1. Iintazi ci zino Aina Klistu akutandikilako yaakweti?

PA NSITA imwi pakasi ka myaka yakwe 62 na 64 C.E., umutumwa Petulo walembiile “antu asololwe yakwe Leza, yano asalangana wa mbutusi mu miputule yonsi yamu Ponto, Galatiya, Kapadokiya, Asiya, nga nu mu Bitiniya.” (1 Pet. 1:1) Antu kwene yaa aali ni ntambi zipusane pusane aku mpanga zya kukaeya ka Asiya kuno ndakai yakaama yakuti Turkey, yalondekwanga ukukomeleziwa nu kutungululwa. Yayakaanyanga nupya yayanenanga amazwi aipe. Yakweti “amacuzi aipe.” Nupya ikalanga umu nsita itale sana. Umutumwa Petulo walemvile ukuti, “Mpelelekezyo ya vintu vyonsi yatipalama.” Lino imyaka 10 itali ikumane, Yelusalemu wali nu kononwa. I cani icali nu kwazwa Aina Klistu konsi kuno ikalanga umu nsita kwene iiya itale?—1 Pet. 4:4, 7, 12.

2, 3. U mulandu ci uno Petulo wakomelezizye aina na ya nkazi ukuti yazengelana? (Lolini cikope cakutandikilako.)

² Petulo wanenyile aina ukuti: “Mwazengelana mu mang’anda inu kwaula kuilizyanya.” (1 Pet. 4:9) Umu Cigiliki, izwi lyakuti “mwazengelana” likapiliula “ukutemwa umwi, nanti ukukwata uluse ku yenyi.”  Nomba lolini ukuti, Petulo wanenyile aina na ya nkazi ukuti ‘yazengelana,’ na yaayo yano yamanyile mpiti nupya ala yakaizizya pamwi. Uzye ukupokelelana kwali nu kuyazwa uli?

³ Kwali nu kuleenga kuti yauvwana. Elenganyini pali vino vyamucitikila. Uzye yamwi yatala yamwama uku ng’anda uku mwao? Uzye icintu ca musango uwo citaamulenzile ukuvwa ningo sana? Uzye lino mwamile umwi uwa mu cilongano ukumwinu, ucuza winu nawe utakomiileko? Ndi tukupokelelana, tukamanya ningo aina na ya nkazi ukucila vino cingaya lino tukuya pamwi nayo pa nsita zyuze. Aina Klistu aliko umu manda yakwe Petulo yalondekwanga ukuvwana sana lino ivintu vipilangako. Vikwene avino caya nu ku Ina Klistu aakaikala umu “manda akusyalikizya.”—2 Tim. 3:1.

4. A mauzyo ci yano tumalanzyanyapo umu cipande cii?

⁴ A masyuko ci yano twakwata ‘akuzengelana’? Uzye tungacimvya uli ivingalenga twafilwa ukupokelela aina na ya nkazi? I cani i cingatwazwa ukuya aenyi yasuma?

5. Uzye tungazengelana uli apa kulongana kwitu ukwa Ina Klistu?

⁵ Pa kulongana: Tukapokelela yonsi akaiza umu kulongana naswe. Yeova ni iuvi lyakwe aliyo yakatwama ukuti twazanwa umu kulongana. (Loma 15:7) Ndi cakuti apya iza umu kulongana naswe, nayo kwene yakaya aenyi yakwe Yeova. Uzye mutanga mwaezya ukuitandikila mweineco ukupokelela antu yaayo asi mulandu ni mizwalile nanti imilolekele yao? (Yako. 2:1-4) Ndi cakuti umwenyi umwi akuloleka ukuti pasi uwatamupokelela, uzye mutanga mumwame ukuti aikale namwe? Angataizya sana ndi mwamwazwa ukuvwa pulogalamu limwi nu kumwazwa ukuzana malembelo yano yakuwelengwa. Iyo ingaya iinzila isuma iya “kuzengela alendo.”—Loma 12:13.

