Uzye Mukaelenganya Wakwe Vino Yeova Akaelenganya?
‘Pindululini amelenganyo inu pakuti miyele inu iye ipya.’—LOMA 12:2.
1, 2. Lino tukukula muli vyakwe Leza, i vyani vino tukasambilila? Langililini.
UMWANA umunono wapokelela uwila. Avyazi yakwe yamunena ukuti: “Landa uti nataizya.” Umwana uvwila, nanti cakuti akukonkelezya sile vino avyazi yakulanda. Lino akukula, angatandika ukutaizya imyelenganyizizye ya yavyazi yakwe nu luse luno antu yauze yakamulanga. Lyene angatandika ukulanga ukuti akataizya umu cumi. U mulandu ci? Pano ala ukutaizya kwaya umu melenganyo yakwe.
2 Umu nzila iliyonga kwene, lino twasambilile sile icumi, twamanyile ucindami wa kuvwila vino Yeova akalonda twacita. Nomba lino tukumanyilapo ivingi muli vyakwe Leza, tukamanya ivingi pa myelenganyizizye yakwe Yeova, vino watemwa, vino wapata, na vino akalola ivintu. Ndi twasambilila ukulola ivintu ndi vino Yeova akavilola, nu kutungululwa na melenganyo yakwe mu miyele itu na muli vino tukasoolola ukucita, tukalanga ukuti tukaelenganya wakwe vino Yeova akaelenganya.
3. U mulandu ci uno catalila ukwelenganya wakwe vino Yeova akaelenganya?
3 Nanti icakuti ukusambilila ukwelenganya wakwe Yeova kwazipa, citangupala ukucita vivyo. Insita zimwi, ukukanamalilika kwitu kungalenga twafilwa ukukolanya Yeova. Limwi cingatutalila ukuvwikisya pali vino Yeova akalola upulumusi, ukutemwisya ivyuma, umulimo wa kusimikila, ukukanaomvya ningo uwazi, nanti vyuze sile. Uzye tungacita uli? Uzye tungatwalilila ukulunduluka pakuti twaelenganya wakwe Yeova? Nupya ukucita vivyo kungatwazwa uli muli vino tukacita ndakai na vino tulaacita uku nkoleelo?
UKWELENGANYA WAKWE VINO LEZA AKAELENGANYA
4. Uzye ukusenula amelenganyo itu kwalola mwi?
4 Welengini Loma 12:2. Paa umutumwa Paulo walondolwile ivyaya umu kusambilila ukwelenganya wakwe Yeova. Icipande icafumileko catwazwilizye ukumanya ukuti pakuti tutandike ukwelenganya wakwe Yeova nu kuta ‘ukukolana na antu amu nsi,’ tulinzile kukana imyelenganyizizye ya mu nsi. Nomba Paulo walumbwile nu kuti tulinzile ‘kusenula amelenganyo itu.’ Pakuti tucite vivyo, tulinzile ukusambilila Baibo nu kwelenganyapo sana pakuti tumanye amelenganyo yakwe Leza, nupya tulinzile ukutandika ukwelenganya ndi vino akaelenganya.
5. Londololini upusano uwaya pa kusambilila nu kuwelenga sile zuwazuwa umu vyeo.
5 Ukusambilila kwaluta pa kuwelenga sile zuwazuwa ivyeo nupya kwaluta pa kusila sile amasuko ya mauzyo ya kuomvya pa kusambilila. Lino tukusambilila, tukaelenganya pali vino ivyeo vikutunena pali Yeova, pa nzila zyakwe, ni myelenganyizizye yakwe. Tukaezya ukumanya umulandu uno masunde yakwe Leza yakazumilizizya ukucita ivintu vimwi nu kukaanya vimwi. Nupya tukaelenganya sana pali vino tulinzile ukusenukamo umu umi witu nu mu myelenganyizizye itu. Nanti icakuti ivintu kwene vii tutanga tuvisambilile lyonsi lino tukusambilila Baibo, ivintu vikatuzipila ndi tukusumba insita ukwelenganya sana pali vino tukusambilila. Limwi tungasyako citika wa nsita ino itupekanya ukusambilila pakuti twelenganye sana pali vino twawelenga.—Masa. 119:97; 1 Tim. 4:15.
