Ivyacitike uwanda uwa usiku vyalenzile nsenuke pano alino natandike ukulonda ukumanya Leza. Nomba lino ntatala namisimikila ivyalondelilepo ukucitika usiku uwanda uwa, lekini imisimikile ivyancitikile lino nali umwance ivyalenzile ntandike ukulondesya ukusambilila pali Leza.

Navilwe umu 1937 ku Guesnain ku mikoti iyayela uku France. Ya tata yaombanga pa mugodi nupya yansambilizye vino cacindama ukuombesya. Ya tata yansambilizye nu kupata ulufyengo, yaweni vino antu yacuzyanga aomvi ya pa mugodi nu kuomba umu ncende umwali sana uzanzo. Fwandi ya tata yalondanga ukuyazwa, ya tata ingile umu kaungwe akavwangilanga aomvi ya pa migodi pa sambu zino yakweti. Nupya yasosile pali vino ya simapepo aikalanga uku ncende itu yali nu usomvi. Aingi ikalanga ningo nomba yalenganga impiya ni vyakulya uku yaomvi ya pa migodi aculanga pakuti sile yakwate vino yakulondekwa. Ya tata yasosile sana pali vino ya simapepo yacitanga icakuti yatansambilizye icili consi pa mipepele. Ningati sile tutalandangapo pali Leza.

 Lino nakulanga, nani kwene natandike ukupata ulufyengo. Icintu conga cino naweni ukuti citali ningo i cakuti antu aingi yapasile antu afumile uku mpanga zyuze iza umu kwikala umu France. Naipakizyanga ukuteya bola na ana yakwe yano yafumile uku mpanga zyuze. Nani kwene ya mayo yali aina Poland, yatali aku France. Nalondanga antu ankanda izipusanepusane ukwikala pamwi umu mutende nu kulacitila ivintu pamwi .

Ningile usilika umu 1957. Vikwene avino cali pakuti njizane umu myamba ya ku Algeria uwanda uwa usiku wakwe vino indondolola pa kutandika. Pa cisila ca kupepa kuli Leza kuti angazwe nalolanga kwati nimakomenkana nu mulwani wane umusilika, nomba nizile ndola punda wa mpanga. Nuvwile ningo! Ivyacitike uwanda uwa alino ni nkondo iyacitikanga vyalenzile nayuzya ukuti; U mulandu ci uno twayela pano nsi? Uze Leza akatusakamala? Uzye tulatala tuye nu mutende manda pe?

Lino naile umukutandala uku yavyazi yane, nakomenkinye Nte Wakwe Yeova umwi. Wampezileko Baibo wa mu Cifrench wino ya Katolika yasenula (La Sainte Bible) ino natandike ukubelenga lino naswilile ku Algeria. Ilembelo limwi lino natandike ukwelenganyapo sana ilya Umbwilo 21:3, 4, NWT. Pakati: “Lolini! Itenti lyakwe Leza lili pamwi na antu . . . Nupya ala yakumbula aminsozi yonsi, kutalaya imfwa, kutalaya ukuloosya nanti ukulila nanti ukuvwa ukuwaika.” * Amazwi yaa yanzungwisye. Nayuzizye nemwico ndi cakuti amazwi yaa yangaya acumi. Pa nsita iya ntamanyile nanti acimwi pali Leza na pali Baibo.

Lino natile usilika umu 1959, nakomenkinye ya François ansambilizye ivingi ivya mu Baibo. Wakwe, yandangilile muli Baibo ukuti Leza wakwata izina lyakuti Yeova. (Masa. 83:18) Ya François yandondolwelile nu kuti Yeova alafumyapo ulufyengo lonsi pano nsi, ukulenga insi yonsi ukuya paladaise, nu kufikilizya amazwi aya pali Umbwilo 21:3, 4.

Vino yansambilizyanga vyuvwikanga ningo sana nupya vyamfisile pa mwenzo. Nomba nani kwene nasokiile ya simapepo icakuti nalondanga nu kuyanena ukuti yakasambilizya ivintu ivitaya muli Baibo! Pa nsita iya ala ncili nkwelenganya wakwe ya tata nupya nalondanga ukufumyapo zuwa ulufyengo. Nalonganda ukucitapo cimwi!