6. Uzye aaweni yano yalinzile ukuya pa enyi itu?

⁶ Ukuliila pamwi: Umu nsita ino Baibo yalembwanga, ukupokelela aenyi kwalimo ukwama umwi uku ng’anda uku cakulya. (Utan. 18:1-8; Yakapi. 13:15; Luka 24:28-30) Ukwama umwi uku cakulya kwalenganga antu ukuya ivyuza nu kuya pa mutende. Uzye pa enyi itu palinzile ukuya na ya weni? Palinzile ukuya na antu yano tukaizizya pamwi, aina na ya nkazi umu cilongano citu. Lino insita izitale zilafika, tulaalondekwa ukwazwana. Tukulondekwa ukukwata ya cuza ya cumi nu kuya pa mutende nayo. Umu 2011, Iumba Ilikatungulula lyasenwile insita ya kulongana kwa Lupungu Lwa Mulinzi uku Betele ya ku United States ukufuma pa 18:45 hrs. ukuileta pa 18:15 hrs. U mulandu ci? Icakumanyisya calanzile ukuti aingi citanga ciyatalile ukuzumila ndi yamwi yayama uku yaomvi yauze apa Betele ndi cakuti ukulongana kukusila zuwa. Vikwene avino na aapa maofesi yauze yakwe ya Nte yacita umu nsi yonsi. Amapekanyo yaa yalenga ukuti aomvi ya pa Betele yauvwana sana.

7, 8. Uzye tungapokelela uli ya kalanda aenyi aakaiza umu kulanda malyasi umu cilongano citu?

⁷ Swensi kwene tukaipakizya ndi twapokelela ya kalanda ya malyasi ya ku yantu yonsi aakafuma uku vilongano vyuze, angalizi ya viputulwa, alino insita zimwi aimilizi aakafuma ukwi ofesi lyakwe ya Nte ilyayela uku mwitu. Ivya musango uu vikaleenga tukwate masyuko akupokelela aina itu. (Welengini 3 Yoane 5-8.) Ukupekanyizizya aenyi ivyakulya iinzila yonga iyakulangilamo ukuti ituyapokelela. Uzye namwe mungazwilizyako ukucita vivyo?

⁸ Nkazi umwi umu United States walanzile ukuti: “Apa myaka ingi, nemo na ya wane twakwata amasyuko akupokelela ya kalanda aenyi pamwi na ya mama yao uku ng’anda ukumwitu. Lyonsi lino twapokelela yamwi tukasansamuka, nupya tukakomelezyanya sana muli vyakwe Leza. Tutatala twalangulukapo.”

9, 10. (a) Uzye aaweni yano tungapokelela pa manda aingi? (b) Uzye na akwata mang’anda anono yangazwilizya? Langililini.

 ⁹ Aenyi aakaiza pa manda aingi: Mpiti sana, umwi ndi wapokelela aenyi atailwe, ilingi wayapekanyizizyanga umwa kulala. (Yobo 31:32; Filimoni 22) Na ndakai kwene, ivya musango uu vikalondekwa. Angalizi ya viputulwa ilingi yakalondekwa umwa kwikala ndi yatandalila ivilongano. Asambi aakaya uku masukulu yakwe Leza yangalondekwa umwakwikala, wakwe vino caya nu ku yaomvi akuitemelwa aaya umu makuule. Amazanzo aakaiponela sile, yangalenga yamwi yasyale ukwaula umwakwikala, nupya yangalondekwa amang’anda ukufikila lino kwaya uwazwilizyo wa kuyazifizya mang’anda kuli yano yakaazwilizya aponelwa uzanzo. Tutalinzile ukwelenganya ukuti yayo sile aakwata mang’anda asuma aliyo yalinzile ukupokelela aenyi, limwi ale yapokelelapo aenyi pa miku iingi. Uzye mutanga mupokeleleko yamwi nanti icakuti ing’anda inu inono?

¹⁰ Umwina umwi uwa ku South Korea akaiusya ukuti wapokelile asambi yamwi aile uku masukulu yakwe Leza. Walemvile ukuti: “Nasitookanga pa kutandika pano ala alino nacifumalile nupya twikalanga umu kang’anda kanono. Nomba ukwikala na asambi kwatuletiile uluzango sana. Vino ala alino twatwalana sile, twaweni vino acitwaline yangaya ni nsansa ndi yakuombela Yeova nu kwimika mauyo ya kuomba umu mulimo wakwe Leza capamwi.”

