1-2. Aaweni aangazwa umusambi wa Baibo ukulunduluka ukufika nu ku lubatizyo?

YA AMY aakaikala ku Fiji yalanzile ukuti: “Natemilwe vino yansambilizyanga muli Baibo. Namanyile ukuti vyali i vya cumi. Nomba lino natandike ukuzanwa pamwi na ina na ya nkazi calenzile ukuti nsenuke nu kubatiziwa.” I vyacitikile ya Amy vikutusambilizya icintu cimwi icicindame icakuti: Umusambi wa Baibo angalunduluka ukufika ku lubatizyo ndi cakuti yauze umu cilongano yakumwazwa.

² Kasimikila wensi angazwilizyako ukuti icilongano cilunduluke. (Efes. 4:16) Painiya wi zina lyakuti Leilani aakaikala ku Vanuatu watiile: “Kwaya imvwango imwi ikalanda ukuti antu yonsi mu muzi yakaazwilizyako ukukuzya umwana. Nkulola ukuti vikwene avino caya na pa kupanga asambi, amu cilongano yalinzile kuombela pamwi pakuti umwi asambilile icumi.” Fwandi avyazi, ya lupwa, ivyuza na ya kasambilizya yonsi yakaazwilizyako pakuti umwana akule. Yakacita vii ndi cakuti yakumukomelezya nu kumusambilizya amasambililo acindame. Vikwene avino na ina na ya nkazi umu cilongano yangacita, yangakomelezya nu kulanga imiyele isuma uku musambi iingalenga alunduluke nu kubatiziwa.—Mapi. 15:22.

3. I vyani vino mwasambilila kuli vino ya Ana, ya Dorin na ya Leilani yalanzile?

³ U mulandu ci uno kasimikila aakatungulula isambililo lya Baibo alinzile ukuyela ni nsansa ndi cakuti amu cilongano yakwazwa umusambi wakwe? Uvwini vino nkazi Ana painiya umuiyele aakaikala ku Moldova walanzile, watiile: “Umusambi wa Baibo akalondekwa sana uwazwilizyo nupya cisi canguke  kasambililzya wakwe ukumwazwa muli vyonsi vino akulondekwa wenga sile.” Ya Dorin nayo kwene aakaomba upainiya uiyele uku Moldova yalanzile yati: “Ilingi ya kasimikila yangalanda cimwi cino nemo ntelenginye napo nupya icingafika umusambi pa mwenzo.” Ya Leilani yalanzile umulandu na uze uno tulinzile ukuyela ni nsansa lino yauze yakwazwa umusambi witu, yatiile: “Ndi cakuti umusambi walola vino aina na ya nkazi yakumulanga ukutemwa na vino iyamusakamala cingamwavwa ukuvwikisya vino antu yakwe Yeova yaya.”—Yoa. 13:35.

4. I vyani vino tumasambilila umu cipande cii?

⁴ Limwi mungaelenganya ukuti, ‘Uzye ningacita uli pakuti nazwe umusambi wa Baibo ukulunduluka lino asi nene nkamutungulula isambililo?’ Lekini tusambilile vino tungacita ndi cakuti umwi watunena ukuti tukazanweko lino akutungulula isambililo na vino tungacita ndi cakuti umusambi wa Baibo watandika ukuzanwa umu kulongana. Tumalola na vino ya eluda yangazwa asambi ya Baibo ukulunduluka ukufika nu ku lubatizyo.

5. I vyani vino mulinzile ukucita lino yamunena ukuti muzanweko pi sambililo lya Baibo?

⁵ Lino muli pi sambililo, u mulimo wakwe kasambilizya ukwazwa umusambi ukuvwikisya Izwi Lyakwe Leza. Ndi cakuti kasambilizya wamunena ukuti muye nawe ukwisambililo mulinzile ukulola ukuti mwemwe ya kazwa. U mulimo winu ukumwazwa. (Kasa. 4:9, 10) Nomba, mungacita uli pakuti muye ya kazwa yasuma lino muli pi sambililo?

6. Lino mwazanwako pi sambililo limwi, mungaomvya uli icisinte icaya pa Mapinda 20:18?

⁶ Mwapekanyizizya limwi isambililo. Inkoleelo, munguzya kasambilizya ukuti amuneneko ivyeo vimwi pa musambi wakwe. (Belengini Mapinda 20:18.) Mungamuzya ukuti: “I vyani vino wamanya pa musambi? I sambililo ci lino mulasambilila nawe? I vyani vino ukulonda umusambi ace asambilile umwi sambililo lii? Uzye kuli vino ndinzile ukucita nanti vino ntalinzile ukucita nanti ukulanda lino tuli pi sambililo? Uzye ningakomelezya uli umusambi pakuti alunduluke?” Ukuya kwene kasambilizya atalinzile ukulanda ivyeo vya nkama ivya musambi, nomba vino wamunena vingamwazwa. Misyonali wi zina lyakuti Joy akalanzyanya ivyeo vya musango uu na wino yakuomba nawe lino yakuya umukutungulula isambililo lya Baibo. Watile: “Ukulanzyanya na wino nkuomba nawe ivyeo vii kukalenga alondesya ukwazwa umusambi nu kumanya vino amaya akalande.”

