglamu ya cila mwezi iya mulabasa wa JW (broadcast.) Umusambi winu angatemwa sana nga mwamwama lino ya cuza yakwe na ya lupwa yakwe yakusevya ukuzevya kumwi nanti lino akuvwa ukuzukilwa. Kazibwe aakaikala uku Uganda watiile: “Nasambililanga ivingi pali Yeova nga tuli pamwi na ansambilizyanga Baibo ukucila vino nasambililanga nga tukusambilila.” Naweni vino Yeova akasakamala antu yakwe na vino yaya ni nsansa. Vikwene avino nalondanga umu umi wane.”

12. U mulandu ci uno tulinzile ukusendela ya kasimikila apusanepusane lino tukuya umu kutungulula isambililo?

 ¹² Mwasendako antu apusanepusane lino mukuya umu kutungulula isambililo. Insita zimwi tungalola ukuti caya sile ningo ukuya swenga nanti ukuya sile na ya kasimikila aliyamwi ukwi sambililo. Nanti cakuti cinganguka ukucita vivyo, umusambi angasambilila ivingi nga tukuya na ya kasimikila apusanepusane. Dmitrii aakaikala uku Moldova watiile: “Cila kasimikila wino izanga na yano yansambilizyanga Baibo walondololanga ivisinka umu nzila iiyele. Cii cangavwanga ukulola inzila zyuze zino ningaomvezyamo vino nasambililanga. Nupya ntuvwile sana insonyi lino naile umu kulongana pa muku wa kutandikilapo, pano ale namanyana na ina na ya nkazi aingi.”

13. U mulandu ci uno tulinzile ukwazwila musambi witu kulazanwa umu kulongana?

¹³ Mwaazwa asambi inu kulazanwa umu kulongana. U mulandu ci? A pa mulandu wakuti Yeova akalonda ya kapepa yakwe ukulalongana pamwi, pano ukucita vivyo kwalemana nu kupepa kwitu. (Aeb. 10:24, 25) Nupya, aina na ya nkazi umu cilongano yakaya kwati aa lupwa itu. Nga tuli pamwi nayo mu kulongana, tukauvwa kwati tuli uku ng’anda tukuliila pamwi nayo ivyakulya ivisuma. Ndi cakuti mukwazwa umusambi wa Baibo ukuzanwa umu kulongana, ale mukumwazwa ukucita icintu icicindame icingalenga abatiziwe. Nomba limwi cingamutalila ukutandika ukuzanwa umu kulongana. Uzye ibuku lyakuti Mungaya ni Nsansa Manda Pe! lingazwa uli umusambi winu kucimvya intazi izingalenga afilwa ukuzanwa umu kulongana?

14. Tungakomelezya uli umusambi witu ukulazanwa umu kulongana?

¹⁴ Mwaomvya isambililo 10 umwi buku lyakuti Mungaya ni Nsansa Manda Pe! pa kukomelezya umusambi winu. Lino ibuku lii litatala lyafuma, yanenyile ya Kasimikila yamwi ukwezya ukusambililamo na asambi yao isambililo 10. Yalanzile ukuti lyaomvile ningo sana ukwazwa asambi ukulazanwa umu kulongana. Nomba mutalinzile ukuloleela mpaka mukafike umwi sambililo 10 alino muce mulaalike umusambi winu uku kulongana. Mulinzile ukumulaalika zuwa nu kulamunenapo lyonsi. Asambi yakakwata intazi zipusanepusane. Fwandi mwaika mano kuli vino umusambi akulondekwa, nu kulola ndi cakuti mungamwazwa muli vimwi. Mutalinzile ukutoovoka ndi cakuti palengela ataatala wizapo umu kulongana. Mwateekela nomba mwatwalilila ukumulaalika.

15. Iintete ci zino umusambi witu angakwata?

¹⁵ Uzye mukwiusya vino muvwile intete pakuti sile muye Nte Wakwe Yeova? Limwi mwayuvwile ukuti mutalakwanisya ukulasimikila uku ng’anda ni ng’anda. Nanti limwi mwatinanga ukuti ya lupwa nanti ivyuza yalamukaanya. Ndi cakuti avino cali, ale mungamanya vino umusambi winu uwa Baibo akayuvwa. Yesu walanzile ukuti antu yamwi yalauvwa intete. Nanti ciye vivyo, wanenyile alondezi yakwe ukuti yatalinzile ukuleka intete ukuyalesya ukuombela Yeova. (Mate. 10:16, 17, 27, 28) Uzye Yesu wavwile uli alondezi yakwe ukuta ukuya ni ntete? Nupya mungamukolanya uli?

16. Tungasambilizya uli umusambi ukulanenako yauze vino akusambilila?

¹⁶ Lyonsi mwasambilizya umusambi winu vino anganenako yauze vino akusambilila. Asambi yakwe Yesu yafwile yuvwile intete lino wayatumile umu kusimikila. Nomba Yesu wayazwile lino wayanenyile kuno yali nu kusimikila alino ni landwe lino yali nu kusimikila.  (Mate. 10:5-7) Mungakolanya uli Yesu? Mwaazwa umusambi ukumanya kuno angaya akasimikile. Mungamuzya ndi cakuti amanyileko umwi aangatemwa ukusambilila icumi ica muli Baibo. Lyene mungamulanga vino angalanzyanyako na yauze pa cumi ca muli Baibo. Ndi cakuti calinga, mungapituluka nawe mu ciputulwa cakuti “Yamwi Yakalanda Ukuti,” ni cakuti “Umwi Angamuzya Ukuti” umwi buku lyakuti Mungaya ni Nsansa Manda Pe! Lino mukucita vivyo, mwaika sana amano uku kwazwa umusambi ukuomvya Baibo lino akwasuka mauzyo umu nzila iyangupale.

17. Tungaomvya uli Mateo 10:19, 20, 29-31, uku kwazwa asambi itu ukutaila sana Yeova?

¹⁷ Mwaazwa umusambi winu ukutaila muli Yeova. Yesu wanenyile asambi yakwe ukuti Yeova wali nu kuyazwa pa mulandu wakuti wayatemilwe. (Belengini Mateo 10:19, 20, 29-31.) Mwanena umusambi winu ukuti nawe kwene Yeova alamwazwa. Mungamwazwa ukutaila muli Yeova nga mukupepela pamwi nawe pa mauyo yano wimika. Franciszek, aakaikala uku Poland walanzile ukuti: “Ansambilizyanga yalandanga pa mauyo yano nimike lino yapepanga. Lino naweni vino Yeova wasukanga mapepo yano aansambilizyanga yapepanga, zuwa zuwa natandike ukupepa. Naweni vino Yeova wangavwile lino naile umu kuleenga ulusa uku ncito pakuti nkazanwe uku kulongana nu ku ukongano.”

18. Uzye Yeova akauvwa uli pa mulimo uno Aina Klistu yakaomba?

¹⁸ Yeova akaika sana amano kuli yano tukasambilizya Baibo. Wamanya vino ya kasambilizya Aina Klistu yakaombesya ukwazwa antu ukupalama kuli aliwe, nupya wayatemwa sana. (Eza. 52:7) Ndi cakuti ndakai musikutungulula isambililo lya Baibo, mungazwa asambi ukulunduluka ukufika uku lubatizyo lino mukuya na ya kasimikila yauze ku masambililo yao.