11. U mulandu ci uno aapya umu cilongano cinu yangalondekwa ukuyapokelela?

¹¹ Apya umu cilongano: Antu yamwi nanti indupwa yangakuukila kuno mukaikala. Yamwi yangiza umu kuombela ukukalondekwa ya kakosoola aingi. Limwi yangatuma ya painiya ukuti yazwilizye umu cilongano cinu. Cii cingalenga ivintu viyatalile sana. Yalinzile ukuyelezya icifulo icipya, icilongano, limwi nu lulimi ulupya nanti intambi. Ukuyama uku cakulya nanti ukuya nayo kumwi kungalenga yapange ivyuza vipya nu kuyelezya uku cifulo icipya.

12. I cani icacitiike icikalanga ukuti tutalinzile ukupekanya ivyakulya ivingi sana pa kupokelela aenyi?

¹² Ukupokelela aenyi kusilondekwa ukupekanya ivyakulya ivingi sana. (Welengini Luka 10:41, 42.) Umwina umwi wiwisye vino cali lino yaile na mamakwe umu mulimo wa umisyonali, walanzile ukuti: “Twali ance, tutamanyile ivingi, nupya twaluukanga sana uku ng’anda. Uwanda umwi amanguzi, mamane waluusile sana uku ng’anda, nupya nafizilwe ukumwazwa. Lyene, apiipi ni nsita yakwe 19:30 hrs., yamwi yakonkonsizye. Kwali umusambi umwi uwa Baibo uwatuletiile amacungwa yatatu. Wizile umu kupokelela ya misyonali. Twamwingizye umu ng’anda nu kumupeela amanzi yakumwa. Lyene twamupangile tii. Tutaamanyile ukulanda Iciswahili pa nsita iyo, nawe atamanyile Icizungu. Nomba cii calenzile tutandike ukupanga ivyuza uku cifulo ciici.”

13. I visuma ci ivikacitika ndi tukupokelela aenyi?

¹³ Uzye mwatala mwafilwapo ukupokelela aenyi? Ndi cakuti avino cili, limwi mwapanyizye isyuko lya kuya pamwi na yauze nu kupanga ivyuza. Ukupokelela aenyi kwazipa sana pano kungalenga tutaazukilwa. Nomba limwi mungazunguka muti, ‘U mulandu ci uno umwi angafililwa ukupokelela aenyi?’ Kwaya ivingi ivingalenga ciye vivyo.

14. I vyani vino tungacita ndi cakuti tukweti insita inono nupya maka iyacepa akuila kuno yatwama nanti ukwama yamwi?

¹⁴ Insita na Maka: Aomvi yakwe Yeova yapamviwa sana nupya ilingi yakakwata ivingi ivya kucita. Yamwi yangayuvwa ukuti yatakweti insita nanti amaka akupokelela aenyi. Ndi cakuti avino caya kuli mwemwe, limwi cingazipa mucecete vino mwatantika ivintu ni vya kucita. Uzye  mungapekanya ningo ivintu pakuti mungakwata insita na maka akuzumila ukuya kuno yamwama nanti ukwama yamwi uku ng’anda uku mwinu? Amalembelo yakakomelezya Aina Klistu ukupokelela aenyi. (Ayeb. 13:2) Fwandi ukupokelela aenyi, i cintu icisuma sana. Limwi cingazipa ukuti muitemelwe ukucefyako ivya kucita ivitacindime.

