CIPANDE CA KUSAMBILILAMO 11
Vino Malembelo Yangamwazwa Ukuzizimizya Intazi
‘Leza . . . akamulenga ukuzizimizya.’—LOMA 15:5.
LWIMBO NA. 94 Tukataizya Pali Vino Twamanya Izwi Lyakwe Leza
VINO TUMASAMBILILAPO *
1. Iintazi ci zino antu yakwe Yeova yangakwata?
UZYE imukwata intazi imwi ikulu? Limwi umwi umu cilongano wamusosya. (Yako. 3:2) Nanti limwi yano mukaomba nayo nanti yano mukasambilila nayo yakamuseka pa mulandu wakuti mukaombela Yeova. (1 Pet. 4:3, 4) Nanti limwi ya lupwa inu yakumulesya ukuya mu kulongana nanti ukunenako yauze pali vino mwazumilamo. (Mate. 10:35, 36) Ndi cakuti intazi iyo yakulisya, cingalenga mwayuvwa ukuti cingazipa ukuta ukuombela Yeova. Nomba mungataila ukuti asi mulandu ni ntazi ino mungakwata, Yeova angamupeela mano na maka aakuzizimizya intazi iyo.
2. Ukulingana na Loma 15:4, uzye ukubelenga Izwi Lyakwe Leza kungatwazwa uli?
2 Yeova wasininkizye ukuti malyasi aakalanda vino antu aatamalilika yazizimizye intazi, yalembwe muli Baibo. U mulandu ci? Pakuti tungasambililako. Vikwene ali vino Yeova walenzile umutumwa Paulo ukulemba. (Belengini Loma 15:4.) Nga twabelenga malyasi yaa tukakomeleziwa nu kuya nu upaalilo. Nomba, tulinzile ukucita na vyuze ukucila sile ukubelenga Baibo. Tulinzile ukuleka Malembelo yasenule vino tukaelenganya na vino tukayuvwa. Tungacita uli ndi cakuti tukulonda ukumanya vino tungacita pa ntazi ino tukweti? Tungacita ivintu vii 4: (1) Kupepa, (2) Kwelenganya, (3) Kwelenganyapo sana, na (4) Kucita vino twabelenga. Tumalanda pali vino tungacita ivintu vii conga na conga. * Lyene tumaomvya inzila kwene ii lino tukusambilila pali vino vyacitikiile Umwene Davidi nu mutumwa Paulo.
1. KUPEPA
Lino mutatala mwatandika ukubelenga Baibo, mwalenga Yeova ukuti amwazwe ukulola vino ivyeo vino mukubelenga vingamwazwa (Lolini palaglafu 3)
3. I vyani vino tulinzile ukucita lino tutaatala twatandika ukubelenga Baibo, nupya u mulandu ci?
3 (1) Kupepa. Lino mutatala mwatandika ukubelenga Baibo, mwalenga Yeova ukuti amwazwe ukulola vino ivyeo vino mukubelenga vingamwazwa. Ndi cakuti imukwata intazi imwi, mungalenga Yeova ukuti amwazwe ukuzana ivisinte vya muli Baibo ivingamwazwa ukumanya ivyakucita pa ntazi iyo.—Filipi 4:6, 7; Yako. 1:5.
2. KWELENGANYA
Mwaelenganya ukuti ivikucitikila umuntu wino mukubelengapo vikucitikila mwemwe (Lolini palaglafu 4)
4. I vyani vingamwazwa pakuti ilyasi lino mukubelengapo liye ilya cumicumi?
4 (2) Kwelenganya. Yeova watupeela uwila uiyele uwa kwelenganya pa vintu. Pakuti ilyasi lino mukubelenga muli Baibo liye ilya cumicumi, mwaelenganya pa vikucitika nu kwelenganya ukuti ivikucitikila umuntu wino mukubelengapo, vikucitikila mwemwe. Mwaezya ukulola vino umuntu wino mukubelengapo walolanga nu kuyuvwa vino wayuvwanga.
