CIPANDE CA KUSAMBILILAMO 25
LWIMBO NA. 7 Yeova Ali Maka Itu
Mwaiusya Ukuti Yeova a “Leza Waumi”
“Yawe umumi!”—MASA. 18:46.
VINO TUMASAMBILILAPO
Cacindama sana ukwiusya ukuti Leza wino tukapepa a “Leza waumi.”
1. I cani cikaazwa aomvi yakwe Yeova ukutwalilila ukumuombela asi mulandu ni ntazi zino yakakwata?
BAIBO ikalondolola ukuti tukwikala umu “insita izitale sana.” (2 Tim. 3:1) Ukulunda pa ntazi zino antu yonsi yakakwata, antu yakwe Yeova yakazizimizya ukukanya nu kucuziwa. I cani icingatwazwa ukutwalilila ukuombela Yeova asi mulandu ni ntazi zii? Icintu conga icicindame icikatwazwa icakuti twamanya ukuti Yeova a “Leza waumi.”—Yele. 10:10; 2 Tim. 1:12 .
2. I vyani vino twamanya pali Yeova ivikatukomelezya?
2 Mu cumi Yeova akuno waya akalola intazi zino tukapitamo nupya akalondesya ukutwazwa. (2 Mila. 16:9; Masa. 23:4) Ndi cakuti tukwiusya ukuti Yeova watwikako amano nupya akalondesya ukutwazwa cikalenga twazizimizya mezyo yano tukakwata. Vikwene ivyacitikile Umwene Devedi.
3. Uzye Devedi walozizye mwi lino watiile “Yawe umumi”?
3 Devedi wamanyile Yeova nupya wamutaile. Lino Umwene Saulo alino na yauze yalondanga ukukoma Devedi, wapefile kuli Yeova pakuti amwazwe. (Masa. 18:6) Lino Yeova waswike ipepo lyakwe Devedi nu kumupususya, watiile: “Yawe umumi.” (Masa. 18:46) Lino Devedi walanzile amazwi yaa atalozyanga sile umu kuti Leza akuno waya. Lupapulo lwa kulondelezyamo ivyeo lumwi lwalangilila ukuti amazwi yano Devedi walanzile yakalangilila ukuti wataile ukuti Yeova “a Leza wa umi akaazwa antu yakwe.” Devedi wamanyile ukuti Leza walolanga ivyamucitikilanga nupya walondesyanga ukumwazwa. Ukumanya vii kwalenzile atwalilile ukumuombela nu kumulumbanya—Masa. 18:28, 29, 49.
4. Uzye ukumanya ukuti Yeova a Leza wa Umi kukatwazwa uli?
4 Ukumanya ukuti Yeova a Leza wa umi kungalenga twaombesya sana. Tulakwata amaka akutwazwa ukuzizimizya mezyo nupya tulalonda ukuombesya umu mulimo wakwe Leza. Tulalonda ukupalama sana kuli Yeova.
LEZA WA UMI ALAMUKOMYA
5. I cani icingatwazwa ukutaila sana Leza lino twakwata intazi? (Filipi 4:13)
5 Tulakwanisya ukuzizimizya mezyo akalamba nanti anono ndi cakuti tukwiusya ukuti Yeova a Leza wa umi nupya angatwazwa. Pano twamanya ukuti kutaya intazi ili yonsi ino Leza witu angafilwa ukucimvya. Wakwata sana amaka, nupya angatupeela amaka akuzizimizya. (Belengini Filipi 4:13.) Ukumanya vii kukalenga twamutaila sana. Ukulola vino Yeova watwazwa lino tukweti intazi inono kungalenga tutaile ukuti nanti twakwata intazi ikulu alatwazwa.
6. I vyani ivyacitikile Devedi lino wali umwance ivyalenzile ataile sana Yeova?
6 Elenganyini pa vintu vili ivyalenzile Devedi ataile sana Yeova. Lino wali umwance ale akucema imfwele zyakwe isi, beele na cisama vyalemile imfwele. Pa miku yii yonsi ili, Devedi wasifile nu kupusya imfwele. Nomba Devedi atelenginye ukuti wacisile vivyo uku maka yakwe. Wamanyile ukuti Yeova uwamwazwanga. (1 Sam. 17:34-37) Devedi atatazile ailile vii ivyamucitikile. Ukwelenganya pali vii kwalenzile ataile ukuti Yeova alamwazwa uku nkoleelo.
