1. I cani cikalenga umuntu kuya ni miyele isuma nanti iipe?

 USI mulandu alino twacibatiziwe, nanti twabatiziwa mpiti, swensi kwene tukalonda ukuya ni miyele ino Yeova watemwa. Pakuti ciye vivyo, tulinzile ukucenjela na vino tukaelenganyapo. U mulandu ci? Pano vino tukaelenganya i vikalenga tuye ni miyele isuma nanti foo. Ndi cakuti tukwelenganya sana pali vino imili itu ikalonda, tulalanda nu kucita ivintu iviipe. (Efes. 4:17-19) Nomba, nga tukwelenganya sana pa visuma, ukwaula nu kutwisika tulalanda nu kucita ivintu ivikazanzya Tata witu, Yeova.—Gala. 5:16.

2. A mauzyo cii amaasukwa umu cipande cii?

² Wakwe vino twasambilile umu cipande icafumileko, insita zimwi tungatandika ukwelenganya pa viipe. Lelo tungasoololapo ukuta ukwelenganya pa vintu vivyo iviipe. Lino tutatala twabatiziwa, tukata ukulanda nu kucita ivintu vino Yeova wapata. Cico ali cintu icicindamisye cino tukacita pa kuzula untu wa mpiti. Nomba pakuti twazanzya Yeova lyonsi, tulinzile nu kuvwila isunde ilikati: “Zwalini untu upya.” (Kolo. 3:10) Mu cipande cii tumaasuka mauzyo yaa: Uzye “untu upya” ali cani? Tungacita uli pakuti tuzwale untu upya nu kutwalilila ukuya ni miyele iyaya umu untu upya?

3. Ukulingana na Galatiya 5:22, 23, uzye “untu upya” ali cani, nupya umuntu akalanga uli ukuti wazwala untu upya?

³ “Untu upya” u kwelenganya nu kucita vintu wakwe vino Yeova akalonda. Umuntu akalanga ukuti wazwala untu upya ukupitila umu kuya ni miyele iikafuma uku mupasi wakwe Leza, nu kuleka ukuti umupasi wa muzilo watungulula vino  akaelenganya, vino akayuvwa, na vino akacita. (Belengini Galatiya 5:22, 23.) Wakwe, umuntu wiyo watemwa Yeova na antu yakwe. (Mate. 22:36-39) Akatwalilila ukuya nu luzango lino akuzizimizya intazi. (Yako. 1:2-4) Waya uwa mutende. (Mate. 5:9) Akateekelela yauze nupya waya ni cikuuku. (Kolo. 3:13) Watemwa ivisuma nupya ali vino akacita. (Luka 6:35) Vino akacita vikalangilila ukuti wataila Tata witu uwa kwi yulu. (Yako. 2:18) Nupya akatwalilila ukuya umufuuke lino yauze yamusosya alino akaikaanya lino watunkwa ukucita vimwi.—1 Kol. 9:25, 27; Tito 3:2.

4. Pakuti tuzwale untu upya, u mulandu ci uno tulinzile ukuyela ni miyele yonsi iyaya pali Galatiya 5:22, 23 nu mu mabuku yauze aa muli Baibo?

⁴ Pakuti tuzwale untu upya tulinzile ukuya ni miyele yonsi iyaya pali Galatiya 5:22, 23 nu mu mabuku yauze aa muli Baibo. * Miyele ii itaya wa vyakuzwala vino tukasoolola ukuzwala conga pa nsita imwi. Alino imiyele ii ingi ikaombela pamwi. Wakwe, ndi cakuti umu cumi twatemwa antu yanji, tukayateekelela nu kuya ni cikuuku kuli aliyo. Nupya pakuti tuye miyele iya usuma kuli yauze, tulinzile ukuya aafuuke nu kuikaanya.

5. Uzye cikapiliula cani ukukwata “melenganyo yakwe Klistu,” nupya u mulandu ci uno tulinzile ukusambililila pa umi wakwe Yesu? (1 Kolinto 2:16)

⁵ Belengini 1 Kolinto 2:16. Pakuti tuzwale untu upya, tulinzile ukukwata “melenganyo yakwe Klistu.” Mu mazwi yauze tungalanda ukuti, tulinzile ukusambilila pali vino Yesu welenganyanga nu kulamukolanya. Yesu walangizyanga ningo sana imiyele iikafuma uku mupasi wakwe Leza. Wakwe vino miila isuma ikaomba ningo, Yesu nawe kwene walangizyanga imiyele yonsi yakwe Yeova. (Aeb. 1:3) Nga tukwelenganya wakwe vino Yesu welenganyanga cilalenga twacita ivintu wakwe vino wacitanga alino nu kuya ni miyele wakwe ino wakwetiko.—Filipi 2:5.

