1. U mulandu ci uno Yesu wapepiileko asambi yakwe ukuti Yeova ayacingilila?

PA WANDA wakusyalikizyako ukuya pano nsi, Yesu welenganyanga pa ntazi zino asambi yakwe yali nu kukwata. Pa mulandu wakuti Yesu watemilwe asambi yakwe, wayapepiileko kuli isi ukuti ayacingilila “ku mwipe wilya.” (Yoa. 17:14, 15) Yesu wamanyile ukuti kwasile panono ukuti aswilile ukwi yulu nupya Satana wali nu kutwalilila ukulwisyanya na yonsi alondanga ukuombela Yeova. Fwandi antu yakwe Yeova yalondekwanga ukucingililwa.

2. Tungasininkizya uli ukuti Yeova alasuka mapepo itu?

² Pa mulandu wakuti Yeova watemwa umwanakwe, waswike ipepo lyakwe. Ndi cakuti tukwezya na maka ukuzanzya Yeova, naswe kwene alatutemwa nupya alaasuka mapepo itu ndi cakuti twapepa ukuti atwazwe nu kutucingilila. Pa mulandu wakuti Yeova Uumutwe wa lupwa uwika amano uku lupwa lwakwe, alatwalilila ukusakamala anakwe. Ndi cakuti atacisile vivyo, izina lyakwe lingononeka nanti ukuzewana.

3. U mulandu ci uno tukulondekwa Yeova ukutucingilila ndakai?

³ Tukulondekwa Yeova ukutucingilila sana ndakai ukucila vino cali mpiti. Satana wasumbwa ukufuma ukwi yulu nupya “ali nu ukali cuze.” (Umbw. 12:12) Walenga antu yamwi ukulaelenganya ukuti ndi cakuti yakutucuzya, ala ‘yakutumikila Leza.’ (Yoa. 16:2) Yauze aatataila Leza yakatucuzya pa mulandu wakuti twaiyela tutaya wa antu amu nsi ii. Asi mulandu ni cikalenga antu ukutucuzya, tusitiina. U mulandu ci? A pa mulandu wakuti Izwi Lyakwe Leza likati: “Mwene wene uwa kutailwa, nupya alamukomelezya nu kumucingilila ku Mwipe  wilya.” (2 Tesa. 3:3) Uzye Yeova akatucingilila uli? Lekini tulande pa vintu viili vino akatupeela.

4. Ukulingana na Efeso 6:13-17, i vyani vino Yeova watupeela ivya kutucingilila?

⁴ Yeova watupeela ivyanzo ivingatucingilila uku kuzanza kwakwe Satana. (Belengini Efeso 6:13-17.) Ivyanzo vino Leza watupeela vyakoma nupya vikaomba ningo. Nomba tulinzile ukuomvya ivyanzo vyonsi vino akatupeela pakuti tucingililwe. Uzye icanzo conga na conga cikaimililako cani? Lekini tulande pali conga na conga.

5. Uzye umusipi ukaimililako cani, nupya u mulandu ci uno tulinzile ukuuzwalila?

⁵ Musipi ukaimililako icumi icaya umwi Izwi Lyakwe Leza, Baibo. U mulandu ci uno tulinzile ukuzwalila umusipi uu? Pano Satana “uwantumpu nupya aliwe uwazitandike.” (Yoa. 8:44) Watwalilila ukubepa pa myaka iingi nupya waponzya “antu amu nsi.” (Umbw. 12:9) Nomba icumi icaya muli Baibo cikatucingilila uku ufi uwo. Tukazwala uli umusipi uu uwa unkolanya? Tukacita vivyo ndi cakuti twasambilila icumi pali Yeova, kumupepa umu ‘mupasi nu mu cumi’ alino nu kuya ni cisinka muli vyonsi vino tukucita.—Yoa. 4:24; Efes. 4:25; Ayeb. 13:18.

