1. U mulandu ci uno yamwi yakafililwa ukukwata amaka ya kuisambilizya?

NDAKAI, antu aingi yakalondekwa ukuombesya pakuti yakwate impiya izilinge izya kuomvya mu mikalile yao. Aina itu aingi yakaomba amaawala aingi cila wanda pakuti sile yalondele indupwa zyao ivya kulya, ivya kuzwala nu mwakwikala. Aina yauze aingi sana, nayo yakamala amaawala aingi cila wanda pakuti yakafike kuno yakaombela nu kuwela. Yauze nayo yakaomba imilimo ikome sana pakuti sile yalondele indupwa zyao ivikulondekwa. Ndi cakuti wanda wasila aina yaa na ya nkazi aakaombesya yakatonta sana! Ni cikacitika icakuti aingi yasikwata na maka ya kuisambilizya.

2. A lilaci lino mukaisambilizya?

² Icisinka i cakuti, tulinzile ukukwata insita ya kuisambilizya Izwi Lyakwe Leza ni mpapulo zitu. Avino tulinzile sile ukucita ndi cakuti tukulonda ukukwata ucuza usuma na Yeova alino nu umi wa pe ku nkoleelo. (1 Tim. 4:15) Yamwi yakazyuka katondotondo cila wanda iyaisambilizya lino mu ng’anda mutatala mwaya icongo nupya lino imyelenganizizye yao ili ningo sana pa mulandu wakuti yafuma yaizi. Yauze nayo yakaomvya amamineti anono manguzi lino kusi icongo pakuti yaisambilizye vyakwe Leza nu kwelenganyapo.

3-4. U kusenuka ci ukwacitika ku mpapulo zino tukawelenga na mavidyo yano tukatamba, nupya u mulandu ci?

³ Ukulanda sile icisinka, mungalanda ukuti ukuisambilizya kwacindama sana. I vyani vino tulinzile ukuisambilizya? Limwi mungalanda muti, ‘Ivya kuwelenga vyavulisya. Nkafilwa ukuwelenga vyonsi.’ Yamwi yakakwanisya ukuwelenga impapulo zyonsi zino yapokelela nu kutamba amavidyo yonsi atiyafuma, nomba ina itu na ya nkazi aingi yene cikayatalila ukuzana insita ya kucita vivyo. Amwi Umba Ilikatungulula yamanya vivyo. Ali mulandu  kwene uno yapingwile ukuti impendwa ya mpapulo izikapulintwa icepeko alino nu kucefya amavidyo akafuma.

⁴ Twata kufumya Ibuku Lya pa Mwaka Lyakwe ya Nte Yakwe Yeova, pa mulandu wakuti twakwata ivingi ivyacitikile antu ivikatukomelezya pa jw.org^® alino na mapulogilamu apa JW Broadcasting^® aakafuma cila mwezi. Na ya magazini ya ku yantu yonsi aa Lupungu Lwa Mulinzi na Zyukini! ndakai yakafuma sile imiku itatu mu mwaka. Ukusenuka kuu kutaayelileko pa mulandu wakuti antu yakwata insita ikulu yakuombamo ivya pa lwao. Icalenzile kuye ukusenuka kuu a pakuti tukwate insita yakwika amano ‘ku vintu vicindame.’ (Filipi 1:10) Lekini tulande pali vino tungacita pakuti twakolezya ivindamisye na vino tungaipakizya lino tukuisambilizya Baibo.

5-6. I mpapulo ci zyuze zino tulinzile ukuwelenga nu kwelenganyapo sana?

⁵ I vyani vino tulinzile ukutandikilapo ukuisambilizya? Cila wanda tulinzile ukukwata insita ya kuisambilizya Baibo. Yacefyako ivyeo vino tukakwata pa kulongana kwa mukasi ka mulungu pakuti twakwata insita ikulu iyakwelenganya pali vino tukuwelenga alino nu kulondelezya ivyeo na vyuze mu mpapulo zitu. Tutalinzile kuwelenga pakuti sile tumale iciputulwa cino iyatantika ica kuwelenga umulungu onsi, lelo tulinzile ukwikako amano pakuti ilandwe lya muli Baibo lingile mu myenzo itu nu kutwazwa ukupalama sana kuli Yeova.—Masa. 19:14.