6. I vyani vino tulinzile ukwiusya lino tukwezya ukuzwala untu upya?

⁶ Uzye cingacitika ukuti twakolanya Yesu? Limwi tungaelenganya ukuti Yesu wali umumalilike. Ntanga nkwanisye ukuya wakwe vino wali. Ndi cakuti ali vino mukayuvwa, mwaiusya ivisinka vii. Ca nkoleelo, mwaumbwa  umu cata cakwe Yeova na cakwe Yesu. Fwandi mungasoololapo ukulayakolanya, nupya ivintu vilamuzipila nga mwacita vivyo. (Utan. 1:26) Cakwe ciili, umupasi wa muzilo wakwe Leza, wakwatisya maka umu uumbo onsi. Ungamwazwa ukucita ivintu vino mutanga mucite pa lwinu. Cakwe citatu, Yeova asienekela ukuti mwacita ivintu kwati mwamalilika. Alino Tata witu uwaya nu kutemwa, wapekanya iciputulwa ica nsita ica myaka 1,000 icakuti antu aakwata upaalilo uwa kwikala pano nsi yakaye amalilike. (Kuso. 20:1-3) Fwandi ndakai Yeova akalonda ukuti twaezya apapezile amaka itu nu kutaila ukwazwa kwakwe.

7. I vyani vino tumasambililapo?

⁷ A muli vyani muno tungakolanya Yesu? Tumalandako pa miyele 4 iikafuma uku mupasi wakwe Leza. Lino tukusambilila pa cisinka conga na conga, tumalola vino tungasambilila kuli vino Yesu walanganga imiyele iyo. Nupya tumalandanga na pa mauzyo yamwi angatwazwa ukutwalilila ukuzwala untu upya.

8. Uzye Yesu walangizye uli ukutemwa?

⁸ Yesu wapeezile ilambo pa mulandu wakuti watemilwe sana Isi Yeova alino naswe. (Yoa. 14:31; 15:13) Yesu walanganga ukuti watemilwe sana antu muli vino wacitanga lino wali pano nsi. Cila wanda, walanganga ukutemwa ni cikuuku nanti cakuti yamwi yamuzunyanga. Cintu icicindamisye cino walangilangamo ukuti watemilwe antu, u kuyasambilizya pa Wene Wakwe Leza. (Luka 4:43, 44) Nupya Yesu walangilile ukuti watemilwe sana Leza na antu ukupitila umu kuitemelwa ukucula nu kufwa imfwa iipisye. Na cii calenga ukuti swensi kwene tukwate isyuko ilya kwikala manda pe.

9. Tungakolanya uli vino Yesu walanganga ukutemwa?

⁹ Twaipeezile kuli Yeova nu kubatiziwa pa mulandu wakuti twatemwa Tata witu uwa kwi yulu. Fwandi, wakwe Yesu, tulinzile ukulanga ukuti twatemwa Yeova ukupitila muli vino tukacitila antu yanji. Mutumwa Yoani walemvile ukuti: “Aatatemwa umwinakwe wino akalola, atanga atemwe Leza, wino atalolapo.” (1 Yoa. 4:20) Tulinzile ukuyuzya ukuti: ‘Uzye natemwa sana antu yanji? Uzye nkatwalilila ukuya ni cikuuku kuli yauze nanti cakuti iyasoka, iyakalipa nu kukalipa? Uzye natemwa sana antu yanji icakuti nkaitemelwa ukuomvya insita yane ni vikwatwa ku kuyazwa ukusambilila pali Yeova? Uzye nkaitemelwa ukutwalilila ukucita vivyo nanti cakuti antu aingi yasikwika mano kuli vino nkucita nanti yakunkanya? Uzye ningaitemelwa ukulaomba insita ikulu mu mulimo uwa kupanga asambi?—Efes. 5:15, 16.

