1. I vyani vino Yesu walanzile pa kusungila ivyuma ukwi yulu?

ASI mawila yonsi aakaloleka. Alino amawila acindame sana ali yano yasiloleka. Umwi Lyasi Lya pa Mwamba, Yesu walanzile pa vintu ivicindame sana ukuluta pa mpiya. Nupya watiile: “Ukuli vyuma vinu, ukuli ni myenzo inu kwene.” (Mate. 6:19-21) Ndi cakuti twacindikisya ivintu vimwi, tukalondesya ukuti tuvikwate. Tukasungila ivyuma vitu ukwi yulu nga tukupanga izina lisuma na Leza nu kumuombela. Yesu walanzile ukuti ivyuma vivyo vitanga vyononeke nupya kusi angiya.

2. (a) Ukulingana na 2 Kolinto 4:17, 18, i vyani vino Paulo watunenyile ukwikako mano? (b) I vyani vino tumasambilila umu cipande cii?

² Mutumwa Paulo watunenyile ukwika mano ku “vintu vino visyaloleka.” (Welengini 2 Kolinto 4:17, 18.) Pa vintu vii visyaloleka paya ni vintu visuma vino tulaipakizya umu nsi ipya yakwe Leza. Mu cipande cii, tumasambilila pa vintu 4 vino tusyalola vino twakwata ndakai kuli kuti ucuza witu na Leza, uwila wa kupepa, vino umupasi wakwe Leza ukatwazwa na vino Yeova, Yesu na angeli yakatwazwa mu mulimo wa kusimikila. Nupya tumalanda na pali vino tungacita pakuti tulange ukuti tukataizya pa vintu vii.

3. U wila ci ukalamba uno twakwata usyaloleka, nupya i cani icalenga tukwate uwila uwo?

³ Pa mawila asyaloleka, uwila ucindame sana a ucuza na Yeova Leza. (Mapi. 3:32) Uzye cingacitika icakuti Leza aye cuza  wa antu aatamalilika nu kutwalilila ukuya uwa muzilo? Ee cingacitika, pano ‘imfwa yakwe Yesu ikafumyapo maifyo ya antu.’ (Yoa. 1:29) Na lino Yesu atatala wafwa, Yeova wamanyile ukuti Yesu alatwalilila ukuya uwa cisinka kufika nu ku mfwa pakuti akakulule antu. Ali mulandu uno Yeova wayelile cuza wa antu na lino Klistu atatala wafwa.—Loma 3:25.

4. Landiniko pa antu yamwi aliko lino Yesu atatala wiza pano nsi aali ya cuza yakwe Leza.

⁴ Lekini tulande pa antu aliko lino Yesu atatala wiza pano nsi aali ya cuza yakwe Leza. Abulaamu wali umuntu uwakweti sana utailo. Na lino papisile imyaka ukucila pali 1,000 Yeova wamwamile ukuti “cuza wane.” (Eza. 41:8) Cico cikupiliula ukuti nanti icakuti umuntu wafwa, ala Yeova acili akumulola ukuti a cuza wakwe. Yeova acili akaiusya Abulaamu. (Luka 20:37, 38) Muze nawe a Yobo. Lino Angeli yonsi yakolongine ukwi yulu, Yeova walanzile pali Yobo. Yeova walanzile pali Yobo ukuti “wankwatila umucinzi ni coopo, nupya wene akafuntuka ku kucita akantu akali konsi akaipe.” (Yobo 1:6-8) Uzye Yeova uvwile uli pali Danieli uwatwalilile ukuya uwa cisinka pa myaka 80 mu mpanga umwali antu aatapepanga Yeova? Pa miku itatu angeli yanenyile umukoloci wii ukuti Leza wamutemilwe. (Dan. 9:23; 10:11, 19) Tungasininkizya ukuti Yeova akalondesya ukutuutulula ya cuza yakwe yano yafwa.—Yobo 14:15.

5. I vyani vikalondekwa pakuti umuntu aye cuza wakwe Yeova?

⁵ Antu yanga ndakai aakaipakizya ucuza na Yeova? Aingi sana. Twamanya vivyo apa mulandu wakuti, aonsi aingi, anaci na ana umu nsi yonsi yakalanga muli vino yakacita ukuti yakalonda ukuya ya cuza yakwe Leza. “Aololoke ali yakundwe yakwe” Yeova. (Mapi. 3:32) Ucuza uwo ukaomba pano antu yaa yataila umu mfwa yakwe Yesu. Pa mulandu wa mfwa yakwe Yesu, tungaya ya cuza yakwe Yeova nupya tungaipeela kuli aliwe nu kuwatiziwa. Ndi cakuti twacita ivintu vii ivicindame, tukaya pa antu aingi sana aipeela nu kuwatiziwa ukuya Aina Klistu aakaipakizya ucuza usuma na Wino wakulisya pa uumbo onsi!

