CIPANDE CA KUSAMBILILAMO 24
LWIMBO NA. 24 Izini ku Mwamba Wako Yeova
Twalililini Ukucita Ivintu Ivingalenga Mutwalilile Ukuya umwi Taalu Lyakwe Yeova!
“We Yawe, uzye aweni alingila umwi taalu lyako?”—MASA. 15:1.
VINO TUMASAMBILILAPO
Tumasambilila vino tulinzile ukucita pakuti tutwalilile ukuipakizya ucuza na Yeova alino na vino akatwenekela ukucitila ya cuza yakwe.
1. Uzye Masamu 15:1-5 yangatwazwa uli?
WAKWE vino twasambilile umu cipande cafumileko aomvi yakwe Yeova aipeela alino na antu akwata ucuza upalamisye na aliwe aliyo angaya umwi “taalu” lyakwe. Nomba i vyani vino tulinzile ukucita pakuti tuye umwi taalu lyakwe? Masamu 15 yalanda sana api lyasi lii. (Belengini Masamu 15, 1-5.) Mu cipande cii ca Masamu mwaya ukusunda ukungalenga tupalame sana kuli Leza.
2. I cani limwi icalenzile Kalemba wa masamu Devedi alande pi taalu lyakwe Yeova?
2 Masamu cipande 15 yatandika na mazwi akuti: “We Yawe, uzye aweni alingila umwi taalu lyako? Uzye aweni alikala apa mwamba wako uwamuzilo?” (Masa. 15:1) Lino kalemba wa masamu Devedi walandanga api “taalu” limwi welenganyanga pi tenti lya kupepelapo ilyali umu Gibyoni pa nsita iya. Nanti vino Devedi walanzile na pa “mwamba . . . uwamuzilo,” limwi welenganyanga pa mwamba wa Zioni uwali umu Yelusalemu. Kufuma kuno Devedi wakuliile itenti muno wasungiile imbokosi ya upangano ukufikila lino yakuzile itempele pali ma kilomita aingi ukuya uku kayeya ka Gibyoni.—2 Sam. 6:17.
3. Umulandu cii uno icicindamila ukuvwikisya ivyaya umu masamu icipande 15? (Loliniko ni cikope.)
3 Kwene Aina Izlaeli aingi yatazumiliziwe ukwingila umwi tenti lya kupepelapo, nupya anono sile aingilanga umwi tenti muno yasungilanga imbokosi ya upangano. Nomba aomvi yakwe Yeova yonsi acisinka yangikala umwi taalu lyakwe ilya unkolanya ndi cakuti yatwalilila ukuya ivyuza vyakwe. Vikwene avino swensi kwene tukalondesya. Mu masamu cipande 15, mwaya miyele imwi ino tulinzile ukukwata pakuti tutwalilile ukuya ya cuza yakwe Yeova.
Aina izlaeli aliko umu manda yakwe Devedi yamanyile ningo vino capiliulanga ukwikala umwi taalu lyakwe Yeova (Lolini palaglafu 3)
MWAYA AKAELE NUPYA MWACITA IVISUMA
4. Twamanya uli ukuti Yeova asilonda sile ukuti Tubatiziwe pakuti azangila muli sweswe? (Ezaya 48:1)
4 Pa masamu icipande 15:2, Cuza wakwe Yeova walondololwa ukuti “Awiyo akapita uwakaele, wiyo akacita ni vilungamane.” Izwi ilyaomviwa ilyakuti “akapita” ni lyakuti “akacita” yakalangilila ukuti tulinzile ukutwalilila. Nomba uzye tungakwanisya ‘ukupita akaele’? Ee. Nanti cakuti tutamalilika, Yeova akatulola ukuti sweswe akaele ndi cakuti tukwezya na maka ukumuvwila. Ndi cakuti twaipeela nu kubatiziwa ale twatandika ukupita na Leza. Iusyini vino cali uku ina Izlaeli, ukuya umwina Izlaeli kutasenulanga ukuti umuntu akapita na Yeova. Yamwi yamupepanga “ukwaula ufumacumi nu wololoke.” (Belengini Ezaya 48:1.) Pakuti aina Izlaeli yalangizye ukuti yalondesyanga ukupita na Yeova yalinzile ukusambilila vino Yeova walondanga ukuti yacita alino nu kulacita vivyo kwene. Na ndakai kwene pakuti Yeova azangila muli sweswe, tusilondekwa sile ukubatiziwa nu kuya ya Nte Yakwe Yeova. Lelo tulinzile ‘ukulacita ivilungame.’ Tungacita uli vivyo?