⁶ I vyani vyuze vino tulinzile ukuwelenga nu kwelenganyapo sana? Tukalonda kupekanya isambililo lya Lupungu Lwa Mulinzi alino ni Sambililo Lya Baibo pa Cilongano kwikako sile ni ivyeo ivikaya mu kulongana kwa mukasi ka mulungu. Nupya tulinzile nu kuwelenga Lupungu Lwa Mulinzi lwa yantu yonsi na Zyukini!

7. Uzye tulinzile ukutoovoka ndi cakuti tukufilwa ukuwelenga nanti ukutamba vyonsi ivikaya pa webusaiti itu na pa JW Broadcasting?

⁷ Limwi mungati ‘awe cuvwika,’ nomba ‘ivipande vya kuwelenga na mavidyo ivikaya pa jw.org, alino ni vyeo ivikaya pa JW Broadcasting vyavulisya sana!’ Nomba elenganyini pali cii: Tuti imuya ku winga lyene mwazana iyapekanya ivya kulya ivingi sana. Uzye mungalonda mpaka mulye ivya kulya vyonsi ivilipo? Awe, limwi mungasoololapo sile vinono avino mulye. Avino caya na pa kuisambilizya, ndi cakuti mutanga muwelenge ivyeo vyonsi ivikaya pa intaneti, mutalinzile ukutoovoka. Mulinzile ukuwelenga nanti ukutamba vino mungakwanisya. Fwandi lekini lyene tulande pali vino cikapiliula kuisambilizya alino na vino mungacita pakuti mwaipakizya lino mukuisambilizya.

8. I vyani vino tungacita lino tukupekanya Lupungu Lwa Mulinzi, nupya ukucita vivyo kungatwazwa uli?

⁸ Ukuisambilizya u kuwelenga ala watuwika sana mano kuli vino ukuwelenga pakuti usambilile icintu cimwi icicindame. Asi ukuwelenga sile zuwa zuwa nu kusila apali ivyasuko. Pa kupekanya Lupungu Lwa Kusambililamo, mufwile ukutandikilapo ukupituluka umu vyeo ivikalanda pali vino tumasambililapo ivikaya pa kutandika kwa cipande. Lyene, welengini nu kwelenganya pa mutwe wa cipande, alino nu tumitwe utunono na mauzyo ya kupitulukamo. Welengini icipande panono panono ala imwikako sana mano. Ikini sana mano kuli sentensi iikulondolola vino palagalafu ikulandapo ino ilingi ikaaya i yakutandikilako muli palagilafu. Ilingi sentensi iyo ikaazwilizya ukumanya icisinka cino palagilafu ikulondolola. Lino mukuwelenga icipande, mwaelenganya pali vino palagalafu wenga na wenga akutungilila utumitwe alino ni cikulandwapo sana umu cipande consi. Mwalemba amazwi yano mutamanyile na  vino mukusambililako vino mutaamanyile vino mungatemwa ukumanyilapo na vyuze.

9. (a) U mulandu ci uno tulinzile ukwikila sana amano ku malembelo lino tukusambilila Lupungu Lwa Mulinzi? (b) Ukulingana na amazwi aya pali Yoswa 1:8, i vyani na vyuze vino tulinzile ukwikako amano kuluta sile pa kuwelenga malembelo?

⁹ Lino tukusambilila Lupungu Lwa Mulinzi pa kulongana, cikatwazwa ukuvwikisya Baibo. Fwandi, mwaika amano ku malembelo maka maka yaya aalawelengwa lino mulasambilila cipande cico pamwi ni cilongano. Mwaika sana amano kuli vino amazwi ali mwi lembelo yakuvwana ni cisinka icili muli palagilafu. Nupya lino mukuwelenga mwakwata insita yakwelenganya sana pa malembelo na pali vino mungaomvya ivyeo vino mwawelenga mu umi winu.—Welengini Yoswa 1:8.

10. Ukulingana na vino tukasambilila pa Ayebulai 5:14, u mulandu ci uno avyazi yalinzile ukukwatila insita pa kupepa kwa lupwa iya kusambilizya ana ivya kuisambilizya nu kulondelezya ivyeo?