6. Tungalanga uli ukuti tukataizya pali ucuza witu na Leza?

⁶ Tungalanga uli ukuti twacindika ucuza witu na Leza? Wakwe Abulaamu na Yobo aatwalilile ukuya acisinka kuli Leza, naswe kwene tulinzile ukutwalilila ukuya acisinka asi mulandu ni myaka uwingi ino twaombela Yeova umu nsi ii. Wakwe Danieli, tulinzile kucindikisya sana ucuza witu na Leza kucila umi witu. (Dan. 6:7, 10, 16, 22) Yeova angatwazwa ukuzizimizya intazi zyonsi zino tungakwata, fwandi tungatwalilila ukuya ya cuza yakwe lyonsi.—Filipi 4:13.

7. (a) Ukulingana na Mapinda 15:8, Uzye Yeova akayuvwa uli pa mapepo itu? (b) Uzye Yeova akaasuka uli mapepo itu?

⁷ Uwila nauze uno tusyalola, iipepo. Ya cuza aatemwana sana yatemwa ukulanzyanya pali vino yakwelenganya na vino yakuyuvwa. Uzye avino na ucuza witu na Yeova waya? Ee! Yeova akalanda naswe ukuomvya Izwi lyakwe, nupya umwi Izwi lyakwe ali muno akatunena vino akaelenganya na vino akayuvwa. Tukalanda na aliwe ukupitila umwi pepo nupya tungamunena vino tukwelenganya na vino tukuyuvwa. Yeova akauvwa ningo sana ukukutika ku mapepo itu. (Welengini Mapinda 15:8.) Vino Yeova a cuza uwaya nu kutemwa, asikutika sile uku mapepo itu lelo akaasuka nu kwasuka. Insita zimwi, Yeova akaasuka zuwa sana. Insita zimwi zyene, tungatwalilila ukupepa pali vino vikutucuzya. Nomba  nanti ciye vivyo tungataila ukuti alatwasuka pa nsita ilinge nupya umu nzila isuma. Kuya kwene, vino Leza wasuka ipepo litu, limwi vingapusana na vino tukwelenganya. Wakwe insita zimwi, atanga afumyepo intazi ino tukweti lelo angatupeela amano na maka ya kuzizimizya.—1 Kol. 10:13.

8. Uzye tungalanga uli ukuti tukataizya pa wila wa kupepa?

⁸ Tungalanga uli ukuti tukataizya pa wila ucindame uno twakwata uwa kupepa? Tungalanga vivyo nga tukuvwila amazwi yano Yeova watunena aakuti “pepini nsita zyonsi.” (1 Tesa. 5:17) Yeova asitupatikizya ukupepa. Lelo, akacindika amaka yano twakwata aakuisoolwela ivyakucita, nupya akatunena “kupepa nsita zyonsi.” (Loma 12:12) Fwandi tungalanga ukuti tukataizya nga tukupepa insita izingi cila wanda. Kuya kwene tutalinzile ukwilila ukutaizya nu kulumbanya Yeova umu mapepo itu.—Masa. 145:2, 3.

9. Uzye umwina umwi akayuvwa uli api pepo, nga mwemo mukayuvwa uli?

⁹ Lino tukuya tukuombela Yeova nu kulola vino akaasuka mapepo itu, tukatwalilila ukutaizya api pepo. Uvwini vino ya Chris aombela Yeova ukucila pa myaka 47 yalanzile. Yatiile: “Nkauvwa ningo ukuzyuka katondo nu kupepa kuli Yeova. Cikazipa sana ukulanda na Yeova lino sile kwaca ale ni vintu vyonsi vikuloleka ningo! Cii cikalenga namutaizya pa vintu vyonsi vino wancitila ukwikapo sile nu wila wa kupepa. Lyene ndi cakuti napepa lino uwanda wasila, nkaya mu kulaala ale indi na kampingu musanguluke.

10. U mulandu ci uno tulinzile ukutaizizya pa mupasi wa muzilo uno Leza akatupeela?

¹⁰ Umupasi wa muzilo wakwe Leza u wila nauze usyaloleka uno tulinzile ukutaizya sana. Yesu watunenyile ukuti tulinzile kutwalilila ukupepela umupasi wa muzilo. (Luka 11:9, 13) Yeova akatupeela amaka aakafuma kuli aliwe ukuomvya umupasi wakwe uwa muzilo. (2 Kol. 4:7; Mili. 1:8) Ndi cakuti umupasi wakwe Leza watwazwa, tungazizimizya intazi zyonsi zino tungakwata.

