CIPANDE CA KUSAMBILILAMO 10
Ukutemwa Yeova nu Kumutaizya Kulalenga Muwatiziwe
“Uzye i cani cingandesya kuti mbatiziwe?”—MILI. 8:36.
LWIMBO NA. 37 Kuombela Yeova nu Mwenzo Onsi
VINO TUMASAMBILILAPO *
1-2. Ukulingana na vino ilembelo lya Milimo 8:27-31, 35-38 likalangilila, i cani calenzile mutungwi umwina Etiopia awatiziwe?
UZYE mukulonda ukuwatiziwa nu kuya umusambi wakwe Klistu? Ukutemwa nu kutaizya vilamwazwa ukupingulapo ukucita vivyo. Lekini tulande pali vino mutungwi uwaombelanga namwene wa ku Etiopia wacisile.
2 Umwina Etiopia wii, wawatiziwe lino sile wasambilila vino Malembelo yakalanda. (Welengini Milimo 8:27-31, 35-38.) I cani calenzile acite vivyo? Afwile wataizyanga sana Izwi Lyakwe Leza pano wawelenganga ivikomo vimwi umwi buku lyakwe Ezaya ala ali umwi celeta. Nupya lino Filipi walanzile nawe wataizye sana pali vino Yesu wamucitiile. Nomba u mulandu ci uno mutungwi wiya wailile uku Yelusalemu? A pa mulandu wakuti watemilwe Yeova na mpiti. Twamanya uli vivyo? Waile sile umu kupepa Yeova uku Yelusalemu. Umonsi wii watiile ukupepa kuno wapepanga nu kwingila umu mipepele ya luko longa sile ulwapeezilwe kuli Leza. Ukutemwa Yeova kwene kuu u kwalenzile apingulepo ukucita icintu na cuze icicindame kuli kuti ukuwatiziwa nu kuya umusambi wakwe Klistu.—Mate. 28:19.
3. I cani cingalesya umuntu ukukanawatiziwa? (Lolini kambokosi kakuti, “ I Vyani Ivyaya Umu Mwenzo Winu?”)
3 Ukutemwa Yeova kungalenga muwatiziwe. Kutemwa kwene insita zimwi kungamulesya ukuwatiziwa. U mulandu ci uno twalandila vivyo? Elenganyini pali vimwi. Limwi mwatemwa sana ya lupwa na ya cuza inu aasi ya kapepa nupya mukasakamala ukuti ndi cakuti mwawatiziwa, yalamupata. (Mate. 10:37) Nanti limwi mwatemwa ukucita ivintu vimwi vino mwamanya ukuti Leza wapata nomba cikamutalila ukuta iviyelezyo kwene vivyo. (Masa. 97:10) Nanti limwi ukufuma uku wance winu mukalondela intambi izyaya umu mipepele ya ufi. Nupya limwi mukauvwa ningo nga mwiusya vino mwacitanga ivintu kwene vivyo mpiti. Nupya cico calenga camutalila ukuta ukulondela intambi izisizanzya Yeova. (1 Kol. 10:20, 21) Fwandi mulinzile ukuyuzya ukuti, “Uzye i vyani nanti a weni wino natemwa sana?”
WINO MULINZILE UKUTEMWA SANA
4. U mulandu ci ucindame ungalenga muwatiziwe?
4 Mwakwata ivintu ivingi vino mungatemwa nu kutaizya. Limwi lino mutatala mwatandika ukusambilila na ya Nte Yakwe Yeova, mwacindike sana Baibo. Nupya limwi mwatemilwe Yesu. Nomba vino mwamanya ya Nte Yakwe Yeova, mwatemwa ukuya pamwi nayo insita ikulu. Nomba ukutemwa ivintu vivyo ivisuma kutange kumulenge mwalondesya ukuipeela kuli Yeova nu kuwatiziwa. Umulandu ucindame sana ungamulenga muwatiziwe u kutemwa Yeova Leza. Nga mwatemwa Yeova ukuluta icili consi, mutalaleka cimwi nanti ali wensi ukumulesya ukumuombela. Ukutemwa Yeova kulamulenga muwatiziwe nupya kulamwazwa ukutwalilila ukuya acisinka pa cisila ca kuwatiziwa.
