1-2. Iintazi ci zino ya Nte aingi yakakwata?

MUTUMWA Paulo wakomelizye Timoti kumwi na ina Klistu yonsi ukulaombesya mu mulimo wa kusimikila. (2 Tim. 4:5) Fwandi tukalondela ukusunda kwakwe Paulo nu kulaomba apapezile amaka itu mu mulimo wakwe Leza. Nomba insita zimwi cikatala. Nomba aina itu aingi na ya nkazi yakauvwa intete ukusimikila. (2 Tim. 4:2) Elenganyini pa ina na ya nkazi aakaikala kuno yalesya umulimo witu. Yakasimikila na lino iyamanya ukuti yangaika mu cifungo.

² Antu yakwe Yeova yakakwata intazi zingi izingalenga ukuti yatoovoke. Aingi yakaomba insita ikulu pakuti sile yalondele ulupwa vino lukulondekwa. Yakalonda ukuombesya mu mulimo wa kusimikila, nomba yakatonta pa mpela ya mulungu. Yamwi yakaomba sile panono mu mulimo wakwe Yeova pa mulandu wakuti yakalwalilila nanti yakota; alino yamwi nayo yatanga yafume pa ng’anda. Yamwi nayo yakayuvwa ukuti yatacindama kuli Yeova. Ya nkazi Mary, *yatiile: “Cikalondekwa ukuombesya pakuti ncimvye amelenganyo aangalenga ntoovoke. Cikalenga nayuvwa uwa mulandu pano cikansendela insita ikulu ino ningaomvya mu mulimo wa kusimikila.

3. I vyani vino tumasambililapo umu cipande cii?

³ Asi mulandu ni ntazi zino tungakwata, Yeova angatupeela amaka akumuombela ukulingana na pano tungapezya. Lino tutatala twalanda pali vino Yeova angatwazwa, lekini tusambilile pali vino wapeezile Paulo na Timoti amaka aakuomba umulimo wa kusimikila asi mulandu ni ntazi.

4. Iintazi ci zino Paulo wakweti?

⁴ Paulo wakweti sana intazi zingi. Walondekwanga sana uwazwilizyo lino alwani yakwe yamumile, kumupoola amawe nu kumwika umu cifungo. (2 Kol. 11:23-25) Paulo atuvwanga insonyi ukulanda ukuti insita zimwi wezyanga na maka ukucimvya ivyali nu kumutoovola. (Loma 7:18, 19, 24) Nupya wazizimizyanga intazi iyali wa munga umu mwili ino walondanga ukuti Leza afumyepo.—2 Kol. 12:7, 8.

5. I vyani vino Paulo wacisile asi mulandu ni ntazi zino wakweti?

⁵ Yeova wapeezile Paulo amaka ya kutwalilila ukusimikila asi mulandu ni ntazi zino wakweti. Lolini vino Paulo waomvile. Wakwe lino wali umu cifungo uku Loma kuno yamunyepiile umu ng’anda, wasimikiile antu aingi ukwikako sile na alasi ya mu uteeko. (Mili. 28:17; Filipi 4:21, 22) Nupya wasimikiile na alinzi ya kwisano na yauze amutandalile. (Mili. 28:30, 31; Filipi 1:13) Pa nsita kwene iya, Paulo walemvile kalata iikakomelezya na Ina Klistu ndakai. Vino Paulo wacisile vyakomelizye amu cilongano ca mu Loma nupya calenzile ukuti aina aingi yakule umu utailo “yakosola ilandwe insita zyonsi kwaula intete.” (Filipi 1:14) Nanti icakuti Paulo atali nu kuomba ukulingana na vino walondanga, vino wacisile vyalenzile “mulimo wa kusalanganya ilandwe lisuma uye inkoleelo.”—Filipi 1:12.