7. U mulandu ci uno mulinzile ukupekanyizizya limwi lino mukulondela umwi ukwi sambililo?

⁷ Ndi cakuti umwi wamwama ukwi sambililo  cingazipa nga mwapekanyizizya limwi isambililo lino yakuya umukulanzyanya. (Ezila 7:10) Umwina Dorin wino itulandapo mpiti walanzile ukuti: “Nkauvwa ningo sana ndi cakuti wino tukuomba nawe atapekanya isambililo. Nga caya vivyo ala amalandangapo ivisinka ivisuma pi sambililo.” Nupya ndi caya vivyo, ala musambi amalola ukuti mwensi mweili imupekanya ningo sana nupya ala amasambililako ivintu ivisuma. Nanti icakuti mutange mupekanyizizye ningo isambililo lilyo, mungasyako kasita kamwi kakuti mupitulukemo sile mulole ivisinka ivilimo.

8. Mungasininkizya uli ukuti ipepo lino mu kupepa pi sambililo i lya mukulungatika?

⁸ Ipepo lyacindama sana pi sambililo, fwandi mwaelenganyizizya limwi vino mumalanda umwi pepo lino kasambilizya wamunena ukuti mumapepa. Lyene ipepo linu lilaya ilya mukulungatika. (Masa. 141:2) Ya Hanae yano yakaikala ku Japan, yacili yakaiusya amapepo yano nkazi wino yayanga na yano yayasambilizyanga Baibo wapepanga. Yalanzile ukuti: “Naweni ukuti nkazi wiya wali na ucuza ukome na Yeova, nupya nalondanga ukumukolanya. Nayuvwanga ukuti natemwikwa lino nkazi wiya walumbulanga izina lyane lino akupepa.”

9. Ukulingana na Yakobo 1: 19, i vyani vino mungacita pakuti muye ya kazwa yasuma pi sambililo?

⁹ Mwaazwilizya kasambilizya lino muli pi sambililo. Nkazi Omamuyovbi, aakaomba upainiya uiyele ku Nigeria, walanzile ati: “Kazwa musuma akakutikisya lino muli pi sambililo. Nupya akalandapo ivyeo ivisuma nomba asilandapo sana pano ala watamanya ukuti u mulimo wakwe kasambilizya ukutungulula isambililo.” Mungamanya uli lino mulinzile ukulandapo na vino mungalanda. (Mapi. 25:11) Mwakutikisya lino kasambilizya nu musambi ya kulanzyanya. (Belengini Yakobo 1:19.) Nga mwacita vivyo mungamanya insita ilinge iya kulandapo na vino mungalandapo. Ukuya kwene mulinzile ukwelenganyapo lino mutatala mwalanda. Wakwe, mutalinzile ukulandapo sana, ukuputukizya kasambilizya lino akulanda ivyeo vimwi nanti ukuletapo ilyasi lyuze. Nomba ndi cakuti mwalanda umu mazwi anono ukuomvya icilangililo nanti iuzyo, cingalenga icisinka cuvwike pi lyasi lino yakulanzyapo. Insita zimwi, mungayuvwa ukuti pasi vino mungalandapo. Nomba ndi cakuti mwataizya umusambi nu kulanga ukuti imumwikako amano cingalenga umusambi ukulunduluka.

10. Ndi cakuti mwasimikilako umusambi ivyamicitikile, vingamwazwa uli?

¹⁰ Mwayanenako ivyamucitikile. Nga calinga mungalondolwelako umusambi pali vino mwasambilile icumi, vino mwacimvizye intazi imwi nanti vino Yeova wamwavwa. (Masa. 78:4, 7) Vino mwamulondolwela vingamwazwa sana. Vingakomya utailo wakwe nanti ukumwazwa ukulunduluka ukufika nu ku lubatizyo. Nupya  limwi vingamwazwa ukumanya ivya kucimvya intazi ino akweti. (1 Pet. 5:9) Umwina Gabriel Painiya wa nsita yonsi aakaikala ku Brazil, akaiusya ivyamwazwile lino wasambililanga Baibo. Walanzile ukuti: “Lino nuvwile ivyacitikile aina yamwi nasambile ukuti Yeova akamanya intazi zino tukakwata. Nupya ndi cakuti yacimvizye intazi zizyo ale nani kwene ningacimvya.”