5. Uzye cikapiliula cani ukuvwila Yeova umu vintu vyonsi?
5 Ukulingana na vino Yeova akalonda, ‘ukuya uwakaele’ nu ‘kucita ivilungame’ kusipiliula sile ukuzanwa umu kulongana lyonsi. (1 Sam. 15:22) Tulinzile ukulaombesya ukuzanzya Yeova lyonsi kumwi sile na lino tuli swenga. (Mapi. 3:6; Kasa. 12:13, 14) Cacindama sana ukwezya na maka ukuvwila Yeova kumwi sile nu mu tuntu utunono. Nga tukucita vii ale tukulanga ukuti twamutemwa nupya nawe alatutemelwako.—Yoa. 14:23; 1 Yoa. 5:3.
6. Ukulingana na Aebele 6:10-12, i cani icacindama ukucila ivisuma vyonsi vino twacisile mpiti?
6 Yeova akataizya sana pali vyonsi vino twamuombela. Nomba vino twamuombile mpiti sile asi ivingalenga tutwalilile ukuya ya cuza yakwe. Nupya vikwene ali vino ilembo lya Aebele 6:10-12. (Belengini.) Yeova asiilila ivisuma vyonsi vino twamuombela. Nomba akalonda ukuti tutwalilile ukumuombela nu mwenzo onsi “ukufika nu ku mpela.” Alatwalilila ukuya cuza witu amanda pe ndi cakuti “tutatoovwike.”—Gal. 6:9.
MWAVWANGA IVYA CUMI UMU MWENZO WINU
7. Uzye ukulanda ivya cumi umu mwenzo kukapiliula cani?
7 Ndi cakuti umwi akulonda ukutwalilila ukuya umwi taalu lyakwe Yeova alinzile ukulavwanga “ivyacumi vyamu mwenzo wakwe.” (Masa. 15:2) Cii cisipiliula sile ukuti umuntu atalinzile ukulabeepa. Yeova akalonda ukuti twaya acumi muli vyonsi vino tukalanda na vino tukacita. (Mapi. 3:32) Ukucita vii kwacindama, “pano Yawe wapata umuntu akaifya uku mufulo, lelo aololoke ali yakundwe yakwe.”—Mapi. 3:32.
8. I vyani vino tutalinzile ukulacita?
8 Yayo ‘akalanda ivya cumi umu myenzo yao’ yasiilangizya uku antu ukuti yakauvwila amasunde yakwe Yeova lelo uku mbali ala yasikucita vivyo. (Eza. 29:13) Yasilonda ukucita iviipe umu umfisolo. Umuntu akacita ivintu iviipe umu umfisolo angatandika ukutwisika amasunde yamwi yakwe Yeova. (Yako. 1:5-8) Angata ukuvwila Yeova umu vintu vino akulola ukuti vitacindime sana. Lyene ndi cakuti walola ukuti pasi iviipe ivikufuma muli vino akacita, angatandika ukucita ivintu ivipisye nupya nanti cakuti wene akulola ukuti akuombela Leza, ukapepa wakwe utanga upokelelwe kuli Yeova. (Kasa. 8:11) Fwandi ali mulandu uno tukalondela ukutwalilila ukuya acisinka umu vintu vyonsi.
9. I vyani vino tungasambilila ukuli vino vyacitike lino Yesu waloline na Natanaeli pa muku wa kutandikilako? (Loliniko ni cikope.)
9 Tungasambilila umulandu uno cacindamila ukulalondesya ukuya acisinka mu vintu vyonsi, kuli vino vyacitike lino Yesu waloline na Natanaeli pa muku wa kutandikilako. Lino Filipi walesile cuza wakwe Natanaeli ukuti yalolane na Yesu, kwali cimwi icicindame icacitike. Nanti cakuti wali umuku wa kutandikilako Yesu ukulolana na Natanaeli, walanzile ati: “Lolini umwina Izlaeli wa cumi wino atakwata ucenjezi.” (Yoa. 1:47) Yesu wamanyile ukuti asambi yakwe yali acisinka, nomba waweni ukuti ucisinka wakwe Natanaeli waiyezile. Natanaeli nawe kwene atali umumalilike, lelo wali uwa cisinka umu vintu vyonsi. Yesu uvwile ningo pali vino Natanaeli wali uwa cisinka nupya wamutaizye. Ukwaula nu kutwisika, swensi kwene avino tukalonda ukuti Yesu atulola.