11. Uzye umupasi wa muzilo ukatwazwa uli?

 ¹¹ Umupasi wa muzilo ungatwazwa ukuomba ningo umulimo onsi uno twapeelwa lino tukuombela Yeova. Umupasi wa muzilo ungalenga twaomba ningo sana imilimo ino twamanya. Twamanya ukuti ivisuma ivikacitika pa cisila ca kuomba umulimo umwi uno twapeelwa lino tukuombela Leza, vikacitika pa mulandu sile uwakuti umupasi wa muzilo ukatwazwa.

12. Ukulingana na Masamu 139:23, 24, tungapepela umupasi wa muzilo ukuti utwazwe ukucita vyani?

¹² Inzila na yuze ino tungalangilamo ukuti twacindika umupasi wa muzilo wakwe Leza, u kuleenga Yeova pakuti tumanye ndi cakuti tukwelenganya pa viipe nanti ukulondesya ukucita iviipe. (Welengini Masamu 139:23, 24.) Ndi cakuti twapepela pali vivyo, Yeova alalenga tumanye iviipe vino tukwelenganya nanti vino tukulonda ukucita ukuomvya umupasi wakwe uwa muzilo. Nupya nga twamanya ukuti itutandika ukuya na melenganyo aipe nanti tukulondesya ukucita iviipe, tulinzile kupepela umupasi wakwe Leza ukutupeela amaka ya kucimvya amelenganyo aipe nanti ukulondesya kucita iviipe. Nga twacita vivyo, Yeova alalola ukuti tusilonda ukucita ivili vyonsi ivingalenga aleke ukutwazwa kuomvya umupasi wakwe uwa muzilo.—Efes. 4:30.

13. Tungacita uli pakuti twataizya pa mupasi wa muzilo?

¹³ Tungatwalilila ukutaizya pa mupasi wa muzilo ndi cakuti tukwelenganya pali vino tukucita ndakai. Lino Yesu atali aswilile ukwi yulu, wanenyile asambi yakwe ukuti: “Lelo lino umupasi wa muzilo uliza panomuli, mulazuziwa na maka, mulaya yakambone yane . . . kufika na kuno insi yapela.” (Mili. 1:8, NWT) Vikwene i vikucitika na ndakai. Yeova walonganika antu 8 milyoni na citika aaya ya kapepa yakwe umu nsi yonsi ukuomvya umupasi wa muzilo. Nupya swe yantu yakwe Leza twalemana nupya twaya amutende umu nsi yonsi pano umupasi wa muzilo ukatwazwa ukukwata imiyele isuma wakwe, ukutemwa, uluzango, umutende, ukuteeka umwenzo, icikuuku, usuma, utailo, ukufuuka  nu kuikakanya. (Gal. 5:22, 23) Ala umupasi wa muzilo u wila ucindame sana!

14. U wila ci uusiloleka uukatwazwa lino tukuomba umulimo wa kusimikila?

¹⁴ Twakwata uwila usyaloleka uwa ‘kuombela pamwi’ na Yeova, Yesu na angeli. (2 Kol. 6:1) Tukacita vivyo lyonsi lino tukuombako umulimo wa kupanga asambi. Paulo walanzile pa mwineco na yonsi aakaomba umulimo uu ukuti: “Tukaombela pamwi na Leza.” (1 Kol. 3:9, NWT) Lyonsi lino tukuombako umulimo wa kusimikila ala tukuombela pamwi na Yesu. Iusyini ukuti pa cisila lino Yesu wanena alondezi yakwe ukuti “yangini konsi mu nsi mucite antu amu nko zyonsi ukuya alondezi” watiile: “Namayanga pamwi namwe.” (Mate. 28:19, 20) Nga angeli yene tukaombela pamwi nayo uli? Tukataizya vino angeli yakatutungulula lino tukunena “landwe lisuma lya manda pe . . . ku antu amuno nsi.”—Umbw. 14:6.

15. Landini api lyasi limwi lya muli Baibo ilikulangilila umulimo ucindame uno Yeova wakwata.

¹⁵ Uzye vino Yeova, Yesu na angeli yakatwazwa, vikalenga tukwanisye ukucita cani? Lino tukukomela imbezu zilandwe lya Wene, zimwi zikaponela pa myenzo isuma nu kukula. (Mate. 13:18, 23) A weni aakalenga imbezu zii ukukula nu kuseeka ivizao? Yesu walondolwile ukuti kusi umuntu angaya umulondezi wakwe kano sile ndi cakuti “Tata . . . wamuleta kunondi.” (Yoa. 6:44) Baibo ikalandapo api lyasi lya musango uu. Iusyini lino Paulo wasimikiile ukwi umba lya anaci aali ukunzi ya musumba wa Filipi. Uvwini vino Baibo ikalanda pa mwanaci wenga uwi zina lyakuti Lidya, ikati: “Mwene wayuzile amano yakwe kuti auvwe kuli vino Paulo wavwanganga.” (Mili. 16:13-15) Wakwe Lidya antu aingi sana yakupalama kuli Yeova.