6. Uzye ica kucinga icisao cikaimililako cani, nupya u mulandu ci uno tulinzile ukucizwalila?

⁶ Ca kucinga icisao, cikaimililako masunde yakwe Yeova aololoke. U mulandu ci uno tulinzile ukuzwalila ica kucinga icisao? Wakwe vivi kwene vino ica kucinga icisao cikacingilila umwenzo wa musilika, avino ica kucinga icisao ica unkolanya cikatucingilila pakuti tutaya ni miyele iipe iya mu nsi ii. (Mapi. 4:23) Yeova akaenekela ukuti tumutemwe nu kumuombela nu mwenzo onsi. (Mate. 22:36, 37) Fwandi Satana akaezya na maka ukutulesya ukuombela Yeova nu mwenzo onsi lino akutulenga tutemwe ivintu vya mu nsi ii nu kutemwa vino Yeova wapata. (Yako. 4:4; 1 Yoa. 2:15, 16) Nupya ndi cakuti inzila iyo yakana ukuomba, akaezya na maka ukutucuzya pakuti sile tute ukuzanzya Yeova.

7. Tungazwala uli ica kucinga icisao?

⁷ Tukazwala ica kucinga icisao nga tukuvwila masunde yakwe Yeova aololoke nu kwikala ukulingana na masunde kwene yayo. (Masa. 97:10) Yamwi yakalola ukuti masunde yakwe Yeova yakalenga tutaya nu untungwa. Ndi cakuti twata ukuomvya ivisinte vya muli Baibo tungaya wa musilika wino wazula ica kucinga icisao ala ali umu ulwi pa mulandu sile uwakuti akuvwa ukuti iicifina. Citanga ciye ica mano ukucita vivyo. Nomba yayo aatemwa Yeova, masunde yakwe aangupale kuli aliyo nupya yakapeela umi.—1 Yoa. 5:3.

8. Uzye cikapiliula cani ukuzwala insapato zya kulangilila ukuti ituipekanya ukusimikila ilandwe lisuma?

⁸ Paulo nupya watukomelizye ukuzwala insapato zya kulangilila ukuti ituipekanya ukusimikila ilandwe lisuma ilya mutende. Cii cikupiliula ukuti tulinzile ukuya aipekanye lyonsi ukusimikila ilandwe lisuma ilya Wene. Nga tukunenako yauze vino Baibo ikalanda, utailo witu ukakomelako. Tukakomeleziwa sana ukulola vino antu yakwe Yeova umu nsi yonsi yakwezya na maka ukusimikila ukuli konsi kuno yali, wakwe lino yali uku ncito nanti uku sukulu, lino yakusimikila uku ng’anda ni ng’anda nanti lino yakukazya, lino yakukala, lino yakutandalila ya lupwa yao aasi ya Nte nanti ukusimikila uku yantu yano yamanya. Ndi cakuti tuvwa intete icakuti ituta nu kusimikila, tungaya wa musilika wino wazula insapato umu ulwi ni cingacitika i cakuti angacisika. Fwandi cingamutalila ukuicingilila ndi cakuti yamuzanza nupya angafilwa ukulondela vino umukalamba wa yasilika akuyanena.

9. U mulandu ci uno tulinzile ukusendela icisyangu cii cikulu?

 ⁹ Cisyangu icikulu ica utailo cikaimilako utailo uno twakwata muli Yeova. Twataila ukuti alafikilizya malayo yakwe yonsi. Utailo uwo, ungaya wa “mwakusiika mivwi yamoto kufuma ku Mwipe wilya.” U mulandu ci uno tulinzile ukusendela isyangu cii icikulu? A pa mulandu wakuti cikatucingilila pakuti tutasombwa na asangu nanti ukutoovoka lino yauze yakutuseka ukuti ivizumilo vitu visi vya mpomvu. Ndi cakuti tutakweti utailo, cingatutalila ukuvwila Yeova ndi cakuti yauze yakututunka ukukanamuvwila. Nomba lyonsi lino twakana ukucita vino Yeova wapata uku ncito nanti uku sukulu ala utailo witu ukutucingilila. (1 Pet. 3:15) Lyonsi lino twakana incito iyakufola impiya izingi ingalenga tufilwe ukukwata insita iya kuombela Yeova, ala utailo witu ukutucingilila. (Ayeb. 13:5, 6) Nupya lyonsi lino twatwalilila ukuombela Yeova asi mulandu nu kukanya ala utailo witu ukutucingilila.—1 Tesa. 2:2.