5. A mauzyo ci yano tumalanzyanyapo?
5 Yesu walanzile ukuti tulinzile ukutemwa Yeova nu mwenzo witu onsi, umi witu onsi, amano itu yonsi na maka itu yonsi. (Mako 12:30) Mungacita uli pakuti mumanye ivya kutemwa nu kucindika sana Yeova umu musango kwene uwo? Ndi cakuti twelenganya pali vino Yeova watutemwa cilatwazwa naswe ukumutemwa. (1 Yoa. 4:19) I vintu ci na vyuze vino mulacita ndi cakuti mwatemwa sana Yeova? *
6. Ukulingana ni Lembelo lyakwe Loma 1:20, iinzila ci yonga ino mungasambilililamo pali Yeova?
6 Mwasambilila pali Yeova ukupitila muli vino waumba. (Welengini Loma 1:20; Umbw. 4:11) Mwaelenganya pali vino Yeova waumba ivimelwa ni nyama na vino ivintu vivyo vikalangilila vino wakwatisya mano. Mwasambililako na kuli vino waumba umwili winu. (Masa. 139:14) Nupya mwaelenganya na pa maka yano Yeova wika umwi lanzi, nupya ilanzi lyaya pa ntanda izingi cuze. * (Eza. 40:26) Lino mwelenganya sana pa uumbo wakwe Yeova, mulaya mukumucindikilako sana. Nomba ukumanya ukuti Yeova wakwata amano na maka asi cilalenga sile mukwate ucuza usuma na aliwe. Lelo pakuti mukomye ucuza winu na aliwe, mulinzile ukumanya ivingi pali aliwe.
7. I vyani vino mulinzile ukusininkizya pakuti mutemwe sana Yeova?
7 Mulinzile ukusininkizya ukuti Yeova wamutemwa. Uzye cikamutalila ukuzumila ukuti Kaumba wi yulu ni nsi wamanya ukuti akuno mwaya nupya wamutemwa? Nga avino cili, mwaiusya ukuti Yeova ataya “ukutali naswe.” (Mili. 17:26-28) Wene “akaceceta umwenzo wa muntu ali wensi” nupya wamulaya ukuti “ndi cakuti wamulondalonda, ulamuzana.” (1 Mila. 28:9) Nupya umulandu uno mukusambililila Baibo a uwa uno Yeova walanda, uwakuti, “nakupalamika kuli nene.” (Yele. 31:3, NWT) Nga mwamanya sana vino Yeova wamucitila, mulamutemwa sana.
8. Mungalanga uli ukuti mukataizya pali vino Yeova wamutemwa?
8 Inzila yonga ino mungalangilamo ukuti mukataizya pali vino Yeova watutemwa, u kulanda nawe umwipepo. Mulaya mukutemelwako sana Yeova nga mukumunena ivikumusakamika nu kumutaizya pali vino wamucitila. Nupya cico cilalenga ucuza winu na aliwe ukukomelako lino mukulola vino akwasuka mapepo inu. (Masa. 116:1) Mulasininkizya ukuti akamuvwikisya. Nomba pakuti mupalame sana kuli aliwe mulinzile ukumanya umulandu uno watemelwa vimwi, ukupata alino nu kucitila ivintu vimwi. Nupya mulinzile nu kumanya vino akalonda mwacita. Inzila yonga ino mungamanyilamo ivintu kwene vivyo u kusambilila sana Izwi lyakwe, Baibo.
Inzila isuma ino tungapalamilamo kuli Leza nu kumanya vino akalonda twacita u kusambilila Baibo (Lolini palaglafu 9) *
9. Mungacita uli pakuti mumanye ndi cakuti mukataizya pali Baibo?
9 Mwataizya api Izwi Lyakwe Leza, Baibo. Muli Baibo sile u mwaya icumi pali Yeova na pali vino akalonda ukumucitila. Mulalanga ukuti mukataizya pali Baibo ndi cakuti mukuiwelenga cila wanda, nu kupekanyizizya isambililo linu ilya Baibo alino nu kulondela vino mukusambilila. (Masa. 119:97, 99; Yoa. 17:17) Uzye mwakwata utantiko wa kuwelenga Baibo? Uzye mukawelenga Baibo cila wanda?