3. KWELENGANYAPO SANA
Mwaelenganya sana pali vino mukubelenga na pali vino ivyeo vivyo vingamwazwa (Lolini palaglafu 5)
5. I vyani vino mungelenganyapo sana, nupya mungacita uli vivyo?
5 (3) Kwelenganyapo sana. Kucita vii, cikupiliula ukwelenganya pali vino mukubelenga na pali vino ivyeo vivyo vingamwazwa. Nga mwacita vii, cingalenga mulemanye ivyeo nu kuvwikisya icikulandwapo. Kubelenga Baibo ukwaula ukwelenganyapo, cingaya kwati u kulema ivimelwa ukwaula ukuvikontelela nu kuvitungwila. Ukwelenganyapo kwaya kwati u kulema vimelwa nu kuvitungwila pakuti vikakule ningo. Pakuti cimwangukile ukwelenganyapo sana, mungayuzya mweineco nu kwasuka mauzyo yaa, ‘Uzye aakulandwapo sana umwi lyasi lii wacisile uli pakuti amale intazi ino wakweti? Uzye Yeova wamwazwile uli? Uzye vino nasambilila umwi lyasi lii vingangazwa uli ukuzizimizya intazi?’
4. KUCITA VINO TWABELENGA
Nga mukuomvya vino mukusambilila mulapingulapo ningo pa vintu, mulaya nu mutende nupya utailo winu ulaya ukome (Lolini palaglafu 6)
6. U mulandu ci uno tulinzile ukulacitila vino tukusambilila?
6 (4) Kucita vino twabelenga. Yesu watiile ndi cakuti tusikucita vino tukusambilila, tungaya wa monsi aakukuula ing’anda yakwe pa mucanga. Akuombesya lelo akonona sile amaka yakwe. U mulandu ci? A pa mulandu wakuti lino icimuza na mulamba viliza, ing’anda yakwe ilapona. (Mate. 7:24-27) Mu nzila ili imwi kwene, ndi cakuti tukupepa, ukwelenganya alino nu kwelenganyapo sana, nomba tusikucita vino tukusambilila, tulaonona sile amaka itu. Fwandi lino twakwata intazi nanti lino yatuzunya, utailo witu utalaya ukome. Nomba nga tukuomvya vino tukusambilila, tukapingulapo ningo pa vintu, tukaya nu mutende nupya utailo witu ukaya ukome. (Eza. 48:17, 18) Lekini tulole vino tungasambilila kuli vimwi vino vyacitikile Umwene Davidi kuomvya ivintu kwene vii 4 vino twasambililapo.
I VYANI VINO MUNGASAMBILILA UKU MWENE DAVIDI?
7. I lyasi ci ilya mu Baibo lino tumalandapo?
7 Uzye yatala yamusosyapo kuli cuza nanti lupwa winu? Ndi cakuti vyamucitikilapo, kuli vino mungasambilila kuli vino vyacitikile Davidi lino umwanakwe Absalomu wamusosizye nu kulonda kumupoka Uwene.—2 Sam. 15:5-14, 31; 18:6-14.
8. I vyani vino mulinzile ukucita pakuti Yeova amwazwe?
8 (1) Kupepa. Lino mukutandika ukubelenga ilyasi lino mukulonda, mwanena Yeova pali vino mukuyuvwa pa viipe vino yauze yakumicitila. (Masa. 6:6-9) Mwanena Yeova vyonsi vino mukuyuvwa. Lyene mwalenga Yeova ukumwazwa ukuzana ivisinte ivingamwazwa ukumanya ivya kucita.
9. I vyani vino Absalomu wacitiile Davidi?
9 (2) Kwelenganya. Elenganyini ivyacitike umwi lyasi lii, na vino Umwene Davidi wayuvwanga. Absalomu umwana wakwe Davidi wezizye na maka pa myaka iingi ukulenga antu yamutemwe. (2 Sam. 15:7) Lino Absalomu waweni ukuti insita yalinga, watumile inengu mu mpanga yonsi iya Izlaeli uku kulenga antu yakamuzumile ukuti u mwene wao. Walenzile na Aitofeli cuza wakwe Davidi nupya impanda mano, ukupondokela Davidi. Lino Davidi walwile sana, Absalomu waisonsile ukuya umwene nupya wezizye ukulonda Davidi pakuti amukome. (Masa. 41:1-9) Davidi wizile amanya vino Abulaamu walondanga ukucita nupya utwike ukufuma mu Yelusalemu. Lino papisile insita, asilika yakwe Absalomu yalwile na asilika yakwe Davidi. Asilika yakwe Davidi yacimvizye nupya yakomile Absalomu umwana wakwe Davidi.
