YA ALLEN yalanzile yati: “Natiinanga ukukukila kuno. * Ntamanyile ngi cakuti nali nu kukwata ivyuza nanti ngi cakuti yali nu kumpokelela.” Ya Allen yakukila ku cilongano cipya apaya makilomita 1,400 ukufuma ku mwao.

Ndi cakuti mwakukila ku cilongano cuze, mufwile namwe kwene mukauvwa intete. I vyani ivingamwazwa ukuyelela? Mungacita uli ndi cakuti mukulola ukuti ukuyelela ikutala kucila na vino mwenekelanga? Nupya ndi cakuti mutakukiilepo ku cilongano cuze, mungalenga uli aenyi atiyakukila mu cilongano cinu ciyangukile ukuyelela?

Tale elenganyini pali vii: Imiti nga yailemula ikata kukula. Lino umuti yakuufumya mu musili, imisisi iingi yakaiputula pakuti cangupale ukuulemula. Lino yaulema sile pauze zuwa zuwa ukatandika ukupanga imisisi yuze. Mu nzila iliyonga kwene ukukukila ku cilongano cuze kungalenga muvwe uyi. Mu cilongano cino mwalimo mwakweti “imisisi” alikuti mwakweti vyuza visuma nupya mwacitanga ningo muli vyakwe Leza. Nomba paa lyene mulinzile ukupanga imisisi yuze pakuti muyelele ku ncende ipya. I vyani vingamwazwa ukucita vivyo? Mwalondela ivisinte vya mu Malembelo. Lekini tulande pa Malembelo yamwi yamwi.

Umuntu akawelenga Izwi Lyakwe Leza waya wa “muti uno yalema umu mbali ya kaluzi, nu kuseeka ukaseeka apa nsita ilingane. Amafwa ya muti uo yasitala iyuma. Vyonsi vino akacita asiposiwa.”—Masa. 1:1-3.

Wakwe vivi kwene vino umuti ukalondekwa amanzi aingi pakuti waloleka ningo, avino nu Mwina Klistu alinzile ukulawelenga sana Izwi Lyakwe Leza pakuti atwalilile ukuya mukome muli ukapepa. Fwandi twalililini ukulawelenga Baibo cila wanda nu kulazanwa mu kulongana lyonsi. Mutwalilile ukulakwata mapepo ya lupwa lyonsi nu kulaisambilizya Baibo. Vyonsi vino mwalondanga ivyakumwazwa muli vyakwe Leza mu cilongano cino mwalimo, mulavizana nu mu cilongano cipya kwene.

“Akaazwa auze nawe kwene ali nu kwazwiliziwa.”—Mapi. 11:25.

Mulayelela nu kusenuka zuwa ndi cakuti mukuya lyonsi mu mulimo wa kusimikila. Ya Kevin ya eluda yalanzile yati: “Icalenzile uwane nani tuyelele zuwa ukutandika upainiya wa nsita inono. Twamanyile zuwa aina, yapainiya alino ni ncende ya kuombelamo.” Ya Roger akukiile apali makilomita 1,600 ukufuma kuno iikalanga, yalanzile yati: “Inzila yonga isuma ingalenga muyelele ku cilongano cipya cino imukukilako ukuya mu mulimo wakusimikila lyonsi. Nupya mulinzile ukumanyisya ya eluda yano mwazana, ukuti imuitemelwa ukulaomba imilimo iliyonsi ino yangamipeela, kuye ukuzifya Ing’anda ya Wene, ukulanda ma lyasi atakweti aineco nanti sile ukuipeelesya ukusendako yamwi muli motoka pa kuya mukulongana. Ndi cakuti aina na ya nkazi yalola ukuti mwaipeelesya muli vyakwe Leza yalalondesya ukuya ya cuza inu.”

“Yulini myenzo inu.”—2 Kol. 6:13.