7. I vyani vino Devedi wisileko mano nupya ukucita vii kwamwazwile uli ukucimvya Golyati?
7 Lino papisile insita ala Devedi acili umwance, waile uku nkambi ya asilika aina Izlaeli. Lino wafisile kuku wazanyile asilika aina Izlaeli yali ni ntete pa mulandu na Golyati umwina Filisti uwali ipaka uwalandanga akuti: “insuula asilika ya Ina Izlaeli.” (1 Sam. 17:10, 11) Asilika aina Izlaeli yuvwanga intete pa mulandu na vino Golyati walolekanga alino na vino wayanenyile. (1 Sam. 17:24, 25) Nomba vii asi vino Devedi wene wayuvwanga. Walolanga ukuti umuntu wii atalwisyanyanga na ina Izlaeli lelo walwisyanyanga na “Leza wa umi.” (1 Sam. 17:26) Fwandi Devedi atelenganyanga wakwe vino asilika aina Izlaeli yelenganyanga, lelo welenganyanga sana pali Yeova. Devedi wataile ukuti viivi kwene vino Leza wamwazwile lino wali akacema avino wali nu kumwazwa. Pa mulandu wakuti wataile ukuti Yeova wali nu kumwazwa, walwisizye Golyati nupya wacimvizye.—1 Sam. 17:45-51.
8. I vyani ivingatwazwa ukusininkizya ukuti Yeova alatwazwa ndi cakuti twakwata intazi? (Loliniko ni cikope.)
8 Naswe kwene tungacimvya amezyo ndi cakuti tukwiusya ukuti Leza witu waiteyanya ukutwazwa. (Masa. 118:6) Tungataila sana Yeova ndi cakuti tukwelenganya sana pali vino wacita. Mwabelenga amalyasi amuli Baibo akalanda pali vino Yeova wapuswisye yakapepa Yakwe. (Eza. 37:17, 33-37) Mwalola malyasi aya pa jw.org akalanda pali vino Yeova akaazwa aina na ya nkazi. Nupya, mwaelenganya pali vino Yeova wamucitila. Mutasakamala ndi cakuti mukalola ukuti Yeova atamwazwapo ukucimvya intazi ikulu wakwe vino wazwile Devedi ukukoma beele na cisama. Icisinka icakuti Yeova wamucitila ivintu ivingi umu umi winu. Yeova walenga ukuti muye ya cuza yakwe. (Yoa. 6:44) Nupya mwatwalilila ukuya umu cumi pa mulandu wakuti akamwazwa. Mwamulenga amwazwa ukwiusya lino waswike ipepo linu, lino wamupeezile vino mwalondekwanga pa nsita ilinge, nanti lino wamusakamile lino mwakweti intazi? Ukwelenganya pali vi kulamwazwa ukusininkizya ukuti Yeova alamwazwa lino mwakwata intazi.
Vino tukacita nga twakwata intazi vikakuma Yeova (Lolini mapalaglafu 8-9)
9. Uzye tulinzile ukulalola uli mezyo yano tukukwata? (Mapinda 27:11)
9 Ukulola Yeova ukuti a Leza wa umi kulalenga tutasakamala sana nga tweziwa. Umulandu cii? Apa mulandu wakuti tukatandika ukulola ukuti mezyo yano tukweti yakuma vino Satana akalwisya Yeova. Satana walanda ukuti ndi cakuti twakwata intazi tungata ukuombela Yeova. (Yobo 1:10, 11; belengini Mapinda 27:11.) Nomba ndi cakuti twazizimizya mezyo tukalanga ukuti twatemwa Yeova nupya tukasinila Satana ukuti uwa ufi. Uzye limwi mukucuziwa na amu uteeko, mukulizya impiya, antu yano mukasimikilako yatatemwa ilyasi lisuma, nanti mukweti iintazi zyuze? Nga avino cili, mwaiusya ukuti imukwata isyuko lya kulenga umwenzo wakwe Yeova ukuvwa ningo. Nupya mwaiusya nu kuti, atalalenga mweziwe ukucila pali vino mungazizimizya. (1 Kol. 10:13) Alamupeela amaka ya kuzizimizya.