Ya François na ya cuza yane yauze ya Nte yangazwile ukuteeka umwenzo. Yandondolwelile ukuti umulimo witu swe ina Klistu asi wa kupingula yauze lelo uwa kuyapeela upalilo ukupitila umu kuyasimikila ilandwe lya Wene. Ali mulimo uno Yesu waombanga nupya ali mulimo uno wapeezile alondezi yakwe ukuomba. (Mate. 24:14; Luka 4:43) Nupya nasambilile ni vyakulanda na antu umu nzila isuma nupya umu cikuuku. Baibo ikalanda ukuti: “Muomvi wa Mwene atalinzile kulemanila. Wene alinzile kuya uwa luse kuli onsi, nupya aye kasambilizya musuma akateeka mwenzo”—2 Tim. 2:24.

Nasenwike muli vino nalondekwanga nu kubatiziwa ukuya Inte Yakwe Yeova umu 1959 pa  ukongano wa Ciputulwa. Akuno twaloline na nkazi Angèle, nupya namutemilwe. Natandike ukutandalila icilongano cino walonganangako nupya twizile itutwalana umu 1960. U mwanaci umusuma sana, umuci umusuma, nupya u wila ukufuma kuli Yeova.—Mapi. 19:14.

Pa myaka ingi, nasambilila amasambililo acindame ku ina acenjele nupya amanyikisya imilimo. Isambililo lyonga ilicindame sana ilyakuti tungaomba umulimo onsi ukome ndi cakuti ituicefya nu kulondela amazwi aya pali Mapinda 15:22, akalanda ukuti: ‘Lelo ukwavula yampandamano amapange yakafikiliziwa.’

Mu 1964 natandike ukulola ukuti amazwi yaa acumi. Mu mwaka kwene uwa, natandike ukuomba ngu mwangalizi wa ciputulwa kutandalila ivilongano ku kukomelezya aina na ya nkazi ukupalama kuli Yeova. Nomba nali sile ni myaka 27 pa nsita iya nupya ntamanyile ivingi. Fwandi naluvyanyanga. Nomba nezyanga ukusambilila kuli vino naluvyanyanga. Ni cicindamisye i cakuti nasambilile amasambililo aingi acindame uku ina amanyikisye imilimo.

Nkaiusya vimwi ivyacitike lino nali umwangalizi umupya lino natandalile icilongano ku Paris, umwina umwi uwisile mano kuli vyakwe Leza wanguzizye ndi cakuti angalandako nani. Nani “nazumile.”

Wanguzizye ukuti, “Louis uzye aaweni yano ya dokota yakatandalila?”

Naswike ukuti, “alwale.”

Walanzile ukuti: “I cisinka. Nomba nalola ukuti ukusumba sana insita ikulu na yayo akacita ningo muli vyakwe Leza, wakwe umwangalizi wa cilongano. Umu cilongano citu mwaya aina aingi na ya nkazi atovooka, apya, alino nakwata insonyi. Yangatemwa sana ndi cakuti wayanga pamwi nayo nanti sile ukulila capamwi icakulya uku mang’anda yao.”

Nuvwile ningo sana pali vino umwina wiya wanenyile. Ukutemwa kuno watemilwe imfwele zyakwe Yeova kwankomelizye. Nanti cakuti cantalile ukuzumila ukuti naluvyanyanga, papo kwene sile natandike ukucita vino wanenyile. Nkataizya Yeova pa ina aya wakwe wiya.

Umu 1969 ukufika umu 1973, yansonsile ukuya mwangalizi uku dipatimenti ikalolekesya pa vyakulya  pa maukongano ya mpanga izingi yaili umu Colombes, ku Paris. Apa ukongano uwaliko umu 1973, twalinzile ukupekanyizizya antu 60,000 ivyakulya apa manda 5! Ntamanyile vino twali nu kuomba umulimo uu. Nupya kwene icali nu kungazwa u kulondela ukusunda ukwaya pa Mapinda 15:22, u kuzyako yampanda mano. Nuzyizyeko aina amanyile ivingi pa mulimo wa kuombela uku vyakulya. Pa ina yayo pali aombelanga uku nyama, alimanga umusalu, yakeleka, alino na akalanga. Ukuombela pamwi kwalenzile tuombe umulimo uu uwali ukulu.

Mu 1973, Nemo na mamane yatwamile ukuya umu kuombela ku Betele ya ku France. Umulimo uno yampezile kuku nao kwene wali ukome. Nali nu kuzana inzila iyakutumilamo impapulo mu Africa ku Cameroon kuno yainzile umulimo witu pakasi kakwe 1970 na 1993. Ntamanyile ndi cakuti nali nu kukwanisya ukuomba umulimo uu. Umwangalizi wa musambo uku France waweni vino nayuvwanga, wankomelizye nu kulanda ukuti: “Aina ku Cameroon yakulondekwa sana ivya kuyazwa muli ukapepa. Tulinzile ukuyasakamala!” Nupya vikwene avino twacisile.