16. A weni aalinzile ukucindikwa ndi cakuti icisuma cimwi cacitika umu mulimo wa kusimikila?

¹⁶ A weni aalinzile ukucindikwa pa visuma ivikacitika umu mulimo wa kusimikila? Paulo waswike iuzyo lii lino walembelanga amu cilongano ca mu Kolinto amazwi yakuti: “Nemo natile imbezu, Apolo nawe azikontelela manzi, lelo Leza aliwe walenzile kuti zikule. Muntu wino akata imbezu nanti wiyo akakontelela, oili yasi cimwi. Cikalamba u kusakamala kwakwe Leza, wino akalenga kuti vimelwa vikule.” (1 Kol. 3:6, 7) Wakwe Paulo, tulinzile lyonsi ukulalumbanya Yeova pa visuma vyonsi ivikucitika umu mulimo wa kusimikila.

17. Tungalanga uli ukuti tukataizya api syuko lino twakwata ilya ‘kuombela pamwi’ na Leza, Klistu na angeli?

¹⁷ Tungalanga uli ukuti tukataizya api syuko lino twakwata ilya ‘kuombela pamwi’ na Leza, Klistu na angeli? Tungacita vivyo ndi cakuti tukwezya na maka ukunenako yauze api landwe lisuma. Kwaya inzila izingi zino tungacitilamo vivyo, izili wakwe ukusimikila kuno kukazanwa antu aingi nu ku ng’anda ni ng’anda. (Mili. 20:20) Aingi nayo yakaipakizya ukusimikila umwi lyasi. Ndi cakuti yakomana nu muntu wino yatamanya, yakamulamuka cikuuku cikuuku nu kwezya ukutandika ukulanda nawe. Ndi cakuti umuntu waloleka kwati akulonda ukulanda nawe, yakatandika ukulanda api landwe lya Wene umu mucenjelo.

18-19. (a) Tukakontelela uli imbezu zya cumi? (b) Landini pali vimwi ivyacitike ivikalangilila vino Yeova wazwilizye umusambi wa Baibo umwi.

¹⁸ Vino sweswe yaomvi aakuombela pamwi na Leza tulinzile ukukomela imbezu zya wene nu kukontelela. Ndi cakuti umwi walanga ukuti akulondesya ukuvwa, tulinzile ukwezya na  maka ukuswililako nu kuyalanda nu muntu wiyo nanti ukutantika ukuti umwi akayeko nu kutandika ukusambilila Baibo. Lino tukutwalilila ukusambilila, tukaya sana ni nsansa nga twalola vino Yeova akwazwilizya umusambi witu uwa Baibo ukusenula imyelenganyizizye yakwe na vino akayuvwa.

¹⁹ Elenganyini pali vino vyacitikiile ya Raphalalani aali a sing’anga uku South Africa. Yatemilwe sana vino yasambililanga muli Baibo. Nomba cayatalilanga sana ukuzumila vino Baibo ikalanda pa kulanda na afwe. (Malan. 18:10-12) Panono panono yalesile ukuti Leza ayatungulula muli vino yelenganyanga. Patalengiile, izile iyata using’anga nanti icakuti ali mulimo sile uno yaombanga umwakusungila ulupwa. Ya Raphalalani, aali ni myaka 60 ndakai, yalanzile ukuti: “Nkataizya sana ya Nte Yakwe Yeova pa kungazwa sana umu nzila izingi wakwe ukungazwa ukuzana incito. Ni cicindamisye icakuti nkataizya sana Yeova pa kungazwa ukusenula imiyele yane nu kuya Inte Yakwe Yeova pakuti naombako umulimo wa kusimikila.

20. I vyani vino mukulondesya ukucita?

²⁰ Umu cipande cii, itusambilila pa mawila 4 aasiloleka. Uwila ucindame sana pali yonsi u wa kuya cuza wakwe Yeova umusuma. Ndi cakuti twaya ya cuza yakwe Yeova, tungakwata amawila na yauze aasuma aasiloleka wakwe ukulanda nawe umwi pepo, ukulola vino umupasi wa muzilo ukutwazwa alino na vino aaya ukwi yulu yakatwazwa mu mulimo wa kusimikila. Fwandi lekini twalondesya ukulataizya sana pa mawila yaa asiloleka. Nupya lekini twatwalilila ukutaizya Yeova pa kuya cuza musuma.