¹⁰ Avyazi yakalonda ukuti ana yao yaipakizya Ukupepa Kwa Lupwa cila mulungu. Nomba, nanti icakuti avyazi yalinzile ukupekanyizizya limwi vino yalasambilila pa kupepa kwa lupwa, yatalinzile ukwelenganya ukuti lyonsi yalinzile ukupekanyako vimwi iviiyele nanti ivya kuzanzya ana cila mulungu. Nanti cakuti pa Kupepa Kwa Lupwa yangamala insita ikalamba ala yakutamba pulogilamu iya pa JW Broadcasting ikafuma cila mwezi, nanti ukulondako vimwi iviiyele ivya kuomvya pa kusambilila ivili wa kupanga iciwato cakwe Nowa, cacindama sana ukusambilizya ana ivya kuisambilizya. Yalinzile ukumanya ivya kupekanya ukulongana, ni vya kulondelezya ivyeo ivikulanda pa cuzyo cino ya kasukulu yauze yayuzya. (Welengini Ayebulai 5:14.) Ndi yakukwata insita ya kuisambilizya Baibo pa ng’anda, cilayangukila ukuvwikisya ivyeo ivikalandwa pa kulongana kwakwe cila mulungu, ukwa ciputulwa nu kwa citungu, muno ilingi musiya ivya kutamba vino ana yatemwa sana. Ukuya kwene, avyazi aliyo yalinzile ukulola utali wa nsita ino yangaomvya pa kupepa kwa lupwa kulingana nu musinku wa yana alino na vino cila mwana waya.

11. U mulandu ci uno cacindamila ukusambilizya asambi itu a Baibo ivya kuisambilizya?

¹¹ Asambi yano tukasambilizya Baibo nayo tulinzile ukuyasambilizya ivya kuisambilizya. Lino yacili apya, tukatemwa sana ukulola kuno yakusila ivyasuko lino yakupekanya ukuti tukasambilile nayo nanti lino yakupekanya ivya pa kulongana kwa cilongano. Nomba tulinzile ukusambilizya asambi itu ivya kulondelezya ni vya kuisambilizya ningo lino yali yonga. Ndi tukucita vivyo, nanti lino yaponelwa ni ntazi yatalauzya sile yauze amu cilongano ukuti yayazwe, yalamanya ivya kuzana ivyeo ivingayazwa lino yakulondelezya umu mpapulo zitu.

12. Uuyo ci uno tulinzile ukukwata lino tukuisambilizya?

¹² Ndi cakuti mutatemwa ukuisambilizya, mungaelenganya ukuti cisi canguke ukuipakizya lino ukuisambilizya. Nomba mungaaipakizya. Mungatandikilapo ukulaisambilizya pa nsita inono sile lyene mukuya kwa nsita mungalundako insita yakuisambilizya. Mwakwata uyo lino mukuisambilizya. Icicindame sana cino tulinzile ukucita u kukwata uyo wa kupalama sana kuli Yeova. Uyo uno tungaombelapo zuwa sana u wa kulondelezya ivyeo ivya kuomvya pa kwasuka umwi uwatuuzizye iuzyo nanti ivya kutwazwa lino tuli ni ntazi.

13. (a) Londololini vino uwacance angacita pakuti alondolole vino wazumilamo ku sukulu. (b) Uzye mungaomvya uli ukusunda ukwaya pali Kolose 4:6?

¹³ Uzye wewe wacance akaya ku sukulu? Limwi cingaya ukuti amu kalasi yonsi yazumila ukuti ivintu vyasangwike sile. Limwi ungatemwa ukuti uyanene umulandu uno wazumilila ukuti ivintu vyaumvile kulingana na vino Baibo ikasambilizya. Fwandi ulinzile ukuisambilizya pa mulandu uwo! Lino ukuisambilizya ulinzile ukukwata mauyo yaili: (1) ukukomya utailo wako muli vino wazumila ukuti Leza u waumvile ivintu vyonsi na (2) ukumanya ivya kulondolola ningo vino wazumilamo. (Loma 1:20; 1 Pet. 3:15) Ulinzile ukutandikilapo ukuyuzya ukuti, ‘U mulandu ci uno amu kalasi yakulandila ukuti yazumila mu kusanguka?’ Lyene ulinzile ukulondelezya ningo mu mpapulo zitu. Limwi ungalondolola ningo sana vino wazumilamo ukuluta na vino ukaelenganya. Antu aingi yazumila ukuti ivintu vyasangwike sile pa mulandu wakuti umwi wino yacindika sana wayanena ukuti vino yazumilamo ivya cumi. Ndi cakuti wazana cisinka conga nanti viili vino ungayanena pa mulandu uwo, limwi ungazwa umwi akalondesya ukusambilila icumi.—Welengini Kolose 4:6.