10. Uzye icisote ci pusukilo ali cani, nupya u mulandu ci uno tulinzile ukucizwalila?

¹⁰ Cisote ci pusukilo uupalilo uno Yeova aakatupeela uwakuti alatuutulula ndi cakuti twafwa nu kuti alalambula yonsi aakacita ukulonda  kwakwe. (1 Tesa. 5:8; 1 Tim. 4:10; Tito 1:1, 2) Wakwe vivikwene vino icisote cikacingilila umutwe wa musilika, a vino nu upalilo ukacingilila imyelenganyizizye itu. U mu nzila ci? Upalilo uwo ukatwazwa ukutwalilila ukwika mano pa malayo yakwe Leza nu kutwazwa ukukanasakamala pa ntazi zino tukakwata. Uzye tukazwala uli icisote cii? Tukacita vivyo nga tukutwalilila ukwelenganya wakwe vino Yeova akaelenganya pa vintu. Wakwe, tusipaalila umu vyuma, lelo tukapaalila mu vintu vino Leza watulaya.—Masa. 26:2; 104:34; 1 Tim. 6:17.

11. Uzye ulupanga lwa mupasi ali cani, nupya u mulandu ci uno tulinzile ukuluomvezya?

¹¹ Ulupanga lwa mupasi wa muzilo Iizwi Lyakwe Leza, Baibo. Ulupanga lwakwata amaka akulenga antu ukumanya ufi wa misango yonsi nu kuyakulula ukufuma ukuvisambilizyo vya ufi ni miyele iipe. (2 Kol. 10:4, 5; 2 Tim. 3:16, 17; Ayeb. 4:12) Tukamanya ivya kuomvya ningo ulupanga luu nga tukuisambilizya na muli vino tukasambilila umwi uvi lyakwe Leza. (2 Tim. 2:15) Ukulunda pa vyanzo, Yeova watupeela icintu na cuze icikatucingilila. I cintu ci cico kwene?

12. I cani cuze cino tukalondekwa, nupya u mulandu ci?

¹² Umusilika uwamanyikisya ulwi, akamanya ukuti atange acimvye wenga ulwi nu kuti akalondekwa asilika yauze ukumwazwa pakuti acimvye. Umu nzila ili imwi, naswe kwene tutange tucimvye Satana na antu yakwe swenga sile, tukalondekwa uwazwilizyo ukufuma uku ina na ya nkazi. Yeova watupeela aina itu aingi sana umu nsi yonsi angatwazwa.—1 Pet. 2:17.

13. Ukulingana na Ayebulai 10:24, 25, uzye ukulongana kukatwazwa uli?

¹³ Iinzila yonga ino aina yangatwazwilamo u kuya umu kulongana. (Belengini Ayebulai 10:24, 25.) Swensi tukatoovoka insita zimwi, nomba ica musango uwo nga cacitika ukuya umu kulongana kungatukomelezya. Ivyasuko vya ina na ya nkazi ivya kufuma pansi ya mwenzo vikatukomelezya. Malyasi yano yakalanda ni vilangililo vikalenga tutwalilile ukuombela Yeova. Nupya tukakomeleziwa ndi cakuti twalanda nayo lino tutatala twatandika ukulongana na pa cisila ca kulongana. (1 Tesa. 5:14) Nupya ukulongana kukalenga tukwate isyuko lya kwazwa yauze na cico cikalenga tuye ni nsansa. (Mili. 20:35; Loma 1:11, 12) Kulongana kukatwazwa umu nzila na zyuze kwene. Kukatwazwa ukuya ya kasimikila nupya ya kasambilizya yasuma. Wakwe, tukasambilila ivya kuomvya ningo Viombelo Vino Tukaomvya pa Kusambilizya. Fwandi mwapekanya ningo ukulongana nu kukutikisya lino mukulongana. Pa cisila ca kulongana mwaomvya vino mwasambilila. Nga mwacita ivintu vii, mulaya “musilika uwakutailwa wakwe Klistu Yesu.”—2 Tim. 2:3.