Nayanga imiku iingi umu mpanga izyazinguluka impanga ya Cameroon mu kulanzyanya na ya eluda aakaikala ku mpanga iyo. Aina yaa yali asipe nupya acenjele yangazwile ukuzana inzila yakutumilamo impapulo pakuti aina mu Cameroon yapokelela impapulo lyonsi. Yeova wapaazile ukuombesya kwitu. Pa myaka 20, antu yakwe Yeova aikalanga uku mpanga iya yatatazile yapisyepo umwezi nanti onga ukwaula ukukwata Ulupungu Lwa Mulinzi nanti ulupapulo luno yamanga ukuti Umulimo Witu wa Wene.

Lino twatandike sile ukumanyana na Angèle, naweni ukuti wali na ucuza upalamisye na Yeova. Nalino twatwaline natwalilile ukulola imiyele  kwene ii. Pa wanda uno twatwaline wanenyile ukuti tupepe pali vino twalondanga ukuombela Yeova capamwi. Yeova waswike ipepo lilya.

Angèle wangazwa ukutaila sana muli Yeova. Wakwe umu 1973 lino yatwamile umu kuombela pa Betele, nasitosile pa mulandu wakuti natemilwe umulimo wa kutandalila ivilongano. Nomba Angèle wanjiwisyeko ukuti twapeela umi witu kuli Yeova. Fwandi tulinzile ukucita vyonsi vino iuvi lyatunena ukucita. (Ayeb. 13:17) Nazumilizye kuli vino walanzile! Fwandi twaile uku Betele. Mamane wacenjela nupya watemwa sana Yeova. Imiyele ii yalenga twauvwana ningo nu kutwazwa ukulapingulapo ningo pa vintu pa myaka yonsi ino twaombela pamwi.

Na lino itukota, mamane Angèle watwalilila ukuya ni miyele isuma nupya akantungilila. Wakwe, pakuti tuzanwe uku masukulu aingi akayako umwi uvi umu Cizungu Angèle nani twalondekwanga ukutandika ukusambilila Icizungu. Fwandi twatandike ukuya uku cilongano icaomvyanga Icizungu nanti cakuti twali ni myaka ukucila pali 70. Pa mulandu wakuti nali muli Komiti wa musambo ku France, cantalilanga ukuzana insita ya kusambilila ululimi luze. Nomba Angèle nani twazwananga. Ndakai lino tuli ni myaka ukucila pali 80 tucili tukapekanya ukulongano umu Cizungu nu mu Cifrench. Nupya tukaezya ukuombako lyonsi imilimo umu cilongano alino nu kuombela pamwi ni cilongano mu mulimo wa kusimikila. Yeova watupaala pali vino twalondanga ukumanya Cizungu.

Twapokelile amapaalo na yauze umu 2017. Angèle nani twakweti isyuko lyakuzanwa ukwi Sukulu Lyakwe Yayo Aya muli Komiti ya Musambo na ya Mama yao, ilyayelile ku Watchtower Educational Center ku Patterson, mu New York.

Ukwaula nu kutwisika Yeova a kasambilizya wa papelapela. (Eza. 30:20) Fwandi swensi kwene aikolo na ance tukasambilila amasambililo acindame. (Malan. 4:5-8) Nalola ukuti acance akauvwa kuli Yeova nu ku ina na ya nkazi amanyikisya imilimo yakalunduluka nu kuya aomvi yakwe Yeova acisinka. Mapinda 9:9 ikatwiusyako ukuti: “Vyonsi vino ungasunda uwamano, ala ivyakumulundilapo amano. Sambilizya umuntu akacita vyaololoke, nga nawe amalundapo ukumanya.”

Insita zimwi nkaelenganya ivyacitike uwanda uwa usiku mu myamba ya ku Algeria nanti cakuti ipapita imyaka 60. Uwanda uwa ntamanyile ukuti kwali ivintu ivisuma ivyali nu kucitika uku nkoleelo. Nasambilila ivingi kuli yauze! Icumi kwene Yeova watupeela umi usuma. Fwandi tukalondesya ukutwalilila ukusambilila kuli Tata witu uwa kwi yulu nu ku ina na ya nkazi amanyikisya imilimo nupya amutemwa.