6. Kulingana na 2 Kolinto 12:9, 10, i cani icavwile Paulo ukutwalilila ukuomba umulimo wa kusimikila?

⁶ Paulo wiwisye ukuti vyonsi vino waomvile umu mulimo wakwe Leza, a maka yakwe Leza amwavwile asi maka yakwe foo. Walanzile ukuti amaka yakwe Leza “yakaombesya lilyo lino watonta.” (Belengini 2 Kolinto 12:9, 10.) Ukuomvya umupasi wakwe uwa muzilo, Yeova wapeezile Paulo amaka ya kutwalilila ukuomba umulimo wa kusimikila asi mulandu nu kuzunyiwa, kumwika umu cifungo nanti intazi zyuze zino wakweti.

7. Iintazi ci zino Timoti wali nu kuzizimizya lino waombanga umulimo wa kusimikila?

⁷ Timoti uwacance wino yaombelanga pamwi na Paulo, nawe kwene walinzile ukutaila amaka yakwe Leza pakuti aombe umulimo wa kusimikila. Lino Timoti wasukililanga Paulo umu mulimo wa umisyonali, yapitanga  intamfu itali. Nupya Paulo wamutumanga mu kutandalila nu kukomelezya ivilongano. (1 Kol. 4:17) Timoti afwile wailolanga ukuti atafisilepo. Limwi icalenzile Paulo amunene ukuti: ‘Utaleka umuntu umwi akusuule pano wewe mwance.” (1 Tim. 4:12) Nupya pa nsita iya, Timoti wakweti intazi iyali kwati umunga umu mwili kuli kuti ukulwala. (1 Tim. 4:12) Nomba Timoti wamanyile ukuti umupasi wa muzilo uwa maka wakwe Yeova wali nu kumulenga atwalilile ukusimikila ilandwe lisuma nu kuombela aina.—2 Tim. 1:7.

8. Uzye Yeova akaazwa uli antu yakwe ndakai?

⁸ Ndakai, Yeova akapeela antu “amaka acila maka ya yantu” pakuti yatwalilile ukumuombela na ucisinka.” (2 Kol. 4:7, NWT.) Lekini tulande pa vintu 4 vino Yeova akatupeela ivikatwazwa ukutwalilila ukuya acisinka kuli aliwe, kuli kuti ipepo, Baibo, aina Klistu yanji nu mulimo wa kusimikila.

9. Uzye ipepo lingatwazwa uli?

⁹ Ipepo lyayakomelizye. Pali Efeso 6:18, Paulo watukomelizye ukulapepa lyonsi. Lyene Leza alasuka amapepo itu nu kutwazwa. Ya Jonnie aakaikala ku Bolivia yaweni vino Yeova wayavwile lino yakweti intazi izingi. Aci alino na avyazi yao yonsi yalwile sana pa nsita ili imwi. Catalile sana ya Jonnie ukulasakamala alwale yaa nu kuyapeela vyonsi vino yalondekwanga. Ya nyina yafwile, nupya palengiile pakuti aci na yaisi yapole. Lino ya Jonnie yalandanga pali vino vyayacitikilanga pa nsita iya, yatiile: “Icangavwile sana, u kupepa kuli Yeova nu kumulondolwela vino nayuvwanga. Yeova wapeezile ya Jonnie amaka yano yalondekwanga pakuti yazizimizye. Ya Ronald ya eluda aakaikala uku Bolivia, yuvwile ukuti ya nyina iyalwala kansa. Lino papisile umwezi onga yafwile. I vyani ivyayavwile ukuzizimizya? Yalanzile ukuti: “Nga nkupepa kuli Yeova namunenanga vyonsi vino nayuvwanga. Namanya ukuti wamanya ningo ukucila vino umuntu aliwensi wamanya, ukwikako sile na nemwineco. Insita zimwi tungayuvwa ukuti tutanga tuzizimizye intazi nupya tutanga tumanye vino tulinzile ukupepelapo. Nomba Yeova watunena ukuti twapepa kuli aliwe asi mulandu cingatutalila ukumulondolwela vino tukuyuvwa.—Loma 8:26, 27.