14-16. (a) I vyani vino mungacita pakuti mumanye ivingi pi buku lya muli Baibo lino mutamanyapo ivingi? (b) Londololini vino amalembelo atiyaomviwa yangamwazwa ukuvwikisya ningo ibuku lyakwe Amosi. (Lolini kambokosi akakuti “ Mwalola Ivyalembwa Muli Baibo Ukuti Ivya Cumi Cumi!”)

¹⁴ Mwelenganye ukuti pa kulongana kwakwe cila mulungu ukulalondelelapo mulawelenga nu kulanzyanya ibuku lya muli Baibo pali kasema umwi wino mutamanya ningo uwaya pali ya kasema aalemvile amabuku aya pakasi kakwe Hosiya na Malaki. Ica kutandikilapo mulinzile ukulondesya ukumanya vino kasema wiyo walemvile. Uzye mungacita uli vivyo?

¹⁵ Inkoleelo, mulinzile ukuyuzya muti: ‘I vyani vino namanya pa muntu uwalemvile ibuku lii? Uzye wali a weni, aekwi kuno wikalanga, umulimo ci uno waombanga?’ Ndi cakuti twamanya ivingi pali kalemba wiyo tunguvwikisya umulandu uno waomvizye amazwi nanti ivilangililo vino waomvizye. Lino mukuwelenga Baibo, mwalola amazwi angamwazwa ukumanya vino kalemba wiyo wali.

¹⁶ Cakwe ciili, ndi mwamanya lino ibuku lilyo lyalemvilwe cilamwazwa sana. Cingamwangukila ukumanya zuwa ndi cakuti mwapituluka mu utantiko wa “Mabuku ya Muli Baibo” uwaya ku cisila cakwe Baibo wa Malembelo ya Nsi Ipya (New World Translation of the Holy Scriptures.) Nupya mungalola pa musilwa wa nsita ukalanda pa nsita ino ya kasema na yene yaliko muli Appendix A6. Ndi cakuti ibuku lya muli Baibo lino mukuisambilizya likalanda pa usowelo, cingazipa ndi cakuti mwamanya vino ivintu vyali lino ibuku lilyo lyalembwanga. I miyele ci iipe nanti ivicitwa iviipe vino antu yacitanga vino kasema wiyo wali nu kuyanena ukutalukako? Aaweni aliko pa nsita ili imwi na ino kalemba wiyo waliko? Pakuti muvwikisye ningo vino cali, mulinzile ukulondelezya mu mabuku na yauze amuli Baibo. Pakuti muvwikisye ningo sana ivyacitikanga mu manda yakwe  kasema Amosi, mulinzile ukuwelenga ivikomo ivyaya mu mabuku yaili 2 Yamwene na 2 Milandu aya mu mutande wa vyeo na vyuze pali Amo. 1:1. Nupya mungawelenga na vino Oseya walemvile, u waliko pa nsita ili imwi na ino Amosi waliko. Ndi cakuti mwawelenga amabuku kwene yaa amuli Baibo yangamwazwa ukumanya vino ivintu vyali mu manda yakwe Amosi.—2 Yamw. 14:25-28; 2 Mila. 26:1-15; Ose. 1:1-11; Amo. 1:1.

17-18. Ukuomvya ivyativilandwa muli palagilafu nanti vyuze vino mwamanya, langililini vino ukwika sana amano uku tuntu utunono kungalenga ukuisambilizya Baibo ukuzipa sana.

