PA MULANDU wakuti tukaikala mu nsi ii umwaya macuzi, tulinzile ukuombesya pakuti tuye nu mutende. Insita zimwi nanti icakuti itukwata umutende, cikatala pakuti tuusungilile. I vyani vino Izwi Lyakwe Leza lyalandapo ivingatwazwa ukutwalilila ukuya nu mutende wa cumi? Nupya tungacita uli pakuti twazweko na yauze ukuya nu mutende?

Pakuti tuipakizye mutende wa cumi, tulinzile ukuvwa ukuti sweswe yacingililwe nupya pasi icikutusakamika. Nupya tulinzile ukukomya ucuza witu na yauze. Ni cicindamisye icingalenga ukutwalilila ukuya nu mutende u kukomya ucuza witu na Leza. Tungacita uli vivyo?

Ndi cakuti tukuvwila amasunde yakwe Yeova alungame alino ni visinte, tukalanga ukuti twamutaila nu kuti tukalondesya ukukwata ucuza usuma na aliwe. (Yele. 17:7, 8; Yako. 2:22, 23) Lyene nawe akapalama kuli sweswe nupya akatupeela umutende. Ilembelo lyakwe Ezaya 32:17 likati: ‘Mu mpanga mulaya mutende, pano umuntu wensi alaacita ivilungame.’ Tungaya nu mutende ndi cakuti tukuvwila Yeova nu mwenzo onsi.—Eza. 48:18, 19.

Nupya tukatwalilila ukuya nu mutende wa cumi pa mulandu nu wila uno Tata witu wa kwi yulu watupeela, ali kuti umupasi wa muzilo.—Mili. 9:31.

Pa miyele ino ‘umupasi wa muzilo ukatulenga ukukwata’ ino umutumwa Paulo walemvile, umutende ali wakwe citatu. (Gala. 5:22, 23) Vino umupasi wakwe Leza ukalenga tuye nu mutende, tulinzile ukuombesya ukuya nu mutende wa cumi. Lekini tulande pa nzila ziili muno mupasi wakwe Leza ukatwazwa ukuya nu mutende.

 Ica kutandikilapo, tukaya nu mutende ndi cakuti tukuwelenga Izwi Lyakwe Leza lyonsi. (Masa. 1:2, 3) Lino tukwelenganya pa mazwi aya muli Baibo, umupasi wakwe Leza ukatwazwa ukuvwikisya vino Yeova akaelenganya pa vintu ivingi. Tukalola vino wene waya nu mutende alino nu mulandu uno mutende wacindamila sana kuli aliwe. Ndi cakuti tukuomvya vino tukusambilila muli Baibo, tukaya sana nu mutende mu mikalile itu.—Mapi. 3:1, 2.

Cakwe ciili, tulinzile ukulenga umupasi wa muzilo kuli Leza. (Luka 11:13) Yeova watulaya ukuti ndi cakuti twamulenga, ‘alatupeela mutende uno kusi umuntu nanti wenga angaumanyikisya. Mutende kwene uu, ulaatungulula umi witu ni myelenganyizizye itu.’ (Filipi 4:6, 7) Ndi cakuti twataila sana umupasi wa muzilo, Yeova alatupeela umutende uno akapeela sile yacuza yakwe.—Loma 15:13.

Uzye yamwi yaacita uli pakuti yalondela ukusunda ukwa mu Malembelo nu kusenuka muli vimwi ivingalenga yatwalilile ukuya nu mutende wa cumi na Yeova alino na antu yauze?

Mu vilongano vya Ina Klistu ndakai mwaya yamwi yano pa nsita imwi yali aakali nomba ndakai yasenuka, yaya ni cikuuku, yateekela nupya yakaaya nu mutende lino yakuomba na antu yauze. * (Mapi. 29:22) Lolini vino umupasi wavwile ya kasimikila ya Wene ukucimvya intazi ya kusoka nu kutandika ukuvwana na antu yauze.

Imiyele iipe ino David wakweti yalenzile ukuti imivwangile yakwe nayo kwene iipe. Lino atatala waipeela kuli Leza, watazile sana ku yantu yauze nupya wapontelanga na ya lupwa yakwe. Lino papisile insita David waweni ukuti alinzile ukusenuka nu kuya nu mutende. Uzye wacisile uli pakuti aye nu mutende? Walanzile ati: “Natandike ukuomvya ivisinte vya muli Baibo mu umi wane, ni cacitike i cakuti twatandike ukucindikana mu lupwa.”

Inkulilo yakwe Rachel yononyile imiyele yakwe. Walanzile ati: “Na likwene nkacula nu ukali pano nakulile mu lupwa umwali antu  akali.” I vyani ivyamwavwile ukuya nu mutende? Walanzile ati: “Nkapepa kuli Yeova lyonsi.”