10. Kulingana na Ayebulai 4:12, u mulandu ci uno cacindamila ukubelenga Baibo nu kwelenganya pali vino tukubelenga?

¹⁰ Yakomeleziwe ni vyeo ivyaya muli Baibo. Paulo wabelenganga Malembelo pakuti akomeleke nu kuteekeziwa, naswe kwene avino tulinzile ukulacita. (Loma 15:4) Lino tukubelenga Izwi lyakwe Leza nu kwelenganyapo, Yeova angaomvya umupasi wakwe uwa muzilo ukutwazwa ukuvwikisya ningo Malembelo nu kulola vino tungayaomvya ukulingana ni vikutucitikila. (Belengini Ayebulai 4:12.) Ya Ronald yano itulandapo mpiti yatiile: “Naya nu luzango pano nezizye ukutandika ukubelenga Baibo cila wanda manguzi. Nkaelenganya pa miyele yakwe Yeova na vino wasakamalanga antu yakwe. Kucita vivyo kukangazwa sana.”

11. Uzye Baibo yavwile uli nkazi uwali sana nu ulanda?

¹¹ Nga tukwelenganya sana api Izwi lyakwe Leza, cilatwazwa kukanasakamikwa sana pa ntazi zino tukweti. Uvwini vino Baibo yavwile mukamfwilwa uwali sana nu ulanda. Eluda umwi wamunenyile ukuti angasambilila masambililo angamwazwa ndi cakuti akubelenga ibuku lyakwe Yobo. Lino watandike sile ukubelenga, wakanyile ukuzumila vino  Yobo welenganyanga. Mu melenganyo yakwe watandike ukucelula Yobo ukuti: “Yobo! Utaelenganya sana pa ntazi zyako!” Lelo wizile ailuka ukuti vino welenganyanga vyakoline sana na vino Yobo welenganyanga. Cii camwavwile ukusenuka muli vino welenganyanga nu kulola vino angakomeleka nu kuzizimizya intazi ya kufwilwa iya.

12. Uzye Yeova akatukomelezya uli ukuomvya ya kapepa yanji?

¹² Ukuya pamwi na Ina Klistu yauze kwayakomelizye. Inzila na yuze ino Yeova akatukomelezezyamo u kuya pamwi na ya kapepa yanji. Paulo walemvile ukuti walondesyanga ukuya pamwi na ina na ya nkazi pakuti yakomelezyanya. (Loma 1:11, 12) Ya Mary yano itulandapo mpiti, yatemwa ukuya pamwi na ina na ya nkazi. Yalanzile ukuti: “Yeova waomvizye aina na ya nkazi aatamanyile ni ntazi ino nakweti. Yankomelizye nu kuntumila makadi, nupya vikwene avino nalondekwanga. Calenzile nkwate isyuko lya kulandako na ya nkazi akwetiko intazi kwene ii nu kusambililako kuli vino yacisile. Nupya lyonsi ya eluda yakalenga nayuvwa ukuti nacindama umu cilongano.”

13. Tungakomelezyanya uli lino tuli pa kulongana?

¹³ Incende yonga isuma ino tungakomelezyanyizizyako, u ku kulongana. Lino mwaya umu kulongana, mungezyako ukukomelezya yauze lino mukuyanena ukuti mwayatemwa nupya mukataizya pali vino yakacita. Wakwe, lino ukulongana kutatala kwatandika, eluda wi zina lyakuti Peter wanenyile nkazi wino iya asi Nte ukuti: “Mwatukomelezya sana vino imwiza. Lyonsi mukaiza na ana inu 6 ala imuipekanya nu kwasukapo.” Nkazi uvwile ningo sana nupya walanzile ukuti: “Inkulondekwa ukuvwa amazwi ya musango uu ilelo.

14. Uzye umulimo wa kusimikila ukatwazwa uli?

¹⁴ Umulimo wa kusimikila walenzile yakomeleke. Lino tukusimikila, tukauvwa ningo, nampo nga antu yakukutika nanti foo. (Mapi. 11:25) Nkazi Stacy wasininkizye ukuti umulimo wa kusimikila ukakomelezya. Lino uwa mu lupwa wazinzilwe, wasosile sana nupya watwalilile ukwelenganya ukuti nga wacisilepo vimwi pakuti aazwe lupwa wiya. Nkazi Stacy camutalile ukuta ukwelenganya pa ntazi iya. I cani icamwavwile ukuvwako ningo lino vii vyacitike? U mulimo wa kusimikila. Lino akusimikila, welenganyanga pa antu ali umu cifulo cino wasimikilangamo aalondekwanga uwazwilizyo. Walanzile ukuti: “Pa nsita iyo, Yeova wampeezile umusambi wa Baibo uwalundulukanga zuwa. Cico cankomelizye sana. Icintu icangazwa sana mu umi wane u mulimo wa kusimikila.”