Mwalanga sana ukutemwa uku ina. Lino ya Melissa nu lupwa lwao yakukiile uku cilongano cipya, iisile sana mano ku kupanga ivyuza ivipya. Yalanzile yati: “Lyonsi twalanzyanyanga na antu pa Ng’anda ya Wene lino tutatala twatandika ukulongana na lino twafuma. Cii calenganga tutapeelela sile mu kulamuka.” Nupya ukucita vii kwavwilizye nu lupwa ukumanya zuwa mazina ya antu. Yalanganga ukuti yatemwa  ina ndi yayama ku ng’anda ku mwao, na ci calenganga ucuza wao na ina ukukomelako. Ya Melissa yalanzile nu kuti: “twapeeline ama nambala yakwe foni na ina itu na ya nkazi pakuti twamanya zuwa ndi kuli vimwi vyakwe Leza ivyakuombela pamwi nanti ndi kuli sile vyuze ivyakucitila pamwi.”

Ndi cakuti mukuvwa intete zya kuya pamwi nantu yano mutamanya, mungatandika ukuyelezya panono panono. Mwamwentula nanti icakuti pakutandika mutakulonda. Ukumwentula kulalenga yauze yalonda kupalama kuli mwemwe. Pano “ilinso lya luse likasansamusya umwenzo.” (Mapi. 15:30) Ya Rachel aakukiile ukutali na kuno yakuliile yalanzile yati: “Nacitanga vintu kulingana na vino nazanyileko, insita zimwi naipatikizyanga sile ukulanda na ina na ya nkazi amu cilongano cino nakukiilemo. Nalondanga umuntu uwataikala mu Ng’anda ya Wene aatakweti wakuvwanga nawe aliwensi pakuti ndande nawe. Naivwanzyanga inti, umuntu wii limwi wakwata insonyi wakwe nene.” U mulandu ci uno mutanga mwimikile uyo wa kulanda nu mwenyi cila mulungu lino mutatala mwatandika ukulongana nanti lino mwafuma?

Mu nzila yuze, limwi mungatemwa sana ukumanyana na antu yano mwazana mu milungu ya kutandikilapo sile lino mwacifika. Nomba mungatandika ukuyelela panono panono. Nga caya vivyo mulinzile ukwezya na maka ukutwalilila ukupanga ivyuza ivipya.

Cikasenda insita ikulu pakuti imiti imwi ikwate misisi pa ncende ipya ino iyailemapo. Vikwene avino caya nu ku yantu, asi yonsi angayelela zuwa ku cilongano cipya cino iiyayako. Ndi cakuti ipalengela pano mwakuukila ku cilongano cuze nupya mukuyuvwa ukuti mutatala mwayelela, ivisinte vya muli Baibo ivingamwazwa aevi:

“Acino mutatonta mu kwazwana. Pano ndi musikutonta, lyene muli nu kupelwa cilambu lino nsita ilafika.”—Gala. 6:9.

Mwaleka ipapita insita pakuti muyelele kuluta vino mwenekelanga. Ya misyonali aingi akaya ku Sukulu lya Gilyadi lino yatatala yaswilila ku mwao yakaya yakwikala ku mpanga ino iyayatumako pa myaka ingi. Ukucita vivyo kukayazwa ukumanyana na ina ya ku mpanga iyo alino nu kusenuka muli vimwi kulingana ni ntambi izyayako.

Ya Alejandro akuukilapo ku vilongano ivipusanepusane yamanya ukuti ukuyelela kutangupala. Yalanzile yati: “Umuku wakusyalikizyako ukukuuka, mamane walanzile ati, ‘Ya cuza yane yonsi iyasyala mu cilongano cino twalimo.’” Ya Alejandro yiwisyeko ya mama yao ukuti vino yalanzile avino yalanzile imyaka ilili iyapitapo lino yakuukilanga ku cilongano cuze. Nomba mu myaka kwene iiya iili yatemilwe ukuya pamwi na antu yauze nupya na antu yano yatamanyile iziile yaya ya cuza yao apalamisye.