11-12. U mulandu ci uno tulinzile ukupokelela asambi ya Baibo ni nsansa lino iza umu kulongana?

¹¹ Pakuti umusambi wa Baibo alunduluke ukufika ku lubatizyo alinzile ukulazanwa umu kulongana lyonsi nu kuomvya vino akusambilila. (Ayeb. 10:24, 25) Ukwaula nu kutwisika, kasambilizya wakwe alamulalika umu kulongana pa muku wa kutandikilapo. Lino wiza uku kulongana swensi kwene tungamukomelezya ukuti atwalilile ukulaiza. Tungacita uli vivyo?

¹² Mwapokelela umusambi ni nsansa. (Loma 15:7) Ndi cakuti mwalenga musambi ukuyuvwa ukuti watapokelelwa cilalenga alondesya ukwiza umu kulongana. Ukucila ukulenga musambi ayuvwa ukuti atapokelilwe mulinzile ukumulamuka ni nsansa nu kumumanyisya kuli yauze. Mungalanda nawe pano limwi ala kasambilizya wakwe atatala wafika nanti limwi ala akuomba imilimo yuze umu Ng’anda ya Wene. Mwakutikisya lino umusambi akalanda nu kulanga ukuti imumwikako mano. Uzye mungazwa uli musambi ndi cakuti mwamupokelelela ni nsansa? Uvwini ivyacitikiile umwina Dmitrii, wino ipapita sile imyaka inono ukufuma pano wabatiziwilwe nupya ndakai u muomvi aakatumikila. Akaiusya vino cali lino waile umuku wa kutandikilapo umu kulongana, watiile: “Umwina umwi wanzanyile indi panzi ala nkuvwa intete zya kwingila, avino twingilile pamwi. Aingi izile umu kundamuka. Nazungwike sana. Natemilwe vino ukulongana kwali icakuti natandike ukwelenganya ukuti fwandi nga kwayanga kulongana cila wanda. Ntatazile nuvwepo vino nayuvwile uwanda uwa.”

13. Uzye imiyele inu isuma ingazwa uli musambi wa Baibo?

¹³ Mwalanga imiyele isuma. Imiyele inu isuma ingalenga umusambi wa Baibo ukusininkizya ukuti sweswe Ina Klistu ya cumi. (Mate. 5:16) Umwina Vitalii painiya aakaikala ku Moldova watiile: “Naweni vino yauze umu cilongano ikalanga, vino yelenganyanga, na vino yacitanga. Cii calenzile nsininkizye ukuti ya Nte Yakwe Yeova aakapepa ya cumi.”

14. Uzye imiyele inu isuma ingazwa uli umwi ukulunduluka?

¹⁴ Lino musambi atatala wabatiziwa alinzile ukulaomvya vino akusambilila. Citanguka ukucita vii. Nomba ndi cakuti musambi walola  vino ukulondela visinte vya muli Baibo kwamwazwa cilalenga alondesya ukumukolanya. (1 Kol. 11:1) Elenganyini pali vino vyacitikiile ya Hanae yano itulandapo mpiti. Yatiile: “Aina na ya nkazi yacitanga vino nasambililanga ukuti avino ndinzile ukulacita. Nasambilile vino ningakomelezya, ukweleela alino nu kulanga ukutemwa. Lyonsi yalandanga ivisuma pa antu yauze. Nalondanga ukulayakolanya.”

15. Uzye amazwi aaya pa Mapinda 27:17 yakatwazwa uli ukulola umulandu uno tulinzile ukuyela ya cuza nu musambi lino watwalilila ukwiza umu kulongana?

¹⁵ Mwalanga ucuza uku musambi. Lino musambi watwalilila ukulazanwa umu kulongana mwalanga ukuti mwamwikako amano. (Filipi 2:4) Mungezyako ukulalanda nawe pakuti mumumanye ningo. Ukucila ukumuzya amauzyo angamuvwisya insonyi mungamutaizya pali vino akulunduluka, mungamuzya na pali vino isambililo likupitika, pa lupwa lwakwe na pa ncito ino akaomba. Kulanzyanya kuu kungalenga muye ya cuza nu musambi. Nga mwaya ya cuza nu musambi mungamwazwa ukulunduluka ukufika nu ku lubatizyo. (Belengini Mapinda 27:17.) Ya Hanae ndakai lyene aapainiya ya nsita yonsi. Yakaiusya vino cali lino yazanyilwe umuku wa kutandikilapo umu kulongana, yatiile: “Natandike ukulondesya ukulaya umu kulongana nupya nazanwangako asi mulandu nintonta. Naipakizyanga ukuya ni vyuza ivipya nupya cii cangavwile ukuta ukuya na ucuza na antu aatapepanga Yeova. Nalondanga ukupalama sana kuli Yeova nu ku ina na ya nkazi. Fwandi napingwilepo ukubatiziwa.”