LEZA WA UMI ALAMULAMBULA
10. I vyani vino Yeova alacitila akamupepa?
10 Yeova akalambula yano yakamupepa. (Aeb. 11:6) Akatupeela umutende nupya akatwazwa ukuteeka umwenzo pali vino tukweti nupya uku nkolelo alatupeela umi wa pe. Twataila sana ukuti Yeova akalondesya ukutulambula nupya wakwata amaka akucitila vivyo. Cii cikalenga twaya apamviwe umu mulimo wakwe Leza wakwe vino aomvi yakwe Yeova aliko mpiti yacitanga. Nupya vikwene avino Timoti wacitanga.—Aeb. 6:10-12.
11. I cani icalenzile Timoti aombesya umu cilongano? (1 Timoti 4:10)
11 Belengini 1 Timoti 4:10. Timoti wataile ukuti Leza wa umi wali nu kumulambula. Cii calenzile aombesya lino akuombela Yeova alino na antu. I vyani vino wacitanga? Mutumwa Paulo wamukomelizye ukuti azifyako imisambilizizye yakwe umu mulimo wa kusimikila alino nu mu cilongano. Nupya Paulo wakomelizye Timoti ukuti aye icakulolelako icisuma uku ina Klistu yauze, aikolo nanti ance. Nupya wapezilwe imilimo itale, pa milimo iyo pali nu kusunda yakapepa yauze umu nzila isuma nomba ukwaula ukupita umumbali. (1 Tim. 4:11-16; 2 Tim. 4:1-5) Nanti cakuti insita zimwi antu yatalolanga vino Timoti wacitanga nanti ukumutaizya wamanyile ukuti Yeova wali nu kumulambula.—Loma 2:6, 7.
12. I cani icingalenga ya eluda yaombesya umu cilongano? (Loliniko ni cikope.)
12 Na Ndakai kwene ya eluda yalinzile ukusininkizya ukuti Yeova akalola nupya akataizya pali vino mukaombesya. Ukulunda pa kucema, ukusambilizya alino nu kusimikila, ya eluda aingi yakatungilila umulimo wa makuule nu kwazwa atiyaponelwa na mazanzo. Yauze nayo yakaomba na ya muli Komiti ya Kulanzyanya ni Vipatala. Ya eluda akaipelesya ukuomba imilimo yii yakalola ukuti Yeova aakatungulula icilongano asi antu. Cii cikalenga yaomba ni milimo ino yapelwa nu mwenzo onsi nupya yataila ukuti Yeova alayalambula pali vino yakaomba.—Kolose 3:23, 24.
Leza alamulambula nga mukuombesya umu cilongano (Lolini mapalaglafu 12-13)
13. Uzye Yeova akuvwa uli pali vino tukamuombela?
13 Asi yonsi angaya ya eluda. Nomba swensi kwene twakwata vino tungacitila Yeova. Akataizya ndi cakuti tukuomba ukulingana na pano tungapezya. Akalola ndi cakuti tukusangwilako uku mulimo wa mu nsi yonsi nanti cakuti upe witu ungacepa. Akauvwa ningo vino tukaombesya ukwasuka pa kulongana na lino tukuvwa insonyi, nupya akuvwa ningo ndi cakuti twelela anji. Nanti icakuti mukulola ukuti musikuombesya ukulingana na vino mukulonda, mwataila ukuti Yeova akuvwa ningo pali vino mukacita. Wamutemwa pa mulandu na vino mukacita nupya alamulambula.—Luka 21:1-4.