6. I vyani ivikacitika ndi tukwelenganya sana pali vino Yeova akaelenganya?
6 Lyonsi lino tukwelenganya pali vino Izwi Lyakwe Leza likatunena, kukaya icintu cimwi iciyiyele icikacitika. Tukaisininkizizya sweineco ukuti imyelenganyizizye yakwe Yeova pa vintu ya malilika. Tukatandika ukulola ivintu ndi vino wene akavilola, nupya tukazumila ukuti vikwene avino cilinzile ukuya. Amelenganyo itu ‘yakasenuka,’ nupya imyelenganyizizye itu ikaya ipya. Umukuya kwa nsita tukatandika ukwelenganya wakwe Yeova.
VINO TUKAELENGANYA VIKALOLEKELA MULI VINO TUKACITA
7, 8. (a) Uzye Yeova akalola uli ivyuma? (Lolini ivikope vyakutandikilako.) (b) I vyani vino tukakolezya umu umi ndi tukwelenganya wakwe vino Yeova akaelenganya?
7 Vino tukaelenganyapo vikalolekela muli vino tukayuvwa pali vimwi alino na muli vino tukacita. (Mako 7:21-23; Yako. 2:17) Cii cingatwazwa ndi twalola pali vimwi vino Baibo ikalanda. Amalyasi yi landwe yakalangilila vino Yeova akaelenganya pa vyuma. Leza wasoolwile avyazi antunze aali nu kukuzya Umwanakwe. Atwalane yayo yatakweti ivyuma sana. (Levi 12:8; Luka 2:24) Lino Yesu wavilwe, Maliya wamulalike “mu mulangu pano mutali ncende mu ng’anda ya enyi.” (Luka 2:7) Ndi cakuti Yeova walondanga, ngawalesile ukuti yazane umwakwikala umusuma pakuti amuno Umwanakwe avyalilwe. Icacindime kuli aliwe u kuleka Yesu avyalilwe umu lupwa lwakwe ya kapepa pakuti yangaamusakamala nu kumukuzya ningo.
8 Ilyasi kwene lii ilyaya muli Baibo ilikalanda pa kuvyalwa kwakwe Yesu, likatwazwa ukumanya vino Yeova akalola ivyuma. Avyazi yamwi yakalondesya ukuti ana yao yakakwate ivyuma, nupya yasisumba na mano kuli ukapepa wa yana yao. Ukwaula nu kutwisika, Yeova akalola ukuti ukapepa wacindama sana ukuluta ivyuma. Uzye namwe mukaelenganya wakwe Yeova? Uzye vino mukacita vikalanga ukuti i vyani vino mwacindikisya?—Welengini Ayebulai 13:5.
9, 10. Uzye tungalanga uli ukuti tukakolanya Yeova ukulozya uku vintu ivingasosya yauze?
9 Cuze cino tungalandapo i milolele yakwe Yeova pa kusosya yauze. Yesu walanzile ukuti: “Muntu umwi ndi alalenga wenga uwa mu yana anono uwantaila ukwifya, cazipila umuntu wiyo kumunyepelela iwe lya kusiila likulu mu nsingo nu kumusumbila muli yemba.” (Mako 9:42) Amazwi yaa yakalanga vino Yesu akauvwa api lyasi lii! Vino Yesu walanganga imiyele ino Isi wakwata muli vino wacitanga, tutanga tutwisike ukuti vikwene avino na Yeova akauvwa pa muntu aliwensi aakacita ivingasosya wenga pa yalondezi yakwe Yesu.—Yoa. 14:9.