“Mutauzya muti, ‘Uzye pacani ivintu vyali ningo mu manda yampiti ukuluta ivintu vya mu manda ya ndakai?’ Iuzyo lyamusango uu lisi iuzyo lyamano, awe.”—Kasa. 7:10.

Mutaezya ukukolanya cilongano cino mwayako ku cilongano cino mwalimo. Ina ya mu cilongano cipya limwi yangaasunga sile vintu mu mwenzo nanti limwi yangaalanda sana ukucila vino amu cilongano cino mwalimo yaali. Fwandi mwalola sile pa visuma vino yakucita, wakwe vino namwe kwene mungalonda yamucitile. Aenyi yamwi yakaiza iiluka ukuti ukukuuka  iikulenga yayuzya aineco ukuti, ‘Uzye i cacumi natemwa “ataila yanji”?’—1 Pet. 2:17.

“Lengini nga mumapelwa.”—Luka 11:9.

Twalililini ukulenga Yeova mwipepo ukuti amwazwe. Ya David ya eluda yalanzile yati: “Mutalinzile ukuitaila. Yeova sile angatwazwa ukucita vintu vingi. Mwapepelapo!” Ya Rachel yano itulandapo mpiti yazumilizye lino yatiile: “ndi cakuti ya wane nani twayuvwa ukuti tukuya tukutaluka ku cilongano, tukapepa kuli Yeova lilyo kwene ituti, ‘Twapapata lekini tumanye ndi cakuti kuli cimwi icikulenga catalila aina ukuvwana naswe.’ Lyene tukaezya ukusumba insita ikulu na ina itu na ya nkazi.”

Mwe yavyazi ndi cakuti ana inu cikuyatalila kuyelela, mwapepela pamwi nayo pa mulandu uu. Mwayazwa ukupanga ivyuza ivipya lino mukutantika ukuti mwaizizya pamwi na yauze.

Mungacita uli pa kuti mwazwe aenyi atiiza mu cilongano cinu? Mwaezya ukuya ya cuza acumi pa kutandika kwene. Pakuti mucite vivyo, mwaezya ukwelenganya pa vintu vino mungatemwa yauze yamucitile ndi mwemwe mwali aenyi, nupya namwe mwayacitila vivyo kwene. (Mate. 7:12) Uzye aenyi yangiza yakwatile pamwi namwe mapepo ya lupwa nanti ukutambila JW Broadcasting pamwi? Uzye mungayanena ukuti mukaombe mwensi mu mulimo wa kusimikila? Ndi cakuti mwayama ku ng’anda kuti muliile capamwi ivya kulya, palapita insita ikulu ala yacili yakaiusya vino mwayapokelile. I vyani na vyuze vino mungacita pakuti mwazwe aenyi?

Ya Carlos yalanzile yati: “Lino twafisile sile ku cilongano cipya nkazi watupeezile umutande wa masitolo muno tungazana vintu vicipe mutengo. Na ci catwavwile wakwe cimwi.” Yayo akuti yafuma ku mpanga kuno imiceele yapusana ni ya ku mwinu yangatemwa ukumanya ivyakuzwala vino yangazwala ngi kukaya, kuli impepo nanti sile lino kuli imvula. Nupya mungayazwa nu kumanya ivya kusimikila ku yantu yano yakuzana mu mulimo ndi cakuti mwayalondolwela vino impanga inu yaya nanti sile ukuyalondololwela vino antu amu mipepele iyayamo yazumilamo.

Ya Allen atiyalumbulwa pa kutandika kwa cipande cii, yakumanya umwaka onga nu kucilapo mu cilongano cino yayamo. Yalanzile ukuti: “Pa kutandika naipatikizyanga sile ukumanya aina na ya nkazi. Nomba ndakai aina yakandola sile kwati nene lupwa wao nupya naya sana ni nsansa.” Ya Allen iiluka ukuti ukukuuka kutalenga yaponzye ivyuza vino yakweti. Lelo kwalenga yakwate ivyuza ivipya vino yalatwalilila ukuya navyo mu umi wao onsi.