15. I vyani vino mukusambilila kuli vino ya Mary yalanzile?

¹⁵ Pa mulandu ni vikayacitikila, yamwi yangayuvwa ukuti yasiomba ukulingana na vino yalinzile ukuomba mu mulimo wa kusimikila. Ndi cakuti avino mukayuvwa, mwaiusya ukuti Yeova akauvwa ningo ndi cakuti mukuomba papezile amaka inu. Elenganyini nupya pali vino vyacitikile ya Mary. Lino yakukiile uku ncende kuno antu yavwanganga indimi zipusanepusane, yailolanga ukuti pasi vino yaombanga. Yalanzile iyati: “Pa nsita imwi nasukanga sile icasuko icangupale, kubelenga Baibo, nanti ukupeela sile umwi kapepala kilandwe lino tuli mu mulimo wa kusimikila.” Yayuvwanga ukuti yataombesyanga wakwe vino antu aalandanga ululimi lulu yaombanga, lelo izile iyasenuka muli vino yelenganyanga. Ilwike ukuti Yeova angayaomvya nanti icakuti yataamanyile ningo ululimi. Yalanzile ukuti, “Icumi icaya  muli Baibo cangupala, nupya cingasenula maumi ya antu.”

16. I cani cingazwa yayo asifuma pa mang’anda nomba yakalondesya ukusimikila?

¹⁶ Yeova akalola nupya akataizya pali vino tukalondesya ukusimikila, nanti icakuti tutanga tufume pa mang’anda. Angamupeela isyuko lya kusimikila kuli yano yakumisunga, nanti kuli ya dokota. Nga twatandika ukukolanya vino tukuomba ndakai kuli vino twaombanga uku cisila, tungatoovoka. Nomba nga twelenganya pali vino Yeova akutwazwa ndakai, tulakwata amaka yano tukalondekwa pakuti tuzizimizye intazi zili zyonsi nu kuya nu luzango.

17. Kulingana na Kasambilizya 11:6, u mulandu ci uno tulinzile ukutwalilila ukusimikila nanti icakuti kusi aakuvwa?

¹⁷ Tutamanya ndi cakuti imbezu zya cumi zino tukakomela zilamela nu kukula. (Belengini Kasambilizya 11:6.) Wakwe, nkazi Barbra ali ni myaka ukucila pali 80 akasimikila ukuomvya foni na makalata. Muli kalata imwi, wisilemo nu Lupungu Lwa Mulinzi lwakwe Maaci 1, 2014 umwali icipande icatangi “Vino Leza Wamucitila.” Atamanyile ukuti watumiile atwalane ali azingwe. Yabelenzile Magazini ii pa miku iingi. Ya iya yaweni kwati Yeova akulanda sile nayo. Atwalane yaa izile iyatandika ukulongana nu kuya ya Nte nupya, pa cisila ca myaka ukucila pali 27 ukufuma pano yazingiilwe. Ya Barbara yuvwile ningo sana nupya yatemilwe ukulola ivisuma ivyafumile muli kalata wino yalemvile!

18. I vyani vino tulinzile ukucita pakuti Leza atupeele amaka?

¹⁸ Yeova watupeela ivintu ivingi ivya kutwazwa, wakwe ipepo, Baibo, aina itu na ya nkazi nu mulimo wa kusimikila. Nga tukuomvya ivintu vii, tukalanga ukuti twataila ukuti alatwazwa nupya akalondesya ukucita vivyo kwene. Fwandi lekini twataila Tata witu uwa kwi yulu wino akapeela amaka akucimvya “kuli yayo yano imyenzo yao ikamufukilila.”—2 Mila. 16:9.