10. Uzye Umwene Davidi nga wacisile uli?
10 Lyene elenganyini pali vino Davidi wayuvwile pali vyonsi vii ivyamucitikilanga. Davidi watemilwe sana Absalomu nupya wataile Aitofeli. Nomba yonsi kwene yoili yamupondokiile. Yamusosizye sana nupya yalondanga nu kumukoma. Limwi Davidi nga watandike ukwelenganya ukuti na ya cuza yakwe kwene yauze nayo kwene yaombelanga pamwi na Absalomu, nupya nga watiile ukuyataila. Limwi nga watandike sile ukwelenganya pali vino vyali nu kumuzipila nu kuutuka ukufuma umu mpanga iya wenga sile. Nanti limwi nga watoovwike sana. Nomba Davidi ataacisile vii vyonsi. Nomba wacimvizye intazi ii. I cani calenzile akwanisye ukucita vivyo?
11. I vyani vino Davidi wacisile lino wakweti intazi itale?
11 (3) Kwelenganyapo sana. I vyani vino tukusambililako ukwi lyasi lii? Asukini iuzyo lii, “I vyani vino Davidi wacisile pakuti azizimizye intazi ino wakweti?” Davidi wateekiile nupya calenzile apingulepo ningo ivya kucita. Nupya ataasakamiile sana icakuti afilwa nu kupingulapo ningo ivya kucita. Lelo wapefile kuli Yeova ukuti amwazwe. Nupya walenzile na auze ukuti yamupandeko mano. Lyene zuwa zuwa wacisile vino wapingwilepo. Nanti icakuti Davidi wasosile sana, ataatile ukutaila yauze nu kuya nu lupato. Watwalilile ukutaila Yeova na ya cuza yakwe.
12. I vyani vino Yeova wacisile pa kwazwa Davidi?
12 Uzye Yeova wavwile uli Davidi? Nga mwalondelezya, mulalola ukuti Yeova wapeezile Davidi amaka ya kuzizimizya intazi ii. (Masa. 3:1-8; tumazwi twa pisika) Yeova watemilwe vino Davidi wapingwilepo ukucita. Nupya wavwile ya cuza ya cumi yakwe Davidi lino yaombesyanga ukucingilila umwene wao.
13. Mungakolanya uli Davidi ndi cakuti umwi wamusosya sana? (Mateo 18:15-17)
13 (4) Kucita vino twabelenga. Muyuzye mweineco ukuti, ‘Ningakolanya uli Davidi?’ Mulinzile ukuombelapo zuwa pa ntazi ino mukweti. Ukulingana ni ntazi ino mukweti, mungaomvya amazwi yakwe Yesu nanti cisinte icaya muli Mateo cipande 18. (Belengini Mateo 18:15-17.) Nomba mutalinzile kupingulapo zuwa pa vintu lino imusoka. Mulinzile ukupepa kuli Yeova pakuti amwazwe ukuteeka umwenzo nu kumwazwa ukumanya ivya kucita pa ntazi ino mukweti. Mutalinzile ukuta ukutaila ya cuza inu. Nomba, mwaitemelwa ukupokelela ukwazwa ukufuma kuli ya cuza inu. (Mapi. 17:17) Cicindamisye i cakuti mwalondela ukusunda kwakwe Yeova ukwaya umwi Izwi lyakwe.—Mapi. 3:5, 6.
I VYANI VINO MUNGASAMBILILA KULI PAULO?
14. A lilaci lino ilembelo lyakwe 2 Timoti 1:12-16 na 4:6-11, 17-22 lingamukomelezya?
14 Uzye ya lupwa inu yakamucuzya pa mulandu wakuti mukaombela Yeova? Nanti uzye limwi mukaikala umu mpanga muno antu yakwe Yeova yayalesya ukuomba imilimo imwi nanti yonsi? Nga vino cili, mungakomeleziwa nga mwabelenga 2 Timoti 1:12-16 na 4:6-11, 17-22. * Paulo walemvile ivikomo vii ale ali mu cifungo.
