Pakuti tuzanzye Yeova tulinzile ukukwata utailo. Nomba, Baibo ikalanda ukuti “asi antu yonsi aya nu utailo.” (2 Tesa. 3:2) Lino umutumwa Paulo walanzile amazwi yaa walandanga pa antu ali “aunkalwe nupya aipe.” Nomba vino walanzile pa utailo ivya cumi. Nanti icakuti kwaya ivisinka ivikalangilila ukuti kwaya kaumba, kwaya antu akakana ukuti kwaya kaumba. (Loma 1:20) Yamwi nayo yangalanda ukuti yataila muli vimwi nanti umuntu umwi uwa maka. Nomba uu asi utailo uno umwi alinzile ukukwata pakuti azanzya Yeova.

Tulinzile ukutaila ukuti Yeova akuno waya nupya akalambula yayo aya nu utailo wa cumi. (Aeb. 11:6) Utailo waya pa miyele iikafuma uku mupasi wa muzilo. Ukupepa kuli Yeova kungalenga umuntu apokelele umupasi wa muzilo. (Luka 11:​9, 10, 13) Ukubelenga Baibo kungamwazwa ukupokelela umupasi wa muzilo. Lyene tungelenganya pali vino tukubelenga nu kwezya ukuomvya vino tukusambilila. Umupasi wa muzilo ungalenga tukwate utailo pakuti twamuzanzya.