10. Uzye Yesu walangilile uli ukuti wali umuntu uwa mutende?

¹⁰ Yesu wali umuntu wa mutende. Lino antu yamwi yamucitilanga iviipe, wene atayacitilangako iviipe. Nomba wene, waitandikilanga ukupanga umutende na yauze nu kuyakomelezya ukuti yauvwana na auze. Wakwe, wayasambilizye ukuti nga yakulonda Yeova aapokelela ukapepa wao, yalinzile ukupanga umutende na antu yauze. (Mate. 5:9, 23, 24) Nupya imiku iingi wazwilizyanga atumwa yakwe lino yapaazyanyanga pali wino wali umukalamba.—Luka 9:46-48; 22:24-27.

11. Tungacita uli pakuti tuye antu aamutende?

¹¹ Kulunda pa kutaluka uku vyongo, kwaya na vyuze vino tulinzile ukucita pakuti tuye antu aamutende. Tulinzile ukutandikilapo ukupanga umutende na antu yanji nu kukomelezya aina na ya nkazi ukuti yauvwana.  (Filipi 4:2, 3; Yako. 3:17, 18) Tulinzile ukuyuzya ukuti: ‘Uzye i vyani vino nkulonda ukucita pakuti naya umuntu uwa mutende? Uzye nkatwalilila ukusokela umwina nanti nkazi ndi cakuti wanduvyanya? Nga ndi cakuti umwina nanti nkazi wanduvyanya, uzye nkaleka ukuti aliwe atandikilepo ukulanda nani pakuti tupange umutende nanti nene nkatandikilapo? Uzye lino calinga, nkakomelezya atiyapusana ukuti yapange umutende?’

12. Uzye Yesu walanganga uli cikuuku?

¹² Yesu wali ni cikuuku. (Mate. 11:28-30) Walanganga icikuuku ukupitila umu kuicefya nu kukanaumilila pa cintu conga na lino ivintu ivitala. Wakwe, lino umwanaci umwina Fonisya wamupaapasile ukuti apozye umwana wakwe, pa kutandika, Yesu wakanyile ukupozya umwana wakwe, nomba lino umwanaci walangizye utailo, Yesu wapozizye umwana wakwe. (Mate. 15:22-28) Nanti cakuti Yesu wali ni cikuuku, walungikanga aaluvyanyanga. Insita zimwi, walanganga icikuuku ukupitila umu kuya umusipe nu kulungika antu yano watemilwe. Wakwe, lino Petulo wezizye ukulesya Yesu ukucita ukulonda kwakwe Yeova, Yesu wamukalipile ala na asambi yauze yakuvwako. (Mako 8:32, 33) Yesu atacisile vivyo pakuti azewanye Petulo, lelo walondanga ukumusambilizya nu kucelula asambi yauze ukuti yatalinzile ukuya ni cilumba. Ukwaula nu kutwisika, Petulo afwile uvwileko insonyi nomba wasambilile kuli vino Yesu wamunenyile.

13. Tungacita uli pakuti twaya sana ni cikuuku kuli yauze?

¹³ Pakuti tulange ukuti twaya sana ni cikuuku kuli yano twatemwa, insita zimwi tukalondekwa ukuyalungika. Lino calondekwa ukucita vivyo, mwakolanya Yesu ukupitila umu kuomvya ivisinte ivyaya umwi Izwi Lyakwe Leza lino mukulungika yauze. Mwaya ateekele. Mwaiusya ukuti yakalondesya ukucita ivisuma nupya mwataila ukuti antu aatemwa Yeova nupya aatemwa namwe kwene, yaluvwila vino mukuyalungika. Mulinzile ukuyuzya ukuti: ‘Uzye nkasipa nu kulungika umuntu wino natemwa nga nalola ukuti vino akucita visi ningo? Uzye lino nkulungika yamwi nkaya ni cikuuku lino nkulanzyanya nayo, nanti limwi cikantalila ukucita vivyo? I cani cikalenga nalonda ukulungika yauze? Uzye nkalungika yauze pa mulandu wakuti nayapata nanti nkacita vivyo pa mulandu wakuti nayatemwa?’

14. Uzye Yesu walanganga uli ukuti wali umuntu umusuma?

¹⁴ Yesu wamanyile ivisuma nupya wacitanga vivyo kwene. Yesu watemilwe Isi, fwandi lyonsi wacitanga ivilungame. Umuntu musuma akalonda ukwazwa antu yauze lyonsi nupya akayacitila ivisuma. Tutalinzile sile ukupelela pa kumanya ivisuma vino tulinzile ukucitila yauze, lelo tulinzile ukucitila yauze ivisuma, mu nzila isuma. Yamwi yangayuzya ukuti, ‘Uzye umuntu angacitila yauze ivisuma ala akwelenganya iviipe?’ Ee, cingacitika. Wakwe, Yesu walanzile pa yantu azwilizyanga apiina lelo pa cisila ica kucita vivyo, ala yakulonda ukuti antu yonsi yamanye vino iyacita pakuti yayalumbaanya. Nanti cakuti vino yacitanga vyali ningo vitazanzyanga Yeova.—Mate. 6:1-4.