14. Uwazwilizyo ci uze uno Yeova akatupeela?

¹⁴ Nupya angeli aamaka aingi sana nayo yakatwazwa. Elenganyini pali vino umungeli wenga sile angacita. (Eza. 37:36) Lyene elenganyini na pali vino angeli aingi amaka yangacita. Kusi umuntu nanti iciwa icingacimvya angeli ya maka yakwe Yeova. Yeova wakwatisya amaka, fwandi ndi cakuti akutwazwa tungaya akome ukucila yano yakatukanya asi mulandu na vino yangavula. (Yakapi. 6:16) Tungasininkizya ukuti vii i vya cumi. Mwaelenganya pali yonsi angamwazwa ndi cakuti mwatoovoka pa mulandu na vino yano mukaomba nayo, yano mukasambilila nayo nanti ya lupwa aasi ya Nte yamunena nanti ukumucitila. Mwaiusya ukuti mutaya mwenga umu ulwi uu. Mukalondela vino Yeova akamutungulula.

15. Ukulingana na Ezaya 54:15, 17, u mulandu ci uo Satana na antu yakwe yafililwa ukulesya umulimo wa kusimikila?

¹⁵ Kwaya ivingi ivyalenga ukuti antu aya umu nsi ii iikatungululwa na Satana yatupate. Tusiika umu vikanza vya miteekele nanti ukulwako inkondo. Tukanena antu api zina lyakwe Leza, ukuyanena pa Wene wakwe ukuti uulaleta umutende nupya tukalondela na masunde yakwe Leza aololeke. Tukalenga antu ukumanya ukuti kateeka wa insi ii u mwipe nupya iinkomi. (Yoa. 8:44) Nupya tukayamanyisya nu kuti insi ii iikatungululwa na Satana yasya iyononwe. Nomba Satana na yonsi aakamulondela yatalatala yalesye umulimo witu uwa kusimikila. Nanti ciye vivyo, tulatwalilila ukulumbanya Yeova umu nzila ili yonsi ino tungamulumbanyizizyamo. Nanti icakuti Satana wakwatisya amaka, wafilwa ukulesya ilandwe lisuma ilya Wene ilikasimikilwa umu nsi yonsi. Wafilwa ukucita vivyo pa mulandu wakuti Yeova akatucingilila.—Belengini Ezaya 54:15, 17.

16. Uzye Yeova alapususya uli antu yakwe lino kulaya ucuzi ukulu cuze?

¹⁶ I vyani vili nu kucitika? Lino kulaya ucuzi ukulu cuze Yeova alatupusuzizya umu nzila ziili. Inzila ya kutandikilapo, alapususya aomvi yakwe aacisinka lino alalenga ya kateeka ya pano nsi ukonona Babiloni mukulu kuli kuti mipepele yonsi iya ufi. (Umbw. 17:16-18; 18:2, 4) Yakwe ciili, alapususya antu yakwe lino alonono vyonsi ivyasyala ivyaya umu insi ii yakwe Satana pa Alamagedoni.—Umbw. 7:9, 10; 16:14, 16.

17. I visuma ci vilacitika ndi cakuti twatwalilila ukuya ya cuza yakwe Yeova?

¹⁷ Nga twatwalilila ukuya ya cuza yakwe Yeova, kusi icili consi cino Satana angatucita. Lelo aaliwe kwene alononwa nu kononwa manda pe. (Loma 16:20) Fwandi zwalini ivyanzo vyonsi nu kutwalilila ukulaviomvya. Mutalwisyanya na Satana na antu aya umu nsi ii mwenga sile. Mwaazwa aina inu na ya nkazi. Nupya mwalondela utunguluzi wakwe Yeova. Nga mwacita vivyo mulasininkizya ukuti Tata winu uwa kwi yulu alamukomya nu kumucingilila.—Eza. 41:10.