YESU walanzile ukuti: “Mukupeela mwaya upolelelo ukulu cuze kuluta mukupokelela!” (Mili. 20:35) Icumi kwene cii cikalozya kuli ucuza witu na Yeova. U mulandu ci? Pano watupeela mawila aingi sana aakatulenga ukuya ni nsansa, nomba tungaya sana ni nsansa ndi twapeela Yeova uwila umwi. U wila ci uno tungapeela kuli Yeova? Pa Mapinda 3:9 pakati: ‘Uwacindika Yeova umu kumupeela ivintu ivisuma sana vino wakwata.’ Pa ‘vintu ivisuma sana vino twakwata’ paya insita itu, vintu vino tukaomba ningo sana, amaka itu, ni vyuma vino twakwata. Ndi tukuomvya ivintu vii umu kutungilila ukupepa kwa cumi, ala tukupeela Yeova uwila, nupya ukucita vivyo kukatuletela sana insansa.

I cani icingatwazwa ukuti twasumba sana mano uku kupeela Yeova uwila witu ukulozya uku vyuma vino twakwata? Umutumwa Paulo wanenyile aina Kolinto ukuti: “Cila wenga uwa munomuli alinzile apaatule impiya zimwi” izya kusangwilako. (1 Kol. 16:2) Uzye mungacita uli ndi mukulonda ukumanya ivingi pa nzila zya kusangwilamo zino mungaomvya kuno mwikala? Lolini akambokosi apisika.

Mutanga musangwileko pa intaneti umu mpanga zyonsi. Lelo, mungazana ivyeo pa nzila zyuze izyakusangwilako pa intaneti apakalanda pa vya misangulo. Umu mpanga zimwi, paya masuko ku mauzyo yano antu yakauzya sana pa misangulo.