Ukulanda sile icisinka, kusi umuntu ndakai aangamanya vino umutumwa Paulo walolekanga. Ivikope ivyaya umu mpapulo zitu vikaleengwa sile, asi vikope ivyazanwa umu vintu vya mpiti vino yakaazikula.

Nomba, kwaya ulondolozi ukalanda pali vino Paulo walolekanga. Ulupungu Lwa Mulizi (Zion’s Watch Tower) lwakwe Maaci 1, 1902, lwalanzilepo ukuti: “Vino Paulo walolekanga: . . . Yavilondolola mu lupapulo lwa ‘Milimo yakwe Paulo na Thecla’ ivyalemvilwe umupiipi nu mwaka wakwe 150, ulondolozi uwo ukaloleka ukuti wazipa sana, nupya wamanyikwe mpiti. Umu ulondolozi uu, walondololwa ukuti wali nu ‘mwili unono, ni ipala, na mangowe, na maka, ni nkopyo izyakomana pa cipuma, alino ni impuno itali.’”

Dikisyonali umwi (The Oxford Dictionary of the Christian Church) uwa mu 1997, akalanda pali vino vyalemvilwe mpiti ukuti: “Mu lupapulo lwa ‘Milimo yakwe Paulo na Thecla’ mufwile mwaya ivisinka vimwi ivyaya umwi lyasi lya mpiti.” Ivyalembwa ivyaya umu Milimo yakwe Paulo na Thecla vyacindikwe sana lino papisile imyaka inono ukufuma pano vyalembiilwe, wakwe vino casininkiziwa umu vyalembwa vya mpiti ivili 80 ivya Cigiliki, alino nu mu ndimi zyuze. Fwandi, ivikope ivyaya umu mpapulo zitu vikauvwana ni vyaliko mpiti pali vino Paulo walolekanga.

Nomba mwaiusya ukuti kwaya ivintu vimwi ivyamanyikwa sana ukucila pa milolekele yakwe Paulo. Na lino Paulo waombanga umulimo wa kusimikila, antu yamwi aataasumvile mano kuli vyakwe Leza yalandanga ukuti: “Lino ali pamwi naswe, pa manso itu, wene umutonte, nupya mazwi yakwe yasyasenula cimwi.” (2 Kol. 10:10) Lelo tutalinzile ukwilila ukuti Yesu wamulenzile ukuya Umwina Klistu umu cizungusyo. Nupya tungelenganya na pali vino waomvile wa ‘muomvi wakwe Klistu umusoololwe, kuti aleke Yesu amanyike ku akulukuwa.’ (Mili. 9:3-5, 15; 22:6-8) Nupya elenganyini pa vintu uwingi vino tukasambilila umu mabuku amuli Baibo yano Yeova walesile kuti Paulo alembe lino wamupeezile umupasi wa muzilo.

Paulo ataituumikanga pa milimo ino waomvile lino atali aye u Mwina Klistu, nupya atalondolwile imilolekele yakwe. (Mili. 26:4, 5; Filipi 3:4-6) Walanzile ukuti: “Nene munono kuluta pa atumwa yonsi nupya citandinzile kwamwa mutumwa.” (1 Kol. 15:9) Lino papisile insita wizile alemba ukuti: “Nemo nacepesya pa antu yao ali anono kuluta mu antu yakwe Leza onsi. Lelo Leza wampile maka akukosoola ilandwe lisuma ku akulukuwa, ilya pa vya ukama wakwe Klistu uno utakwata icipimo.” (Efes. 3:8) Amazwi yaa yacindama sana ukucila ivilivyonsi ivingatusakamika pa milolekele yakwe Paulo.