15. I vyani vimwi ivingalenga yamwi yatiina ukupokelela aenyi?

¹⁵ Vino mukayuvwa: Uzye mwatala mwelenganyapo ukwama yamwi uku mwinu alino imuyuvwa ukuti mutanga mukwanisye? Yamwi yaya ni nsonyi nupya yakatiina ukuti limwi cingize citale ukulanzyanya na yano yama nanti limwi aenyi yangize yayuvwe kwati yatapokelilwe ningo. Yamwi yatakwata impiya izingi nupya yakaelenganya ukuti yatanga yapekanye wakwe vino yauze umu cilongano yangacita. Mwaiusya ukuti, icacindama sana umu ng’anda asi vino mukaloleka, icikalondekwa sile, u kwika ningo ivintu nu kuzifyamo nu kulanga ucuza kuli yano mwapokelela.

16, 17. I cani icingalenga kuti mutaatiina ukupokelela aenyi?

¹⁶ Ndi cakuti mukatiina ukupokelela aenyi, mutaaya mwenga. Eluda uwa ku Britain walanzile ukuti: “Ukupekanyizizya aenyi kukaleta masakamika yamwi. Nomba wakwe vino caya umu mulimo onsi uwa kuombela Yeova, kwaya ivintu ivisuma ivikacitika ndi tukupokelela aenyi. Nkaipakizya ukwikala sile na enyi ala tukumwa kofi nu kulanzyanya.” Mwaiusya ukuti ukulanga ukuti mwatimusumba amano uku enyi kukaazwa lyonsi. (Filipi 2:4) Apiipi nu muntu aliwensi akatemwa ukunenako yauze ivya mucitikila umu umi. Ukwizizya pàmwi na yauze limwi ingaya ali nsita sile ino yauze yangatuuzya pali vino vyatucitikila umu umi. Eluda muze nawe walanzile ati: “Ukwama aina na ya nkazi uku ng’anda ukwane kukangazwa ukuyamanya ningo, sana sana pali vino yasambiliile icumi.” Ukulanga ukuti mwasuumba amano kuli yauze kukalenga mwaipakizya lino muli pamwi nayo.

¹⁷ Nkazi painiya uwapokelile asambi aazanyilwe uku masukulu apusane pusane yakwe Leza walanzile ukuti: “Pa kutandika nasakamiile pano ing’anda yane inono sana nupya mwaya ivilimba vya kwikalapo vino yamwi yaomvizyepo mpiti. Umuci wakwe kasambilizya wa masukulu yaa wanteekizye. Walanzile ukuti wene na ya iya yakaomba umulimo wa kutandalila ivilongano, imilungu ino yakaipakizya sana, a iiya ino yakaikala na antu atemwa vyakwe Leza aatakwata ivingi nomba yano yasumba sana mano umu kuombela Yeova nu kwangupazya umi. Cii canjiwisye vino yamayo yatunenanga ala tucili ance ukuti: ‘Imbale ya musalu pamwi ni citemwiko, yazipapo.’” (Mapi. 15:17) Mwaleka ukutemwa kwamucincizya ukupokelela aenyi, nupya mutaasakamala.

18, 19. Uzye ukupokelela aenyi kungatwazwa uli ukuta ukwelenganya iviipe pali yauze?

¹⁸ Vino mukayuvwa pali yauze: Uzye kwaya umwi umu cilongano cinu uwamusosya? Ukuvwa uyi pa muntu wiyo umuku wakutandikilako kungalenga mutwalilile ukumupata ndi mutacisile ivingalenga mute ukupata umuntu wiyo. Ukukana uvwana na yamwi kungalenga mutapokelela aenyi. Nanti limwi umwi wamusosizye mpiti, nupya cikamutalila ukwililako.

¹⁹ Baibo ikatukomelezya ukuti pakuti tukomye ucuza witu na yauze kumwi sile na alwani itu, tulinzile ukulapokelela aenyi. (Welengini Mapinda 25:21, 22.) Ndi cakuti mwama umwi uku ng’anda uku mwinu, cingamwazwa ukuta ukuvwa uyi pa muntu wiyo nu kuya na ucuza usuma nawe. Mungatandika ukulola imiyele isuma ino Yeova waweni lino wasambilizye muntu wiyo icumi. (Yoa. 6:44) Ndi cakuti mwalanga ukutemwa, mungatandika ucuza usuma nupya uiyele ukwaula ukumanya. Mungacita uli pakuti musininkizye ukuti ukutemwa u kukumulenga mwapokelela yauze? Inzila yonga ino tungaomvya  ukulondela ukukomelezya ukwaya pali Filipi 2:3 ukwakuti: “Muicefye nu kulola auzo ukuya acindame kuluta mwemwe.” Ukulonda inzila zya kulolelamo aina na ya nkazi ukuti yacindama ukuluta sweswe kuli kuti mu utailo, mu kuzizimizya, ukusipa alino ni miyele yuze ino Aina Klistu yalinzile ukukwata kulalenga tuyatemwe sana nupya cilatwazwa ukulayapokelela.