10 Uzye naswe tukalola ivintu wakwe vino Yeova na Yesu yakavilola? Uzye tukaelenganya ndi vino yakaelenganya? Uzye vino tukacita vikasokolola cani? Elenganyini ukuti twatemwa imizwalile imwi nanti ukuiyemvya umu nzila imwi iingalenga yamwi yasoke umu cilongano nanti iingalenga yamwi yaelenganya pa kucita upulumusi, uzye ukutemwa aina itu na ya nkazi kulalenga ukuti tutaluke uku vintu vino vikatuzanzya?—1 Tim. 2:9, 10.
11, 12. Uzye tukaicingilila uli uku vicitwa viipe ndi tukulola iviipe wakwe vino Leza akavilola nu kuikaanya?
11 Cakwe citatu: Yeova wapata ulufyengo. (Eza. 61:8) Nanti icakuti wamanya ukuti insita zimwi tukaelenganya pa viipe pa mulandu nu kukanamalilika kuno twapyana, akatukomelezya ukuti naswe tulinzile ukupata iviipe. (Welengini Masamu 97:10.) Ukwelenganya pa mulandu uno Yeova wapatila uyi kungatwazwa ukulola ivintu wakwe vino wene akavilola, nupya tungaya sana na maka akukaana ukucita iviipe.
12 Ukulola uyi wakwe vino Yeova akaulola kungatwazwa ukumanya ivicitwa vimwi iviipe nanti cakuti vitalumbulwa muli Baibo. Imicinile imwi itaazipa ino tungalandapo, u kucina watuwikala pa maulu yakwe umwi. Icimusango cii caticiseeka sana umu nsi. Yamwi yangalola kwati ivicitwa vya musango uu vyaya sile ningo, ala yakwelenganya ukuti vitaakolana nu kucita upulumusi. * Nomba uzye ivicitwa vya musango uu vikalanga imyelenganyizizye yakwe Leza uwapata iviipe vya misango yonsi? Lekini twataluka uku kucita ivintu viipe lino tukuikaanya nu kupata sana vino Yeova wapata.—Loma 12:9.
UKWELENGANYIZIZYA CALIMWI VINO TULAPINGULAPO UKU NKOLEELO
13. U mulandu ci uno tulinzile ukwelenganyizizya calimwi pali vino Yeova akalola ivintu pakuti tukapingulepo ningo ndi vimwi vyacitika uku nkoleelo?
13 Lino tukusambilila Baibo, tulinzile ukwelenganya pali vino Yeova akaelenganya pali vimwi ivingatucitikila uku nkoleelo. Ndi tukucita vii, cingatwazwa lino kwacitika vimwi ivingalondekwa ukuti tupingulepo papokwene sile. Ivintu ivikacitika vitalatwiukizya icakuti itufilwa ni vya kucita. (Mapi. 22:3) Lekini tusambilile kuli yamwi yano vii vyacitikiile.
14. I cani cino tukasambilila kuli vino Yosefu wakanyile muka Potifa?
14 Yosefu walangiliile ukuti welenganyizizye calimwi pali vino Yeova akalola ukuya na ucisinka umu cupo lino wakanyile papokwene sile ukucita upulumusi na muka Potifa. (Welengini Utandiko 39:8, 9.) Nupya vino waswike muka Potifa ati: “Uzye lyene ningacita uli cintu caipa ndi ci nu kwifya kuli Leza wane?” vikalangilila ukuti welenganyanga ndi vino Yeova akaelenganya. Nga swemo? Tungacita uli ndi cakuti wino tukaomba nawe watandika ukulanga icintemwa? Nanti tuti umwi watutumila meseji nanti icikope ca upulumusi pali foni tungacita uli? * Tungamanya zuwa ivya kucita ndi cakuti twelenganyizizyapo calimwi nu kwelenganya wakwe vino Yeova akaelenganya pa vintu vya musango uwo alino nu kupaangila calimwi umu mwenzo vino tungacita.
15. Uzye tungacita uli pakuti tukane matunko nu kutwalilila ukuya acisinka kuli Yeova wakwe vino Ayebulai yatatu yacisile?