10. I cintu ci conga icalenga Baibo iiyele sana?
10 Icintu conga icaiyela muli Baibo i cakuti mwaya malyasi aakalanda pa antu aaweni Yesu. Ali buku sile lyonga ilikalondolola vino Yesu wamucitila. Lino mukusambilila pali vino Yesu walanzile nu kucita, mulalondesya ukuya cuza wakwe.
11. I cani cilalenga mutemwe Yeova?
11 Nga mwatemwa Yesu alino mulatemelwako sana Yeova. U mulandu ci? Pano Yesu wakolanyanga ningo imiyele yakwe Isi. (Yoa. 14:9) Fwandi nga mukusambilila sana pali Yesu, mulamanya nu kutaizya sana Yeova. Elenganyini pa luse luno Yesu walanganga antu aasuzilwe na antu yauze, kuli kuti apiina, alwale nanti yano yatakweti aakuyazwa. Elenganyini na pali vino akamupandako mano pali vino mungacita umu umi winu na vino umi winu ungazipa ndi cakuti mukumuvwila.—Mate. 5:1-11; 7:24-27.
12. Nga mwasambilila pali Yesu, i vyani vino mulacita?
12 Ukutemwa Yesu kulakulilako lino mukwelenganya pa mpolelwa ino Yesu wapeezile pakuti imembu zitu zyelelwe. (Mate. 20:28) Nga mwamanya ukuti Yesu waitemilwe ukumufwila, cilalenga mulapile nu kulenga uwelelo kuli Yeova. (Mili. 3:19, 20; 1 Yoa. 1:9) Nupya nga mwatemwa sana Yesu na Yeova, mulalondesya ukuya pamwi na antu ayatemwa.
13. I vyani vino Yeova wamupeela?
13 Mwatemwa yayo aatemwa Yeova. Ya lupwa inu na ya cuza inu aasi ya kapepa yatange yuvwikisye umulandu uno mukulondela ukuipeela kuli Yeova. Yangatandika nu kumukaanya. Yeova alamwazwa lino alaleka aina na ya nkazi umu cilongano ukuya ya lupwa inu. Ndi cakuti mwapalama sana uku lupwa lulo, yalamutemwa nu kumwazwa umu nzila ili yonsi. (Mako 10:29, 30; Ayeb. 10:24, 25) Nupya patalalengela, ya lupwa inu yangatandika ukuombela Yeova nayo kwene nu kumuvwila.—1 Pet. 2:12.
14. Wakwe vino ilembelo lyakwe 1 Yoane 5:3 likalanda, i vyani vino mwamanya lyene pa visinte vyakwe Yeova?
14 Mwataizya pa visinte vyakwe Yeova nu kuvilondela. Lino mutatala mwamanya Yeova limwi mwaisoolwelanga ivisuma ni viipe, nomba lyene mukalola ukuti visinte vyakwe Yeova ali visuma. (Masa. 1:1-3; welengini 1 Yoane 5:3.) Elenganyini pali vino Baibo ikasambilizya ukuti ali vino ya iya, aci, avyazi na ana yalinzile ukucita. (Efes. 5:22–6:4) Uzye ulupwa lwinu luli ni nsansa pa mulandu wakuti mukulondela vino Baibo ikasambilizya? Uzye mukuya mukuyelako ni miyele isuma pa mulandu wa kuvwila vino Yeova akamupandako amano pali ya cuza yano mulinzile ukukwata? Uzye ndakai lyene mwaya ni nsansa? (Mapi. 13:20; 1 Kol. 15:33) Icasuko cifwile ukuya a ee.
15. I vyani vino mulinzile ukucita nga mukulonda ivisinte vya muli Baibo vyamwazwa?
15 Insita zimwi limwi cikamutalila ukulondela ivisinte vya muli Baibo vino mukusambilila. Ali mulandu uno Yeova akaomvezya iuvi lyakwe ukumupeela impapulo izikalondolola Baibo pakuti mumanye ivisuma ni viipe. (Ayeb. 5:13, 14) Ndi cakuti mukuwelenga nu kuisambilizya ukuomvya impapulo kwene zii, mulalola vino zilamwazwa umu umi winu nupya cilalenga mwalondesya ukuya umwi uvi lyakwe Yeova.