15. Tungacita uli pakuti tuye sana ni miyele iya usuma?

¹⁵ Tungalanga ukuti sweswe antu asuma sana ndi cakuti tukucitila yauze ivisuma umu nzila isuma. Limwi mungayuzya ukuti: ‘Uzye nkacitila yauze ivintu vino imanya ukuti ivisuma? I cani icikalenga nalonda ukucitila yauze ivisuma?’

16. I vyani vino tulinzile ukulacita cila wanda, nupya u mulandu ci?

¹⁶ Tutalinzile ukulaelenganya ukuti nga twabatiziwa sile ala casila ituzwala untu upya nupya kusi vili vyonsi vino tulinzile ukucita. Untu upya waya wa cakuzwala icipya cino tulinzile ukusunga ningo. Inzila yonga ino tungacitilamo vivyo, u kulola inzila zino tungaalangilamo imiyele iikafuma uku mupasi wakwe Leza cila wanda. U mulandu ci? Pano Yeova asi a Leza akalanda sile, lelo akacita na vino walanda. (Utan. 1:2) Fwandi imiyele iikafuma uku mupasi wakwe Leza ingatwazwa ukulacitila yauze ivisuma, nupya vivyo kwene avino cilinzile ukuya. Wakwe, umusambi uwi zina ilyakuti Yakobo walemvile ukuti: “Utailo uwaula imilimo wafwa.” (Yako. 2:26) Nupya vivyo kwene avino caya nu ku miyele iikafuma uku mupasi wakwe Leza. Lyonsi lino twalanga imiyele iyo, ala tukulanga ukuti umupasi wakwe Leza ukutwazwa.

17. Uzye tulinzile ukucita uli ndi cakuti twafilwa ukulanga imiyele ino umupasi wa muzilo ukalenga itukwata?

¹⁷ Na aina Klistu kwene aakuti yalengela pano yabatiziwilwe, insita zimwi cikayatalila ukulanga imiyele ino umupasi uwa muzilo ukatulenga ukukwata. Fwandi cacindama sana ukukanatoovoka. Elenganyini pali cii: Ndi cakuti ica kuzwala cino mwatemwa calepuka, uzye mungacisumba papo kwene? Awe foo. Limwi mungatemwa ukucisuma pano icilepuka nga cingasumika. Mungaacisunga ningo pakuti citakalepuke nupya. Umu nzila ili imwi kwene, ndi cakuti mwafilwa ukulanga icikuuku, ukuteekela, nu kutemwa kuli umwi, mutalinzile ukutoovoka. Nga mwalenga uwelelo ukufuma pansi ya mwenzo, cingalenga ukuti mutwalilile ukuya na ucuza usuma nu muntu wiyo. Nupya mwalondesya ukucitila yauze ivisuma.

18. I vyani vino tungasininkizya?

¹⁸ Tukataizya sana pa kukwata Yesu wino tungakolanya. Nga tukukolanya sana vino Yesu welenganyanga na vino wacitanga, cilatwangukila ukucita wakwe vino wacitanga. Nga tukucita ivintu wakwe vino Yesu wacitanga, cilatwangukila ukuzwala untu upya. Mu cipande cii, itusambilila sile pa miyele 4 iikafuma uku mupasi wakwe Leza. Cingazipa nga mwapatulako insita iya kwelenganya pa miyele yuze iikafuma uku mupasi ino tutalanzilepo, alino nu kulola vino mungalanga ningo imiyele iyo. Mungazana ivipande ivikalanda pi lyasi lii nga mwaya umwi Ibuku Ilya Kwazwa Inte Zyakwe Yeova Ukulondelezya Ivyeo api lyasi lyakuti “Uwina Klistu” alino mulole apakuti “Miyele Ino Umupasi Ukatulenga Ukukwata.” Mungasininkizya ukuti ndi cakuti mukwezya apapezile amaka inu ukutwalilila ukuzwala untu upya, Yeova alamwazwa.