15 Lyene lekini tulande pa yalumendo yatatu Ayebulai yano yamanga amazina yakuti Syadilaki, Mesyaki, na Abedinego. Vino yakaanyile paswe ukupepa iciluwi cakwe goldi cino Umwene Nebukadineza wapanzile nu kumwasuka ukwaula intete, vyalangilile ukuti yelenganyizizye calimwi pali vino vyali nu kuyazwa ukutwalilila ukuya acumi kuli Yeova. (Kufu. 20:4, 5; Dan. 3:4-6, 12, 16-18) Elenganyini ukuti uwamulemba incito wamunena ukuti musangule impiya zya kuzevezya uwanda umwi uwa mwikalwe uukauvwana ni mipepele ya ufi. Uzye mungacita uli? Ukuluta ukuloleela mpaka ivya musango uu vikacitike, uzye citanga cizipe ukwelenganyizizyapo calimwi ndakai kwene pakuti mwaelenganya ndi vino Yeova akaelenganya? Lyene ndi vya musango uwo vyacitika, citalamutalila ukumanya ivya kucita nu kulanda ivya mpomvu, wakwe vino Ayebulai yaya yatatu yacisile.
Uzye mwalondelezya, ukulemba icipepala ca mwisunde, nu kulanda na dokota winu? (Lolini palagalafu 16)
16. Uzye ukumanya vino Yeova akaelenganya kungatwazwa uli ukuipekanyizizya calimwi mu vya ku cipatala?
16 Ukwelenganyizizya calimwi pali vino tungacita pakuti tutwalilile ukuya acisinka nako kungatwazwa lino kwacitika vimwi ukwaula ukwenekela nupya calondekwa ukuti tuye uku cipatala. Nanti icakuti tukakana ukwikwamo uwazi nanti ivintu 4 ivya wazi, imiombele imwi iyakuomvya uwazi, ingalondekwa kuti tuipingwilepo sweineco ukuomvya ivisinte vya muli Baibo ivikalanga imyelenganyizizye yakwe Yeova. (Mili. 15:28, 29) Insita isuma iyakwelenganya pa vintu vivyo asi lino yatuteeka umu cipatala, lino tukuuvwa sana ukuwaya nupya itutitikiziwa icakuti tungalondekwa ukupingulapo zuwazuwa. Cingazipa ukulondelezya likwene, ukulemba mafomu ya mwi sunde nu kulangilila vino tungatemwa dokota acite alino nu kulanzyanya nawe. *
17-19. U mulandu ci uno cacindamila ukumanya vino Yeova akaelenganya pa vintu likwene? Langililini pali vino tungaipekanya kuli vino vingatucitikila.
17 Icakusyalikizya, elenganyini pali vino Yesu waswike Petulo zuwazuwa lino Petulo walanzile ukuti: “Mwene cipelele kutali. Utakaleke cii cikuponele.” Yesu afwile welenganyizizyepo calimwi pa kulonda kwakwe Leza kuli aliwe alino na pa Malembelo alandanga pa umi wakwe ni imfwa yakwe pano nsi. Ukumanya vii kwalenzile ukuti utailo wakwe ukome nu kuipeelesya ukwaula ukuzingota.—Welengini Mateo 16:21-23.
18 Ndakai Leza akalonda antu yakwe yapalame sana kuli aliwe nu kuombesya umu mulimo wakwe. (Mate. 6:33; 28:19, 20; Yako. 4:8) Wakwe vino cali kuli Yesu, antu atutemwa yangezya ukutukaanya ukucita vivyo. Nga ndi cakuti uwamulemba incito wamunena ukuti amamupeela umulimo wa papela nu kutandika ukumufolesya impiya izingi nomba umulimo uwo ungalenga mute ukuombesya muli vyakwe Leza, mungacita uli? Nanti ndi cakuti mucili pa Sukulu, elenganyini ukuti yamupeela isyuko lya kuya uku mpanga yuze pakuti mukasambilile na vyuze. Uzye insita ino yamunena vivyo ali ino mungatandikilapo ukulondelezya ivya kucita, ukuzya ulupwa lwinu na ya eluda, alino lyene mupingulepo? Uzye citanga cizipe ukumanyila calimwi vino Yeova akaelenganya pa vintu vivyo likwene nu kwezya ukwelenganya ndi vino wene akaelenganya? Lyene ndi cakuti ivya musango uwo vyamucitikila, mulamanya ivya kucita, nupya icilasyalako sile u kupingula ukulingana na vino mwapaangila calimwi umu mwenzo.