15. I vyani vino mungalenga Yeova?
15 (1) Kupepa. Lino mutatala mwatandika ukubelenga ivikomo vii, mwanena Yeova pa ntazi ino mukweti na vino mukuyuvwa. Mutapita umu mbali. Lyene mwalenga Yeova ukumwazwa ukumanya ivisinte ivingamwazwa umwi lyasi ilikulanda pa ntazi zino Paulo wakweti ivingamwazwa ukumanya vino mulinzile ukucita pa ntazi ino mukweti.
16. I vyani vyacitikile Paulo?
16 (2) Kwelenganya. Elenganyini ukuti ivyacitikilanga Paulo vikucitikila mwemwe. Paulo iyamunyepa na maceni mu cifungo ku Loma. Yatala yamwikapo umu cifungo, nomba pa nsita ii yene watasininkizya ukuti yamamukoma. Auze yamwi iyamupuuka, nupya akuvwa ukutonta.—2 Tim. 1:15.
17. Uzye Paulo nga wacisile uli?
17 Limwi Paulo nga wisile mano kuli vino vyamucitikilanga mpiti, nu kutandika ukwelenganya ukuti ndi cakuti ataali u Mwina Klistu mucincile, nga yataamwisile mu cifungo. Limwi nga wasokiile aonsi amu citungu ca Asia aamupusile nupya limwi nga watiile ukutaila ya cuza yakwe. Nomba Paulo atacisile vyonsi vii. U mulandu ci uno wasininkizizye ukuti ya cuza yakwe yali nu kutwalilila ukuya acisinka kuli aliwe nu kuti Yeova wali nu kumupaala?
18. I vyani vino Paulo wacisile lino wakweti intazi itale?
18 (3) Kwelenganyapo sana. Asukini iuzyo lii, “I vyani vino Paulo wacisile pakuti azizimizye intazi ino wakweti?” Nanti icakuti Paulo wamanyile ukuti wali umupipi nu kufwa, atilile ukuti icintu cicindame ukucita u kupeela Yeova ululumbi. Nupya watwalilile ukwelenganya pali vino wali nu kukomelezya yauze. Walangilile ukuti wataile Yeova pano wapepanga lyonsi. (2 Tim. 1:3) Paulo ataatwalilile ukwelenganya pa ina amupuusile, lelo wataizye ya cuza yakwe acisinka atwalilile ukumwazwa. Nupya Paulo watwalilile ukuisambilizya Izwi Lyakwe Leza. (2 Tim. 3:16, 17; 4:13) Ni cicindamisye i cakuti, wasininkizye ukuti Yeova na Yesu yamutemilwe. Yene yatamusiile, nupya yali nu kumupaala pali vino watwalilile ukuomba ni cisinka.
19. Uzye Yeova wazwile uli Paulo?
19 Yeova wacelwile Paulo ukuti yali nu kumucuzya pa mulandu nu kuya Umwina Klistu. (Mili. 21:11-13) Uzye Yeova wazwile uli Paulo? Wasukanga mapepo yakwe Paulo, nupya wamupeelanga amaka. (2 Tim. 4:17) Paulo yamunenyile ukuti wali nu kupokelela icilambu cino waombiile. Nupya Yeova waomvizye ya cuza acisinka ukwazwa Paulo.
20. Tungakolanya uli utailo uno Paulo wakweti uwalembwa pali Loma 8:38, 39?
20 (4) Kucita vino twabelenga. Muyuzye mweineco ukuti, ‘Ningakolanya uli Paulo?’ Wakwe vino cali kuli Paulo, naswe kwene tulinzile ukwenekela ukuti yalatucuzya pa mulandu nu kuombela Yeova. (Mako 10:29, 30) Pakuti tutwalilile ukuombela Yeova ni cisinka nga twakwata intazi, tulinzile ukutwalilila ukupepa kuli Yeova nu kuisambilizya Izwi lyakwe lyonsi. Nupya tulinzile ukulaiusya lyonsi ukuti cicindamisye cino tulinzile ukucita, u kupeela Yeova ululumbi. Tulinzile ukusininkizya ukuti Yeova atalatala atusye nupya pasi cili consi icingalenga ate ukututemwa.—Belengini Loma 8:38, 39; Ayeb. 13:5, 6.