16. Uzye Yeova akatungulula uli iuvi lyakwe?
16 Mwatemwa iuvi lyakwe Yeova nu kulitungilila. Yeova wakolonganika antu yakwe umu vilongano nupya Umwanakwe Yesu aali mutwe wa vilongano kwene vii vyonsi. (Efes. 1:22; 5:23) Yesu wasonta iumba lya yonsi apakwe anono sile ukutungulula umulimo uno akalonda uombwe pali ndakai. Yesu wamile aonsi yaa ukuti muomvi mutailwe uwa mano, nupya aonsi yaa yakaombesya umu mulimo wao uwa kumwazwa kupalama kuli Leza nu kucingilila ucuza winu na aliwe. (Mate. 24:45-47) Inzila yonga ino umuomvi mutailwe akaomvya pa kumusakamala u kusininkizya ukuti ya eluda afikepo ali yano yasontwa pakuti yamucingilila. (Eza. 32:1, 2; Ayeb. 13:17; 1 Pet. 5:2, 3) Ya eluda yaipeelesya ukucita vyonsi vino yangakwanisya pakuti sile yamukomelezye nu kumwazwa ukupalama kuli Yeova. Nomba umulimo ucindame sana uno yakaomba u kumwazwa ukusambilizya yauze pali Yeova.—Efes. 4:11-13.
17. Ukulingana ni lembelo lyakwe Loma 10:10, 13, 14, u mulandu ci uno tukanenela yauze pali Yeova?
17 Mwaazwa yauze ukusambilila ukutemwa Yeova. Yesu wanenyile alondezi yakwe ukulasambilizya yauze pali Yeova. (Mate. 28:19, 20) Canguka sana ukuvwila isunde lilyo pano twamanya ukuti vivyo kwene avino tulinzile ukucita. Nomba nga mwatemwa sana Yeova mulayuvwa wakwe vino umutumwa Petulo na Yoane yayuvwanga, yalanzile ukuti: “Tutangata kulanda pali vino twalola nu kuvwa.” (Mili. 4:20) Tulaya sana ni nsansa ndi cakuti twazwa yauze ukumanya Yeova. Elenganyini pali vino kakosoola Filipi wali sana nu luzango lino wazwilizye umwina Etiopia ukusambilila icumi ica mu Malembelo nu kuwatiziwa! Nga mukukolanya Filipi nu kuvwila isunde lyakwe Yesu ilya kusimikila, mulalanga ukuti mukulonda ukuya Inte Yakwe Yeova. (Welengini Loma 10:10, 13, 14.) Pa nsita iyo, muluzya iuzyo wakwe lino umwina Etiopia uzizye ilyakuti: “Uzye i cani cingandesya kuti mbatiziwe?”—Mili. 8:36.
18. I vyani vino tulasambilila umu cipande icilondelilepo?
18 Mulapingulapo ukucita icintu icicindamisye umu umi winu ndi cakuti mwapingulapo ukuwatiziwa. Pa mulandu wakuti ukucita vivyo icintu cicindamisye, mulinzile ukwelenganyapo ningo sana pali vino cikapiliula ukuwatiziwa. I vyani vino mulinzile ukumanya pa luwatizyo? I vyani vino mulinzile ukucita lino mutatala mwawatiziwa na lino mwawatiziwa? Amauzyo yaa yalasukwa umu cipande icilondelilepo.
LWIMBO NA. 2 Wewe Yeova
^ pala. 5 Antu yamwi aatemwa Yeova yatamanya ningo ndi cakuti yaipekanya ukuwatiziwa nu kuya Inte Yakwe Yeova. Ndi cakuti avino mukayuvwa, icipande cii cimalanda pali vimwi vino mungacita ivingamwazwa ukuwatiziwa.
^ pala. 5 Swe yantu twapusana, fwandi yamwi yangalondela ivyeo vyakutwazwa ivili umu cipande cii ukulingana na vino ivitantikwa, yauze yene yangavilondela umu nzila izipusune.
^ pala. 6 Pakuti mulole na vyuze pa uumbo, lolini ibuku lyakuti Was Life Created? ni lyakuti The Origin of Life—Five Questions Worth Asking.
^ pala. 61 ULONDOLOZI WA CIKOPE: Nkazi wapeela umukazyana kapepala ki landwe wino wazana lino akukala ivintu.