Lino Yesu waloline na Natanaeli pa muku wa kutandikilako walanzile ukuti wali umuntu uwali na ucisinka. Uzye naswe kwene avino angatulola? (Lolini palaglafu 9)
10. Umulandu cii uno tutalinzile ukulalanda iviipe pa antu yauze? (Yakobo 1:26)
10 Ivingi ivyaya umu Masamu icipande 15 vikalanda pali vino tulinzile ukulacitila yauze. Pa Masamu 15:3 pakalanda ukuti cuza wakwe Yeova “Awiyo wino ululimi lwakwe lusitumpoka, wiyo asicita iviipe uku muze nanti ukuletela umuze umuzewanya.” Ukulanda iviipe pa antu yauze kungalenga tuyasosye nupya tungata ukuya aya cuza yakwe Yeova.—Belengini Yakobo 1:26.
11. Uzye ulwambo ali cani, nupya i vyani ivingacitikila umuntu wa lwambo atakulonda ukulapila?
11 Kalemba wa masamu walanzile pa lwambo. Uzye ulwambo ali cani? Ulwambo, ukulanda ivyeo ivya ufi ivingalenga izina lyakwe umwi ukononeka. Ndi cakuti umuntu uwa lwambo atakulonda ukulapila yangamufumya umu cilongano cakwe Yeova.—Yele. 17:10.
12-13. I vyani vimwi ivingacitika ivingalenga tutandike ukulanda iviipe pali yamwi ukwaula ukumanya? (Loliniko ni cikope.)
12 Pa Masamu 15:3 pakatwiusya nu kuti cuza wakwe Yeova asi asicitila auze iviipe nanti ukuletela auze umuzewanya. Uzye cii cikapiliula cani?
13 Ukwaula nu kumanya tungazewanya yamwi ukupitila umu kulanda iviipe pali aliyo. Wakwe ukulanda ukuti: (1) nkazi ataaleka ukuomba upainiya, (2) atwalane iyata ukuombela pa Betele, nanti (3) Umwina atata ukuomba u eluda nanti uomvi . Cingiipa sana ndi cakuti twatandika ukuneena antu ukuti pali vimwi vino umwina nanti nkazi wacita pakuti ate ukuomba umulimo umwi? Kungaya vimwi ivyativilenga ukuti ivintu visenuke vino tutanga tumanye. Nupya cuza wakwe Yeova “asicita iviipe uku muze nanti ukuletela umuze umuzewanya.”
Canguka ukulanda iviipe pa antu yauze nupya ukucita vii ulwambo (Lolini mapalaglafu 12-13)
MWACINDIKA YANO YAKATIINA YEOVA
14. Londololini vino cuza wakwe Yeova “akalolekesya umwipe ni misuula.”
14 Pa Masamu 15:4 pakalanda ukuti cuza wakwe Yeova “akalolekesya umwipe ni misuula.” Tungacita uli vivyo? Swemo tutanga tumanye ndi cakuti umuntu umwipe nanti foo. Umulandu ci uno twalandila vivyo? Pano tutamalilika, limwi tungatemwa antu yamwi pa mulandu wakuti tukauvwana nayo lelo tungapata yamwi pa mulandu wakuti yakatusosya. Fwandi, tulinzile sile ukutaluka yano Yeova akalola ukuti antu ‘aipe.’ (1 Kol. 5:11) Pa antu yano Yeova akalola ukuti aipe paya na yano yakacita iviipe ukwaula ukulapila, aatacindika vino twazumilamo, nanti akalonda ukutononela ucuza witu na Yeova.—Mapi. 13:20.
15. Inzila cii yonga ino tungalangilamo ukuti twacindika aakatontela “Leza.”?
15 Ukulunda pali vino twalandapo, pa Masamu 15:4 pakalanda ukuti tulinzile ukucindika aakatontela “Leza.” Tukaezya na maka ukulanga icikuuku nu mucinzi kuli ya cuza yakwe Yeova. (Loma 12:10) Tungacita uli vivyo? Inzila yonga ino tukacitilamo vivyo, ukulondela ivyaya pa Masamu 15:4 apakalanda ukuti cuza wakwe Yeova “ndi walapa asifutuka, nanti angailetelela umweneco.” Ukukana ukufikilizya vino twalaya kungalenga yauze ukuvwa uyi. (Mate. 5:37) Wakwe, Yeova akalonda ukuti atwalane yacita ukulingana na vino yalafile lino yatwaline. Nupya akauvwa ningo ndi cakuti avyazi yakwezya na maka ukufikilizya vino yalaya. Pa mulandu wakuti twatemwa Yeova alino na antu, tulinzile ukulaezya papezile amaka itu ukufikilizya vino twalaya.