¹⁷ Lino tukuwelenga Baibo, cikazipa ndi cakuti tukulondesya ukumanyilapo na vyuze. Tuti mukuwelenga icipande 12 ica mwi buku lya usoowelo lyakwe Zakaliya, icikalanda pa mfwa yakwe Mesiya. (Zaka. 12:10) Ndi cakuti mwafika pa cikomo 12, mungawelenga ukuti “aluko lwakwe Natani” yaali nu kuloosya alino nu kuvwa ulanda sana pa mfwa yakwe Mesiya. Ukucila ukupitapo sile vivyo kwene ukwaula ukusumbako amano, mulinzile ukutala imwimilila nu kuyuzya mweineco imuti: ‘U kulemana ci ukwaya pa yantu amu luko lwakwe Natani alino na Mesiya? Uzye kuli inzila imwi ino ningazanilamo ivyeo na vyuze pi lyasi lii?’ Mulinzile ukwezya “ukulondelezya.” Ivyeo na vyuze vingamutungulula kuli 2 Samueli 5:13, 14, kuno mungasambilila ukuti Natani wali pa yana ya Mwene Davidi. Ivyeo na vyuze ivyaya pali Luka 3:23, 31, vikalanda ukuti Yesu wali uwa mu mupanda wakwe Natani ukupitila muli Maliya. (Lolini “Yosefu, mwana wakwe Heli,” ivyeo vyakusambilila pali Luka 3:23.) Papo kwene mungatemwa ivyeo vivyo. Mwamanyile ukuti kwaya usoowelo ukalanda ukuti Yesu wafumile mu mupanda wakwe Davidi. (Mate. 22:42) Nomba Davidi wakweti ana aonsi ukucila pali 20. Fwandi acino Zakaliya walandiile pa yantu amu  luko lwakwe Natani ukuti yaali nu ukulosya pa mfwa yakwe Yesu.

¹⁸ Pali na cuze cino mungelenganyapo. Umu cipande ca kutandikilako cakwe Luka, tukawelenga ukuti umungeli Gabilieli watandalile Maliya nu kumumanyisya icintu cimwi icakuzungusya pa mwana wino wali nu kukwata ati: “Alaya mukulu nupya alaamwa Umwana wakwe Leza uwa papelapela. Mwene Leza alamupeela uwene wakwe Davidi cikolwe cakwe, nawe alaya Umwene wa ina Izlaeli pe na pe.” (Luka 1:32, 33) Limwi lino tukuwelenga tungika sile mano pa mazwi ya kutandikilako yano Gabilieli walanzile, akuti Yesu wali nu kwamwa “Mwana wakwe Leza uwa papelapela.” Nomba Gabilieli wasoowile nu kuti Yesu “alaya Umwene.” Fwandi limwi tungati uzye Maliya welenginye vyani pa mazwi yano Gabilieli walanzile? Uzye ale welenginye ukuti Gabilieli walozizye umu kuti Yesu wali nu kupyana Umwene Helodi nanti ukwiza pyana umwi pali ya kateeka aatekanga umu Izlaeli? Ndi cakuti Yesu wali nu kuya umwene, Maliya wali nu kuya nyina wa Mwene, nupya ulupwa lwakwe lwali nu kwikala ukwi sano. Nomba pataaya pano Baibo ikalanda ukuti Maliya watazile anenapo Gabilieli ivya musango uu nanti pano yalanda ukuti Maliya waleenzile icifulo icisuma umu Wene, wakwe vino asambi yakwe Yesu yaili yacisile. (Mate. 20:20-23) Akantu kwene kaa akanono kakatwazwa ukumanya ukuti Maliya wali umwanaci uwaicefizye sana!

19-20. Ukulingana nu ulondolozi uwaya pali Yakobo 1:22-25; 4:8, a mauyo ci yano tulinzile ukukwata lino tukuisambilizya Baibo?

¹⁹ Lekini twaiusya ukuti, umulandu uno tukasambililila Baibo ni mpapulo zitu, tukalonda ukupalama sana kuli Yeova. Nupya tukalonda ukumanya ningo ‘vino twaya’ na vino tulinzile ukuombelapo pakuti twazanzya Leza. (Welengini Yakobo 1:22-25; 4:8.) Fwandi lyonsi lino tukutandika ukuisambilizya Baibo, tulinzile ukuleenga Yeova pakuti atupeele umupasi wakwe. Tulinzile ukumuleenga ukuti atwazwe ukuvwikisya vino tukusambilila nu kulola pano tungazifya umu micitile itu iya vintu.

²⁰ Lekini swensi tuye wa muntu wakwe Leza wino kalemba wa masamu walondolwile ukuti: ‘Wene akazangila mu kuyela amazwi yakwe Yeova, nu kuyelenganyapo usiku nu musanya. Nupya muli vyonsi vino akacita asiposiwa.’—Masa. 1:2, 3.