David na Rachel ayano twalandapo sile aakweti miyele ya mutende ino tukakwata ndi cakuti tukuomvya ivisinte vya mu Malembelo nu kutaila ukuti mupasi wa muzilo umatwazwanga. Fwandi asi mulandu nu kwikala mu nsi ii itale, tungakwata umutende ukalenga twauvwana na ya lupwa itu alino na Ina Klistu yanji. Yeova watunena ukuti, “mwikale mu mutende na antu onsi.” (Loma 12:18) Uzye icangupale ukucita vivyo, nupya i visuma ci ivikacitika ndi tukuombesya pakuti tuye nu mutende?

Lino tukuomba umulimo wa kusimikila, tukaavwa antu kuvwa ukwi landwe lya mutende ilikalanda pa Wene Wakwe Leza. (Eza. 9:6, 7; Mate. 24:14) Cikaleta uluzango pano aingi yakauvwa. Fwandi ndakai yasisoka sana pa mulandu ni viipe ivikacitika mu ncende ino iikalamo. Lyene yakwata upaalilo wa cumi muli vino vilacitika ku nkoleelo nupya calenga ‘yalonda ukuya nu mutende nu kuulondela.’—Masa. 34:14, Upangano Upya na Masamu.

Nomba asi yonsi aakauvwa ukwi landwe lino tukakosoola. (Yoa. 3:19) Nanti ciye vivyo, umupasi wakwe Leza ukatwazwa ukuyasimikila ilandwe lisuma mu mutende nupya mu mucinzi. Nga tukucita vii, ala tukulondela vino Yesu watunenyile pa mulimo wa kusimikila ivyalembwa pali Mateo 10:11-13, pano walanzile ukuti: ‘Lino mwingila mu ng’anda mutale muti, “Mutende uye namwe.” Aineco ya ng’anda ndi yamuzengela, mutende winu ulaya panoyali, lelo ndi yakana kumuzengela, mutende winu ulamuwelela.’ Ndi twalondela ukusunda kwakwe Yesu, tungaya nu mutende nupya tungakwata isyuko lya kwazwako yauze ku nkoleelo.

Nupya tukalenga kuye mutende lino tukulanda na aomvi ya mu uteeko mu mucinzi ukwikako sile na yayo aakakanya mulimo witu uwa kusimikila. Uteeko uwa calo cimwi ica mu Africa wazumilizye ukuti twafyengwa pakuti aakazumilizya ukukuula ivikulwa yakaanye ukukuula Mang’anda ya Wene. Pakuti uwavya uu ucimviwe mu mucinzi, umwina uwaomvilepo umisyonali ku cisila mu ncende ya Africa yamupeezile mulimo wa kuyatandalila mukalamba wa mu uteeko mu London ku England. Wali nu kunena mukalamba wii pa mulimo usuma uno ya Nte Yakwe Yeova yakaomba mu mpanga iiya. I vyani vyacitike lino waileko?

Walanzile ati: “Lino nafisile pano yakapokelelela aenyi, naweni imizwalile ya mukazyana uwampokelile nupya nasondwelile ukuti wafumile ku mutundu wa yantu yano namanyile ululimi lwao. Fwandi namulamwike mu lulimi lwakwe. Wazungwike nu kunguzya ati, ‘U mulandu ci uno mwizila?’ Namunenyile ala inteekela inti nkulonda ukulolana nu mukalamba wa mu uteeko. Wamutumile foni, nupya lino wizile wandamwike mu lulimi lwakwe. Ukufuma papo, wisileko amano pa kuvwa kuli vino nalondolwile pa milimo isuma ino ya Nte yakaomba.”

Vino umwina wii walondolwelile umuomvi wa uteeko mu mucinzi, calenzile muomvi wii ate ukwelenganya iviipe pali ya Nte nu kuta ukupata imiombele yao. Lino papisile insita, uteeko wa mu mpanga iyo wasenwile amasunde yano wiisileko pa makuule. Aina yatemilwe wakwe cimwi pi lyasi lii! Fwandi ukuya nu mucinzi ku yantu yauze kungalenga ivisuma ivingi ukucitika nupya pangaya umutende.

Ndakai, antu yakwe Yeova yakaipakizya umutende uwaya muli paladaise wa unkolanya. Mungalundulula umutende uwo ndi cakuti mukuombesya ukukwata imiyele yi ino mupasi wakwe Leza ukalenga tukwate. Ni cacindama sana i cakuti Yeova alamutemwa nupya mulatwalilila ukuya nu mutende mu nsi ipya.—2 Pet. 3:13, 14.