16. Inzila cii yuze ino tungalangilamo ukuti twacindika ya cuza yakwe Yeova?
16 Inzila yuze ino tungalangilamo ukuti twacindika ya cuza yakwe Yeova ukuyapokelela alino nu kuya na ukapekape. (Loma 12:13) Ukwizizya pamwi na aina na ya nkazi kukalenga ucuza witu na aliyo alino na ucuza witu na Yeova ukukomelako. Nupya ndi cakuti tukupokelela aenyi ale tukukolanya Yeova.
MWATALUKA UKU KUTEMWISYA IMPIYA
17. Umulandu cii uno ilembo lya masamu icipande 15 lyalandila pa mpiya?
17 Baibo ikalanda ukuti cuza wakwe Yeova a “wiyo asilonda ukukwilila umu mpiya zino wakongwesya. Wiyo asipokelela amafukakanwa pakuti yafyenge uwakaele.” (Masa. 15:5) Umulandu ci uno ilembo lya Masamu cipande 15 lyalandila pa mpiya? Pano ukutemwisya impiya kungalenga tusosye yauze nupya ucuza witu na Yeova ungononeka. (1 Tim. 6:10) Mu nsita ino ivyalumbulwa muli Baibo vyacitikanga, yamwi yapokanga kaloba uku ina yao ndi cakuti yayakongwesya impiya. Nupya yakapingula yamwi yapokanga mafukakanwa nu kufyenga akaele lino yakupingula imilandu. Ukucita vii kukasosya Yeova.—Ezek. 22:12.
18. Amauzyo cii angatwazwa ukumanya vino tukalola impiya? (Aebele 13:5)
18 Icicindama sana ukwelenganya pali vino tukalola impiya. Mungayuzya mauzyo yaa: ‘Uzye insita izingi nkazana ukuti nkwelenganya pa mpiya alino na vino ningakala? Ndi cakuti nakongola impiya, uzye nkalengela ukuwezezya wino nakongwileko nu kutandika ukwelenganya ukuti atakulondekwa impiya? Uzye ukukwata impiya kukalenga nayuvwa ukuti nacindama ukucila yauze nu kuleka cantalila ukuya na ukapekape. Uzye nkapingula aina na ya nkazi ukuti yatemwisya ivyuma pa mulandu wakuti yakwata impiya? Uzye nika mano kuli ucuza na akankala ukucila apiina?’ Icicindama sana ukuyuzya mauzyo ya pano twakwata isyuko lya kuya ya cuza yakwe Yeova. Nupya tungacingilila isyuko lii ndi cakuti twataluka uku kutemwisya impiya. Nga tukucita vivyo Yeova atalatala atusye—Belengini Aebele 13:5.
YEOVA WATEMWA YA CUZA YAKWE
19. Umulandu cii uno Yeova akatupelela utunguluzi?
19 Masamu cipande 15 yasyalikizya na mazwi yakuti: “Muntu wino akacita ivintu vii, pasi icintu nanti conga icingamuponya.” (Masa. 15, 5) Paa kalemba wa masamu walanzile umulandu uno cacindamila ukucita ivyaya umwi lembo lii. Yeova akalonda ukuti twaya ni nsansa. Ali mulandu uno akatupelela utunguluzi ulalenga tuce tupaalwe nu kucingililwa.—Eza. 48:17.
20. I vyani vino ya cuza yakwe Yeova yakalolela?
20 Ya cuza yakwe Yeova yalakwata umi usuma uku nkoleelo. Apakwe yalikala ukwi iyulu kuno Yesu wayapekanyizizya. (Yoa. 14:2) Akwata upaalilo wa kwikala pano nsi nayo yakalolela amalayo aya pali Kusokolola 21:3. Ukwaula nu kutwisika swensi kwene tukataizya pali vino Yeova watupeela isyuko lya kuya ya cuza yakwe nu kwikala umwi taalu lyakwe amanda pe.
LWIMBO NA. 39 Kupanga Izina Lisuma na Leza