TWALILILINI UKUPALAMA KULI LEZA
14. Uzye ukutwalilila ukupalama kuli Yeova kulatwazwa uli ukutwalilila ukuya acisinka? (Loliniko ni cikope.)
14 Ndi cakuti twapalama kuli Leza, cilatwangukila ukutwalilila ukuya acisinka kuli aliwe. Vikwene ali vino cali kuli Jozefu. Wakanyile ukucita uzelele pa mulandu wakuti wali a cuza wakwe Leza nupya atalondanga ukumusosya. (Utan. 39:9) Ndi cakuti tukulonda ukuya ya cuza yakwe Yeova, tulinzile ukukwata insita iya kupepa kuli Yeova nu kulaisambilizya izwi lyakwe. Nga tukucita vivyo ucuza witu na Yeova ulatwalilila ukukulilako. Wakwe vino cali kuli Jozefu, Ndi cakuti twakwata ucuza usuma na Yeova, Tatalalonda ukucita ivintu ivingamusosya.—Yako. 4:8.
Ukupalama kuli Leza kulamwazwa ukutwalilila ukuya acisinka (Lolini mapalaglafu 14-15)
15. I vyani vino tukasambilila kuli vino vyacitikile ina Izlaeli lino yali umu lwanga? (Aebele 3:12)
15 Cikaanguka sana uku antu akata ukutaila Yeova ukucita ivintu ivya kumusosya. Elenganyini pali vino vyacitikile Aina Izlaeli lino yali umu lwanga. Yamanyile ukuti Yeova akuno waya, nomba yatwisikanga ndi cakuti Yeova angayazwa. Pano yuzizye ukuti: “Uzye Yeova ali naswe nanti foo?” (Kufu. 17:2, 7) Cii calenzile yapondokele Leza. Ukwaula nu kutwisika tusilonda ukucita vino yacisile.—Belengini Aebele 3:12.
16. I vyani ivingalenga utailo witu weziwe?
16 Ivikacitika umu nsi vikalenga catutalila ukutwalilila ukupalama kuli Yeova. Aingi yatazumila ukuti Leza akuno waya. Insita zimwi cingaloleka kwati antu atazumila ukuti Leza akuno waya ivintu vikuyazipila. Ndi cakuti twalola ivya musango uu utailo witu ungeziwa. Nanti cakuti vii vitanga vilenge twalola kwati Leza atayako, tungatandika ukulola kwati asitusakamala. Vikwene avino nu walemvile Masamu cipande 73 wayuvwanga. Walolanga kuno ivintu vyazipilanga antu atalondelanga masunde yakwe Leza. Cii calenzile atandike ukutwisika ndi cakuti cacindama ukuombela Leza.—Masa. 73:11-13.
17. I cani icilatwazwa ukutwalilila ukupalama kuli Yeova?
17 I cani cazwile kalemba wa masamu ukusenula imyelenganyizizye yakwe? Welenganyanga pali vino vyali nu kucitikila antu atile ukutaila Yeova. (Masa. 73:18, 19, 27) Nupya Welenganyanga na pa visuma ivikacitikila antu akaombela Yeova. (Masa. 73:24) Naswe kwene tungaelenganya pa mapaalo yano Yeova watupeela. Mwaelenganya pali vino umi winu wali nu kuya ndi cakuti mutaombelanga Yeova. Ndi cakuti lyonsi tukwiusya umulandu uno cazipila ukuombela Yeova tulatwalilila ukuya acisinka nupya tulalanda wakwe vino kalemba wa masamu walanzile ukuti: “nemo natemwisya ukukupalamila, we Leza.”—Masa. 73:28.
18. Umulandu ci uno tutalinzile ukutiinila ivilacitika uku nkoleelo?
18 Tungacimvya intazi zyonsi zino tukukwata umu manda yaa akusyalikizya pa mulandu wakuti tukaombela “Leza wa umi nupya uwa cumi.” (1 Tesa. 1:9) Leza akuno waya nupya akasakamala yayo akamupepa. Walangilile ukuti wali na aomvi yakwe mpiti nupya na ndakai kwene avino akacita. Likwene sile tuli nu kukwata ucuzi ukalamba utatala wayako. Nomba tutalaya swenga. (Eza. 41:10) Lekini swensi tuye antu angasipa “nu kulanda ukuti: ‘Yeova ali kaazwa wane; ntalatiina.’”—Aeb. 13:5, 6.
LWIMBO NA. 3 Wewe Maka Itu, Wewe Twasintililamo