16. I vyani vino mungacita pakuti mwazwe musambi ukuyuvwa ukuti u wa mu cilongano?

¹⁶ Lino musambi akutwalilila ukulunduluka nu kusenuka, mwamwazwa ukuyuvwa ukuti uwa mu cilongano. Mungacita vii ndi cakuti mukupokelela aenyi. (Ayeb. 13:2) Umwina Denis aakaikala ku Moldova akaiusya ivyacitikanga lino wasambililanga Baibo, watiile: “Ilingi aina yangamanga na mamane ku kuyaizizya pamwi nayo. Yatunenanga vino Yeova wayavwanga. Na cico catukomelezyanga. Calenzile tusininkizye ukuti twalondesyanga ukuombela Yeova nu kuti twali nu kuipakizya ivintu ivisuma nga twacita vivyo.” Lino musambi waya kasimikila mungamunena ukuya nawe umu mulimo wa kusimikila. Umwina Diego kasimikila uwa ku Brazil watiile: “Aina aingi yanenanga ukuti tuye nayo umu mulimo wa kusimikila. Cangazwanga sana ukuyamanya ningo. Kucita vivyo, kwalenzile nsambilile ivingi nu kupalama sana kuli Yeova na Yesu.”

17. Uzye ya eluda yangazwa uli asambi ya Baibo?

¹⁷ Mwakwata insita ya kuya pamwi na asambi ya Baibo. Mwe ya eluda, ndi cakuti mukulanga  ukuti mwatemwa asambi nu kuyasakamala cilalenga yalunduluke nu kubatiziwa. Uzye mungalandako na asambi ya Baibo insita izingi ndi cakuti iza umu kulongana? Yalalola ukuti mwaikako mano ndi cakuti mukwiusya amazina yao sana sana ndi cakuti yakwasukapo. Uzye mungasyako insita ya kuya na kasimikila lino akuya umu kutungulula isambililo? Mungazwa sana musambi kucila na pali vino mukwenekela. Nkazi Jackie painiya wa ku Nigeria walanzile ati: “Asambi yane aingi yakazunguka ndi cakuti yamanya ukuti umwina wino tuli nawe a eluda. Umusambi wane umwi watiile: ‘Ya pasita itu yatange yacite vivyo. Yakatandalila sile akankala nupya ndi cakuti yayalipila sile!’” Ndakai lyene musambi wiyo akalongana.

18. Uzye ya eluda yangaomba uli ningo umulimo uno yapeelwa uwaya pa Milimo 20:28?

¹⁸ Mwasambilizya nu kukomelezya ya kasambilizya. Mwe ya eluda mwakwata umulimo ucindame sana uwakwazwa ya kasimikila ukuomba ningo umulimo wa kusimikila nu kusambilizya. (Belengini Milimo 20:28.) Ndi cakuti umwi akuvwa insonyi ukutungulula isambililo lino apano muli, mwaipeelesya ukutungula isambililo lilyo. Ya Jackie, yano itulandapo mpiti yalanzile ukuti: “Ilingi ya eluda yakanguzya pa asambi yane. Ndi cakuti nakwata intazi lino nkutungulula isambililo yakangazwa sana.” Ya eluda yangacita ivintu ivingi sana pa kukomelezya ya kasambilizya. (1 Tesa. 5:11) Ya Jackie yalanzile nu kuti: “Nkauvwa ningo ndi cakuti ya eluda yankomelezya nu kunena ukuti yakataizya pali vino nkaombesya. Nga caya vivyo nkateekeziwa sana. Vino yakanena vikalenga nayuvwa ukuti nkutungulula ningo masambililo na cico cikalenga naya sana nu luzango.”—Mapi. 25:25.

19. I vyani ivingalenga swensi tuye ni nsansa?

¹⁹ Nanti icakuti ndakai tusikutungula isambililo lya Baibo, tungazwa umwi ukulunduluka ukufika uku lubatizyo. Tungazwa kasambilizya ndi cakuti itupekanya ningo nu kulanda amazwi asuma lino tuli pi sambililo ukwaula ukulandapo sana. Lino asambi iza umu kulongano tungayalanga ucuza nu kuyalanga imiyele isuma. Nupya ya eluda yangakomelezya asambi ndi cakuti yakusyako insita ya kuya pamwi nayo nupya yangakomelezya na ya kasambilizya lino yakuyasambilizya nu kuyataizya. Ukwaula nu kutwisika, tukaya sana ni nsansa ndi cakuti twacitapo vimwi nanti icakuti ivinono ukwazwa umwi ukutemwa Yeova nu kulamuombela.