SAMBILILINI KULI YAUZE ALI NI CISINKA ALEMBWA MULI BAIBO
21. I vyani vyazwilizye ya Aya na Hector ukucimvya intazi zino yakweti?
21 Malyasi alembwa muli Baibo yangalenga tukwate amaka yano tukulondekwa pakuti tuzizimizye intazi zili zyonsi zino twakwata. Wakwe nkazi Aya, painiya aakaikala uku Japan walanzile ukuti ilyasi lyakwe Yona lyamwazwile ukuta ukuya ni intete zya kusimikila ukukazanwa antu aingi. Hector uwacance aakaikala uku Indonesia wino avyazi yakwe yasiombela Yeova walanzile ukuti ilyasi lyakwe Luti likalenga alondesya ukusambilila pali Yeova nu kumuombela.
22. I vyani vingamwazwa ukuipakizya ivyangalo vya muli Baibo, nanti malyasi aaya mu cipande cakuti “Mwakolanya Utailo Wao”?
22 Aekwi kuno mungazana malyasi amuli Baibo aangamukomya? Mavidyo, ivyangalo vya mazwi yatupu alino ni cipande cakuti “Mwakolanya Utailo Wao” vingalenga malyasi amuli Baibo ukuya acumicumi. * Lino mutatala mwatamba, kukutika, nanti ukubelanga malyasi yaa, mwalenga Yeova ukuti amwazwe ukuzana masambililo acindame yano mungaomvya. Elenganyini ukuti ivikucitikila wino mukubelengapo vikucitikila mwemwe. Mwaelenganyapo sana pali vino aomvi yakwe Yeova yaa acisinka yacisile, na vino Yeova wayazwile ukucimvya intazi zino yakweti. Lyene mwaomvya vino mwasambilila kuli vino vikumucitikila. Mwataizya Yeova pali vino akumwazwa. Nupya mwalanga ukuti mukutaizya pali vino akumwazwa lino mukukomelezya yauze nu kuyazwa muli vino yakulondekwa.
23. Kulingana na Ezaya 41:10, 13, i vyani vino Yeova walaya ukutucitila?
23 Ivintu mu nsi ii ikatungululwa na Satana, vingatala sana, nupya insita zimwi tutanga tumanye ni vyakucita. (2 Tim. 3:1) Nomba tutalinzile ukusakamikwa nanti ukutiina. Yeova wamanya intazi zino tukakwata. Ndi cakuti twalondekwa uwazwilizyo, watulaya ukuti alatwalilila ukutwazwa. (Belengini Ezaya 41:10, 13.) Twasininkizya ukuti Yeova alatwazwa, nupya Baibo ikatupeela amaka yano tukulondekwa akuzizimizya intazi zili zyonsi.
LWIMBO NA. 96 Ibuku Lyakwe Leza I Cuma
^ pala. 5 Malyasi aingi aaya muli Baibo yakalangilila ukuti Yeova watemwa aomvi yakwe nupya alaayazwa umu ntazi zyonsi zino yakwata. Cipande cii cimalanda pa nzila ya kusambilililamo Baibo iingamwazwa ukusambilila ivingi ku malyasi yano mukubelenga.
^ pala. 2 Inzila ii ino twalandapo i nzila yonga sile pa nzila izingi zino mungaomvya pa kubelenga Baibo. Inzila zyuze zino mungaomvya pa kubelenga Baibo, mungazizana umwi buku lyakuti Ibuku Ilya Kwazwa Inte Zyakwe Yeova Ukulondelezya Ivyeo apa mutwe wakuti “Baibo” pa kamutwe kakuti “Kuwelenga nu Kuvwikisya Baibo.”
^ pala. 14 Mutalinzile ukubelenga ivikomo vii pi sambililo lya Lupungu lwa Mulinzi.
^ pala. 22 Lolini cipande cakuti “Mwakolanya Utailo Wao”—Aonsi na Anaci Amuli Baibo” pa jw.org. (Yangini apakuti VISAMBILIZYO VYA MULI BAIBO > KUTAILA MULI LEZA.)