20. U mulandu ci nupya i cani icilinzile ukutulenga ukuya kuli wino watwamile ndi twazumila ukuti tulayako?

²⁰ Kalemba wa masamu Davidi uzizye ati: ‘We Yeova, uzye a weni alingila umwi tenti lyako?’ (Masa. 15:1) Wakonkizyepo ukulondolola imiyele ino Leza akatemwa ukulola umu enyi yakwe. Imiyele imwi u kuya uwa cumi muli vino tukalanda. Davidi watiile: “Ndi walapa asifutuka, nanti angailetelela umweneco.” (Masa. 15:4) Ndi twazumila lino umwi watwama, tutalinzile ukusenuka na patalinzile. Wino watatwama limwi angapekanya vimwi, nupya amaka yakwe yangononeka sile ndi twasenula mano. (Mate. 5:37) Yamwi yakasenula mano kuli yano yayamile pakuti yazumile ukuya kuze kuno iyayama ukukuloleka ukuti kuliko ningo. Uzye ukucita vivyo kungalanga ukuti mwaya nu kutemwa nu mucinzi? Lelo, tulinzile ukuzumila kuno yatwama nu mwenzo onsi asi mulandu na vino uwatatwama angatupeela. (Luka 10:7) Nupya ndi cakuti kuli vimwi ivicindame ivingaleenga kuti tufilwe ukuya kuli wino watwamile, cingazipa ukumumanyisya lino kucili insita.

21. Uzye ukucindika intambi izyaya uku mpanga zimwi kungatwazwa uli ukuya aenyi yasuma?

²¹ Nupya cacindama nu kucindika intambi izyaya kuno mwikala. Uku mpanga zimwi, aenyi yano yasikwenekela yakayapokelela ningo sana, nomba kuuze kwene yakalonda ukupekanyizizya calimwi. Umu vifulo vimwi akupokelela aenyi akayapeela ivintu ivisuma vino angakwanisya ukuyapeela, nu kuleka amu lupwa iyatala yaloleelako. Kuuze kwene yonsi yakaankana ivilipo pamwi na enyi. Umu ncende zimwi, aenyi yakaletako tumwi utungaomviwa lino yakwizizya capamwi, kuze kwene aakupokelela aenyi akauvwa ningo ndi cakuti aenyi iza sile ukwaula nanti akamwi. Nupya amu mpanga zimwi yakaenekela ukuti ndi yama umwi pa muku wa kutandikilako na wakwe ciili, alinzile ukukana nu mucinzi, lyene kuze kwene umuntu ndi wakana ukuya kuno iyamwama ala asitaizya. Lekini twaezya apapezile amaka itu pakuti twazanzya atiyatwama uku mang’anda yao.

22. U mulandu ci uno ‘kuzengelana’ kwacindamila sana?

²² Umutumwa Petulo walanzile ukuti: “Mpelelekezyo ya vintu vyonsi yatipalama.” (1 Pet. 4:7) Ndakai lyene yatipalama sana. Kwasya kuce kuye ucuzi ukulu cuze utatala wayako. Lino intazi zikuvulilako, tulaalondekwa ukulanga sana ukutemwa uku ina na ya nkazi. Ukucila vino cali mpiti, ukusunda kwakwe Petulo kukaomba sana uku Ina Klistu ndakai ukwakuti, “Mwazengelana mu mang’anda inu kwaula kuilizyanya,” ukucita vii kulatwalilila amanda pe.—1 Pet. 4:9.