19 Kuli na vyuze vino mungelenganyapo ivingacitika zuwazuwa ukwaula ukwenekela. Ukuya kwene tutanga tuipekanyizizye kuli vyonsi ivingatucitikila. Nomba ndi cakuti tukwelenganya pa myelenganyizizye yakwe Yeova lino tukuisambilizya Baibo, tulaiusya nu kuomvya vino twasambilila mpiti lino vimwi vyatucitikila. Lekini fwandi lyonsi twamanya vino Yeova akaelenganya pali vimwi, nu kwelenganya ndi vino wene akaelenganya, alino nu kulola vino ivintu vingatuzipila ndakai nu ku nkoleelo.
VINO MELENGANYO YAKWE YEOVA YANGAMWAZWA UKU NKOLEELO
20, 21. (a) U mulandu ci uno tulakwatila untungwa umu nsi ipya? (b) Uzye tungacita uli pakuti tuye ni nsansa ndakai?
20 Tukalondesya insi ipya. Sweingi tukalondesya ukwikala umi wa pe umu paladaise pano nsi. Lino Uwene Wakwe Leza ulaateeka, antunze yalakululwa uku vintu ivikalenga yaya nu ulanda ivyaya umu nsi ii. Ukuya kwene na pa nsita kwene iiya antu yalatwalilila ukuomvya kampingu pa kupingula pa vintu. Cila muntu alaisoolwela ukulingana na vino watemwa nanti vino akalondesya ukucita.
21 Ukuya kwene untungwa uwo ulakwata umwa kupeleela. Ukulozya uku kupingula pa visuma ni viipe, afuuke yalaatungululwa na masunde yakwe Yeova ni myelenganyizizye yakwe. Cii naco cilazipa sana, nupya cilalenga antu yaye sana nu luzango alino nu mutende. (Masa. 37:11) Na ndakai kwene tungaya nu luzango lino tukwelenganya wakwe vino Yeova akaelenganya.
^ par. 12 Ukucinila pa maulu yakwe umwi kwalondololwa ukuti “u kucina ala umwi atazwite ningo nupya ala akucina kwati akucita upulumusi.” Ukulingana ni vyacitiike, cii cingalenga umwi yamupangile komiti ya upinguzi. Umwina Klistu uwacitapo ivya musango uu alinzile ukunena ya eluda ukuti yamwazwe.—Yako. 5:14, 15.
^ par. 14 Ukutuma mameseji ya upulumusi, ivikope, nanti mavidyo uku yantu yauze pa foni, yakakwama ukuti u kutuma ivya upulumusi. Ukulingana na vino umwi watumile, cingalenga ya eluda yamupangile komiti ya upinguzi. Insita zimwi, ana anono aakatumilana ivya upulumusi, uteeko ukayapeela umulandu wa upulumusi. Pakuti mumanyilepo na vyuze, mukayule pa jw.org nu kuwelenga icipande cakuti “Acance Yakauzya—I Vyani Vino Ndinzile Ukumanya pa Kutumilana Ivya Upulumsi? (Lolini apakuti BIBLE TEACHINGS > TEENAGERS.) Nanti mulole icipande cakuti “Ivya Kulanda nu Mwana Winu Umunono pa Kutumilana Ivya Upulumusi” muli Zyukini! wa Cizungu wakwe Novemba 2013, amafwa 4-5.
^ par. 16 Ivyeo ivingamwazwa vyalembwa umu mpapulo zitu. Lolini ibuku lyakuti Vino Tungikala mu Kutemwa Kwakwe Leza, amafwa 246-249.
